Eden Ndi Do ke Owo Ekebem Iso Odu?

KERE nte okpodude ke ata ediye ebiet. N̄kpọ ndomokiet idụhe nditịmede fi uwem, ukopke kpukpru editịm oro ẹsisịnde ke ikpọ obio. Ebiet oro okpon etieti, onyụn̄ ana sụn̄-n̄. Se ikam inemde ikan edi nte ke inyeneke se ifịnade fi, udọn̄ọke, n̄kpọ ndomokiet ibiakke fi, kpukpru n̄kpọ ẹnenem fi.

Etiwọn̄ọde enyịn, sese ata ndiye flawa, nsasana idịm, ye awawa ikọn̄ ye mbiet emi ẹsemde ke eyo. Omokop inem inem ofụm otụkde fi, ye nte mme flawa ẹsion̄ode edinem utebe. Ofụm ke eberi mme ikọn̄ eto aka n̄kan̄ emi ye n̄kan̄ oko, aya ke ewet ke enyọn̄ itiat, mme inuen ye n̄ken̄ ke ẹkwọ ndinem ikwọ. Nte idọn̄ke fi ndidu ke utọ ediye ebiet emi?

Ata ediwak owo ke ererimbot ẹnịm ke owo ọkọtọn̄ọ uwem ke utọ ebiet emi. Christendom, Muslim, ye Ido Ukpono Mme Jew ẹkpep n̄kpọ ke ata ediwak isua idahaemi ẹban̄a In̄wan̄ Eden emi Abasi ekesịnde Adam ye Eve. Bible ọdọhọ ke uwem ama enen̄ede enem mmọ do, ke mmọ ikenyeneke mfịna ndomokiet. Mmọ ikenyeneke mfịna ke otu idemmọ, inyeneke ye mme unam, inyụn̄ inyeneke ye Abasi, kpa enye emi okobotde mmọ ete ẹdu ke nsinsi ke ediye Paradise emi.—Genesis 2:15-24.

Mbon Hindu n̄ko ẹnyene eke mmọ se ẹkpepde ẹban̄a Paradise emi. Mbon Buddha ẹnịm ke ikpọ mme adaiso ido ukpono mmimọ, emi ẹsikotde Buddha, ẹdu ke ebiet emi etiede nte paradise. Ata ediwak ido ukpono ke Africa ẹsibụk nsio nsio mbụk emi ẹnen̄erede ẹbiet mbụk Adam ye Eve.

Ke nditịm ntịn̄, ediwak owo ẹkpep n̄kpọ ẹban̄a paradise emi ke nsio nsio ido ukpono ye obio. Ewet n̄wed kiet ọdọhọ ete: “Ediwak obio ẹnịm nte ke uwem ọkọtọn̄ọ ke paradise emi mme owo ẹkefọnde ẹma, ẹdu ke ifụre ye emem, ẹkop inemesịt, se ẹdade ẹdu uwem ẹdi barasuene, ndien mfịna  ye nsịn̄ede ye utọk ikonyụn̄ idụhe. . . . Emi anam ediwak owo ẹyom ndifiak n̄kodu ke Paradise emi ẹma ẹkeduọk edi emi owo mîfreke, ẹnyụn̄ ẹyom kpukpru usụn̄ ndifiak nnyene enye.”

Okûkam udi nsio nsio mbụk emi ẹbụkde ẹban̄a paradise oto ebiet kiet? Okûdi kpukpru owo ẹkam ẹkere n̄kpọ emi eketịbede? Ndi In̄wan̄ Eden ama odu? Ndi Adam ye Eve n̄ko ẹma ẹdu?

Mbon emi ẹsifan̄ade mfan̄a ẹsida mbụk emi ẹnam n̄kpọ nsahi. Ediwak owo ke eyo ntatenyịn emi ẹda mbụk emi nte n̄ke. Edi n̄kpọ n̄kpaidem ndifiọk nte ke ndusụk mbon emi ẹdi mme aka ufọkabasi. Ediwak mme ada iso ido ukpono ẹkpep ke In̄wan̄ Eden ikodụhe. Mmọ ẹdọhọ ke mbụk emi edi n̄ke.

Imọfiọk ke n̄ke awak ke Bible. Jesus akakam eke ediwak ke otu emi. Edi Bible idọhọke ke mbụk In̄wan̄ Eden edi n̄ke, edi ọdọhọ ke edi ata akpanikọ. Edieke mbụk emi ekpedide nsu, ọwọrọ ke ofụri Bible ekpedi nsu. Ẹyak ise ntak emi ediwak owo mînịmke mbụk emi ke akpanikọ, inyụn̄ ise m̀mê mme ntak emi mmọ ẹnọde ẹnen. Iyonyụn̄ ineme n̄ko ntak emi mbụk emi enen̄erede ebehe nnyịn owo kiet kiet.