N̄koyom Ndidi Ata Osio Mfiak-N̄kabade

Nte Zoya Dimitrova obụkde

Ke ini n̄kedide isua 15, mma ndedi se n̄koyomde—nsisan̄a ye nta mbon mbre nnyịn n̄ka nsio nsio ebiet n̄kosio mfiak-n̄kabade. Edi akwa n̄kpọ mmọn̄eyet ama etịbe ọnọ mi ke September 4, 1970. Ke ini n̄kosụk nsiode mfiak n̄kabade, mma nto enyọn̄ ndiduọ n̄kpoho ke isọn̄.

N̄KAMANA ke December 16, 1952, ndien ami ye ete ye eka mi ye adiahaeka mi ikodụn̄ ke Sofia ke Bulgaria. Ini oro ekedi ini ukara Communist, ndien kpa ye emi ukara mîkakpanke mme owo ndinyene ido ukpono, mmọ ikamaha ido ukpono. Ata ediwak owo ikenịmke ke Abasi do, ndien idem mbon emi ẹkenịmde ke enye do ikesiyakke mme owo ẹfiọk. Okposụkedi emi ubon nnyịn ẹkedọhọde ke idi mbon Orthodox, owo ikekpepke mi n̄kpọ ndomokiet iban̄a Abasi, n̄konyụn̄ n̄kereke ke Abasi do.

N̄kọtọn̄ọ ke ekpri mma kpukpru mbre mbuba, edi enye emi n̄kamade n̄kan ekedi usio mfiak-n̄kabade. Ete kiet ama edi ufọkn̄wed nnyịn ke ini n̄kedide isua 13 ediyom owo emi enye ekpekpepde usio mfiak-n̄kabade. Owo emi ekesikpepde nnyịn nte ẹsiode mfiak-n̄kabade ama ọdọhọ enye emen mi. Esịt ama enem mi etieti ndisidụk ubomisọn̄ mbakara n̄ka mme itie mme itie man nta mbre emi ẹkenam ndụn̄ọde ye ami ẹnyụn̄ ẹtem mi udomo. Mma n̄kop inemesịt ke ini n̄kebede udomo emi. N̄katak ke ọkpọsọn̄ ukpep nnyụn̄ nsasat se ndiade ke se ibede isua iba man n̄keme ndibre mbre emi. Mma n̄kụre ukpep emi ke ini n̄kedide isua 15 nnyụn̄ ntọn̄ọ ndisio mfiak-n̄kabade. Ke ntọn̄ọ ntọn̄ọ, mma nsan̄a n̄kanade ofụri Bulgaria nnyụn̄ n̄ka mme idụt emi ẹkesịnede ke idak ukara Soviet Union, nsịm Algeria, Hungary, ye akani Yugoslavia.

Ke ofụri isua ita, mma nsio mfiak-n̄kabade, kpa mbre emi n̄kenen̄erede mma. Ekem, ke ini n̄kosụk nsiode mfiak-n̄kabade ke Titov Veles ke Macedonia, akwa n̄kpọ mmọn̄eyet oro n̄ketịn̄de mban̄a ke enyọn̄ emi ama etịbe. N̄kodoro ke ebiet emi enen̄erede okon̄ nsio mfiak-n̄kabade. Ekesidi ima iyom ndisio mfiak-n̄kabade, owo emi ndade mbre mbre emi eyetehede ibuot ke isọn̄ omụm mi otop ke enyọn̄ ndien ami nyụt ke ofụm ekem enye okpobi mi. Edi isan̄ kiet, ubọk ama efebede enye, urụk oro nsimụmde onyụn̄ ekịbe, ntre mma ndiduọ n̄kpoho ke isọn̄. Ẹma ẹmen mi ẹfehe ẹka ufọkibọk ẹkekụt ke mmobụn̄ ubọk, ye ọkpọn̄kan̄, ye ọkpọ asakedem. Mma nsụhọ ke usen ifan̄ oro ẹketienede. Ndien ke mma n̄keset, mma ndikụt ke ọtọn̄ọde ke isịn mi sụhọde ama akpa. Kpa ye emi, n̄kekere ke idem mi ọyọsọn̄, ndien ke edieke ẹtịmde ẹsọbọ mi idem, ke nyekeme ndifiak nsan̄a nnyụn̄ ntọn̄ọ ntak nsio mfiak-n̄kabade.

