Editịn̄ Ikọ ke Usem—Ndi Edi Enọ Abasi?

DEVON ọdọhọ ete: “N̄kpọ emi isin̄wan̄ake mi. Kpukpru urua ke ufọkabasi nnyịn, esitie nte ediwak owo ẹbọ edisana spirit ẹsinyụn̄ ẹtịn̄ ikọ ke usem. Ndusụk mmọ ẹsidu oburobụt uwem. Edi ami mmesidomo ndida mme edumbet Bible ndu uwem. Edi akananam mbọhọ edisana spirit ke adan̄a ofụri akam oro nsibọn̄de mben̄e nte ẹnọ mi. Ntak emi edide ntre?”

Gabriel n̄ko esika ufọkabasi emi mme owo ẹsidọhọde ke imọbọ edisana spirit inyụn̄ itịn̄ ikọ ke usem. Enye ọdọhọ ete: “Se isifịnade mi edi nte ke ini mbọn̄de akam, mme owo ẹsitịmede mi ke nditịn̄ ikọ emi owo ndomokiet mîfiọkke se ọwọrọde, ẹnyụn̄ ẹtịn̄ uyo enen̄ede ọsọn̄. Ikọ emi isinyeneke ufọn inọ owo ndomokiet. N̄kọ akpana enọ emi spirit Abasi ọnọde enen̄ede enyene ufọn?”

Se iketịbede emi inọ Devon ye Gabriel anam ẹbụp akpan mbụme emi, Ndi editịn̄ ikọ ke usem oro ndusụk ufọkabasi ẹsemde mfịn enen̄ede edi enọ Abasi? Man ibọrọ mbụme oro, ọfọn idụn̄ọde utịbe utịbe enọ editịn̄ ikọ ke nsio nsio usem, oro ẹkenọde mme Christian eyo mme apostle.

Mmọ “Ẹtọn̄ọ Ndisem Nsio Nsio Usem”

Imesikot ke Bible iban̄a irenowo ye iban emi ẹkenọde mmọ ukeme ndisem mme usem emi akananam mmọ mîkpepke. Akpa ini ekedi ke Pentecost 33 E.N., urua ifan̄ ke Jesus Christ ama akakpa. Usen oro, n̄kpọ nte mbet Jesus 120 emi ẹkedude ke Jerusalem ẹma “ẹyọhọ ye edisana spirit ẹnyụn̄ ẹtọn̄ọ ndisem nsio nsio usem.” Isenowo emi ẹketode nsio nsio idụt ẹdi ẹma “ẹkop n̄kpaidem, koro owo kiet kiet okopde nte mmọ ẹtịn̄de ikọ ke usem mmọ.”—Utom 1:15; 2:1-6.

Bible asiak mme akpa mbet Jesus en̄wen emi ẹkenọde utịbe utịbe enọ emi. Ke uwụtn̄kpọ, edisana spirit ama ọnọ apostle Paul ukeme nditịn̄ ikọ ke usem. (Utom 19:6; 1 Corinth 12:10, 28; 14:18) Edi akpana eti ntak odu emi anamde ẹnọ mme owo utọ enọ edisana spirit Abasi oro. Ntre, ntak emi ẹkenọde enọ editịn̄ ikọ ke usem ke eyo Bible?

Idiọn̄ọ Ibetedem Abasi

Ke ini Paul ekewetde n̄wed ọnọ ẹsọk mme Christian ke Corinth, emi anade edi ndusụk mmọ ẹma ẹsitịn̄ ikọ ke usem, enye ama ọdọhọ ke ‘editịn̄ ikọ ke usem edi idiọn̄ọ ọnọ mbon oro mînịmke ke akpanikọ.’ (1 Corinth 14:22) Ntem, enọ editịn̄ ikọ ke usem ye mme utịbe utịbe enọ eken ẹkedi idiọn̄ọ ndiwụt  mbon oro mîkedịghe mme Christian ke Abasi ama enyịme onyụn̄ ọnọ esop mme Christian oro ẹketọn̄ọde-tọn̄ọ do ibetedem. Ukem nte idiọn̄ọ emi esiwụtde owo efak, mme utịbe utịbe enọ emi ẹkedi idiọn̄ọ emi ẹkewụtde mbon oro ẹkeyomde akpanikọ ebiet emi mmọ ẹkpekụtde ikọt Abasi.

Enen̄ede ọfọn ifiọk ke Bible itịn̄ke ke ẹma ẹnọ Jesus m̀mê prọfet ekededi emi okodude uwem mbemiso eyo mme Christian enọ editịn̄ ikọ ke usem oro akanam mmọ mîkpepke. Do, ọwọrọ ke enyene ntak en̄wen emi ẹkenọde mme mbet Jesus enọ editịn̄ ikọ ke usem.

