Nte Mme Christian Eyo Mme Apostle Ẹkedude Uwem

“Anamusọ Eto”

“Nte enye idịghe eyen anamusọ eto?”—MATTHEW 13:55.

OWO ikọfiọkke Jesus nte “eyen anamusọ eto” kpọt edi ẹma ẹfiọk enye n̄ko nte “anamusọ eto.” (Mark 6:3) Anaedi Joseph ebe eka esie ekekpep enye utom emi.

Nso usọ ye nso n̄kpọutom ke akana Jesus ọfiọk ndida nnam utom ke ini enye akanamde utom usọeto? Nso n̄kpọ ke enye ekesinam ọnọ mbon Nazareth? Ndien etie nte ukpep usọeto oro enye ọkọbọde ke ini uyen okotụk enye didie ke enye ama okokpon?

Mbubehe Ubon Ndise emi odude mi ke isọn̄ owụt nte ete ekpepde akpan esie nte ẹkemede ndida n̄kpọ utịbi ndudu nnam utom edifọn edifọn. Udọ akpan̄ utọn̄ onyụn̄ etịn̄ enyịn ese.

Nditọiren ẹkesiwak nditọn̄ọ ukpep utom ke ini ẹkedide n̄kpọ nte isua 12 esịm 15. Ete mmọ ekesiwak ndikpep mmọ. Ẹkesida ediwak isua ẹkpep, ndien akana mmọ ẹnen̄ede ẹsịn ifịk edieke ẹyomde ndidi nti mme anamusọ eto. Kere nte ekesinemde Joseph ndibiat  ediwak hour nnam utom, nneme nneme, nnyụn̄ n̄kpep Jesus utom usọeto. Anaedi esịt ekenem Joseph didie ntem ndikụt nte Jesus enen̄erede ọfiọk utom usọeto!

Ama Oyom Ifiọk, Odudu, ye Usọ Ama oyom anamusọ eto ọfiọk utọ eto emi enye adade anam utom. Enye ekenyene ndimek eto emi ẹkenyenede ke n̄kann̄kụk, utọ nte cypress, oak, cedar, sycamore, ye olive. Edi itie usiaketo m̀mê itie unyam n̄kpọ ubọpufọk ikodụhe emi anamusọ eto ke eyo mme apostle akpakade ekedep eto emi ẹsiakde ke udomo emi enye oyomde. Utu ke oro, enye ekesidụk akai ekese eto emi enye oyomde, ekek mmọ, ndien ekem ada mmọ okobon ke ufọkutom esie.

Nso ke enye akada eto emi anam? Ekeme ndidi enye ama esibiat ediwak hour etiene ọbọp ufọk. Enye ayasiak ndori ndida n̄kọn̄ ọkọmufọk, ọkọn̄ udịghi ukot esịt ufọkenyọn̄, onyụn̄ anam usụn̄, window, ye n̄kpana ibibene.

Anamusọ eto ama esinam mme n̄kpọ mbanaufọk n̄ko. Ndise oro ẹtienede mi ẹwụt ndusụk n̄kpọ emi—kọbọd emi enyenede utan̄ m̀mê usụn̄ (1), ifịm (2), akpakaha (3), ye nsio nsio okpokoro (4); ye n̄kpana eyen. Enye ama esida eto anam nsio nsio ndudiọn̄ onyụn̄ esịn fansi man anam mme n̄kpọ mbanaufọk ẹnen̄ede ẹye. Enye ama esida mbukpa ọkwọk m̀mê aran eyet ke mme n̄kpọ oro man ẹbịghi ẹnyụn̄ ẹsem.

Anamusọ eto ama esinam n̄ko n̄kpọutom ọnọ mme ọtọin̄wan̄—ọkpọnọ (5) emi ẹdade ikpọ eto ẹnam ye fọk, edisat ukpọri mbio, ye udọk (6). Ufụn̄isọn̄ (7) oro enye akanamde ekenyene ndisọn̄ idem sia edet esie emi ekedide ukwak ekesifụn̄ isọn̄ itiat. Enye ama anam ukpatn̄kpọ eto (8) onyụn̄ anam wheel eto emi ẹkedade ẹwat ukpatn̄kpọ oro. Utom esie ama ekeme n̄ko ndisịne edidiọn̄ n̄kpọ mbanaufọk, mme n̄kpọutom, ye ukpatn̄kpọ oro enye akanamde.

