Leta Australia

“Mmọn̄ Ntie ke Mbenikan̄ N̄kot Enye Okoneyo Emi”

KE INI ẹtịn̄de n̄kpọ ẹban̄a obio-in̄wan̄ Australia, se isidụkde owo ekikere esidi ebiet oro etiede nsatnsat, emi nainai eyo adade, ye akamba obio oro etiede ukpọk ukpọk. Kpa ye oro, ke otu owo miliọn 20 ye udori oro ẹdụn̄ọde ke ofụri Australia, n̄kpọ nte owo 180,000 ẹdụn̄ọ ke obio-in̄wan̄ emi.

Ete ye eka mi oro ẹdide Mme Ntiense Jehovah ẹma ẹda mi ẹka ukwọrọikọ ke obio-in̄wan̄ emi ini n̄kedide eyenọwọn̄. Mma nnen̄ede mma nte obio-in̄wan̄ emi okokponde onyụn̄ eyede. Mma nnyụn̄ mma mmemmem uwem nditọ obio oro. Sia ndide ete ubon idahaemi, n̄koyom n̄wan mi ye nditọ mi oro ẹdide isua 10 ye 12 ẹtiene ẹkekụt se n̄kokụtde.

Ntịmidem Ukaisan̄

Akpa kan̄a, nnyịn ima itie ikere se iditakde. Okụk oro inyenede edida nnyịn esịm m̀mọ̀n̄? Ikpebịghi adan̄a didie? Ebe ye n̄wan oro ẹdide mme asan̄autom uyọhọ ini ke esop nnyịn ẹma ẹnyịme nditiene nnyịn. Nnyịn ima ibiere ndidaha ke n̄wed ama etre. Ekem ima iwet n̄kọk itieutom Mme Ntiense Jehovah ke Australia idọhọ ẹnọ nnyịn ebiet oro idikwọrọde ikọ. Ẹma ẹdọhọ ikọkwọrọ ikọ ke nsannsan obio emi odude ekpere Goondiwindi, kpa ekpri obio-in̄wan̄ emi edide n̄kpọ nte kilomita 400 tọn̄ọ ke edem usoputịn Brisbane, emi nnyịn ikodụn̄ọde.

Ima idifiọk ke ekpri esop Mme Ntiense Jehovah odu ke Goondiwindi. Emi ekedi edidiọn̄ efen efen. Ndisobo iren ye iban oro ẹdide Christian eyenen̄ede anam isan̄ nnyịn etetịm enem. Ima inam mmọ ẹfiọk ke nnyịn ke idi. Mmọ ẹma ẹsọsọp ẹbọrọ ke idatesịt ndiwụt ke mmimọ ke ibet nnyịn.

Esisịt ini mbemiso idahade, ima isop idem ineme nte idisan̄ade ikwọrọ eti mbụk Obio Ubọn̄ ke obio-in̄wan̄ emi. Nnyịn ikenen̄ede iyom ndikpono mme amanaisọn̄ obio emi ye nte mmọ ẹsinamde n̄kpọ. Ke uwụtn̄kpọ, ndusụk ekpụk ẹda isọn̄ mmọ nte inyene obio. Ndien ikpọfọnke ndibe ntre ndụk isọn̄ owo ke mme andinyene mîdọhọke nnyịn idi.

Imesịm Obio-In̄wan̄

Usen oro ikoyomde ndidaha ama edisịm. Ima idọn̄ mbiomo iyọhọ ubomisọn̄ nnyịn mbiba, idụk iwat idaha. Nnyịn ikebem iso ikụt in̄wan̄, edi nte ikosụk iwatde ikpere Goondiwindi, ima itọn̄ọ ndikụt mbiet ye mme eto ifan̄. Utịn ini etuep emi ebiet ediye n̄wanndọ. Ke ima ikawat ke hour ifan̄, ima idisịm Goondiwindi inyụn̄ ikpe okụk idụk ina okoneyo oro ke ekpri ufọk ke ebiet oro ẹsibonde ubomisọn̄ mbiomo.

 Ke ndan̄nsiere, oro edi, Sunday, eyo ama enen̄ede eye, enem ndika ukwọrọikọ. Eyo esinen̄ede ada mi ke ndaeyo. Akpa ebiet oro ikesịmde ekedi obio-in̄wan̄ mme amanaisọn̄ oro edide n̄kpọ nte kilomita 30 tọn̄ọ ke ebiet oro ikadan̄de. Ẹma ẹdọhọ nnyịn ikosobo ye akanian̄wan kiet oro ekerede Jenny, kpa ọbọn̄ obio-in̄wan̄ oro. Mma oro ama akpan̄ utọn̄ okop nte ikwọrọde ikọ onyụn̄ ọbọ n̄wed Kpep N̄kpọ to Akwa Andikpep * ke inemesịt. Enye ama ọdọhọ idụk obio-in̄wan̄ ikwọrọ ikọ inọ mme owo.

Nditọwọn̄ obio-in̄wan̄ oro ẹma ẹsibem nnyịn iso ẹketọt mme enyeneufọk ẹte ke isenowo ke ẹdi. Kpukpru owo oro ikosobode ẹma ẹkpan̄ utọn̄ ukpono ukpono ẹkop etop Bible ẹnyụn̄ ẹbọ n̄wed. Ikebịghike, n̄wed oro ikakamade ama okụre, ndien akana ifiak isịm obio man ikodụk mbono esop. Mbemiso ikadahade, ima ibiere ndifiak mbịne mbon oro nnyịn mîkosoboke ke ufọk.