 Mma nsan̄a nsio nsio ufọkibọk ke isua iba ye ubak nsụk n̄kere ke idem mi ọyọsọn̄. Ke akpatre, mma ndikụt ke ndikemeke aba ndisan̄a m̀mê ndisio mfiak-n̄kabade tutu amama, ke nditak ke n̄kpọitie mbon n̄kpọnnam.

Nditọn̄ọ Obufa Uwem

N̄kekere ke ndikemeke ndidu uwem utie itie kiet sia ekesidide n̄ka mi n̄ka ko. Mma mfụhọ etieti sia idotenyịn mi ama akakpa mfụhọ. Ekem ke 1977, akparawa kiet emi ekerede Stoyan ama edi ufọk mi. Mma ndọhọ enye odụk edi ke mma n̄kọdiọn̄ọ ke enye edi eyeneka akani owo mbre nnyịn. Nte isụk inemede nneme, enye ama obụp mi m̀mê mmekere ke idem ọyọtọn̄ọ ntak ọsọn̄ mi. Sia uwem ama okodorode mi, mma ndọhọ enye ke n̄kereke ke utọ n̄kpọ oro eyetịbe. Ke ini enye ọkọdọhọde ke Abasi ikpọn̄ ekeme ndin̄wam mi, mma mbọrọ enye iyatesịt iyatesịt nte, “Edieke edide Abasi do, ntak emi enye ayakde utọ n̄kpọ emi esịm mi?”

Ikebịghike Stoyan emi okonyụn̄ edide owo mbre nnyịn akakabade edi kiet ke otu Mme Ntiense Jehovah. Enye ekekpep Bible ke ini enye okosụk ebrede mbre emi ke United States. Enye ama ada Bible owụt mi nti n̄kpọ oro Abasi ọn̄wọn̄ọde ndinam ke ini iso. Mma n̄kop inemesịt ndifiọk nte ke ofụri isọn̄ ọmọn̄ akabade edi paradise ke mîbịghike. Un̄wọn̄ọ oro nte ke ‘n̄kpa ididụhe aba, mfụhọ m̀mê ntuan̄a m̀mê ubiak idinyụn̄ idụhe aba’ ama odụk mi ọkpọ. (Ediyarade 21:4) Ama enen̄ede ọdọn̄ mi nditọn̄ọ ntak nsan̄a! Mma nsọsọp nnyịme nte ẹsidi ẹdikpep mi Bible. Nte n̄kasan̄ade ntọn̄ọ obufa uwem edi emi. Ke akpatre, mma ndikụt ntak ndinyene ata idotenyịn!

N̄kesitetie mbet ẹdikpep mi Bible. Stoyan ekebem iso ekpep mi Bible, ekem Totka edikpep. Eyenete an̄wan emi ama ọfọn ido etieti onyụn̄ anam mi nsọsọp nnyene ifiọk Bible ndien ekem mma nyak idem mi nnọ Jehovah Abasi. Ini oro, owo ndomokiet ikodụhe ke Sofia ndinịm mi baptism, ntre n̄kenyene ndibet tutu eyenete kiet oto Macedonia edi edinịm mi baptism. Ke n̄kpọ nte isua kiet ama ekebe tọn̄ọ n̄kọtọn̄ọ ndikpep Bible, ẹma ẹnịm mi baptism ke akwa uyeremmọn̄ ufọk mi ke September 11, 1978. Ndina baptism nnyụn̄ n̄kabade ndi kiet ke otu Mme Ntiense Jehovah ama anam nnen̄ede n̄kop inemesịt, onyụn̄ anam uwem mi enen̄ede enyene se ọwọrọde.