Ndi emekeme ndikere nte Jesus ndinam utom nte anamusọ eto okotụkde nte enye eketiede? Kere nte utịn mbọhọ Palestine ọkọfọpde Jesus ikpaidem, esịp esie ẹsọn̄ ke ntak emi enye anamde ọkpọsọn̄ utom ke ediwak isua, ikpaubọk esie ọsọn̄ ke ntak edimụm n̄kpotụk n̄kpotụk eto nnyụn̄ mmụm ekụri, ukọn̄n̄kpọ, ye uyọkn̄kpọ.

Ama Esida Ọnọ Uwụtn̄kpọ Jesus ama enen̄ede ọfiọk ndida mmemmem n̄kpọ oro mme owo ẹtịmde ẹfiọk n̄kpep ntotụn̄ọ n̄kpọ Abasi. Ndi enye ama esida ifiọk oro enye ekenyenede ke utom usọeto ọnọ ndusụk uwụtn̄kpọ emi? Kere ban̄a ifan̄ emi. “Ntak, ndien, afo esede mbio emi esịnede ke enyịn eyenete fo, edi mûkereke uban̄a obukpọk emi odude fi ke enyịn?” Anamusọ eto ọkọfiọk adan̄a nte obukpọk okokponde eketre. (Matthew 7:3) Nte ini akakade, Jesus ama ọdọhọ otuowo en̄wen ete: “Baba owo kiet emi akabarede ese edem ke enye ama ekesịn ubọk ke ufụn̄isọn̄ ikemeke ndinam utom obio  ubọn̄ Abasi.” Anaedi enye ama esinam ufụn̄isọn̄ n̄ko. (Luke 9:62) Kiet ke otu ikot Jesus oro enemde akan abuana ekpri n̄kpọutom oro anamusọ eto akanamde. Jesus ọkọdọhọ ete: “Ẹmen ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi. . . . Ọkpọnọ mi ememem, mbiomo mi onyụn̄ efefere.” (Matthew 11:29, 30) Anaedi Jesus ama ọfiọk ndinam ọkpọnọ oro mîbiakke owo edi ‘ememde-mem.’

Etie nte mme andibiọn̄ọ Jesus ẹkesasak enye ke ini ẹkekotde enye “eyen anamusọ eto.” Kpa ye oro, mme Christian ke eyo mme apostle ye ke eyomfịn ẹbat ke edi n̄kpọ ukpono nditiene osụhọdeidem owo emi ekedide anamusọ eto ini kiet ko.

[Ekebe/Mme ndise ke page 26]

Ekebe N̄kpọutom Anamusọ Eto

Akana anamusọ eto, utọ nte Jesus, emi okodude ke eyo mme apostle ọfiọk ndikama mme n̄kpọutom emi. Uyọkn̄kpọ (1) esie ekedi eto emi ẹfakde mbatmbat ukwak emi enyenede edet, oro esisịbede eto ẹma ẹdụri ẹka iso ye edem. Enye ekesida n̄kpọ udomo itụn̄ (2) odomo se enye edikọn̄de onyụn̄ ada n̄ket udomon̄kpọ (3) ese m̀mê n̄kpọ emi enye anamde enen. Ekebe n̄kpọutom esie ama esịne n̄ko plumb (4), eto udomon̄kpọ (5), ukwọhọde eto emi ẹkemede ndida n̄kwọhọde eto ọdọnọ (6), ye ekụri (7) ndida n̄kek eto.

Ẹkesida n̄kpọ unam fansi ke eto (8) ye utụn̄n̄kpọ (9) ẹsịbe ẹnyụn̄ ẹnam eto udọkn̄kpọ. Ukọn̄n̄kpọ oro ẹdade eto ẹnam (10) emi ẹsidade ẹkọn̄ ntok ufak eto m̀mê utịbin̄kpọ ẹdoro ke okukịp ekebe n̄kpọutom. Ẹwụt n̄ko ekpri uyọkn̄kpọ (11), ikwa usọi eto (12), ye okpukwak (13). Ukọn̄n̄kpọ (14) ye n̄kọbọ ekụri (15) ẹdu ke iso ekebe n̄kpọutom ndida ntọn̄ọ utom ke eto. Ikwa (16) ye nsio nsio utịbin̄kpọ (17) ẹdoro ke okukịp. N̄kpọ utịbi ndudu (18) ebere ke ekebe n̄kpọutom.