Leta Mexico

“Ndi Jehovah Ama Nnyịn kpa ye Emi Idide Mbon Esịtikọt Mexico?”

MELESIO, owo O’dam esito esịtikọt Mexico mmọ oro enye odụn̄de, osụhọde ikpọ ibot ediyom utom ke obio. Enye esidụk mbono esop Mme Ntiense Jehovah onyụn̄ ada mme n̄wed nnyịn akabuana ye nditọ edem mmọ. Enye ama ekpe nnyịn ubọk ete inam owo esidi edikpep mmimọ Bible.

Mbon O’dam ẹdụn̄ọ ke ikpọ obot, ke ata esịtikọt ufọt ufọt edem edere Mexico, ndien to do sịm Ufọkmbono Obio Ubọn̄ Mme Ntiense Jehovah emi ekperede mmọ akan edi n̄kpọ nte kilomita 240. Ediwak nnyịn ima ibiere ndika n̄kese mmọ.

Ima itan̄ n̄kpoduoho nnyịn—ekpri tent, n̄kpọnna, udia, ye aranikan̄—emi edidade nnyịn usen ita idọn̄ ke ekpri ubomisọn̄ mbiomo itọn̄ọ isan̄. Ikọkpọn̄ obio nnyịn Durango ke n̄kanika inan̄ usenubọk, iwat ofụri hour itiaita ke ntọn̄ ntọn̄ obot obot afan̄ikọt tutu ke ebiet emi usụn̄ oro eketrede. Mi ke usụn̄ obio O’dam akakam ọtọn̄ọ. Akana ibe akamba ebeden̄ ye akamba obot kiet efen mbemiso isịmde O’dam.

Ima iyak ubomisọn̄ nnyịn inịm ke ekpri obio-in̄wan̄ kiet, ikọhọ mbiomo nnyịn isan̄a ofụri hour ita isụhọde ikesịm esịt ebeden̄ oro. Ima itat tent nnyịn inam itienna ekem isan̄a itan̄ ifia ibara ikan̄ man ibịn ndiọi unam. Ekedi owo kiet ama ede idap hour ita, enye edemede esịn ifia ke ikan̄ man owo en̄wen onyụn̄ ede esie; ntre ntre tutu eyo esiere.

Ke tụhi-tụhi ndan̄nsiere, ima ifiak itọn̄ọ ndidọk obot. Ima ikụt ediwak afan̄ ke obot oro, inyụn̄ isop usụn̄ ediwak ini. Owo nnyịn kiet ama okop usem O’dam esisịt, ntre ima inyene esisịt nneme Bible ye mme owo ke mme ufọk oro ikokụtde ke usụn̄. Edi ama akpa nnyịn idem ndikop ke odu mme owo ke Los Arenales oro ikakade, emi ẹdọhọde ke idi Mme Ntiense Jehovah, mmọ ẹsinyụn̄ ẹnịm mme mbono Bible. Esịt ama enem nnyịn okposụkedi emi idem akakpade nnyịn.

Itisịm Los Arenales, ikpat ama obụp nnyịn. Ufọkn̄wed m̀mê ikan̄ ilektrik idụhe do. N̄kpri ntomo ntomo ufọk oro ẹdade kọrikọri ẹbọp, emi ẹnyụn̄ ẹdade ikpan̄wed ẹnam ọkọm ẹyọhọ do. Mmọ ikopke-kop se ikade iso ke mme obio en̄wen. Mme owo ẹbuene mi etieti, n̄kukụre udia emi mmọ ẹnyenede edi bred emi ẹdade ibokpot ẹnam ye n̄kpri  n̄kpọ eken. Ima isobo ye Melesio, ekpri esan̄ esan̄ akparawa emi ekenen̄erede okop inemesịt ndikụt nnyịn. Enye ama ada nnyịn odụk ekpri ufọk esie onyụn̄ ọdọhọ ke imesibọn̄ akam kpukpru usen ite Jehovah ọdọn̄ Mme Ntiense esie ẹdi ẹdikpep ubon imọ ye nditọ O’dam mmimọ Bible. Enye ikekemeke ndibọrọ kpukpru mbụme emi mmọ ẹkesibụpde enye.

Mbon O’dam ẹnyene ido ukpono mmọ, ndien mmọ ẹkot oku ido ukpono emi shaman. Mmọ ẹsikama ntan̄ ye ọkpọ ntrukpom nte n̄kpọ n̄kpemeidem, ẹtuak ibuot ẹnọ mme n̄kpọ-obot, ẹnyụn̄ ẹbak mme oku ido ukpono mmọ, ndien mme oku emi ẹsiwo mmọ etieti. Melesio ọdọhọ ke ini ikakade obio ikokop ke Jehovah edi ata Abasi, ke ima inyọn̄ idifọp kpukpru n̄kpọ ukpono ndem imọ. Nditọ obio mmọ ẹkekere ke ndem emi ẹyewot enye. Ke ini n̄kpọ ndomokiet mîkanamke eyen mbon, mmọ ẹma ẹdikụt ke Jehovah enyene odudu akan mme ndem emi mmọ ẹsikponode. Ekem mmọ ẹma ẹtọn̄ọ ndidụk ukpepn̄kpọ Bible oro Melesio ekesidade mme n̄wed nnyịn enịm ye ubon esie.