Ama An̄wam Ẹsuan Eti Mbụk

Jesus ọkọdọhọ mme mbet esie ke ntọn̄ọ ntọn̄ọ utom ukwọrọikọ esie ete ẹkwọrọ eti mbụk Obio Ubọn̄ Abasi ẹnọ mme Jew kpọt. (Matthew 10:6; 15:24) Emi akanam mme mbet esie ikawakke ndikwọrọ ikọ ke ebiet emi mme Jew mîkawakke. Edi oro ekedi ke ibio ini.

Ikebịghike ke Jesus ama akakpa ke 33 E.N., ẹnyụn̄ ẹnam enye eset, enye ama owụk mme mbet esie ete ẹka “ẹkenam mme owo ke kpukpru idụt ẹdi mbet.” Enye ama onyụn̄ ọdọhọ mmọ ke mmọ ẹyedi mme ntiense imọ “tutu esịm ke ata utịt ikpehe isọn̄.” (Matthew 28:19; Utom 1:8) Ama oyom ẹsem mme usem en̄wen ke adianade ye usem Hebrew man ẹkeme ndikwọrọ eti mbụk nsịm ata utịt ikpehe isọn̄.

Edi ediwak ke otu akpa mme mbet oro ẹkedi mbon oro “mîfiọkke n̄wed ye mme usụhọde owo.” (Utom 4:13) Ntem, didie ke mmọ ẹkpekeme ndikwọrọ ikọ nsịm utịt ikpehe isọn̄ emi ẹsemde mme usem emi akanam mmọ mîkopke n̄wan̄wadise ndikpekpep ndisem? Edisana spirit ama ọnọ ndusụk ifịk ifịk mme ọkwọrọ ikọ oro enọ edikwọrọ ikọ udọn udọn ke mme usem emi akanam mmọ mîfiọkke.

Ntre, akpan ntak iba akanam ẹnọ enọ editịn̄ ikọ ke usem. Akpa, enye ekedi idiọn̄ọ ndiwụt ke Abasi ọnọ mmọ ibetedem. Ọyọhọ iba, ẹkenọ enye man an̄wam mme Christian eyo mme apostle ẹnam utom mmọ ndikwọrọ ikọ nnọ mbon oro ẹsemde nsio nsio usem. Ndi editịn̄ ikọ ke usem oro ediwak ufọkabasi ẹsitịn̄de owụt ke mmọ ẹnyene ibetedem Abasi onyụn̄ an̄wam mmọ ẹkwọrọ ikọ ẹnọ mbon oro ẹsemde nsio nsio usem?

Editịn̄ Ikọ ke Usem Mfịn​—Ndi Edi Idiọn̄ọ Ibetedem Abasi?

M̀mọ̀n̄ ke okpowụk idiọn̄ọ man enyene ufọn ọnọ ata ediwak owo ke obio mbufo? Ke esịt ekpri ufọk? Ihih! Mbụk emi aban̄ade se iketịbede ke usen Pentecost ọdọhọ ke “udịm owo” emi ẹkesan̄ade-san̄a ẹbe ẹma ẹkụt idiọn̄ọ editịn̄ ikọ ke usem ke utịbe utịbe usụn̄ emi mme mbet oro ẹketịn̄de. Oro ama anam “n̄kpọ nte ukpọn̄ tọsịn ita ẹdiana” ẹkabade ẹdi mme Christian usen oro! (Utom 2:5, 6, 41) Edieke mme owo ẹdọhọde mfịn ke itịn̄ ikọ ke usem, edi mmọ ẹnam oro ke esịt ufọkabasi kpọt, akpakịp mbon oro mîdịghe mme Christian ẹdinam didie ikụt idiọn̄ọ emi?

Ikọ Abasi ọdọhọ ke use ye “mme utom obụkidem” eken ẹsibọbiọn̄ọ edisana spirit, ye nte ke “mbon oro ẹkade iso ẹnam utọ mme n̄kpọ emi ididaha obio ubọn̄ Abasi inyene.” (Galatia 5:17-21) Edieke afo okụtde mbon oro mîdụhe eti uwem nte ẹtịn̄de ikọ ke usem, afo emekeme ndikere ete, ‘Ndi enen—edieke mîkam idịghe abian̄a—Abasi ndiyak edisana spirit esie nnọ mbon emi ẹkade iso ẹnam se Ikọ Esie akpande?’ Oro ekpetie nte ndiwụk idiọn̄ọ oro esiwụtde owo efak ke ebiet oro mînenke.

Ndi Ẹda Editịn̄ Ikọ ke Usem Mfịn Ẹsuan Eti Mbụk?

