Mme Ntantaọfiọn̄ Ẹnam Ẹfiọk Odudu Abasi

“Ẹmenede enyịn mbufo ke enyọn̄, ẹnyụn̄ ẹse! Anie okobot mme mmọ emi? Anie ada otu mmọ ọwọrọ ke ibat mmọ? Enye osio kpukpru mmọ enyịn̄: koro nsọn̄idem esie okponde, enye onyụn̄ ọsọn̄ odudu; baba owo mmọ kiet isopke.”—ISAIAH 40:26.

UTỊN edi uke uke ntantaọfiọn̄. Kpa ye oro, utịn odobi utịm ike-330,000 akan isọn̄. Ekese ntantaọfiọn̄ oro ẹkperede isọn̄ ikponke nte utịn. Edi mme ntantaọfiọn̄ eken, utọ nte enye oro ẹkotde V382 Cygni, odobi utịm ike-27 ke nsụhọde n̄kaha akan utịn.

Utịn ofiop adan̄a didie? Edieke ufiop ikan̄ oro ẹbarade ke kilomita 15 otụkde fi, ọwọrọ ke ikan̄ oro enen̄ede ọsọn̄ odudu. Tọn̄ọ ke isọn̄ sịm ebiet emi utịn odude edi n̄kpọ nte kilomita miliọn 150. Kpa ye oro, ufiop eyo ekeme ndibụp owo idem ke usen anainai eyo. Edi n̄kpọ n̄kpaidem ndifiọk ke ata nịn̄inịn̄i ufiop utịn kpọt esisịm isọn̄. Kpa ye oro, ekpri ufiop emi anam uwem odu ke isọn̄.

Ke akpanikọ, ntaifiọk ẹdọhọ ke utịn enyene odudu ekem ndinọ n̄kpọ nte ekondo oro okponde nte isọn̄ ke itie triliọn 31, un̄wana. Ke nditịn̄ ke usụn̄ en̄wen, ntaifiọk ẹdọhọ ke ikpehe Intanet Space Weather Prediction Center (SWPC) ẹte ke ufiop oro ọwọrọde ke utịn ke sekọn kiet kpọt ekeme ndinọ ofụri United States “ikan̄—ke udomo oro mmọ ẹnyenede idahaemi—ke isua miliọn 9.”

Ufiop esito esịt utịn ọwọrọ. Utịn enen̄ede okpon, esịt esie onyụn̄ enen̄ede otụn̄ọ tutu esida ediwak miliọn isua ufiop ndito esịt esie n̄wọrọ ndisịm enyọn̄. Ntaifiọk ẹdọhọ ke “edieke Utịn ekpetrede ndinọ un̄wana mfịn, ke akpada isua 50,000,000 mbemiso mme owo ke Isọn̄ ẹfiọk!”

Ọfọn, kere ban̄a emi: Ke ini esede ikpaenyọn̄ ke okoneyo oro enyọn̄ an̄wan̄ade, afo oyokụt ediwak tọsịn ntantaọfiọn̄, kpukpru ẹnen̄ede ẹfiop nte utịn. Ndien ntaifiọk ẹdọhọ ke ntantaọfiọn̄ oro ẹdude ke ekondo ẹdi ananaibat!

Kpukpru ntantaọfiọn̄ emi ẹketo m̀mọ̀n̄? Ekese ntaifiọk ẹnịm ke mmimọ ifiọkke nte ekondo akasan̄ade edidu ke mbuari ke n̄kpọ nte isua biliọn 14 emi ẹkebede. Bible etịn̄ in̄wan̄-in̄wan̄ ete: “Ke editọn̄ọ Abasi okobot enyọn̄ ye isọn̄.” (Genesis 1:1) Eyịghe idụhe nte ke Enye emi okobotde ikpọ okopodudu ntantaọfiọn̄ emi enen̄ede “ọsọn̄ odudu.”—Isaiah 40:26.

