Ọyọhọ Otu 128 Ẹkụre Ukpep Ke Gilead

Ẹnọ Mme Isụn̄utom ‘Ẹka Ẹkenam Mme Mbet’

“ANA ndusụk mme Christian ẹnyịme ndikpọn̄ ubon mmọ ye edem mmọ n̄ka n̄kọkwọrọ eti mbụk ke idụt en̄wen man kpukpru idụt ẹkop eti mbụk.” David Splane, emi edide owo Otu Ukara Mme Ntiense Jehovah eketịn̄ ikọ emi ndida mberede edinam ukụre ukpep Gilead.

Ke March 13, 2010, se ikperede ndisịm owo 8,000 ẹma ẹsop idem man ẹdụk edinam ukụre ukpep ọyọhọ otu 128 eke Ufọkn̄wed Enyọn̄-Ukpeme Ukpep Bible Eke Gilead. Mme ufan, mbonubon, ye isenowo emi ẹtode idụt 27 ẹkedụk edinam emi.

“Mme Mbet Iketiehe ke Ufọk”

Brọda Splane, emi ekedide etieibuot okpokoro, ọkọtọn̄ọ edinam emi ke ndineme ewụhọ oro Jesus ọkọnọde ete: “Ẹka ẹkenam mme owo ke kpukpru idụt ẹdi mbet mi.” (Matthew 28:19, 20) Enye ama ọsọn̄ọ etịn̄ ete ke Jesus ọkọnọ mme mbet ẹka ẹbịne mme owo. Edi akpanikọ, ke Pentecost 33 E.N., mbon Mesopotamia, Edem Edere Africa, ye ediwak ebiet ke Obio Ukara Rome ẹma ẹdi Jerusalem ẹdikop eti mbụk. Kpa ye oro, Brọda Splane ama ọdọhọ ke “mme mbet iketiehe ke ufọk ibet mme owo emi ẹtode kpukpru idụt ẹdedi ẹbịne mmọ. Mmọ ẹkenyene ndika ata utịt ikpehe isọn̄ n̄koyom mme owo.”—Utom 1:8.

Brọda Splane ama ọdọhọ ete: “Jesus ikọdọhọke-dọhọ mme mbet esie se ẹkpenamde kpọt, edi ama eteme mmọ nte ẹdinamde. Enye ikọdọhọke-dọhọ mmọ ẹbọn̄ akam kpọt, edi ama ekpep mmọ nte ẹkpebọn̄de akam. Enye ikọdọhọke-dọhọ mmọ ẹkwọrọ ikọ kpọt, edi ama owụt mmọ nte ẹkpekwọrọde ikọ. Enye ikọdọhọke-dọhọ mmọ ẹdi nti mme andikpep kpọt, edi ama ada nti usụn̄ ọnọ ukpep.”

Ke ini etieibuot okpokoro eketịn̄de ikọ ọnọ mme ete ye eka mme andikụre ukpep oro, enye ama etịn̄ un̄wọn̄ọ oro Jesus ọkọn̄wọn̄ọde ọnọ mme mbet esie, ete: “Sese! Ami ndodu ye mbufo kpukpru usen tutu esịm utịt editịm n̄kpọ emi.” (Matthew 28:20) Brọda Splane ama anam otuowo ẹnen̄ede ẹnịm ke Jesus ayaka iso ese aban̄a nditọ ufọkn̄wed oro ke idụt oro ẹnọde mmọ ẹka.

“Ẹka Iso Ẹbụre Mbụre”

Anthony Morris, emi edide owo Otu Ukara, ama esịn udọn̄ ọnọ nditọ ufọkn̄wed oro ete “ẹka iso ẹbụre mbụre.” Enye ama ọdọhọ ke eti mbụre ye idiọk mbụre ẹdu. Idiọk mbụre abuana owo ndinọ idemesie ubọn̄. Ẹtịn̄ eti mbụre ke 1 Corinth 1:31 ẹte: “Owo eke obụrede mbụre, yak enye obụre ke Jehovah.” Brọda Morris ọkọdọhọ ete: “N̄kpọ ndibụre mban̄a edi oro—ndinyene ikike ye ifiọk Jehovah Abasi. Ke nditịm ntịn̄, akakan ifet fo—ye okịmmọ—edi ndikere edisana enyịn̄ oro, ndidi kiet ke otu Mme Ntiense Jehovah.”—Jeremiah 9:24.

