‘Ukpọn̄ Fo Iditreke Ndinụhọ Mfụk Mi’
San̄a Kpere Abasi
‘Ukpọn̄ Fo Iditreke Ndinụhọ Mfụk Mi’
NSỤHỌDEIDEM edi ata ediye edu. Nnyịn imesima ndisan̄a n̄kpere mbon oro ẹsụhọrede idem. Edi mbon oro ẹnen̄erede ẹsụhọde idem iwakke ke ererimbot emi—akpan akpan mbon oro ẹnyenede odudu m̀mê ẹkarade mbon en̄wen. Nso kaban̄a Jehovah Abasi, emi akam enyenede odudu akan ke ofụri ekondo? Ndi enye esisụhọde idem? Ẹyak idụn̄ọde mme ikọ Jeremiah oro ẹdude ke N̄wed Eseme 3:20, 21.—Kot.
Jeremiah ekewet N̄wed Eseme ke ini Israel ẹkedude ke ata idiọk idaha. Ibịghike enye okokụt n̄kpọ emi akanamde enye enen̄ede ofụhọ—mbon Babylon ẹma ẹsobo Jerusalem edima obio esie. Prọfet emi ama ọfiọk ke Jehovah akamia nditọ Israel ufen emi ke ntak nsọn̄ibuot mmọ. Edi, ndi Jeremiah ama ọduọk idotenyịn ofụri ofụri? Ndi enye ama ekere ke Jehovah oyom usụn̄ akaha tutu ikemeke ndikụt ikọt esie oro ẹkabarede esịt inyụn̄ inyan̄a mmọ isio ke ukụt mmọ? Kop nte Jeremiah etịn̄de ikọ ke ibuot nditọ Israel.
Kpa ye oro Jeremiah ofụhọde, enye osụk enyenyene idotenyịn. Enye ọdọhọ Jehovah ete: “Ukpọn̄ * fo [Jehovah] iditreke nditi nnyụn̄ nnụhọ mfụk mi.” (Ufan̄ikọ 20) Jeremiah inyeneke eyịghe ndomokiet. Enye ọdiọn̄ọ ke Jehovah idifreke imọ, idinyụn̄ ifreke ikọt Esie oro ẹkabarede esịt. Edi nso ke ata ọkpọsọn̄ Abasi edinam?—Ediyarade 15:3.
Jeremiah ọfiọk ke Jehovah iditreke ‘ndinụhọ’ n̄n̄wam mbon emi ẹnen̄erede ẹkabade esịt. Ikọ oro otụk owo etieti. Kere nte Jehovah, kpa “Ata Edikon̄ ke ofụri isọn̄,” onụhọde emenede ikọt esie osio ke idiọk idaha mmọ, onyụn̄ afiak ada mmọ nte ikọt esiemmọ. (Psalm 83:18) Emi ọnọ Jeremiah idotenyịn onyụn̄ ọdọn̄ enye esịt. Ntre, Jeremiah ebiere ndinyene ime mbet ini emi Jehovah edinyan̄ade ikọt Esie emi ẹkabarede esịt.—Ufan̄ikọ 21.
Se Jeremiah ekewetde emi ekpep nnyịn n̄kpọ iba aban̄a Jehovah. Akpa, enye ekpep nnyịn nte ke Jehovah osụhọde idem. (Psalm 18:35) Okposụkedi Jehovah “okponde ke odudu,” enye enyịme ndisụhọde idem n̄n̄wam nnyịn ke ini idem ememde nnyịn. (Job 37:23; Psalm 113:5-7) Ndi emi inemke fi? Ọyọhọ iba, Jehovah esitua owo mbọm. Enye ‘eben̄e idem ndifen’ nnọ mme anamidiọk oro ẹkabarede esịt nnyụn̄ mfiak nda mmọ nte ikọt esiemmọ. (Psalm 86:5) Edu mbiba emi—nsụhọdeidem ye mbọm—ẹsan̄a n̄wed kiet.
Esịt enen̄ede enem nnyịn nte ke Jehovah itiehe nte mme andikara ererimbot emi, emi ntan̄idem esinamde mmọ ẹsọn̄ ibuot, inyụn̄ iyomke-yom ndifiọk se itịbede inọ mbon en̄wen. Ndi idọn̄ke fi ndikpep ekese mban̄a Abasi emi osụhọrede idem ntem enyịme ‘ndinụhọ’ mmenede ikọt esie nsio ke nnanenyịn nnyụn̄ nnọ mmọ idotenyịn?
Itie Bible emi okpokotde ke June:
[Ikọ Idakisọn̄]
^ ikp. 5 Mme scribe ẹkekpụhọde ufan̄ikọ emi ẹkabade ẹwet “ukpọn̄ mi,” man etie nte Jeremiah eketịn̄ aban̄a idemesie. Eketie mmọ nte ke edi ata usọn̄enyịn ndikot Jehovah ukpọn̄ sia Bible onyụn̄ okot mme owo ye mme unam ukpọn̄. Edi Bible esiwak ndida n̄kpọ emi owo ọdiọn̄ọde ntịn̄ mban̄a Abasi man ọsọp an̄wan̄a nnyịn. Mmọdo, sia “ukpọn̄” onyụn̄ ọwọrọde “uwem,” ntre, “ukpọn̄ fo” ke itien̄wed emi ada ọnọ Abasi.
[Se ẹwetde ke ikpọ abisi ke page 14]
Jehovah enyịme ndisụhọde idem n̄n̄wam nnyịn ke ini idem ememde nnyịn
