Nsu ye Akpanikọ—Akpanikọ Oro Aban̄ade Jesus

AFO EKERE DIDIE? NDI IKỌ EMI EDI AKPANIKỌ M̀MÊ NSU?

Jesus akamana ke December 25.

Ọfiọkn̄kpọ owo ita ẹma ẹka ẹkese Jesus ke ini enye akamanade.

Jesus ekedi ikpọn̄ eyen.

Jesus ekedi Abasi ke mbiet owo.

Jesus ikedịghe ikpîkpu eti owo.

EDIWAK owo ẹdidọhọ ke kpukpru ikọ emi ẹdi akpanikọ. Ndusụk ẹkeme ndidọhọ ke ọsọsọn̄—idem ke owo ikemeke—ndifiọk. Mmọ ẹkam ẹkeme ndikere ke edieke afo enịmde Jesus ke akpanikọ, ke ibọrọ mbụme emi inen̄ekede inyene se ọwọrọde.

Edi Bible idọhọke ntre. Enye esịn udọn̄ ọnọ nnyịn ete inyene “nnennen ifiọk Ọbọn̄ nnyịn Jesus Christ.” (2 Peter 1:8) Nnyịn inyene ifiọk oro ke ndidụn̄ọde mme Gospel. Mmọ ẹnam ifiọk akpanikọ oro aban̄ade Jesus, ke ntem, ẹnam nnyịn ifiọk se idide nsu ye se idide akpanikọ. Ke ntre, ẹyak ineme se mme Gospel ẹtịn̄de ẹban̄a mme ukpepn̄kpọ oro iketịn̄de ke enyọn̄ emi.

UKPEPN̄KPỌ: Jesus akamana ke December 25.

SE EDIDE: NSU.

Idụhe ebiet ke Bible emi asiakde nnennen ọfiọn̄ m̀mê usen emi Jesus akamanade. Ẹkeda m̀mọ̀n̄, ndien, December 25? The Encyclopædia Britannica ọdọhọ ke ndusụk owo oro ẹkotde idemmọ Christian “ẹkeyom usen oro asan̄a kiet ye usọrọ mme okpono ndem Rome emi ẹkesidiade ndida nti . . . ini etuep emi okoneyo ọniọn̄de akan uwemeyo, ke ini emi uwemeyo afiakde ọtọn̄ọ ndiniọn̄, utịn onyụn̄ ọtọn̄ọde ndinen̄ede nsiaha.” N̄wed oro ọdọhọ n̄ko ke ediwak edinam Christmas oto “mme usọrọ emi mme okpono ndem ẹkesidiade ẹban̄a utọin̄wan̄ ye mme udịmenyọn̄ ke ini etuep.”

 Ndi Jesus ekpenyịme ẹdia usọrọ usen emana imọ ke December 25? Kere ban̄a emi ise: Owo ifiọkke usen emi Jesus akamanade. Idụhe ebiet ke Bible emi etemede nnyịn ete idia usọrọ usen emana Jesus, inyụn̄ idụhe n̄kpọ ndomokiet emi owụtde ke mme Christian eyo mme apostle ẹma ẹdia. Edi Bible etịn̄ nnennen usen emi Jesus akakpade, Jesus ama onyụn̄ owụk mme anditiene enye ete ẹti usen oro. * (Luke 22:19) Ana in̄wan̄-in̄wan̄ ke Jesus okoyom ẹda ufọn n̄kpa uwa imọ nte akpan n̄kpọ, idịghe emana imọ.—Matthew 20:28.

UKPEPN̄KPỌ: Ọfiọkn̄kpọ owo ita (m̀mê ndidem, nte ẹnịmde ke ndusụk ebiet) ẹma ẹkese Jesus ke ini enye akamanade.

SE EDIDE: NSU.

Ekeme ndidi afo emesikụt ndise emi owụtde nte nsek Jesus esịnede ke usịnudia ufene, ọfiọkn̄kpọ owo ita ẹnyụn̄ ẹkama enọ ẹkanade enye ẹkụk. Edi ndise emi edi nsu.

