Mmanie Ẹkwọrọ Eti Mbụk?

“Ẹyenyụn̄ ẹkwọrọ eti mbụk . . . emi ke ofụri isọn̄.”—MATTHEW 24:14.

MME NTIENSE JEHOVAH ẹkwọrọ eti mbụk ke ofụri ererimbot. Mmọ ẹnam emi ke nsio nsio usụn̄:

Ẹtetịn̄ Ẹnọ Mme Owo. Mme Ntiense Jehovah ẹsika ẹbịne mme owo ẹkekwọrọ eti mbụk ẹnọ mmọ nte Jesus ye mme mbet esie ẹkesinamde. (Luke 8:1; 10:1) Mmọ isitiehe-tie ibet mme owo ẹdi ẹbịne mmimọ. Kpukpru Mme Ntiense Jehovah—emi ebede owo miliọn itiaba—ke ẹkwọrọ eti mbụk Obio Ubọn̄ Abasi ẹnọ mme owo. Mmọ ẹsisan̄a ke ufọk ke ufọk, ẹda ke mme efak, ẹda urụk ukopikọ ye mme usụn̄ en̄wen ẹkwọrọ ikọ. Mme Ntiense ẹma ẹda se ibede biliọn hour kiet ye ubak ẹnam utom emi isua oko.

Mmọ ikpepke mme owo iban̄a Obio Ubọn̄ Abasi kpọt, edi ẹkpep n̄ko ‘kpukpru se Jesus eketemede.’ (Matthew 28:20) Mmọ ẹsinịm ukpepn̄kpọ Bible mfọn ye mme owo emi ẹwakde ebe miliọn itiaita.

Mme Ntiense ke ẹkwọrọ ikọ ke ofụri ererimbot—ke idụt 236. Mmọ ẹsikwọrọ ikọ ẹnọ kpukpru orụk owo. Ẹkwọrọ ke mme idụt ye obio, ke akai Amazon, ke mbịt mbịt ikpehe Siberia, ke mme unaisọn̄ Africa ye ke Ikpọ Obot Himalaya. Owo ikpehe mmọ okụk ndinam utom emi; mmọ ẹda okụk mmọ ye ini mmọ ẹnam emi sia mmọ ẹmade Abasi ye mbọhọidụn̄ mmọ.

Mme N̄wed ye Ọkpọ Umụmikọ. Ẹmịn̄ magazine emi osụk okotde mi, oro edi, Enyọn̄-Ukpeme Ọnọ Ntọt Obio Ubọn̄ Jehovah ke usem 185, ẹnyụn̄ ẹsuan ebe idem miliọn 42 ke kpukpru nsiondi esie. Ẹmịn̄ Awake!, emi etịn̄de n̄ko aban̄a Obio Ubọn̄ Abasi, ke usem 83 ẹnyụn̄ ẹsuan n̄kpọ nte idem miliọn 40 ke kpukpru nsiondi esie.

Ikpọ n̄wed, ndiye uduot n̄kpri n̄wed, mme tract, mme CD/MP3, ye mme DVD oro ẹtatde ukpepn̄kpọ Bible ẹdu idahaemi ke n̄kpọ nte usem 540. Ke n̄kpasịp isua duop emi ẹbede, Mme Ntiense ẹsion̄o ẹnyụn̄ ẹsuan mme n̄kpọ emi ebe idem biliọn 20, emi ọwọrọde ke edieke ẹbaharede ukem ukem, ke owo kiet kiet ke ofụri ererimbot enyene ita ke otu mme n̄kpọ emi!

Mme Ntiense Jehovah ẹmịn̄ n̄ko, mîdịghe ẹnam ẹmịn̄ nsio nsio edikabade Bible. Mmọ ẹkabade, ẹmịn̄, ẹnyụn̄ ẹsuan ofụri Edisana N̄wed Abasi-Edikabade Eke Obufa Ererimbot m̀mê ubak ubak ke usem 96. Ẹsuan se ibede miliọn 166 idahaemi.

Ke Mme Mbono Esop Christian. Mme mbono esop oro ẹsinịmde ke urua ke urua ke Ufọkmbono Obio Ubọn̄ Mme Ntiense Jehovah idịghe ikpîkpu edinam ido ukpono, edi  ẹsinọ ata ukpep ke mme mbono esop emi. Ẹsinọ mme utịn̄ikọ Bible, ẹnyụn̄ ẹda Enyọn̄-Ukpeme ye mme n̄wed nnyịn eken ẹkpep Bible. Ke mme mbono emi n̄ko ke ẹsikpep Mme Ntiense nte ẹkpekwọrọde eti mbụk edifọn edifọn.

Mme Ntiense ẹsikpep ukem n̄kpọ ke se ibede esop 107,000 ke ofụri isọn̄, ndien emi anam mmọ ẹdiana kiet. Mbon en̄wen ẹkeme nditiene ndụk mme mbono esop emi. Owo isitan̄ke etịbe. Imọfiọk ke kpukpru emi ẹkpedi ikpîkpu edieke Mme Ntiense mînamke se mmọ ẹkwọrọde.

Ẹdu Eti Uwem. Mmọ ẹsidomo ndidu eti uwem nte mme Christian, ẹsịn ofụri ukeme ndinam n̄kpọ ye mbon en̄wen nte mmọ ẹkpenyụn̄ ẹyomde mbon en̄wen ẹnam ye mmimọ. (Matthew 7:12) Okposụkedi emi mmọ ẹdide mme anana-mfọnmma owo, ẹsinyụn̄ ẹnamde ndudue ndusụk ini, mmọ ẹnen̄ede ẹyom ndinam n̄kpọ ke ima ye kpukpru owo, nnyụn̄ n̄n̄wam mme owo ini ekededi emi mmọ ẹkemede, idịghe sụk ndikwọrọ eti mbụk kpọt.

Mme Ntiense Jehovah ikwọrọke ikọ man ẹkabade ofụri ererimbot esịt. Utu ke oro, mmọ ẹyom ndinam utom emi tutu ekem ini emi Jehovah ọdọhọde ke ekem, ndien utịt eyedi nte Jesus ọkọdọhọde. Nso iditịbe inọ isọn̄ ye mme andidụn̄ ke esịt ini oro?

[Ndise ke page 7]

Mme Ntiense ke ẹkwọrọ ikọ ke ofụri ererimbot