Ndi Abasi Enyene Esop?

KPUKPRU se Abasi obotde owụt ke enye esinam n̄kpọ ke ndutịm. Idịghe mme n̄kpọ-obot oro ẹkụtde ke enyịn kpọt ẹwụt ke Abasi esinam n̄kpọ ke ndutịm. Bible owụt ke mme angel n̄ko ke heaven ẹnam n̄kpọ Abasi ẹtiene ndutịm. Prọfet Daniel ama okụt ke n̄kukụt nte udịm udịm mme angel ẹdade ke ebekpo Abasi ke heaven. Daniel ọkọdọhọ ete: “Tọsịn ke itie tọsịn ẹnam n̄kpọ ẹnọ enye, tọsịn duop ke itie tọsịn duop ẹnyụn̄ ẹda enye ke iso.” (Daniel 7:9, 10) Kere utọ ndutịm emi anade ẹnam man adan̄a ediwak angel emi—emi edide ebe miliọn ikie—ẹkeme ndinam se Abasi ọdọhọde mmọ ẹnam ẹnọ mme asan̄autom esie mi ke isọn̄!—Psalm 91:11.

Kpa ye emi Jehovah Abasi, kpa Andibot nnyịn, edide Akakan Anam-ndutịm, enye itiehe eto eto m̀mê ukara ukara. Utu ke oro, enye akam edi Abasi inemesịt emi ekerede aban̄a mfọnọn̄kpọ mme edibotn̄kpọ esie. (1 Timothy 1:11; 1 Peter 5:7) Imekeme ndikụt emi ke nte enye akanamde n̄kpọ ye idụt Israel eset ye akpa mme Christian.

Jehovah Ama Etịm Onyụn̄ Ada Idụt Israel Eset Usụn̄

Moses ke Jehovah Abasi ọkọdọhọ etịm nditọ Israel man ẹkeme ndituak ibuot nnọ imọ. Kere ban̄a nte ẹketịmde itienna nditọ Israel ke ini mmọ ẹkedude ke wilderness Sinai. Ndutịme okpokokpon etieti edieke ẹkpekeyakde ubon kiet kiet ẹwụk tent mmọ ke ebiet ekededi oro mmọ ẹmade. Jehovah ama etịn̄ ebiet emi esien kiet kiet ẹkpewụkde tent mmọ. (Numbers 2:1-34) Ibet Moses ama etịn̄ nnennen nnennen nte ẹkpesanade idem. Ke uwụtn̄kpọ, ibet ama eteme ebiet emi ẹkpeken̄de idem.—Deuteronomy 23:12, 13.

Ẹma ẹnen̄ede ẹtịm Idụt Israel ke nsio nsio usụn̄ ke ini mmọ ẹkesịmde Isọn̄ Un̄wọn̄ọ. Ẹkebahade mmọ ẹsịn ke esien 12, ẹnyụn̄ ẹnọ esien kiet kiet isọn̄. Ibet emi Jehovah ọkọnọde Moses ama otụk kpukpru ikpehe uwem, utọ nte utuakibuot, ndọ, ukpepn̄wed, mbubehe, udia, utọ in̄wan̄, ubọk ufene ye mme n̄kpọ eken. * Kpa ye emi ndusụk ibet emi ẹketịn̄de nnennen nnennen se ẹkpenamde, enye ama anam nditọ Israel ẹkop inemesịt onyụn̄ owụt ke Jehovah ekere aban̄a ikọt esie. Jehovah ama ọnọ mmọ san̄asan̄a ntịn̄enyịn ke ini mmọ ẹketienede ima ima ndutịm esie emi.—Psalm 147:19, 20.

Kpa ye emi Moses ekedide eti adausụn̄, ama oyom enye etiene ndutịm Jehovah man enye ekpekeme ndikụt unen ke utom esie. Ke uwụtn̄kpọ, Moses akanam didie ọdiọn̄ọ ebiet emi enye ekpemende nditọ Israel asan̄a ke wilderness? Jehovah akada adaha obubịt enyọn̄ ke uwemeyo ye adaha ikan̄ ke okoneyo ada mmọ usụn̄. (Exodus 13:21, 22) Kpa ye emi Jehovah akadade  owo ọnọ ndausụn̄, enye ke idemesie eketịm onyụn̄ ada ikọt esie usụn̄. Se enye okonyụn̄ anamde ye akpa mme Christian edi oro.