Nso kaban̄a ọyọhọ ntak iba oro akanamde ẹnọ mme owo enọ editịn̄ ikọ ke usem ke eyo mme apostle? Ndi ẹda editịn̄ ikọ ke usem ke mme ufọkabasi ẹkwọrọ eti mbụk ẹnọ mme owo emi ẹsemde nsio nsio usem? Ti ete ke otuowo oro ẹkedude ke Jerusalem ke usen Pentecost 33 E.N. ẹketo nsio nsio idụt, ye nte  ke se mme mbet ẹketịn̄de ke utịbe utịbe usụn̄ ama enen̄ede an̄wan̄a mmọ. Edi mbon oro ẹsidọhọde mfịn ke itịn̄ ikọ ke usem ẹsitịn̄ se mîn̄wan̄ake owo ekededi oro okopde.

Nte an̄wan̄ade, editịn̄ ikọ ke usem ke eyomfịn enen̄ede edi isio ye enọ edisana spirit emi ẹkenọde akpa mme mbet Jesus. Ke akpanikọ, idụhe n̄wetnnịm n̄kpọ ekededi emi ẹkemede ndiberi edem, emi owụtde ke owo ekededi ama ọbọ utịbe utịbe enọ editịn̄ ikọ ke usem ke mme apostle ẹma ẹkekpan̄a. Emi ikpaha mbon oro ẹsikotde Bible idem. Apostle Paul emi ẹkenọde odudu spirit ama etịn̄ ntịn̄nnịm ikọ aban̄a mme utịbe utịbe enọ, emi esịnede editịn̄ ikọ ke usem ete: “Mmọ ẹyebe ẹfep.” (1 Corinth 13:8) Edi owo ekeme ndisan̄a didie mfiọk mbon oro ẹnyenede edisana spirit mfịn?

Mmanie Ẹnyene Edisana Spirit?

Jesus ama enen̄ede ọfiọk ke idibịghike enọ editịn̄ ikọ ke usem eyetre ẹma ẹtọn̄ọ esop mme Christian. Esisịt ini mbemiso Jesus akakpade, enye ama etịn̄ se ẹdidade ẹdiọn̄ọ ata mme anditiene enye. Enye ọkọdọhọ ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:35) Ke nditịm ntịn̄, Ikọ Abasi ọdọhọ ke ufan̄ikọ oro ọdọhọde ke mme utịbe utịbe enọ ẹyebe ẹfep ete: “Ima idibehe ifep ke nsinsi.”—1 Corinth 13:8.

Ima ke ẹbem iso ẹsiak ke otu edu, m̀mê n̄kpọ, usụkkiet oro ẹnamde “mbun̄wụm” edisana spirit Abasi. (Galatia 5:22, 23) Ntre mbon oro ẹnen̄erede ẹnyene edisana spirit—ndien ke ntem ẹnyenede ibetedem Abasi—ẹyenen̄ede ẹma kiet eken. Ke adianade do, ọyọhọ n̄kpọ ita emi anamde mbun̄wụm spirit edi emem. Ntem, mbon oro ẹnyenede edisana spirit mfịn ẹsinam emem, ndien ẹnen̄ede ẹfep mme idiọk edu nte usua, asari, ye afai.

Ti n̄ko ntịn̄nnịm ikọ Jesus oro ẹwetde ke Utom 1:8. Enye ọkọdọhọ ke mme mbet imọ ẹyebọ odudu man ẹdi mme ntiense imọ “tutu esịm ke ata utịt ikpehe isọn̄.” Jesus ama owụt n̄ko ke utom emi ayaka iso “tutu esịm utịt ererimbot.” (Matthew 28:20, Edisana Ŋwed Abasi Ibom) Ntem, utom ukwọrọikọ emi ẹnamde ke ofụri ererimbot mi ke ẹdika iso ẹda ẹdiọn̄ọ mbon oro ẹnyenede edisana spirit.

Afo ekere didie? Afo okụt ke mmanie ẹnyene edisana spirit mfịn? Mmanie ẹn̄wụm mbun̄wụm spirit, akpan akpan ima ye emem, tutu ukara ẹmia mmọ ufen ke ofụri ererimbot ke ntak emi ẹsịnde ndin̄wana ekọn̄? (Isaiah 2:4) Mmanie ẹsịn ukeme ndifep mme utom obụkidem, utọ nte use, ẹkam ẹsiode-sio mbon oro ẹkade iso ẹnam utọ ido emi edi ikabakede esịt, ẹfep ke otu mmọ? (1 Corinth 5:11-13) Mmanie ẹkwọrọ eti mbụk Obio Ubọn̄ Abasi ke ofụri isọn̄ nte n̄kukụre idotenyịn ubonowo?—Matthew 24:14.

Mme andisio magazine emi idịpke inua ndidọhọ ke Mme Ntiense Jehovah ẹnam kpukpru se Bible etịn̄de aban̄a mbon oro ẹnyenede edisana spirit. Mbọk yom usụn̄ mehe ye mmọ man okụt m̀mê Abasi enen̄ede ọnọ mmọ ibetedem m̀mê inọhọ.