Ọyọhọ Otu 131 Ẹkụre Ukpep ke Gilead

“Nam Jehovah Okop Inemesịt”

MBONUBON, mme ufan, ye mbon eken ẹma ẹsop idem ke September 10, 2011, man ẹdụk edinam ukụre ukpep ọyọhọ otu 131 ke Ufọkn̄wed Enyọn̄-Ukpeme Ukpep Bible Eke Gilead. Idem akada kpukpru owo urua urua nte edinam emi oyomde nditọn̄ọ. Ke ini edinam emi okụrede, iso kpukpru owo 9,063 oro ẹkedude do ẹketie imam imam ke ntak ndinem utịn̄ikọ oro ẹkenọde, mme nnamn̄wụt, ye mme ndụn̄ọde oro ẹkenamde.

Stephen Lett emi edide owo Otu Ukara Mme Ntiense Jehovah, emi okonyụn̄ edide etieibuot okpokoro edinam oro, ọkọnọ akpa utịn̄ikọ. Enye ama eneme mme itie N̄wed Abasi emi ẹnamde etie nte ke Jehovah Abasi enyene ata idem, onyụn̄ eneme mme ufan̄ikọ oro ẹwụtde nte enye esidade ndamban̄a enyịn, utọn̄, ye ubọk esie anam n̄kpọ.

Akpa kan̄a, Brọda Lett ama eneme 2 Chronicle 16:9, emi ọdọhọde ke “enyịn Jehovah [asan̄a] akanade ofụri isọn̄ man enye owụt odudu esie ke ufọn mbon oro ẹnamde n̄kpọ ẹnọ enye ke ofụri esịt.” Ẹma ẹsịn udọn̄ ẹnọ nditọ ufọkn̄wed ẹte ẹka iso ẹnam n̄kpọ Jehovah ke ofụri esịt. Ẹma ẹdọhọ mmọ ẹte ẹkpebe Abasi ke ndikụt nti n̄kpọ emi mme owo ẹnamde. Ekem Brọda Lett ama eneme 1 Peter 3:12, emi ọdọhọde ete ke Jehovah esikop n̄kpeubọk ndinen owo. Enye ama ọdọhọ nditọ ufọkn̄wed oro ẹsineme nneme ye Jehovah, ẹti nte ke Jehovah enen̄ede oyom ndikop akam mmọ.

Brọda Lett ama eneme n̄ko Isaiah 41:13, emi Jehovah ọn̄wọn̄ọde ete: “Ami Jehovah Abasi fo mmụm fi ubọk nnasia, Enye emi ọdọhọde fi ete, ‘Kûfehe ndịk. Ami nyan̄wam fi.’” Brọda Lett ama etịn̄ ke ofụri esịt nte itien̄wed emi etiede enye ke idem ete: “Nte se Jehovah etịn̄de mi itụkke fi? Se nte Enye anyande ubọk ndimụm fi.” Ekem Brọda Lett ama ọdọhọ nditọ ufọkn̄wed oro ete ẹsiyak Jehovah an̄wam mmọ, ẹkûnyụn̄ ẹnam n̄kpọ emi edinamde Jehovah asana mmọ ayak, m̀mê etre ndin̄wam mmọ. Enye ama ọdọhọ ke nditọ ufọkn̄wed emi ẹkpenyene ndimụm mbon en̄wen ubọk n̄ko ukem nte Jehovah, oro edi, ndisịn ofụri ukeme n̄n̄wam mme owo.

Ke akpatre, Brọda Lett ama okot Isaiah 40:11. Ekem enye ọdọhọ mmọ ẹkere ẹban̄a nte itie N̄wed Abasi oro owụtde nte Jehovah enen̄erede ama nnyịn. Brọda Lett ama ọdọhọ ete: “Jehovah emen nnyịn akama ke ubọk. Enye akama nnyịn ke ikpanesịt esie.” Nnyịn ikpanam n̄kpọ didie ndien? Enye ama esịn udọn̄ ọnọ nditọ ufọkn̄wed oro ete ẹka iso ẹsụhọde idem nte nditọerọn̄ man Jehovah aka iso akama mmọ ke ikpanesịt esie.