Ẹma Ẹnen̄ede Ẹtịm Akpa Mme Christian

Mme apostle ye mme mbet Christ eken ẹma ẹsịn ifịk ẹkwọrọ ikọ tutu ẹsiak mme esop Christian ke nsio nsio ebiet ke Asia ye ke Europe. Kpa ye oro mme esop emi ẹkedude ke nsio nsio ebiet, mmọ ẹma ẹdiana kiet. Ẹma ẹnen̄ede ẹtịm mme esop emi, ndien mme apostle ẹkeda usụn̄. Ke uwụtn̄kpọ, apostle Paul ama ọnọ Titus aka Crete man ‘eketịm mme n̄kpọ.’ (Titus 1:5, The Jerusalem Bible) Ndien Paul ọkọdọhọ nditọete ke esop Corinth ete ke ndusụk nditọete ẹnyene “ukeme ndinọ ndausụn̄.” (1 Corinth 12:28) Edi anie ekenen̄ede anam kpukpru ndutịm emi? Paul ọdọhọ ke Abasi akanam.—1 Corinth 12:24.

Nditọete oro ẹkemekde ẹte ẹse enyịn ke esop ikakarake-kara nditọete mmọ ke esop. Utu ke oro, mmọ ẹkedi nsan̄autom emi ẹtienede ndausụn̄ spirit Abasi, ndien akana mmọ ẹdi “uwụtn̄kpọ ẹnọ otuerọn̄.” (2 Corinth 1:24; 1 Peter 5:2, 3) Jesus Christ emi Abasi akanamde eset ke n̄kpa edi “ibuot ọnọ esop,” idịghe anana-mfọnmma owo ndomokiet.—Ephesus 5:23.

Ke ini esop ke Corinth ẹketọn̄ọde ndinam n̄kpọ ke usụn̄ emi enen̄erede okpụhọde ye se mme esop eken ẹkenamde, Paul ama obụp mmọ ete: “Nte ikọ Abasi okoto mbufo ọwọrọ, mîdịghe ndi mbufo ikpọn̄ ke enye ekesịm?” (1 Corinth 14:36) Paul okobụp mbụme emi ndinam mmọ ẹkere n̄kpọ ẹnyụn̄ ẹkụt ke ifọnke ndidian̄ade nda. Mme esop ẹma ẹnen̄ede ẹkọri ke ini mmọ ẹketienede ndausụn̄ mme apostle.—Utom 16:4, 5.

Abasi Ndinyene Esop Owụt Ima Esie

Nso kaban̄a idahaemi? Ndusụk owo imaha ndidụk ido ukpono ndomokiet. Bible owụt ke Abasi esisụk ada esop esie anam uduak esie. Enye akanam nditọ Israel eset ye akpa mme Christian ẹtuak ibuot ẹnọ imọ nte esop.

Ndi iwụtke ifiọk ndinịm ke Jehovah Abasi osụk anam ntre ye ikọt esie mfịn, oro edi, ọnọ mmọ ndausụn̄ nte esop? Abasi nditịm ikọt esie ndọn̄ ke esop kiet owụt ke enye ama mmọ. Jehovah ada esop esie emi anam uduak esie mfịn. Nso ke owo akpada ọdiọn̄ọ esop emi? Se se ẹkemede ndida ndiọn̄ọ enye mi:

▪ Ẹtịm ata mme Christian ndinam akpan utom. (Matthew 24:14; 1 Timothy 2:3, 4) Jesus okowụk mme anditiene enye ete ẹkwọrọ eti mbụk Obio Ubọn̄ ẹnọ kpukpru idụt, ndien owo ikpekemeke ndinam utom emi ke ofụri ererimbot edieke ekpedide enyene esie anam. Ke uwụtn̄kpọ, isọn̄ke ndida ikpọn̄ nnọ owo kiet udia, edi edieke ẹdọhọde ọnọ owo tọsịn, m̀mê miliọn udia, oyoyom okụt ete ke mmọ ẹnen̄ede ẹdiana kiet ẹnyụn̄ ẹnam n̄kpọ esịt kiet. Ntre n̄ko ke edi ye ata mme Christian; ndidiana kiet ‘nnam n̄kpọ Abasi ke esịt kiet’ anam mmọ ẹkeme ndinam utom oro ẹdọn̄de mmọ. (Zephaniah 3:9) Ndi ekere ke mme owo oro ẹtode nsio nsio idụt, emi ẹnyụn̄ ẹsemde nsio nsio usem ẹkeme ndidiana kiet nnam utom ke mîkpedịghe emi mmọ ẹdude ke esop kiet? Imọdiọn̄ọ ke ọmọfiọk ibọrọ.

