Se Ikpepde Ito Jesus

Nte Ẹkemede Ndikop Inemesịct

Nso idi ukpọhọde inemesịt?

▪ Jesus ama asiak inemesịt ke ata akpa ikọ oro enye eketịn̄de ke ọwọrọetop ukwọrọikọ esie. Enye ọkọdọhọ ete: “Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit.” (Matthew 5:3) Nso ke ikọ esie ọkọwọrọ? Nso idi unana nnyịn ke n̄kan̄ eke spirit?

Man idu uwem, ana ikot ibifịk, in̄wọn̄ mmọn̄, inyụn̄ idia udia, ukem nte mme unam ẹsinamde. Edi man ikop inemesịt, enyene n̄kpọ oro anade inam oro mme unam mîkemeke ndinam—oyom ifiọk uduak uwem. Andibot kpọt ekeme ndinam nnyịn ifiọk uduak uwem. Ke ntre, Jesus ama ọdọhọ ete: “Idịghe uyo ikpọn̄ ke ana owo ada odu uwem, edi edida kpukpru ikọ eke ẹwọrọde Jehovah ke inua odu.” (Matthew 4:4) Mbon oro ẹfiọkde unana mmọ ke n̄kan̄ eke spirit ẹkop inemesịt sia mmọ ẹsan̄a ẹkpere Jehovah, “Abasi inemesịt,” enye onyụn̄ ọnọ mmọ akpan n̄kpọ oro ekemede ndinam owo okop inemesịt—oro edi, idotenyịn.—1 Timothy 1:11.

Didie ke Jesus ọkọnọ idotenyịn?

▪ Jesus ọkọdọhọ ete: “Inemesịt edi eke mme enyene ifụre ifụre ido, koro mmọ ẹyeda isọn̄ ẹnyene.” (Matthew 5:5) Jesus ama ọnọ ubonowo idotenyịn ke ndikọk mme owo udọn̄ọ nnyụn̄ nnam mme akpan̄kpa ẹset ẹfiak ẹdidu uwem ke isọn̄. Enye ama ọnọ etop idotenyịn n̄ko. Enye ọkọdọhọ ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” (John 3:16) Mbon oro ẹkopde uyo Abasi ẹyedu nsinsi uwem ke isọn̄. Kere nte odude uwem ye mbon oro ẹnyenede ifụre ifụre ido unyụn̄ usọn̄ke! Imosụk ise Ikọ Abasi ọdọhọde ete: “Ẹdat esịt ke idotenyịn.” (Rome 12:12) Jesus ama etịn̄ n̄ko aban̄a nte ẹkpekopde inemesịt idahaemi.

 Jesus ekekpep ke ẹkpedu uwem didie man ẹkop inemesịt?

▪ Jesus ama ọnọ nti item aban̄a mme utọ n̄kpọ emi: nte owo akpanamde n̄kpọ ye owo, ndọ, nsụhọdeidem, ye nnennen usụn̄ emi ẹkpesede mme n̄kpọ obụkidem. (Matthew 5:21-32; 6:1-5, 19-34) Edieke anamde item Jesus, afo oyokop inemesịt.

Ntatubọk esinam owo okop inemesịt. (Utom 20:35) Ke uwụtn̄kpọ, Jesus ọkọdọhọ ete: “Ke ini afo anamde usọrọ, kot mme ubuene, mmọ eke ẹbiomode ndo ke ukot, mbụn̄ọ, nnan; ndien afo oyokop inemesịt, koro mmọ mînyeneke se ẹdidade ẹsio fi usiene.” (Luke 14:13, 14) Ikop inemesịt ke ini inamde n̄kpọ inọ mbon en̄wen man mmọ ẹkop inemesịt, idịghe ke ini iyomde ufọn idem nnyịn.

Nso idi akakan n̄kpọ oro anamde owo okop inemesịt?

▪ Edieke anamde n̄kpọ ọnọ mbon en̄wen, afo oyokop inemesịt, edi afo eyenen̄ede okop inemesịt edieke anamde n̄kpọ ọnọ Abasi. Idem inemesịt oro mme ete ye eka oro ẹmade nditọ mmọ ẹkopde ifetke-fet ndikpon ntre. Ikụt emi ke se iketịbede isan̄ kiet ke ini Jesus ekekpepde mme owo n̄kpọ an̄wan̄wa. “N̄wan kiet ke otuowo [ama] emenede uyo ọdọhọ enye ete: ‘Inemesịt edi eke owo emi idịbi esie akamande fi ye eba emi afo akawapde!’ Edi enye ọdọhọ ete: ‘Baba, utu ke oro, Inemesịt akam edi eke mbon oro ẹkopde ikọ Abasi ẹnyụn̄ ẹkpemede ndinam enye!’”—Luke 11:27, 28.

Jesus ke idem esiemmọ ama enen̄ede okop inemesịt ke ndinam uduak Ete esie eke heaven. Uduak Abasi edi mme owo ndikop mban̄a idotenyịn nsinsi uwem. Isan̄ kiet, ke ini Jesus eketịn̄de idotenyịn emi ọnọ owo kiet emi ekenyenede udọn̄, enye Jesus ama ọdọhọ ete: “Udia mi edi ndinam uduak enye emi ọkọdọn̄de mi.” (John 4:13, 14, 34) Afo n̄ko emekeme nditiene n̄kop inemesịt ke ndinam n̄kpọ oro Abasi amade ebe ke ndikwọrọ akpanikọ Bible nnọ mme owo.

Edieke oyomde ndifiọk n̄kpọ en̄wen, se ibuot 1 ke n̄wed emi, Nso ke Bible Enen̄ede Ekpep? emi Mme Ntiense Jehovah ẹsiode.

[Ndise ke page 16]

Ndifiọk uduak uwem anam nnyịn ikop ata inemesịt