Melesio ọdọhọ “ke ima idọhọ mmọ ke mmọ ẹnyene ndibem kan̄a iso mfọp kpukpru n̄kpọ n̄kpemeidem ye ndisọi mbiet mmọ.” Ediwak mmọ ikokopke ndịk ndem mmọ aba, ndien mbon oro ẹketọn̄ọde nditiene mme Melesio ndụk ukpepn̄kpọ Bible ẹma ebe 80. Idem ama akpa nnyịn ndikop emi, ntre ima ibiere ndinịm mbono esop uwemeyo oro. Ima idọn̄ mme owo ẹwat ke enan̄-mbakara ẹkekot mbon oro ẹsidụkde ukpepn̄kpọ Bible ke edem Melesio ite ẹdi. Okposụkedi emi ekedide ufọturua, mmọ mîkonyụn̄ ifiọkke ite ke idi, ofụri owo 25 ẹma ẹsan̄a ke ukot ye ke enan̄-mbiomo ẹdi.

Ima ida Bible ibọrọ mme mbụme emi mmọ ẹkebụpde, ndien Melesio akakabade ikọ ọnọ nnyịn. Mmọ ẹma ẹbụp mme mbụme nte: “Ndi Jehovah ama nnyịn kpa ye emi idide mbon esịtikọt Mexico?” “Ndi enye esikop akam ke usem O’dam?” “Ke ini Armageddon edin̄wanade, ndi Jehovah oyosụk eti nnyịn emi idụn̄ọde ke esịtikọt mi?” Esịt ama enem nnyịn ndida Bible nnam mbon nsụhọdeidem emi ẹfiọk ke Jehovah ekere aban̄a mbon nsụhọdeidem inamke n̄kpọ m̀mê m̀mọ̀n̄ ke mmọ ẹdụn̄ọ, m̀mê nso usem ke mmọ ẹsem. Mmọ ẹma ẹkpe nnyịn ubọk ẹte idọn̄ owo edinen̄ede ekpep mmimọ Bible.

Ima ibuana udia oro ikadade idi ye mbufa ufan nnyịn ke ima ikokụre mbono esop. Ebiet oro ama enen̄ede ebịt ke eyo ama okokụt, ntre ima inen̄ede ikop inemesịt ke ini mmọ ẹkedọhọde idụk ufọk emi ẹkesụk ẹbọpde ke ubọk idak ibuot. Ke ndan̄nsiere, mmọ ẹma ẹda nnyịn ẹsan̄a usụn̄ oro mîyomke ẹkesịm ebiet emi ikenịmde ubomisọn̄, ntre ima iwat inyọn̄ Durango, inen̄ede ikop inemesịt kpa ye emi idem ekememde nnyịn.

Nso akwa ifet ke ekedi ntem ndisobo ye mbon oro ẹnyenede esịt akpanikọ, emi ẹnen̄erede ẹma ndikpep n̄kpọ mban̄a ata Abasi nnyụn̄ ntuak ibuot nnọ enye kpa ye emi mmọ mînyeneke n̄wed ukpep Bible ke usem mmọ! Tọn̄ọ ikọnyọn̄ idi, Mme Ntiense itiokiet ẹka obio emi ẹkedu do urua ita. Mmọ ẹn̄wam n̄kpọ nte owo 45 oro ẹkenen̄erede ẹyom ndinam n̄kpọ Jehovah. Kpukpru mmọ ẹsidụk mbono esop kpukpru ini.

N̄kpọ en̄wen emi enemde ndifiọk edi nte ke owo inyamke aba sika ke ekpri ufọkurua kiet emi odude ke Los Arenales. Ntak edi koro ediwak owo ke ẹkpep Bible, ndien emi anam mmọ ẹtre sika. Mmọ ẹnyụn̄ ẹkam ẹsịn ndọ mmọ ke n̄wed ukara.

[Ndise ke page 24]

Melesio ye n̄wan esie, nditọiban mmọ inan̄, ye eka an̄wan esie

[Mme Ndise ke page 25]

Ukpepn̄kpọ Bible ye mbono esop ke Los Arenales

[Ebiet ẹdade ndise ẹto ke page 25]

Servicio Postal Mexicano, Correos de Mexico