Ekem Brọda Morris ama obụk ifiọkutom isụn̄utom kiet ke Africa man owụt nte edide akpan n̄kpọ ndinam ẹfiọk enyịn̄ Jehovah. Isụn̄utom oro akasan̄a ye n̄wan esie aka ndinọ utịn̄ikọ Bible. Ke itie unam ndụn̄ọde, ekpri owoekọn̄ ama anyan eyenete oro ikan̄ ke iso onyụn̄ obụp m̀mê enye edi anie? N̄wan esie ama eti se enye ekekpepde ke Gilead onyụn̄ esịn enye etap ke utọn̄ ete, “Dọhọ enye ke afo edi kiet ke otu Mme Ntiense Jehovah ndien ke ika ndinọ utịn̄ikọ Bible.” Enye ama anam se n̄wan esie ọkọdọhọde, ndien ẹma ẹyak mmọ ẹbe itie unam ndụn̄ọde oro. Ke ndan̄nsiere, ebe ye n̄wan emi ẹma ẹkop ke ekebe utịn̄ikọ ke adaibuot ukara ama asian mbonekọn̄ ete ẹyom mbon oro ẹwotde owo ke ukpeokụk, emi ẹdọhọde ke idi isụn̄utom! Ebe ye n̄wan oro ẹma ẹbọhọ afanikọn̄ ke  ntak emi ẹkedọhọde ke idi Mme Ntiense Jehovah utu ke ndidọhọ ke idi isụn̄utom. Brọda Morris akada utịn̄ikọ esie ekeberi ntem: “Ama aka ekesịm efakutom fo, ka iso bụre mbụre. Bụre ban̄a kpukpru se Jehovah edidade fi inam man ọnọ idemesie nsinsi ubọn̄.”

“Ndi Afo Ayanam Utom Fo?”

Geoffrey Jackson, emi edide owo Otu Ukara ye akani isụn̄utom, ama anam nditọ ufọkn̄wed oro ẹkere ẹban̄a mbụme oro. Enye ama obụp ete, “Ikọ nnyịn esiwọrọ nso ke ini nnyịn idọhọde ke owo edi isụn̄utom?” Enye ama ọdọhọ ke ikọ oro “isụn̄utom” oto ikọ Latin emi aban̄ade owo m̀mê otu emi ẹnọde san̄asan̄a utom. Nte Mme Ntiense Jehovah, utom nnyịn edi ndikwọrọ eti mbụk nnyụn̄ n̄n̄wam mme owo ẹnam n̄kpọ Abasi. Nnyịn inam utom emi nte Jesus, emi ekesikerede aban̄a utom esie ke isọn̄ kpukpru ini. Jesus ọkọdọhọ Pontius Pilate, owo ukara Rome, ete: “Koro n̄kamana kaban̄a emi, n̄konyụn̄ ndi ke ererimbot kaban̄a emi, man n̄kpetie ntiense nnọ akpanikọ emi.”—John 18:37.