“Nnyịn Ikama N̄kpọuto Emi ke Esombat”

David Splane emi edide owo Otu Ukara ekeneme ibuotikọ emi. (2 Corinth 4:7) Nso idi n̄kpọuto emi? Ndi edi ifiọk m̀mê ọniọn̄? Brọda Splane ọkọdọhọ ke idịghe! N̄kpọuto emi apostle Paul eketịn̄de aban̄a edi ‘utom ediyarade akpanikọ emi.’” (2 Corinth 4:1, 2, 5) Brọda Splane ama eti nditọ ufọkn̄wed ete ke ọfiọn̄ ition oro mmọ ẹkebiatde ẹkpep n̄kpọ ekedi man etịm mmọ idem ndinam akpan utom emi. Utom emi edi ata n̄kpọuto.

Brọda Splane ọkọdọhọ ke nnyịn idi “esombat” emi. Enye ama owụt nte esombat okpụhọrede ye eso o-gold. Owo isiwakke ndida eso o-gold nnam n̄kpọ, edi ẹsikam ẹwak ndida esombat nnam. Edieke idọn̄de n̄kpọuto ke eso o-gold, idida n̄kpọuto oro idọn̄de do ye eso o-gold oro ukem ukem. Brọda Splane ama adian do ete: “Inaha mbufo nditọ ufọkn̄wed ẹnọ idem mbufo ubọn̄. Mbufo  mme isụn̄utom ẹnyene ndinọ Jehovah ubọn̄ sia mbufo ẹdide mme esombat.”

Brọda Splane ọkọdọhọ ke eyo Bible, ke ikan̄ ikesikemeke ndita ndusụk esombat, ke ndusụk ẹma ẹsisọn̄ idem tutu ikemeke ndisọp ntaha mben. Nso ke enye akada emi ekpep? Emi ọwọrọ nte ke nsonso oro mmọ ẹtọn̄ọde utom isụn̄utom mmọ, ke mmọ ẹyesọn̄ idem etieti, idọn̄ke utọn̄ ke kpukpru se mme owo ẹtịn̄de ndikụt ndudue nnọ mmọ, idinyụn̄ isọpke ndiyat esịt. Brọda Splane ama ọdọhọ ete: “Mbufo ẹyekụt ke ẹmesọn̄ idem ẹkan nte ẹkekerede.” Jehovah ayak utom emi ọnọ mme esombat, iyakke inọ mme angel. Brọda Splane akada ikọ esie ekeberi ntem: “Emi owụt ke Jehovah enyene mbuọtidem ke idem mbufo.”

‘Ẹmetiene Mme Owo Ẹfehe, Ndi Ẹyekeme Ndifehe ye Enan̄-Mbakara?’

Samuel Herd emi edide owo Otu Ukara ama obụp nditọ ufọkn̄wed emi ete: “Mbufo ẹkeme ndifehe oyom usụn̄ adan̄a didie ẹnyụn̄ ẹkeme ndifehe nsọp adan̄a didie?” Ntak emi enye okobụpde mmọ mbụme emi? Enye okoyom ndiwụt ke nditọ ufọkn̄wed emi ẹnyụn̄ ẹtie nte prọfet Jeremiah. Anam-akpanikọ asan̄autom Abasi emi ama osobo mme idomo emi mîkememke utom ndiyọ, ndien mme idomo en̄wen emi ẹkam ẹkponde ẹkan oro ke ẹkesụk ẹdedi ke usụn̄. Ntre Jehovah ama obụp enye ete: “Koro afo emetiene mbon emi ẹsan̄ade ke ukot efehe, ndien mmọ ẹyenam fi akpa mba, didie, ndien, ke afo ekeme ndifehe itọk ye mme enan̄-mbakara?”—Jeremiah 12:5.