Nte Abasi Adade Odudu Esie Anam N̄kpọ

Jehovah Abasi esida odudu esie an̄wam mbon oro ẹnamde uduak esie. Ke uwụtn̄kpọ, apostle Paul ama esịn idem ekpep mme owo n̄kpọ aban̄a Abasi. Paul ekedi owo nte nnyịn, edi enye ama ekeme ndinam ekese kpa ye ubiọn̄ọ. Enye akasan̄a didie anam emi? Enye ọkọdọhọ ke Abasi ọkọnọ imọ “odudu eke ebede ukeme owo.”—2 Corinth 4:7-9.

 Jehovah Abasi esinyụn̄ ada odudu esie osobo mbon oro ẹkoide-koi ẹbiat ibet esie. Jesus Christ ama etịn̄ aban̄a nsobo Sodom ye Gomorrah ye Ukwọ eyo Noah ndiwụt ke Jehovah esisobo mme idiọkowo kpọt. Jesus ama etịn̄ ete ke ibịghike, ke Jehovah ayafiak ada odudu esie osobo mbon oro ẹfụmide mme edumbet Esie.—Matthew 24:3, 37-39; Luke 17:26-30.

Etie Fi Didie ke Idem?

Ke ama eketie ekere nte mme ntantaọfiọn̄ ẹnamde ifiọk odudu Abasi, ekeme nditie fi ke idem nte eketiede Edidem David emi ọkọdọhọde ete: “Ke adan̄aemi nsede enyọn̄, utom nnuenubọk fo, ọfiọn̄ ye ntantaọfiọn̄ emi afo owụkde; nso n̄kpọ edi owo eke afo etide enye? nso n̄kpọ edi eyen owo eke afo edide edise enye?”—Psalm 8:3, 4.

Ih, ke ini itiede ikere nte nnyịn ikpride ye nte ekondo okponde, oro ayanam nnyịn isụhọde idem. Edi inaha odudu Abasi enyek nnyịn idem. Jehovah ama ọnọ prọfet Isaiah odudu ndiwet ikọ nsịnudọn̄ emi: “[Abasi] ọnọ mbon mba odudu; onyụn̄ anam ukeme awak ọnọ mmọ eke mînyeneke nsọn̄idem. Idem n̄kparawa ẹyekpa mba ẹnyụn̄ ẹkpọt, nyara owo ẹyenyụn̄ ẹduọn̄ọ: edi mmọ eke ẹberede ye Jehovah ẹyekop obufa nsọn̄idem; ẹyedọk ke mba nte ntrukpom; ẹyefen̄e, ndien idikpọtke; ẹyesan̄a, edi idikpaha mba.”—Isaiah 40:29-31.

Edieke oyomde ndinam uduak Abasi, fiọk ete ke enye iditreke ndinọ fi edisana spirit esie man an̄wam fi aka iso anam oro. Edi ana ọbọn̄ akam eben̄e edisana spirit emi. (Luke 11:13) Abasi ayan̄wam fi ọyọ idomo ekededi onyụn̄ ọnọ fi odudu ndinam se inende.—Philippi 4:13.

[Se ẹwetde ke ikpọ abisi page 7]

Abasi ọyọnọ fi odudu ndinam se inende

[Mme Ndise emi ẹdude ke page 7]

Ọtọn̄ọde ke enyọn̄ enyọn̄ ufien ka nnasia: Otu ntantaọfiọn̄ oro ẹkotde Whirlpool, uyọ ntantaọfiọn̄ oro ẹkotde Pleiades, otu ntantaọfiọn̄ emi ẹkotde Orion, ye Andromeda

[Mme Ndise emi ẹdude ke page 7]

Utịn odobi utịm ike-330,000 akan isọn̄

[Ebiet Ẹdade Ndise Ẹto ke page 7]

Pleiades: NASA, ESA and AURA/Caltech; all others above: National Optical Astronomy Observatories