Brọda Jackson ama anam nditọ ufọkn̄wed ẹkere ẹban̄a mbụk ekọn̄ Jericho. Ke usen itiokiet mbonekọn̄ Israel ẹkenyene ndibabak ndemede ke usenubọk, nsịne n̄kpọekọn̄, nnyụn̄ nsan̄a n̄kanade Jericho, ke oro okụrede ẹfiak ẹnyọn̄ ufọk. Brọda Jackson ọkọdọhọ ete, “Owo ekeme ndikere ke se mmọ ẹkenamde ikesịneke ifiọk onyụn̄ etie esen esen.” Enye ama ọdọhọ ke ekeme ndidi ndusụk mbonekọn̄ ẹma ẹkere ẹte, ‘Nso ubiatini ededi emi?’ Edi ke ọyọhọ usen itiaba, ẹma ẹteme nditọ Israel ẹte ẹsan̄a ẹkanade ofụri obio oro utịm ikatiaba, ndien ke oro ebede mmọ ẹfiori akamba mfiori. Nso ikedi utịp? Ibibene Jericho ama ọduọ!—Joshua 6:13-15, 20.

Brọda Jackson ama etịn̄ n̄kpọ inan̄ oro mbụk emi ekpepde nnyịn. (1) Oyom ikop item. Inyene ndinam n̄kpọ nte Jehovah etemede, ikereke ke ekikere nnyịn ọfọn akan. (2) Oyom ibuọt idem inyụn̄ iberi edem ke Jehovah. “Oto mbuọtidem ibibene Jericho ẹduọn̄ọ ke isọn̄,” itoho ke n̄kpọ uwụri ibibene. (Mme Hebrew 11:30) (3) Ana inyene ime. Ke edikem ini, edidiọn̄ Jehovah ‘eyesịm fi.’ (Deuteronomy 28:2) (4) Kûkpa mba. Kûdedei ufre utom fo. Brọda Jackson akada ikọ esie ekeberi ntem, “Ẹma ẹti mme n̄kpọ emi, mbufo ẹyenam utom mbufo ẹnyụn̄ ẹnọ Jehovah ubọn̄ ye itoro.”

Mme N̄kpọ En̄wen Oro Ẹkenamde

“Ma Bible ye Andinyene Enye.” Oro ekedi ibuotikọ Maxwell Lloyd, andibuana ke Kọmiti N̄kọk Itieutom United States. Enye ọkọdọhọ nditọ ufọkn̄wed oro ete, “Ana ẹda Bible nte n̄wed emi enyenede ufọn kpukpru ini.” Ekem enye ama esịn udọn̄ ọnọ mmọ ete: Ẹkûdedei ẹyak ima emi mbufo ẹmade Jehovah ebịt. Ẹkûkere ke kpukpru owo ẹfiọk se mbufo ẹkpepde. Ẹdomo ndikpep akpanikọ Bible ke mmemmem usụn̄ man ẹkeme ndisịm esịt nditọ ukpepn̄kpọ mbufo. Ẹsụhọde idem. Ẹkûda idem ke mfiọk-n̄kan. Ẹnịm eti uwụtn̄kpọ. Ẹyak nditọ ukpepn̄kpọ mbufo ẹkụt ke mbufo ẹmenen̄ede ẹma Bible.

“Ẹtịm Ẹse Mme Raven.” Emi ekedi ibuotikọ Michael Burnett, andikpep ke Gilead emi edide akani isụn̄utom. Enye ọkọdọhọ ke esịt eyesitịmede nnyịn ndusụk ini. Edi ẹti item Jesus emi: “Ẹtịm ẹse mme raven ẹte mmọ isuanke n̄kpasịp inyụn̄ idọkke-dọk, . . . ndien Abasi ọbọk mmọ.” (Luke 12:24) Ibet ediomi ọkọdọhọ ke raven edi edidehe unam emi mîkanaha ẹta. Ẹkese mmọ ke n̄kpọ ndek. (Leviticus 11:13, 15) Kpa oro ye ẹkedade mmọ ntre, Abasi ama ọnọ mmọ udia. Brọda Burnett ama ọdọhọ ete, “Ntre edieke esịt enen̄erede ẹtịmede mbufo ke ini iso, ẹkere ẹban̄a mme raven. Edieke Abasi esede aban̄a edidehe inuen emi ẹsede ke ndek, n̄wan̄wadise mbufo emi ẹdide edisana ke enyịn esie!”