Edi akpanikọ ke mme owo ẹma ẹto Edem Usiahautịn ẹdise Jesus. Edi isenowo emi ẹkenen̄ede ẹdi mme asiak ntantaọfiọn̄. (Matthew 2:1) Mmọn̄ọ, ndi mmọ ẹkekụt nte Jesus esịnede ke usịnudia ufene? Baba; mmọ ẹkeka ẹkese enye ke ufọk. Anaedi ediwak ọfiọn̄ ẹma ẹbe tọn̄ọ Jesus akamana mbemiso mmọ ẹkekade ẹkese enye.—Matthew 2:9-11.

Edi ndi mmọ ẹkedi owo 2? 3? m̀mê 30? Bible isiakke. Ekeme ndidi ẹdọhọ ke mmọ ẹkedi ita ke ntak emi ẹkenọde utọ enọ ita. * (Matthew 2:11) Ndusụk owo ẹkam ẹdọhọ ke owo kiet kiet ke otu inua-okot mme ọfiọkn̄kpọ owo ita oro ẹkeda ẹban̄a nsio nsio orụk ubonowo. Edi utọ ekikere oro idụhe ke N̄wed Abasi. Utu ke oro, nte n̄wed usiakikọ Gospel kiet ọdọhọde, “ewet mbụkeset emi okodude uwem ke n̄kpọ nte isua 1,300 emi ẹkebede akada ekikere esie” etịbi nsu enye emi edi.

UKPEPN̄KPỌ: Jesus ekedi ikpọn̄ eyen.

SE EDIDE: NSU.

Mme Gospel ẹtịn̄ in̄wan̄-in̄wan̄ ke Jesus ama enyene nditọeka. Gospel Luke okot Jesus “akpan” Mary, emi ọwọrọde ke Mary ama enyene nditọ en̄wen. * (Luke 2:7) Gospel Mark ọdọhọ ke ndusụk owo ke obio Nazareth ẹkedọhọ ke Jesus edi ukem ye nditọeka esie, idaha enye nte san̄asan̄a owo. Mmọ ẹkebụp ẹte: “Nte emi idịghe . . . eyeneka James ye Joseph ye Judas ye Simon? Nte nditọeka esie iban inyụn̄ idụhe mi ye nnyịn?”—Mark 6:3; Matthew 12:46; John 7:5.

Kpa ye ofụri se mme Gospel ẹtịn̄de, ediwak mme ekpep ukpepn̄kpọ ido ukpono ẹsụk ẹdọhọ ke Jesus ekedi ikpọn̄ eyen. Ndusụk ẹte ke nditọeka esie oro ẹtịn̄de ẹban̄a do ẹkedi nditọ eyeneka eka m̀mê nditọ eyeneka ete esie. * Mbon eken ẹte ke mmọ ẹkedi nditọebe Mary. Edi kere ban̄a emi ise: Edieke Jesus ekedide ikpọn̄ eyen Mary, ndi mbio obio Nazareth oro ẹkpeketịn̄ se mmọ ẹketịn̄de oro? Edi ndusụk mmọ ẹma ẹda enyịn mmọ ẹkụt ini emi Mary akasan̄ade ye idịbi kpukpru nditọ esie. Mmọ ẹma ẹfiọk ke Jesus ekedi akpa ke otu ediwak nditọ oro Mary akamande.

UKPEPN̄KPỌ: Jesus edi Abasi ke mbiet owo.

SE EDIDE: NSU.

Ebịghi mme owo ẹketọn̄ọ ndidọhọ ke Abasi ekedi isọn̄ edidụn̄ nte owo emi ekedide Jesus, emi edide ọkpọikọ ke ukpepn̄kpọ Abasi-Ita-ke-Kiet—edi owo ikesitịn̄ke utọ ikọ emi ke  ini emi Jesus okodude ke isọn̄. Utu ke oro, The Encyclopædia Britannica ọdọhọ ete: “Ikọ oro Abasi-Ita-ke-Kiet m̀mê in̄wan̄în̄wan̄ ukpepn̄kpọ ntre idụhe ke Obufa Testament . . . Ukpepn̄kpọ oro ọkọtọn̄ọ sụn̄sụn̄ ke ediwak isua ikie emi ẹkebede onyụn̄ ebe ke ediwak eneni.”