Brọda Herd ama emen ikọ emi etịn̄ ye nditọ ufọkn̄wed emi onyụn̄ ọdọhọ ete: “Afo emekeme ndikere ke ifehe itọk ye mme enan̄-mbakara ke ntak kpukpru udomo emi mbufo ẹketiede ke ufọkn̄wed emi. Edi mbufo ifeheke ye enan̄-mbakara, ẹkam ẹtiene mbon emi ẹsan̄ade ke ukot ẹfehe. Ke mme efakutom mbufo, mbufo ẹdifehe itọk ye enan̄-mbakara sia mbufo ẹyesobo mme idomo oro ẹkponde ẹkan se mbufo ẹkerede. Mbufo ẹdinam n̄kpọ didie? Se mbufo ẹkpepde ke ufọkn̄wed emi etịm mbufo idem ndifehe itọk ye enan̄-mbakara, ikpaha mba.” Enye ama esịn udọn̄ ọnọ nditọ ufọkn̄wed emi ete ẹka iso ẹkpep Ikọ Abasi ẹnyụn̄ ẹbọn̄ akam.

Brọda Herd ama ọdọhọ ke idem eyemem ndusụk nditọ ufọkn̄wed emi ẹnọde ẹkekwọrọ ikọ mi mîdịghe ke owo idikpan̄ke utọn̄ inọ mmọ. Mbon eken ẹyedọn̄ọ, mîdịghe ẹkere ke mmimọ ikemeke ndinam se ikpanamde. Enye ama ọdọhọ ke Abasi ayanam mmọ ẹkeme ndikan idomo ekededi, ikpaha mba. Brọda Herd ọkọdọhọ nditọ ufọkn̄wed oro ete: “Edide ẹtiene mbon emi ẹsan̄ade ke ukot ẹfehe m̀mê ẹfehe ye enan̄-mbakara, ẹti ẹte ke Abasi ayanam mbufo ẹfehe ẹsịm utịt. Ntre ke mbufo ẹdikụt unen ke utom mbufo ndien emi ọyọnọ Jehovah ubọn̄ ye itoro.”

Mme N̄kpọ En̄wen Oro Ẹkenemede ke Edinam Oro

“Kûben̄e Ibat Ibat Kpọt.” John Ekrann, emi edide owo Kọmiti N̄kọk Itieutom United States ekeneme mbụk Bible emi aban̄ade prọfet Elisha ye ebeakpa emi ẹkeyomde nditan̄ nditọ esie nnyam nte ifịn. (2 Ndidem 4:1-7) Ebeakpa oro ekenyene ekpri ekpeme aran kiet kpọt. Elisha ama ọdọhọ enye aka ekeben̄e mme mbọhọidụn̄ esie aban̄, onyụn̄ adian do ete: “Kûben̄e ibat ibat kpọt.” Jehovah ama ada Elisha anam aran ọyọhọ kpukpru aban̄ oro mma oro akakade ọkọbọ. Ekem mma oro ama aka akanyam aran oro osio isọn emi enye akakamade onyụn̄ enyene ekpri okụk ndida nse mban̄a ubon esie tutu edịm afiak edep.

Nso ke ẹkeda mbụk emi ẹkpep nditọ ufọkn̄wed oro? Ke ini mma oro akakade ndiben̄e mme mbọhọidụn̄ esie aban̄, ekeme ndidi enye ikasatke-sat. Brọda Ekrann ọkọdọhọ ete: “Ekeme ndidi enye ọkọbọ aban̄ ekededi emi mîdidụtke, akpan akpan ikpọ aban̄.” Brọda Ekrann ama esịn udọn̄ ọnọ nditọ ufọkn̄wed emi ndinam se ededi emi ẹdọn̄de mmọ, edide ekpri m̀mê akamba. Enye ọkọdọhọ mmọ ete: “Ẹkûsasat utom.” Enye ama eti mmọ ke Abasi ọkọdiọn̄ ebeakpa oro etiene nte enye akanamde  uyo prọfet Elisha. Nso ke ikpep ito emi? Abasi edidiọn̄ nnyịn etiene adan̄a mbuọtidem ye ifịk emi inyenede. Brọda Ekrann ekeberi ikọ esie ntem: “Ẹnam n̄kpọ Abasi ke ofụri esịt.”