Se n̄kekpepde eketie nte owo abara mi ikan̄ ke esịt. Mma nneme se n̄kekpepde ye kpukpru owo oro ẹkewahade ufọk mi. Edi idụhe owo emi akadade se ntịn̄de ke akpan n̄kpọ. Etie nte ndusụk mmọ ẹkekere ke unọmọ oro n̄kenyenede anam ibuot ebe mi.

 Akwa Idiọkn̄kpọ

Ẹma ẹkpan utom Mme Ntiense Jehovah ke Bulgaria ini oro, ndien nnyịn ikawakke ke idụt emi. Mme Ntiense Jehovah ikesinịmke mme mbono esop mmọ, ntre n̄kenyeneke ifet ndidu ye mbon oro ẹnịmde se nnịmde ke akpanikọ. N̄konyụn̄ mfiọkke ke ọdiọk ndidian idem ye mbon oro mîdaha mme edumbet Bible idu uwem. Kpukpru emi ẹma ẹnam ndue nnam akwa idiọkn̄kpọ.

Esịt ama enen̄ede afịna mi, mma nnyụn̄ nnen̄ede n̄kop ubiak emi mbon emi ẹdian̄arede ẹkpọn̄ Jehovah Abasi ẹsikopde. Bụt ama anam mi, edi mma mbọn̄ akam nnọ Jehovah ntịn̄ ofụri ofụri nte etiede mi ke idem nnyụn̄ mben̄e enye nte efen ọnọ mi. Ekem mbiowo ẹma ẹn̄wam mi mfiak n̄kpere Jehovah nnyụn̄ mfiak ntọn̄ọ ndinam n̄kpọ esie ke inemesịt. Enen̄ede enem mi ndikpono Jehovah ye edisana esịt ke edisana esop esie!

Mmokop Inemesịt kpa ye Mmen̄kemeke Ndisan̄a

Unọmọ oro n̄kenyenede isua 40 emi ẹkebede iyakke ndu utọ uwem emi n̄koyomde ndidu, edi anam ntak ke n̄kpọitie mbon n̄kpọnnam. Edi mfụhọke nnyụn̄ nsemeke nte n̄kpọ eke ẹdọhọde ke ufọn uwem idụhe. Se n̄kpepde ke Bible anam n̄kụt ke usio mfiak-n̄kabade, kpa mbre emi n̄kamade etieti, ikpọkọnọhọ mi inemesịt ibịghi. Mmada enyịn mi n̄kụt nte uwem n̄kani mbon mbre emi, oro ẹkesụk ẹkade iso ẹbre mbre emi, mîtiehe nte mmọ ẹkekerede. Edi n̄kpọ itiehe ntem ye ami koro mmenen̄ede n̄kpere Andibot, Jehovah Abasi. Emi ọnọ mi utọ inemesịt emi usio mfiak-n̄kabade mîkpọnọhọ mi.

Mmokop inemesịt n̄ko ndikụt ediwak mbon en̄wen ẹtienede ẹkpep Bible ẹnyụn̄ ẹyakde idem ẹnọ edima Abasi nnyịn, Jehovah. Ke ini n̄kọtọn̄ọde ndikpep Bible ke 1977, Mme Ntiense Jehovah ifan̄ kpọt ẹkedu ke ofụri Bulgaria. Nnyịn Mme Ntiense ikawak esisịt ibe owo ikie idem ke 1991 n̄kpọn̄ n̄kpọn̄ emi, ke ukara Communist ama ọkọduọ, ndien ukara ẹnyịme ndien ndisịn ido ukpono nnyịn ke n̄wed man ikeme ndikpono Abasi ifụre ifụre. Esịt enen̄ede enem mi ndikụt nte Mme Ntiense Jehovah ẹwakde ẹkpere 1,800 idahaemi!

