Abraham Owo Nsụhọdeidem

Eyo ofiop etieti, Abraham etie ke tent esie, ke okop inem mfụt. Edi ete imenede enyịn, sese owo ita ẹsan̄ade ko ẹdi. * Abraham ọsọsọp efehe okosobo ye mmọ onyụn̄ ọdọhọ mmọ ẹdiduọk odudu man iyom esisịt uyo isọk mmọ ẹta, edi adaha akanam akwa udia emi esịnede edisan̄ uyo, bọta, mmọn̄eba, ye eti unam ọnọ mmọ. Abraham ada udia emi ọsọk isenowo emi. Se enye anamde emi owụt ke enye enen̄ede ama ndikama isenowo, onyụn̄ enen̄ede osụhọde idem nte idikụtde.—Genesis 18:1-8.

NSO IDI NSỤHỌDEIDEM? Owo emi osụhọrede idem isitan̄ke idem, edi esifiọk ke enyene se owo en̄wen adade ọfọn akan imọ. (Philippi 2:3) Enye esikpan̄ utọn̄ okop ekikere mbon en̄wen, onyụn̄ ama ndisan̄a utom nnọ mmọ, idem ekpededi edi utom emi ẹkpedọn̄de eyenọwọn̄.

DIDIE KE ABRAHAM OKOWỤT KE IMOSỤHỌDE IDEM? Ekenenem enye ndisan̄a utom nnọ mbon en̄wen. Nte iketịn̄de ke ntọn̄ọ, ke ini enye akadade okụt isenowo ita oro, enye ama ọsọsọp anam n̄kpọ man ese aban̄a mmọ. Sarah an̄wan esie ama ọsọsọp anam udia. Ndi ọmọfiọk owo emi akakam anamde n̄kpọ akan? Itien̄wed oro ọdọhọ ke Abraham ama ọsọsọp efehe okosobo ye isenowo oro, ọdọhọ iyom n̄kpọ inọ mmọ ẹdia. Kpa enye Abraham ekefehe aka ọtọ ufene esie okosio unam ọnọ ẹda ẹnam udia, ndien kpa enye akada udia oro ọsọk isenowo emi. Utu ke nditetie nte ọbọn̄ ndọhọ mme asan̄autom esie ẹnam kpukpru n̄kpọ, Abraham ama osụhọde idem emen n̄kpọ emi eyenọwọn̄ akpanamde anam. Enye ikekereke ke imokpon ibe ndisan̄a utom nnọ mbon en̄wen.

Abraham ama akpan̄ utọn̄ okop ekikere mbon emi ẹdude ke idak esie. Bible itịn̄ke ekese iban̄a nneme Abraham ye Sarah. Edi Bible  etịn̄ ikaba ete ke Abraham ama akpan̄ utọn̄ okop ekikere Sarah onyụn̄ anam se enye ọkọdọhọde okposụkedi emi kiet ke otu emi ‘akayatde enye esịt etieti’ ke akpa. (Genesis 16:2; 21:8-14) Edi ke ini Jehovah ọkọdọhọde ke Sarah enen, Abraham ama osụhọde idem anam se n̄wan esie ọkọdọhọde.

NSO KE EMI EKPEP NNYỊN? Edieke idide ata mbon nsụhọdeidem, edinenem nnyịn ndisan̄a utom nnọ mbon en̄wen. Idisiyoyom se ikpanamde man uwem enen̄ede enem mme owo.

Nte inamde n̄kpọ iban̄a ekikere mbon en̄wen ekpenyene ndiwụt n̄ko ke imosụhọde idem. Utu ke ndidọhọ ke se owo etịn̄de ifọnke sia mîdịghe nnyịn itịn̄, akpana isisụhọde idem idara ekikere mbon en̄wen. (Mme N̄ke 15:22) Utọ in̄wan̄-in̄wan̄ edu emi esinen̄ede an̄wam mbon oro ẹkamade itie. John emi edide eteutom emi enen̄erede ọdiọn̄ọ utom ọdọhọ ete: “Mmokụt ke eti eteutom esikam ananam mbon oro ẹnamde utom ke idak esie ẹnyene ifụre nditịn̄ ekikere mmọ.” Enye ọdọhọ n̄ko ete: “Owo emi enen̄erede osụhọde idem kpọt edidiọn̄ọ ke mbon oro ẹdude imọ ke idak ẹkeme ndidiọn̄ọ ndusụk n̄kpọ n̄kan imọ. Edi ke nditịm ntịn̄, idụhe eke ọdiọn̄ọde kpukpru n̄kpọ idem ekpededi owo edi eteutom.”

Abasi ọyọdiọn̄ nnyịn edieke isikpan̄de utọn̄ ikop ekikere mbon en̄wen, inyụn̄ ima ndisan̄a utom nnọ mmọ nte Abraham akanamde. Bible ọdọhọ ke “Abasi ọbọbiọn̄ọ mbon ntan̄idem, edi enye ọnọ mbon nsụhọdeidem mfọnido eke owo mîdotke.”—1 Peter 5:5.

[Ikọ Idakisọn̄]