‘Mmọ Ẹtie Nte Udia Ẹnọ Nnyịn.’ William Samuelson emi edide Esenyịn Itieutom Emi Esede Aban̄a Mme Ufọkn̄wed Ukara Abasi ekeneme ibuotikọ emi ẹdade ẹto Numbers 14:9 mi. Enye ama etịn̄ aban̄a eti uwụtn̄kpọ emi Joshua ye Caleb ẹkenịmde. Enye ọkọdọhọ ke kpa nte udia esisọn̄ọde owo idem, ke mmọ ndikakan mbon Canaan ama ọsọn̄ọ mmọ idem. Nso ke emi ekekpep nditọ ufọkn̄wed emi? Brọda Samuelson ọkọdọhọ ete: “Nte mbufo ẹdikade utom mbufo, ẹda mme idomo emi ẹdisobode nte udia emi edisọn̄ọde mbufo idem.”

“Ndi Mmọ Ẹyesọn̄ọ Ẹda ke Ini Idomo?” Sam Roberson, emi edide kiet ke otu mme andikpep ke ufọkn̄wed emi ama eneme se Paul eketịn̄de ete ke ndusụk owo ẹma “ẹyak mbuọtidem mmọ owụre nte nsụn̄ikan̄.” (1 Timothy 1:19) Enye ama ọdọhọ nditọ ufọkn̄wed emi ẹn̄wam mbon en̄wen ẹtiene ẹnyene mbuọtidem ke Jehovah Abasi. Enye ama adian do ete: “Mbufo ẹtie nte odomutịm.” Didie? Odomutịm esifọp n̄kpri ukwak amia kiet adian ye eken ada anam n̄kpọkọbi emi ẹkemede ndida n̄kọbi ubom. Kpasụk ntre, mbufo ẹmekeme ndin̄wam mbon emi mbufo ẹkpepde Bible ẹnyene mme edu emi ẹdinamde mmọ ẹnyene edinyan̄a.

Brọda Roberson ọkọdọhọ ke edu itiaita oro ẹsiakde ke 2 Peter 1:5-8 ẹbiet n̄kpri ukwak oro, ye nte ke edieke mme isụn̄utom emi ẹn̄wamde mbon emi mmọ ẹkpepde Bible ẹkụt nte Jehovah enyenede mme edu emi, ke imekere ke mmọ idikpọn̄ke Jehovah. Mmọ ẹyekan idomo ekededi.

Mme Ifiọkutom ye Mme Ndụn̄ọde

Michael Burnett, emi edide kiet ke otu mme andikpep ke ufọkn̄wed emi ama ọdọhọ nditọ ufọkn̄wed ẹbụk ẹnyụn̄ ẹnanam ndusụk ifiọkutom emi mmọ ẹkenyenede ke utom ukwọrọikọ mmọ, ẹwụt. Otuowo ẹma ẹkop inemesịt ndikop nte nditọ ufọkn̄wed emi ẹkekemede ndikwọrọ ikọ ke akamba ufọkurua, an̄wambehe ubomofụm, ke ufọk ke ufọk, idem ẹkwọrọde ẹnọ mbon ẹkeduede ẹkot mmọ ke urụk ukopikọ.