 Isụk inyenyene ekese ndinam ke Bulgaria. Ediwak owo ẹyom ndikpep Ikọ Abasi. Ibat mbon emi ẹkedụkde Editi n̄kpa Christ ke 2010 anam ifiọk emi koro mme owo ẹma ẹwak esịm 3,914. Esinem mi nditie n̄kere nte Jehovah ọdiọn̄de utom nnyịn mi ke Bulgaria. Mmada enyịn mi n̄kụt nte ‘esisịt akabarede edi ọkpọsọn̄ idụt’ kpa nte prọfet Isaiah eketịn̄de.—Isaiah 60:22.

N̄kpọ efen emi anamde nnen̄ede n̄kop inemesịt, emi mmendifreke tutu amama, edi edisio Edisana N̄wed Abasi-Edikabade Eke Obufa Ererimbot ke usem Bulgarian. Emi eketịbe ke August 2009 ke Mbono District “Ẹdu ke Ukpeme!” ke Sofia. N̄ketetie mbet ndinyene Bible emi ke usem nnyịn! Emi eyenen̄ede an̄wam ediwak owo ke Bulgaria ẹkpep Bible.

Esinem mi ndinam mme mbọhọidụn̄ mi ye owo ekededi emi awahade ufọk mi ọfiọk akpanikọ Bible kpa ye mmen̄kemeke ndisan̄a n̄kwọrọ eti mbụk Obio Ubọn̄ nte n̄kpamade ndikwọrọ. Isan̄ kiet, mma ntie ke etehe n̄kot mbọhọidụn̄ mi emi akasan̄ade ebe. Eyenan̄wan emi ama awaha edi, ndien mma n̄kwọrọ ikọ nnọ enye, enye ama ọsọsọp enyịme mi ntọn̄ọ ndikpep imọ Bible. Esịt ama enen̄ede enem mi ke ini enye akanade baptism onyụn̄ akabarede edi kiet ke otu Mme Ntiense Jehovah. Mmokop inemesịt ndikpep owo inan̄ Bible tutu mmọ ẹyak idem ẹnọ Jehovah.

Esinen̄ede enem mi ndidụk mbono esop kpukpru ini ye ata ediwak nditọete iban ye iren emi ẹkabarede ẹtie nte eka ye ete ye nditọeka mi. Edi isimemke utom inọ mi ndidụk mme mbono esop koro owo inyeneke san̄asan̄a n̄kpọisan̄ inọ n̄kani owo ye mbon n̄kpọnnam ke idụt nnyịn. Edi mmenen̄ede n̄kop inemesịt nte akparawa kiet ke esop nnyịn esin̄wamde mi. Enye esimen mi ke ubomisọn̄ esie aka Ufọk Mbono Obio Ubọn̄ nnyịn onyụn̄ emen ọnyọn̄. Enye esidịbede mi esịn ke ubomisọn̄, kpa enye esidịbede osio, emen mi odụk Ufọk Mbono Obio Ubọn̄ onyụn̄ emen ọwọrọ. Ekọm enyene Jehovah ke ndikesịn mi ke utọ ima ima ubon esie emi!

N̄kpọ itiehe nte n̄kekerede ke ini n̄kedide ekpri. Ndikpono Jehovah enen̄ede ọnọ mi inemesịt onyụn̄ anam nnyene idotenyịn. Mmesikop inemesịt ndikot se Abasi ọn̄wọn̄ọde ete ke “mbụn̄ọ ọyọfrọ nte ayara edop” ke ini isọn̄ emi edidide paradise. (Isaiah 35:6) Nnen̄ede ntie mbet usen emi ndifrọde ndaha nda ke n̄kpọitie mi nnyụn̄ mfiak n̄kop ata nsọn̄idem.

[Se ẹwetde ke ikpọ abisi ke page 30]

“Esinen̄ede enem mi ndidụk mbono esop kpukpru ini”

[Se ẹwetde ke ikpọ abisi ke page 31]

‘Ndifreke nte ẹkesiode Edisana N̄wed Abasi-Edikabade Eke Obufa Ererimbot ke usem Bulgarian’

[Ndise ke page 29]

N̄kọtọn̄ọ ke isua 15 nsio mfiak-n̄kabade