“Nnamke fi idiọk ndomokiet.” Mark Noumair, andikpep en̄wen ke Gilead, ama anam kpukpru mbon oro ẹkedụkde edinam emi ẹdụn̄ọde uwụtn̄kpọ emi Jesus ọkọnọde aban̄a mme anamutom ke in̄wan̄ vine. Ndusụk mbonutom ẹma ẹkpa utom ofụri usen. Mbon en̄wen ẹnam ke hour kiet kpọt. Edi kpukpru mmọ ẹkebọ  ukem okụkutom! Mbon oro ẹkenamde utom ẹbịghi ẹkan ẹma ẹkụni ke otu idemmọ. Ete enyene in̄wan̄ vine ama ọdọhọ mbon oro ẹkekụnide ete: “Nnamke fi idiọk ndomokiet. Nte ami ye afo ikebiereke denarius kiet? Bọ se idide okwo nyọn̄.” (Matthew 20:13, 14.) Nso ke emi ekpep nnyịn? Kûmen idemfo udomo ye mbon en̄wen. Brọda Noumair ama ọdọhọ ete, “Edieke ẹmende idem mbufo ẹdomo ye mbon en̄wen nte mîdotke, emi idiyakke ẹkop idatesịt. Emi akam ekeme ndinam mbufo ẹkpọn̄ utom mbufo, ndien ke ntem ẹkpọn̄ ọsọn̄urua ifetutom mbufo.” Brọda Noumair ama eti nditọ ufọkn̄wed oro ke Jesus ọnọ ndausụn̄ ke utom ndamban̄a idọk ke eyo nnyịn ndien ke enye ekeme ndinam n̄kpọ ye mme anditiene enye nte enye amade. Edieke Jehovah ye Jesus ẹnọde mbon en̄wen mme n̄kpọ efen efen, mmọ inamke fi idiọk ndomokiet. Tịn̄ enyịn ke se ẹnode fi, ndien kûdedei uyak “okụkutom” mbon en̄wen ọwọn̄ọde fi ntịn̄enyịn ọkpọn̄ utom emi Jehovah ọnọde fi anam.

Mme Ifiọkutom ye Mme Ndụn̄ọde

Nditọ Ufọkn̄wed Gilead ẹsitiene mme esop Mme Ntiense Jehovah ke mbọhọ oro ẹnam utom ukwọrọikọ ke ini emi mmọ mîkaha n̄wed m̀mê ke ini emi mmọ mînyeneke utom ufọkn̄wed ndinam. Sam Roberson, kiet ke otu mme andikpep ke Ufọkn̄wed Gilead, ama ọdọhọ ediwak nditọ ufọkn̄wed ẹbụk ifiọkutom oro mmọ ẹkenyenede ke an̄wautom. Ke uwụtn̄kpọ, Sista Alessandra Kirchler, ama osobo ye n̄wan kiet emi ekenen̄erede etịmede esịt aban̄a nte eyen esie esin̄wọn̄de sika. Sista Alessandra ama ada Awake! emi enemede aban̄a sika afiak aka ebịne n̄wan emi. Owo ndomokiet ikodụhe ke ufọk, edi enye ama ọkpọn̄ Awake! oro do. Nte ini akakade, Sista Alessandra ama okụt mma oro ke ufọk, mma oro onyụn̄ adara enye. Mma oro ama ama magazine oro onyụn̄ ọdọhọ ete, “Mmesiwak ndikere m̀mê enyene se Abasi odomode ndikpep mi ke ndidomo mi ofụri idomo mi.” Sista Alessandra ama owụt enye ke Bible ke idịghe Abasi esinam afanikọn̄ esịm nnyịn. (James 1:13) Idahaemi, n̄wan oro ye eyen esie ke ẹkpep Bible.