Ekem Michael Hansen emi odude ke Bethel United States ama anam ndụn̄ọde ye isụn̄utom ita emi ẹma ẹkenam utom ke ediwak isua—Stephen McDowell ke Panama, Mark Noumair ke Kenya, ye William Yasovsky ke Paraguay. Ibuotikọ emi ẹkedade ẹnam ndụn̄ọde emi ekedi, “Ndidat Esịt Ndinam Uduak Jehovah,” ndien kpukpru se mmọ ẹketịn̄de ẹkewụt ke mmọ ẹdat esịt ndinam emi. (Psalm 40:8) Ke uwụtn̄kpọ, Mark Noumair, ama etịn̄ mme akpan n̄kpọ emi ẹkenen̄erede ẹdat imọ ye n̄wan imọ esịt ke utom mmimọ. Enye ọkọdọhọ ke ufan oro ikanamde ye nditọete ke obio oro enen̄ede enem mmimọ esịt. N̄kpọ efen emi ekenemde mmọ esịt ekedi ndikụt nte nditọete ẹnamde se ẹkpepde mmọ, ẹnamde ukpụhọde ke uwem, ndinyụn̄ n̄kụt nte Jehovah ọdiọn̄de mmọ. Enye ama ọdọhọ nditọ ufọkn̄wed oro ke mmọ n̄ko ẹyekop inemesịt ke utom mmọ.

Ke kiet ke otu nditọ ufọkn̄wed emi ama okokot inem inem leta ekọm, Brọda Lett ama eberi edinam emi ke ndidọhọ nditọ ufọkn̄wed emi ẹnam n̄kpọ ye eti ibuot. Enye ọkọdọhọ ke edieke mmọ ẹnamde emi, ke mmọ ‘ẹyenam Jehovah okop inemesịt.’ Mme isụn̄utom emi iditreke-tre ndinam Jehovah okop inemesịt edieke mmọ ẹkade iso ẹnam utom mmọ ke ofụri esịt.—Isaiah 65:19.

 [Chart/N̄wed ndise obio ke page 31]

IDAHA NDITỌ UFỌKN̄WED

Ibat idụt oro ẹtode 10

Isua emana ke ẹbaharede ukem ukem 34.7

Isua ifan̄ tọn̄ọ ẹkena baptism ke ẹbaharede ukem ukem 19.0

Isua oro ẹdude ke utom uyọhọ ini ke ẹbaharede ukem ukem 13.5

[N̄wed ndise obio]

(Ama oyom ndikụt nte enye enen̄erede etie, se n̄wed)

Idụt oro ẹnọde mmọ ẹka

IDỤT ORO ẸNỌDE MMỌ ẸKA

BENIN

BRAZIL

BULGARIA

BURUNDI

CAMEROON

CANADA

CENTRAL AFRICAN REPUBLIC

GERMANY

GHANA

HONG KONG

INDONESIA

KENYA

LIBERIA

LITHUANIA

MALAYSIA

MOZAMBIQUE

NEPAL

PANAMA

PARAGUAY

SIERRA LEONE

SLOVAKIA

SOUTH AFRICA

UNITED STATES OF AMERICA

VENEZUELA

[Ndise ke page 30]

Nditọ ufọkn̄wed ẹwụt nte ikọkwọrọde ikọ

[Ndise ke page 31]

Ọyọhọ Otu 131 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible Eke Gilead

Ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Lesch, C.; Lesch, N.; Shakarjian, P.; Shakarjian, T.; Budden, R.; Budden, K.; Nash, T.; Nash, L.

(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.

(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S.; Thenard, E.; Thenard, A.

(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.

(5) Hartman, E.; Hartman, T.; Goolia, W.; Goolia, K.; Thomas, J.; Thomas, E.; Okazaki, N.; Okazaki, M.

(6) Mills, C.; Mills, A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.

(7) Hansen, B.; Hansen, M.; Fahie, A.; Fahie, M.; Dalgaard, J.; Dalgaard, J.; Andersson, M.; Andersson, R.