Ido ukpono akam ososụhọde Jesus itie ke ini enye ekpepde ke Jesus ekedi Abasi ke mbiet owo. * Asan̄a didie edi ntre? Kere ban̄a uwụtn̄kpọ emi. Mbonutom ẹben̄e eseutom mmọ n̄kpọ, edi enye ọdọhọ mmọ ke imọ inyeneke unen ndinọ mmọ n̄kpọ oro. Edieke ikọ esie edide akpanikọ, eseutom oro ada mbufiọk owụt ke enyene mme n̄kpọ oro imọ mîkemeke ndinam. Edieke mîdịghe akpanikọ—oro edi, edieke enye ekemede ndinọ se mmọ ẹben̄ede edi imaha ndinam—enye ababian̄a.

Edi Jesus ọkọdọhọ didie ke ini mbet esie iba ẹkeyomde ikpọ itie? Enye ọkọdọhọ mmọ ete: “Editie ke nnasia mi ye ke ufien mi inyeneke mi ndinọ, edi enyene mbon emi Ete mi eketịmde oro ọnọ.” (Matthew 20:23) Edieke Jesus ekpedide Abasi, ndi oro ikpedịghe nsu? Edi Jesus ndidọhọ ke Enye emi okponde akan enyene ndinam n̄kpọ emi, enye ekenịm eti uwụtn̄kpọ ke idịghe kpukpru n̄kpọ ke imọ ikeme ndinam—enye okonyụn̄ owụt ke imọ idịghe n̄ka ye Abasi.

UKPEPN̄KPỌ: Jesus ikedịghe ikpîkpu eti owo.

SE EDIDE: AKPANIKỌ.

Jesus ama etịn̄ in̄wan̄-in̄wan̄ ke imọ idịghe ikpîkpu eti owo. Enye ọkọdọhọ ete: “Ami ndi Eyen Abasi.” (John 10:36) Edi akpanikọ ke owo ekededi ekeme ndidọhọ ke imọ idi Eyen Abasi. Edi edieke se Jesus eketịn̄de ekedide nsu, oro akpanam enye edi nso utọ owo? Ke akpanikọ, ọkpọwọrọ ke enye idịghe eti owo, edi ke edi ata owo abian̄a!

Abasi ke idem esiemmọ enen̄ede etịn̄ owo emi Jesus edide. Enye ama etịn̄ ikaba aban̄a Jesus ete: ‘Emi edi Eyen mi.’ (Matthew 3:17; 17:5) Kere ban̄a emi: N̄wed Abasi etịn̄ ikafan̄ kpọt aban̄a ini emi mme owo ẹkekopde uyo Abasi ke isọn̄—edi ikaba ke otu emi Abasi ọdọhọ ke Jesus edi Eyen imọ! Emi edi akakan uyarade ke Jesus edi owo emi enye ọkọdọhọde nte imọ idide.

Ndi ibuotikọ emi asian fi n̄kpọ emi mûkọfiọkke uban̄a Jesus? Edieke edide ntre, mbọk ka iso dụn̄ọde mme Gospel emi ẹkedade odudu spirit Abasi ẹwet. Utọ ukpepn̄kpọ oro eyenen̄ede enem fi onyụn̄ anam ọfiọk ekese n̄kpọ. Jesus ke idem esiemmọ ọkọdọhọ ke ndikpep akpanikọ oro aban̄ade enye ye Ete esie ‘ọwọrọ nsinsi uwem.’—John 17:3.

[Mme Ikọ Idakisọn̄]

[Ekebe/Ndise ke page 14]

Mme N̄kpọ En̄wen Oro Ẹkemede Ndikpa Fi Idem

Jesus eketie didie ke ini enye ekedide owo? Ndi enye ekedi owo emi mîkamaha nti n̄kpọ, mîkekereke iban̄a owo, tutu edi se mme usụhọde owo mîkekemeke ndisan̄a n̄kpere enye? Ndusụk owo ẹkeme ndibọrọ ih. Ekeme ndidi oro anam akpa mmọ idem ndifiọk ke Jesus . . .

• ama esika usọrọ.—John 2:1-11.

• ama esitoro mme owo.—Mark 14:6-9.

• ama ama nditọwọn̄.—Mark 10:13, 14.

• ama atua eyet ke eferife.—John 11:35.

• ama esitua owo mbọm.—Mark 1:40, 41.