Ndi Ama Ọfiọk?

Ntak ẹkenọde Judas mbak silver 30 man ada Jesus ọnọ?

Ke ini Judas Iscariot akakade ebịne mbọn̄ oku ndikobụp m̀mê okụk ifan̄ ke ẹdinọ imọ man ida Jesus inọ, mmọ ẹma ẹnyịme ndinọ enye “mbak silver edịp-ye-duop.” (Matthew 26:14, 15) Etie nte ibat okụk emi okowụt nte mmọ ẹkesuade Jesus ye nte mmọ ẹkedade enye ke usụhọde.

Etie nte okụk emi ekedi shekel silver emi mme Jew ẹkesidade ẹdep n̄kpọ. Nso ke ẹkesida mbak silver 30 ẹdep ini oro? Ibet Moses owụt ke ẹkesida okụk emi ẹdep ofụn. Ẹma ẹsinyụn̄ ẹda mbak silver 30 ẹdep isọn̄.—Exodus 21:32; Matthew 27:6, 7.

Ke ini prọfet Zechariah ọkọdọhọde nditọ Israel emi mîkanamke akpanikọ ẹnọ imọ utịp utom imọ nte andikpeme ikọt Abasi, mmọ ẹma ẹdomo “shekel silver edịp ye duop” ẹnọ enye. Ẹkekokoi ẹnam emi ndisụhọde prọfet Abasi emi itie nnyụn̄ n̄wụt ke mmimọ ida enye nte ofụn. Ntem, Jehovah ọkọdọhọ Zechariah ete: “Men enye duọk nọ obot-eso, ata akwa ekọm-urua emi mmọ ẹkọmde mi.” (Zechariah 11:12, 13) Zechariah ndikemen okụk emi nduọk nte eketemede enye eti nnyịn se Judas Iscariot akanamde ye okụk emi enye ọkọbọde ada Enye emi Jehovah ekemekde ndidi andikpeme Israel ọnọ.—Matthew 27:5.

Nso ikedi “n̄wed usio-ndọ” oro ẹtịn̄de ẹban̄a ke Bible?

Ibet Moses ọkọdọhọ ete: “Ke adan̄aemi owo adade n̄wan ọdọ, ama ekem edieke n̄wan mînemke enye esịt, koro okụtde enye n̄kpọ bụt ke idem: ndien yak enye ewet n̄wed usio-ndọ ọnọ n̄wan, esịn enye ke ubọk, ndien anam enye ọwọrọ ke ufọk esie.” (Deuteronomy 24:1) Nso ikanam ẹwet n̄wed usiondọ emi? N̄wed Abasi itịn̄ke se ẹkewetde ke n̄wed usiondọ emi, edi eyịghe idụhe nte ke enye ama ekpeme n̄wan oro ẹkesiode ndọ.

Ke 1951-1952, ẹma ẹsion̄o ediwak n̄kpọeset ke abaitiat emi odude ke edem edere Wadi Murabbaat, kpa nsat isọn̄ akpa ke desat Judea. Ediwak n̄kani ikpan̄wed oro ẹkekụtde do ẹma ẹsịne n̄wed usiondọ oro ẹkewetde ke usem Aramaic ke n̄kpọ nte isua 71 m̀mê 72 E.N. N̄wed usiondọ oro ama etịn̄ se iketịbede ke akpa usenọfiọn̄ ke ọfiọn̄ Marheshvan, ke ọyọhọ isua itiokiet tọn̄ọ nte mme Jew ẹken̄wana ye mbon Rome. Joseph eyen Naqsan emi okodụn̄de ke Masada ama osio Miriam eyen Jonathan emi okotode Hanablata, ndọ. Miriam ama ekeme ndidọ owo Jew en̄wen ekededi oro enye akamade. Joseph ama ọkpọn̄ n̄kpọ ndọ Miriam ọnọ onyụn̄ ekpe n̄kpọ esie ekededi oro akabiarade utịm ikanan̄. Joseph ke idemesie ama esịn ubọk ke n̄wed usiondọ oro, ọkọrọ ye ntiense ita, oro edi, Eliezer, eyen Malka; Joseph, eyen Malka; ye Eleazar, eyen Hanana.

[Ndise ke page 25]

Abaitiat ke Wadi Murabbaat

[Ndise ke page 25]

N̄wed usiondọ emi ẹkewetde ke n̄kpọ nte isua 71 m̀mê 72 e.n.

[Mme Ebiet Ẹdade Ndise Ẹto ke page 25]

Caves: Todd Bolen/Bible Places.com; certificate: Clara Amit, Courtesy of the Israel Antiquities Authority