Mme owo ẹma ẹyọhọ Ufọkmbono Obio Ubọn̄ uwemeyo oro, ẹneme nneme, ẹnyụn̄ ẹnam mbufa ufan. Mme Ntiense 25 oro ẹdude do ke ẹkesịn idem ẹtan̄a etop Obio Ubọn̄ ẹnọ n̄kpọ nte owo 11,000 oro ẹdụn̄ọde ke ofụri akaka ikpehe obio-in̄wan̄ oro. Ntiense kiet ama ọkọm nnyịn ete: “Mbọk ẹsọsọn̄ọ ke ndikesịn ukeme ndi ndin̄wam nnyịn.” Ke mbono esop ama akasuana, nnyịn ima ifiak isobo man ida ubọk ika inua. Mbemiso ikodụkde idap usen oro, ima inọ eku mbakara oro okosụk akande ekpere nnyịn udia.

“Mmọn̄ Ntie ke Mbenikan̄ N̄kot Enye Okoneyo Emi”

Ke usen iba ẹma ẹkebe, ima iwat ke ubomisọn̄ mbiba ikọkwọrọ ikọ ke nsannsan obio-in̄wan̄ oro ufọk ẹkedude ntomo ntomo ke n̄kpere Queensland-New South Wales. Mbiet oro erọn̄ ye enan̄ ẹsitade ẹyọyọhọ obio-in̄wan̄ emi, eto ẹnyụn̄ ẹdu n̄ko. Ima ikụt ediwak unam oro ẹbietde edop nte ẹnyen̄ede utọn̄ ke ini ẹkụtde nnyịn. Ima ida ikụt ikpọ inuen oro mîsifehe ẹsan̄ade ẹbe.

Ima ikụt ediwak enan̄ ẹsan̄ade sụn̄sụn̄ ke usụn̄ ke uwemeyo Tuesday. Mme ekpeme enan̄ ẹsima ndida ufene mmọ ndi mi akpan akpan ke ini edịm mîdepke ke anyan ini. Ikebịghike, ima ikụt ekpeme enan̄ kiet odorode ke enyọn̄ enan̄-mbakara esie. Mma n̄wat n̄kadian ke mbenusụn̄ nnyụn̄ n̄kọm enye. Enye ama ọbọrọ ete: “Ufan mmọkọm nde.” Ọbọn̄ emi ama atuak ada ye ebua esie oro esitienede ekpeme enan̄ esie, ima inyụn̄ itọn̄ọ nneme.

Ke ima ikeneme esisịt ini iban̄a edịm oro mîkedepke ke anyan ini, mma ntop nneme Bible nsịn. Enye ama ọdọhọ ke ‘imọ ikopke n̄kpọ ndomokiet iban̄a Bible tọn̄ọ ini ikedide eyenọwọn̄.’ Enye ọkọdọhọ ke mme ọkwọrọ ederi ẹbiat ererimbot emi. Kpa ye oro, enye okosụk enenen̄ede okpono Bible. Ke ima ikenyene inem inem nneme ke N̄wed Abasi, mma nnọ enye n̄wed Nso ke Bible Enen̄ede Ekpep? * Enye ama ọbọ n̄wed oro esịn ke ekpat ọfọn̄idem esie onyụn̄ ọdọhọ ete: “Edieke n̄wed emi edinamde mfiọk se Bible ekpepde, mmọn̄ ntie ke mbenikan̄ n̄kot enye okoneyo emi.”

Ini Unyọn̄ Edisịm

Ima ibụk ifiọkutom nnyịn mbubịteyo oro inọ nditọete ke Ufọkmbono Obio Ubọn̄. Mmọ ẹma ẹdọhọ ke iyafiak ikese mbon oro ẹkenyenede udọn̄. Ke mbono esop ama akasuana, eketie nte nnyịn ikpọnyọn̄ke aba. Kpukpru nnyịn iketie nte itai ye aban̄. Nsịnudọn̄ eke spirit oro kpukpru nnyịn ikọnọde kiet eken ama enen̄ede ọsọn̄ọ nnyịn idem ke n̄kan̄ eke spirit.—Rome 1:12.

Ima idụk usụn̄ unyọn̄ ke ndan̄nsiere. Ke ima iketie ikere nte isan̄ nnyịn emi eketiede, ima ikụt ke Jehovah ama enen̄ede ọdiọn̄ ukeme oro ikesịnde. Ima ifiọk ke imenen̄ede isan̄a ikpere Jehovah. Ke ima ikesịm ufọk, mma mbụp nditọ nnyịn nte: “M̀mọ̀n̄ ke ẹkpema ika nduọkodudu ini en̄wen? Ndi ẹyema ika ikpọ obot?” Mmọ ẹkebọrọ uyo kiet ẹte: “Nnyịn iyomke ikpọ obot, iyom ndifiak n̄kọkwọrọ ikọ ke obio-in̄wan̄ Australia.” N̄wan mi ama ekpere ndibọ mmọ ikọ ke inua, ete: “Nsịn ke uyo oro. Nduọkodudu enye emi ekedi etịp atua!”

[Mme Ikọ Idakisọn̄]