Owo Edem Usiahautịn Asia ke Italy Eset
Owo Edem Usiahautịn Asia ke Italy Eset
OWO edem usiahautịn Asia akasan̄a didie okodu ke Obio Ukara Rome ke n̄kpọ nte isua 2,000 emi ẹkebede? Mbụme emi ke mme ọdọkisọn̄ nyom n̄kpọeset ẹkebụp ke ini mmọ ẹkekụtde n̄kpọ oro akpade owo idem ke usụk usụk Italy ke 2009.
Mmọ ẹma ẹkụt ọkpọ owo 75 ke akani udi Vagnari, emi edide kilomita 60 to do sịm Bari. Ẹma ẹse mme ọkpọ emi ke ukwakutom, ẹnyụn̄ ẹkụt ke ediwak ke otu owo emi ẹkemana ke mbọhọ oro. Edi ọkpọ owo kiet ama enen̄ede akpa ntaifiọk emi idem. Ndụn̄ọde en̄wen emi ntaifiọk emi ẹkenamde owụt ke eka esie okoto Edem Usiahautịn Asia. Ọkpọ esie emi owụt ke ekpere n̄kpọ nte isua 2,000 enye akakpa. Ndụn̄ọde oro owụt “ke etie nte akpa ẹkụtde ọkpọ owo Edem Usiahautịn Asia edi emi ke Obio Ukara Rome.” Ntre, anie ke owo emi ekedi?
Ndụn̄ọde oro aka iso owụt ke “owo ekeme ndisọsọp n̄kere ke owo emi ekesitiene anyam sịrik emi ekedide mbubehe emi akanyamade etieti ke China ye Rome.” Edi ndusụk owo ẹkere ke idịghe owo kiet ekesito Italy ada sịrik asan̄a ofụri kilomita 8,000 aka China akanyam, edi ke mbonurua mmọ ẹma ẹsito ẹdibọ mmọ ke usụn̄ ẹkenyam ke nsio nsio ebiet.
Nso ke ikeme ndikpep nto ebiet emi ẹkekụtde ọkpọ owo emi? Ke eset, Vagnari ekedi obio-in̄wan̄ emi ekesịnede ke Obio Ukara Rome, kpa ebiet emi mme odomutịm ẹkesitarade ukwak ẹda ẹnam itiat ufụk ọkọmufọk. Ediwak mme odomutịm emi ẹkedi ifịn, ndien etie nte owo Edem Usiahautịn Asia emi okonyụn̄ edi ofụn. Udi esie ikedịghe udi imọ owo. N̄kukụre se enye ekenyenede, emi ẹkebụkde ke udi esie oro ekedi eso kiet kpọt; ekem ẹmen okpo owo en̄wen ẹdori enye ke idem.
Nso ibehe nnyịn ye mbụk ọkpọ owo emi? Mme akpa Christian ẹma ẹkwọrọ eti mbụk Obio Ubọn̄ Abasi ke ebiet ekededi emi mme owo ẹkesịmde ke akpa isua ikie. Bible ọdọhọ ke Pentecost eke isua 33 E.N. ama ekebe, ke isenowo oro ẹkedide Jerusalem ẹma ẹda eti mbụk oro mmọ ẹkekopde do ẹkekwọrọ ke nsio nsio ebiet. (Utom 2:1-12, 37-41) Ọkpọ owo Edem Usiahautịn Asia emi owụt ke anaedi ndusụk owo ẹma ẹsito Edem Usiahautịn Asia ẹka n̄kan̄ Mediterranean ini oro. *
[Ikọ Idakisọn̄]
^ ikp. 6 N̄kpọ n̄ko odu ndiwụt ke mme owo ẹma ẹsito Edem Usoputịn ẹka Edem Usiahautịn Asia. Se ibuotikọ oro, “Mme Isụn̄utom Ẹkekwọrọ Ikọ Ẹkesịm M̀mọ̀n̄ ke Edem Usiahautịn̄ Asia?” ke Enyọn̄-Ukpeme eke January 1, 2009.
[N̄wed ndise obio 29]
(Ama oyom ndikụt nte enye enen̄erede etie, se n̄wed)
ROME
Vagnari
Inyan̄ Mediterranean
EDEM USIAHAUTỊN ASIA
INYAN̄IBOM PACIFIC
[Ndise ke page 29]
Ọkpọ owo Edem Usiahautịn Asia emi ẹkekụtde ke udi ke vagnari
[Ebiet ẹdade n̄kpọ ẹto]
© Su concessione del Ministero per i Beni e le Attività Culturali-Direzione Regionale per i Beni Culturali e Paesaggistici della Puglia-Soprintendenza per i Beni Archeologici della Puglia