▪ Ẹtịm ata mme Christian man ẹnọ kiet eken ibetedem ẹnyụn̄ ẹsịn udọn̄ ẹnọ kiet eken. Ke ndusụk ebiet, mme owo ẹsika mbre ke obot. Owo ekeme ndibiere ke idemesie ndika mbre emi ikpọn̄, isan̄ake ye owo ndomokiet. Edi edieke n̄kpọ anamde enye, idụhe eke edinyan̄ade enye. Ntre iwụtkke ifiọk ndidian̄ade ntie ke idem. (Mme N̄ke 18:1) Mme Christian ẹnyene ndin̄wam kiet eken man ẹkeme ndinam utom emi Jesus ọkọdọn̄de mmọ. (Matthew 28:19, 20) Ke esop Christian ke ẹsikpep  Bible, ẹkpep nte ẹkpedude uwem, ẹnyụn̄ ẹnọ nsịnudọn̄ emi ekemede ndin̄wam owo aka iso anam n̄kpọ Abasi. M̀mọ̀n̄ ndien ke owo akpaka ọkọbọ item Jehovah onyụn̄ okpono enye ekpedi Abasi ikenyeneke esop emi enye adade ọnọ mme owo ndausụn̄?—Mme Hebrew 10:24, 25.

▪ Ẹtịm ata mme Christian man mmọ ẹdiana kiet ẹkpono Abasi. Se inamde mme erọn̄ Jesus ẹdi otu kiet edi sia mmọ ẹkop uyo Adausụn̄ mmọ. (John 10:16) Ubahade idụhe ke otu mmọ, udunyụn̄ ukwe mmọ ke nsio nsio ufọkabasi emi ẹyọhọde mfịn ke ererimbot. Kpukpru mmọ “ẹnyene ikọ inua kiet.” (1 Corinth 1:10) Omokụt do ke oyom ndutịm m̀mê esop, mbemiso mme owo ẹkemede ndidiana kiet. N̄kukụre mbon emi Abasi ekemede ndidiọn̄ edi mbon emi ẹdianade kiet.—Psalm 133:1, 3.

Ata ima Abasi ye ima akpanikọ emi odude ke Bible anam ata ediwak owo ẹdụk esop emi ẹnamde mme n̄kpọ emi isiakde ke enyọn̄ emi ye mme n̄kpọ en̄wen oro Bible etemede. Mme Ntiense Jehovah ke ẹdiana kiet ke ofụri ererimbot ẹnam uduak Abasi. Mmọ ẹnịm ke Abasi odu ye mmimọ nte enye ọn̄wọn̄ọde mi ete: “Nyodụn̄ ke otu mmọ nnyụn̄ nsan̄a ke otu mmọ, ndien nyedi Abasi mmọ, mmọ ẹyenyụn̄ ẹdi ikọt mi.” (2 Corinth 6:16) Afo emekeme nditiene mbọ utịbe utịbe edidiọn̄ Jehovah Abasi emi edieke etienede esop esie okpono enye.

[Ikọ Idakisọn̄]

[Ndise ke page 13]

Ẹma ẹnen̄ede ẹtịm nditọ Israel ke nde ke nde ke wilderness

[Mme Ndise ke page 14, 15]

Owo ikpekemeke ndikwọrọ ikọ ke ofụri ererimbot ekpedi ndutịm m̀mê esop ikodụhe

Ndikwọrọ ikọ ke ufọk ke ufọk

Ndin̄wam mbon unọmọ

Mme Mbono

Ndibọp mme itie utuakibuot