Se Ikpepde Ito Jesus

Iban̄a Ebiet Emi Mme Owo Ẹdidude

Ndi Jesus ama ọdọhọ ke mme owo ẹyeka heaven?

Ih! Jesus ke idemesie ama aka heaven okodu ye Ete esie ke enye ama ekeset. Edi mbemiso enye akakpade onyụn̄ esetde, enye ama ọdọhọ mme anam-akpanikọ apostle esie 11 ete: “Ke ufọk Ete mi ediwak ebietidụn̄ ẹdu. . . . Mmọn̄ nnyọn̄ n̄ka n̄ketịm itie nnịm nnọ mbufo.” (John 14:2) Edi mbon oro ẹdikade heaven iwakke. Jesus ama anam emi an̄wan̄a ke ini enye ọkọdọhọde mme mbet esie ete: “Ẹkûfehe ndịk, ekpri otuerọn̄, koro Ete mbufo emenyịme ndida obio ubọn̄ oro nnọ mbufo.”—Luke 12:32.

Nso ke “ekpri otuerọn̄” emi ẹdinam ke heaven?

Abasi oyom mmọ ẹdikara ye Jesus ke heaven. Isan̄a didie ifiọk? Ke Jesus ama ekeset, enye ama owụt apostle John ke n̄kukụt nte ke ndusụk mme anam-akpanikọ asan̄autom Abasi “ẹyekara isọn̄ nte ndidem.” (Ediyarade 1:1; 5:9, 10) Emi edi eti mbụk koro kiet ke otu n̄kpọ oro ubonowo ẹnen̄erede ẹyom edi eti ukara. Nso ke ukara emi Jesus edide edidem mi edinam? Jesus ọkọdọhọ ete: “Ke ini ẹdifiakde ẹbot mme n̄kpọ, ke ini Eyen owo osụhọrede etie ke ebekpo ubọn̄ esie, mbufo emi ẹtienede mi ẹyesụhọde n̄ko ẹtie ke ebekpo duopeba.” (Matthew 19:28) Ukara oro Jesus ye mbon emi ẹdikade heaven ẹdikarade ‘ayafiak obot mme n̄kpọ,’ m̀mê anam isọn̄ afiak edi Paradise  nte ekedide mbemiso Adam ye Eve ẹnam idiọkn̄kpọ.

Nso idotenyịn ke Jesus ọkọnọ mbon oro mîdikaha heaven?

Ẹkebot Jesus ndidu ke heaven, edi ẹbot isọn̄ ẹnọ nditọ owo. (Psalm 115:16) Ntak edi oro Jesus ọkọdọhọde ete: “Mbufo ẹto ke ikpehe eke isọn̄; ami nto ke ikpehe eke enyọn̄.” (John 8:23) Jesus ama etịn̄ nte n̄kpọ edifọnde ye ubonowo ke isọn̄ ke ini iso. Enye ama ọdọhọ isan̄ kiet ete: “Inemesịt edi eke mme enyene ifụre ifụre ido, koro mmọ ẹyeda isọn̄ ẹnyene.” (Matthew 5:5) Enye eketịn̄ aban̄a se idude ke Psalm 37:11, 29, emi ọdọhọde ete: “Mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt. Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”

Ntem, idịghe “ekpri otuerọn̄” emi ẹkade heaven kpọt ẹdinyene nsinsi uwem. Jesus ama etịn̄ n̄ko aban̄a idotenyịn oro ediwak miliọn owo ẹnyenede. Enye ọkọdọhọ ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.”—John 3:16.

Nso ke Abasi edinam man mme owo ẹkûbọ aba ufen?

Jesus ama etịn̄ ikọ oro owụtde ke ubonowo ẹyebọhọ ikpọ afanikọn̄ iba. Enye ọkọdọhọ ete: “Ekem ini ikpe ererimbot emi; ke emi ẹmọn̄ ẹsio andikara ererimbot emi ẹduọk.” (John 12:31) Akpa, ẹyebiere ikpe ẹnọ kpukpru ndiọi owo oro ẹsinamde mme owo ẹbọ ufen, ẹnyụn̄ ẹsobo mmọ. Ke oro ebede, ẹyesio Satan ẹduọk, ndien enye idikemeke aba ndibian̄a mme owo.

Nso kaban̄a mme akpan̄kpa oro mîkenyeneke ifet ndifiọk Abasi ye Jesus Christ nnyụn̄ mbuọt idem ye mmọ? Jesus ọkọdọhọ anamidiọk oro ẹkekọn̄de ke eto ẹkpere enye ete: “Afo oyodu ye ami ke Paradise.” (Luke 23:43) Anamidiọk oro, ye ediwak miliọn owo emi Jesus edinamde ẹset ke ini ẹdinamde isọn̄ edi Paradise, eyenyene ifet ndikpep n̄kpọ mban̄a Abasi. Enye edisịne ke otu mbon nsụkidem m̀mê nti owo oro ẹdidude uwem ke isọn̄ ke nsinsi.—Utom 24:15.

Edieke oyomde ndinyene ekese ifiọk mban̄a emi, mbọk kot ibuot 3 ye ibuot 7 ke n̄wed Nso ke Bible Enen̄ede Ekpep? *

[Ikọ Idakisọn̄]

[Ndise ke page 23]

“Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” —Psalm 37:29