Se Ikpepde Ito Jesus

Iban̄a Utuakibuot Akpanikọ

Ndi Abasi enyịme kpukpru utuakibuot?

▪ Mbọm mbon oro nsunsu ido ukpono ẹkebian̄ade ama anam Jesus. Enye ama ọdọhọ mme owo ete ẹkpeme idem ye “mme prọfet nsu emi ẹfọrọde ikpa erọn̄ . . . edi ke esịt esịt ẹdide ndiọi wolf.” (Matthew 7:15) Ndi omokụt ke ndusụk owo ẹda ido ukpono ẹnam ndiọi n̄kpọ?

Jesus ọkọbọn̄ akam ntem ọnọ Abasi: “Ikọ fo edi akpanikọ.” (John 17:17) Ntre, Abasi inyịmeke utuakibuot emi mîkemke ye akpanikọ Bible. Mmọdo, Jesus ọkọdọhọ ke ikọ Abasi emi osu ndusụk mbon ido ukpono emi ẹkedide mbubịk: “Mmọ ẹka iso ndikpono mi ke ikpîkpu, koro mmọ ẹkpepde mme ewụhọ owo ke mme ukpepn̄kpọ mmọ.”—Matthew 15:9.

Ndi ido ukpono akpanikọ odu?

▪ Ke ini Jesus okosobode ye n̄wan kiet ke Samaria emi nsunsu ido ukpono akabian̄ade, enye ama ọdọhọ n̄wan oro ete: “Mbufo ẹtuak ibuot ẹnọ se mbufo mîfiọkke . . . Ata mme andituak ibuot [ẹdituak] ibuot ẹnọ Ete ke spirit ye ke akpanikọ, koro, ke akpanikọ, edi utọ mme owo emi ke Ete oyom ete ẹtuak ibuot ẹnọ imọ.” (John 4:22, 23) Ọwọrọ ke utuakibuot akpanikọ odu.

Jesus ọkọdọhọ ete: “Nnamke baba n̄kpọ kiet ke odudu idemmi; edi kpa nte Ete ekekpepde mi kpa ntre ke ntịn̄ mme n̄kpọ emi.” Ntre Jesus ama ọfiọk ke ido ukpono oro imọ ikekpepde mme owo ekedi n̄kukụre ido ukpono akpanikọ. (John 8:28) Mmọdo, enye ọkọdọhọ ete: “Ami ndi usụn̄ ye akpanikọ ye uwem. Baba owo kiet itieneke Ete ibọhọke ebe ke ami.” (John 14:6) Sia mme andituak ibuot ke nnennen usụn̄ ẹtuakde ibuot ke ukem usụn̄ ẹnọ Ete, ọwọrọ ke ana mmọ ẹdu ke ido ukpono akpanikọ kiet.

 Afo ekeme ndisan̄a didie mfiọk mme andituak ibuot ke nnennen usụn̄?

▪ Christian edi owo emi etienede Jesus Christ. Kere ban̄a usụn̄ inan̄ emi edikpebe uwụtn̄kpọ Jesus anamde ẹnen̄ede ẹfiọk mme anditiene enye.

1. Jesus Christ ọkọbọn̄ akam ntem ọnọ Jehovah: ‘Ami mmanam ẹfiọk enyịn̄ fo.’ (John 17:26) Ata mme Christian ke ẹsụk ẹnanam ntre n̄ko.

2. Jesus ama ọkwọrọ aban̄a Obio Ubọn̄ Jehovah, onyụn̄ ọdọn̄ mme mbet esie ẹsan̄a ke ufọk ke ufọk ẹnam kpasụk ntre. Enye ọkọdọhọ ete: “Ke obio m̀mê obio-in̄wan̄ ekededi eke mbufo ẹdụkde, ẹyom owo eke odotde ke esịt.” Ekem, enye ama ọdọhọ mme anditiene enye ete: “Mmọdo ẹka ẹkenam mme owo ke kpukpru idụt ẹdi mbet mi.” (Matthew 10:7, 11; 28:19) Afo emekeme ndisọsọp mfiọk ata mme Christian mfịn koro mmọ ke ẹka iso ẹnam utom oro.

3. Jesus ikesịnke idem ke mbubehe ukara. Ntak edi oro enye eketịn̄de aban̄a mme anditiene enye ete: “Mmọ [idịghe] ubak ererimbot, kpa nte ami mmendịghe ubak ererimbot.” (John 17:14) Mme owo ẹkpenyene ndinen̄ede mfiọk ke mme andituak ibuot ke nnennen usụn̄ isịnke idem ke mbubehe ukara.

4. Jesus ama esiyak n̄kpọ atak enye man ama mme owo. Enye ọkọdọhọ ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:35) Ata mme Christian ẹkere ẹban̄a kiet eken, inyụn̄ itieneke in̄wana ekọn̄.

Didie ke afo ekeme ndibọ ufọn nto utuakibuot akpanikọ?

▪ Ana owo ebem iso ọfiọk Jehovah edifọn edifọn mbemiso ekemede ndituak ibuot ke nnennen usụn̄ nnọ enye. Ifiọk Abasi edinam owo odu mfọnn̄kan uwem, onyụn̄ anam enye ama Abasi ke ofụri esịt. Jehovah ọn̄wọn̄ọ ndinọ mbon oro ẹmade enye nsinsi uwem. Ntak edi oro Jesus ọkọdọhọde ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet.”—John 17:3.

Edieke oyomde ndifiọk n̄kpọ en̄wen mban̄a n̄kpọ emi, se ibuot 15 ke n̄wed emi

[Ndise ke page 16]

“Ẹkpeme idem ye mme prọfet nsu emi ẹfọrọde ikpa erọn̄ ẹdi ke ọtọ mbufo, edi ke esịt esịt ẹdide ndiọi wolf.”—Matthew 7:15