Kpep N̄kpọ To Ikọ Abasi

Ini Ewe ke Jesus Akakabade Edidem?

Ibuotikọ emi ọbọrọ mme mbụme emi ẹkemede ndidi emesibụp onyụn̄ owụt n̄ko ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Ewe Obio Ubọn̄ ke ẹken̄wọn̄ọ ndinọ Jesus?

Abasi ama ọn̄wọn̄ọ ete ke andito ufọk Edidem David eyetie ke ebekpo onyụn̄ edi edidem ke nsinsi. Owo ufọk David oro edi Jesus, ndien enye ke akara idahaemi ke heaven nte Edidem Obio Ubọn̄ Abasi.—Kot Psalm 89:4; Luke 1:32, 33.

Ke ini David okosụk edide eyenọwọn̄, Abasi ama emek enye edidem ndikara idụt Israel emi ẹkedide ikọt esie. Ke ini David akakpade, Solomon emi Jehovah ekemekde ama etie ke “ebekpo Jehovah.” (1 Chronicle 28:4, 5; 29:23) Ke Solomon ama akakpa, ediwak ndidem ẹma ẹkara ke Jerusalem, edi ediwak mmọ ikanamke n̄kpọ Abasi. Ke akpatre, Jehovah ama ayak mbonekọn̄ Babylon ẹsobo Jerusalem ẹnyụn̄ ẹdorode edidem oro akakarade. Emi eketịbe ke isua 607 M.E.N. Ọtọn̄ọde ke isua oro, idụhe edidem ndomokiet ke ubon David emi akafiakde etie ke ebekpo Jehovah ke Jerusalem.—Kot Ezekiel 21:27.

2. Isua ifan̄ ẹdibe mbemiso edidem emi otode ubon David ke Jerusalem afiak ọtọn̄ọ ndikara?

Esisịt ini ke ẹma ẹkesobo Jerusalem, Jehovah ama ọdọhọ prọfet Daniel ete ke imọ iyemek Edidem emi editiede ke heaven ikara. Ini ewe ke enye editọn̄ọ ndikara?—Kot Daniel 7:13, 14.

Daniel ama asiak ndap emi Abasi okowụkde ete ẹsịbe akamba eto kiet ẹduọk, kpa nte Abasi okowụkde ete ẹsobo obio ubọn̄ emi okodude ke Jerusalem. Edi ẹma ẹdọhọ ẹyak etak eto oro ada man enye akpafiak esehe ke “ini itiaba” ẹma ẹkebe. Bible ọdọhọ ke “ini” ita ye ubak ẹdi usen 1,260, ntre “ini itiaba” ẹdidi usen 2,520. (Ediyarade 12:6, 14) Ke ntịn̄nnịm ikọ Bible, usen esiwak ndida mban̄a isua. (Numbers 14:34) Ntem, isua 2,520 ẹkenyene ndibe mbemiso owo emi otode ubon David afiak etie ke ebekpo Jehovah akara.—Kot Daniel 4:10-17.

  3. Ini Ewe ke Jesus Akakabade Edidem?

Abasi akanam Jesus Edidem ke heaven ke 1914, ke isua 2,520 ẹma ẹkebe tọn̄ọ ẹkesobo Jerusalem. Akpa n̄kpọ emi Jesus akanamde nte Edidem ekedi ndisio Satan ye mme demon esie mfep ke heaven. (Ediyarade 12:7-10) Mme owo mi ke isọn̄ ikekwe n̄kpọntịbe emi, edi imokụt ekese afanikọn̄ emi n̄kpọntịbe emi adade ọsọk ubonowo. (Ediyarade 12:12) Se itịbede ke ekondo toto ke 1914 owụt ke Jesus ama akabade Edidem ke isua oro.—Kot Matthew 24:14; Luke 21: 10, 11, 31.

4. Nso ke ukara Jesus edinam inọ fi?

Mme ntịn̄nnịm ikọ emi ẹban̄ade ukara Jesus ndisu ẹwụt ke afo emekeme ndiberi edem ke Ikọ Abasi. Ke mîbịghike, Jesus ayada odudu esie nte Edidem anam mme owo ẹbọhọ kpukpru ufen emi mmọ ẹbọde.—Kot Psalm 72:8, 12, 13; Daniel 2:44.

Edieke oyomde ndifiọk n̄kpọ efen mban̄a emi, mbọk se page 215-218 ke n̄wed Nso ke Bible Enen̄ede Ekpep?, emi Mme Ntiense Jehovah ẹsiode.

NSO KE BIBLE Enen̄ede EKPEP?

[Chart ke page 16, 17]

(Ama oyom ndikụt nte enye enen̄erede etie, se n̄wed)

October October

607 M.E.N. 1914 E.N.

← 2,520 years →

1000 B.C.E. 1 M.E.N. 1 E.N. 1000 E.N. 2000 E.N.

← Isua 606.25 →← Isua 1,913.75 →

Ẹsobo obio ubọn̄ Da masịn̄ unamibat fo bat: Abasi emek Jesus

oro okodude 606.25 Edidem onyụn̄ ọnọ enye

ke Jerusalem + 1,913.75 odudu ndikara mme idụt

= 2,520