Melvin Jones, emi anamde utom ke Itieutom Utịmutom, ama anam ndụn̄ọde ye owo ita emi ẹdide n̄kani nditọ Ufọkn̄wed Gilead: Jon Sommerud, emi anamde utom ke Albania; Mark Anderson, emi anamde utom ke Kenya; ye James Hinderer, emi anamde utom ke Itieutom Emi Esede Aban̄a Mme Ufọkn̄wed Ukara Abasi. Mmọ mbita ẹma ẹnyịme ke Ufọkn̄wed Gilead ekpep mme akpan ukpepn̄kpọ Bible onyụn̄ ekpep n̄ko nte ẹkemede ndida mme ukpepn̄kpọ emi nsịn ke edinam, inamke n̄kpọ m̀mê nditọ ufọkn̄wed emi ẹdi mmanie m̀mê ẹnyụn̄ ẹnam utom ke m̀mọ̀n̄.

Ekem eyen ufọkn̄wed kiet ama okot leta ekọm emi otụkde owo etieti, emi nditọ ufọkn̄wed emi ẹkewetde. John Barr emi edide isua 96, kpa owo Otu Ukara emi ọsọn̄de akan, ekeberi edinam emi ke akam, eben̄e Jehovah ete ọdiọn̄ utom nditọ ufọkn̄wed ọyọhọ otu 128 emi.

 [Chart/Ndise obio ke page 31]

IDAHA OTU

Ibat idụt oro ẹtode 8

Nditọ ufọkn̄wed 54

Mme ọdọ ndọ 27

Isua emana ke ẹbaharede ukem ukem 35.2

Isua ifan̄ tọn̄ọ ẹkena baptism ke ẹbaharede ukem ukem 19.1

Isua oro ẹdude ke utom uyọhọ ini ke ẹbaharede ukem ukem 13.8

[Ndise obio]

(Ama oyom ndikụt nte enye enen̄erede etie, se idem n̄wed)

Ẹnọ nditọ ufọkn̄wed ẹka idụt 25 oro ẹdude ke idak emi:

IDỤT ORO ẸNỌDE MME ISỤN̄UTOM ẸKA

HONDURAS

GUATEMALA

NICARAGUA

DOMINICAN REPUBLIC

ARUBA

GUYANA

ECUADOR

BOLIVIA

PARAGUAY

LATVIA

ROMANIA

KOSOVO

SERBIA

ALBANIA

GUINEA

LIBERIA

CÔTE D’IVOIRE

GHANA

NAMIBIA

RWANDA

MADAGASCAR

MONGOLIA

TAIWAN

CAMBODIA

INDONESIA

(IDỤT EMI N̄KỌK ITIEUTOM AUSTRALIA ESEDE ABAN̄A)

[Ndise ke page 30]

Nditọ Ufọkn̄wed Gilead ẹnam kiet ke otu ifiọkutom oro mmọ ẹkenyenede ke an̄wautom ẹwụt

[Ndise ke page 31]

Ọyọhọ Otu 128 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible Eke Gilead

Ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Keller, E; Ostopowich, I; Jacobsen, S; Arias, M; Dieckmann, Y; Tanaka, J; Harada, K.

(2) Camacho, L; Kirchler, A; Rodríguez, S; Ward, B; Trenalone, K; Victoria, V; Oxley, F; Nguyen, K.

(3) Oxley, O; De Dios, A; Lindström, C; Allen, J; Meads, T; Waddington, J; Victoria, E.

(4) Harada, H; Lindström, A; Orsini, E; Logue, D; Missud, T; Bergeron, S; Camacho, G; Ward, T.

(5) Kirchler, W; Nguyen, H; Kremer, E.; Burgaud, C; Titmas, N; De Dios, C; Rodríguez, A; Waddington, M.

(6) Dieckmann, J; Allen, C; Titmas, R; Arias, J; Bergeron, E; Keller, J; Ostopowich, F; Burgaud, F.

(7) Tanaka, K; Kremer, J; Jacobsen, R; Trenalone, J; Logue, J; Meads, D; Missud, D.; Orsini, A.