Mme Andikot N̄wed Nnyịn Ẹbụp Ẹte . . .

Ndi Abasi Okobot Devil?

▪ Sia Bible ọdọhọde ke Abasi ‘okobot kpukpru n̄kpọ,’ ntre ediwak owo ẹkere ke anaedi enye okonyụn̄ obot Devil. (Ephesus 3:9; Ediyarade 4:11) Bible enen̄ede owụt ke idịghe Abasi okobot Devil.

Jehovah okobot owo emi akakabarede edi Devil. Se Bible etịn̄de aban̄a orụk owo emi Jehovah edide anam ifiọk ke idịghe enye okobot akwa andibiọn̄ọ emi. Kop se Bible etịn̄de aban̄a Jehovah mi: “Utom esie ọfọn ama, koro kpukpru usụn̄ esie ẹnende. . . . ; Enye edi eti ye edinen.” (Deuteronomy 32:3-5) Itien̄wed emi owụt ke Satan ama ọfọn ama onyụn̄ enen, ke enye ekedi kiet ke otu nditọ Abasi. Jesus ọkọdọhọ ke John 8:44 ete ke Devil ‘ikọsọn̄ọke ida ke akpanikọ,’ emi ọwọrọde ke enyene ini emi Devil ekesinamde akpanikọ, inamke idiọk.

Edi kpa nte edide ye kpukpru mme angel ye mme owo, angel emi akakabarede edi Satan ama enyene ifụre ndimek ndinam eti m̀mê idiọk. Sia enye ekemekde ndibiọn̄ọ Abasi nnyụn̄ nnam Adam ye Eve ẹtiene enye ẹsọn̄ ibuot, enye ama akabade Satan, emi ọwọrọde “Andibiọn̄ọ.”—Genesis 3:1-5.

Idiọk angel emi ama onyụn̄ akabade edi Devil, emi ọwọrọde “Ọdọk-Edidọk.” Kpa enye ekedịbe ke edem urụkikọt ada n̄kari abian̄a Eve ete abiat ibet Abasi. Emi akanam Jesus okot Satan “ete nsu.”—John 8:44.

Didie ke angel emi ọkọfọnde ama anana ndo, emi okonyụn̄ odude ke ebiet emi idiọkn̄kpọ ndomokiet mîdụhe ọkotọn̄ọ ndidiọk? Mfịna esie ọkọtọn̄ọ ke ini enye okoyomde ẹtuak ibuot ẹnọ imọ utu ke Abasi, ndien enye ama okụt ifet ndikabade n̄kara mme owo. Utu ke ndisio idiọk udọn̄ emi mfep ke esịt, enye ama aka iso ekere n̄kpọ emi tutu ekemini emi enye osiode-sio anam. N̄wed James anam nte n̄kpọ emi akasan̄ade an̄wan̄a; enye ọdọhọ ete: “Idomo esịm owo kiet kiet ke ini udọn̄ idemesie odụride onyụn̄ atapde enye. Ekem ke ini udọn̄ emi oyomode, aman idiọkn̄kpọ.”—James 1:14, 15; 1 Timothy 3:6.

Se iketịbede emi onyụn̄ etie nte abat-okụk emi okụtde ifet ndiyịp okụk usiakifia mmọ. Enye ekeme ndisọsọp nsio idiọk ekikere emi mfep ke esịt esie, edi edieke enye mîsioho, enye ekeme ndiyịp okụk usiakifia mmọ. Ndien edieke enye eyịpde, ọwọrọ enye edidi inọ. Ke adianade do, edieke enye akan̄de ete imọ ikeyịpke, ọwọrọ ke enye edidi osu nsu n̄ko. Se ikonyụn̄ itịbede edi oro ke heaven. Angel emi Abasi okobotde ama etie ekere idiọk onyụn̄ ososio idiọk oro anam, osu nsu, ọsọn̄ ibuot ye Ete esie. Se ikanamde enye akabade Satan kpa Devil edi oro.

Esịt enen̄ede enem nnyịn koro Abasi oyosobo Satan kpa Devil ke ekem ini esie. (Rome 16:20) Edi kan̄a ke emi, Bible anam mbon emi ẹtuakde ibuot ẹnọ Jehovah Abasi ẹdiọn̄ọ n̄kukan Satan man ẹkeme ndibọhọ n̄kari esie. (2 Corinth 2:11; Ephesus 6:11) Ke ntre, ẹn̄wana nte ẹkekeme “[ndibiọn̄ọ] Devil, ndien enye eyefehe ọkpọn̄ mbufo.”—James 4:7.

[Se ẹwetde ke ikpọ abisi ke page 21]

Mfọnmma angel ama akabade Satan ke ntak emi enye ekemekde ndibiọn̄ọ Abasi