USEN kiet, eka mi ama obụp mi ete: “Ntak emi mûyomke ndituak ibuot nnọ mme eteete fo? Ndi ufiọkke ke mmọ ẹnịm fi uwem? Akpakam ọkọkọm mmọ ke ndinịm fi uwem. Ntak emi oyomde ndikpọn̄ utuakibuot oro ikamanade-mana idikụt? Edieke afo etrede ndituak ibuot nnọ mme eteete nnyịn, ọwọrọ ọdọhọ ke nnyịn emi ituakde ibuot inọ mmọ idi ndisịme.” Ekem enye ama ọtọn̄ọ nditua.

Akanam eka mi itịn̄ke ikọ ntem. Enye akakam ọdọhọ ẹdikpep mi Bible, edi enye akanam emi sia enye ikoyomke ẹkpep imọ. Mma nsikop uyo esie kpukpru ini. Edi idahaemi, ama enen̄ede ọsọn̄ mi ndikop uyo esie, koro n̄kenyene ndikop uyo Jehovah man nnem Jehovah esịt. Jehovah ama an̄wam mi nsọn̄ọ nda n̄kop uyo imọ.

N̄kesitiene ete ye eka mi n̄ka Ido Ukpono Buddha, ndien ido ukpono emi ke ediwak mbon Japan ẹka. Edi, ke mma n̄kekpep Bible ye Mme Ntiense Jehovah ke ọfiọn̄ iba kpọt, mma ndinịm ke Bible edi N̄wed Abasi. Ke mma n̄kedifiọk ke mmenyene Ete emi odude ke heaven, ama ọdọn̄ mi ndinen̄ede ndiọn̄ọ enye. Ami ye eka mi ima isikop inemesịt ndineme se ẹkesikpepde mi. Mma ntọn̄ọ ndisidụk mbono esop ke Sunday, ke Ufọkmbono Obio Ubọn̄. Ke ini Bible eketịmde an̄wan̄a mi, mma ndọhọ eka mi ke ndisitieneke aba nnam mme edinam Ido Ukpono Buddha. Iso ama okpụhọde eka mi inikiet inikiet. Enye ama ọdọhọ mi ete, “Edi n̄kpọ o-bụt ndinyene eyen emi mîmaha mme eteete nnyịn.” Enye ama ọdọhọ ntre ndikpep Bible nnyụn̄ ntre ndidụk mbono esop. Eketie mi nte n̄kpọ ndap. N̄kpenịmke ke eka mi ekpetịn̄ utọ ikọ oro.

Mma n̄kpep ke n̄wed Ephesus ibuot 6, ke Jehovah ọdọhọ n̄kop uyo nnọ ete ye eka mi. Edi ete mi akada ye eka mi. Ke nsonso oro, n̄kekere ke edieke n̄kopde uyo mmọ, ke mmọ ẹyenyịme nnam n̄kpọ Jehovah nte ini akade, ndien nnyịn iyafiak idu ke emem. Akan oro, ini ama ekpere ndiwet udomo mbe ndụk ufọkn̄wed sekọndri, ntre akana mben̄e idem. Mma ndọhọ mmọ ke ndikpepke Bible, ndinyụn̄ ndụkke mbono esop ke ọfiọn̄ ita. Edi mma ndọhọ Jehovah ke nyafiak ntọn̄ọ ndidụk mbono esop ọfiọn̄ ita ẹma ẹbe.

Se n̄kebierede ndinam emi ikọfọnke. N̄kekere ke nditre ndikpep Bible nnyụn̄ ntre ndidụk mbono esop ke ọfiọn̄ ita idifịnake mi. Edi ikebịghike, mma ntọn̄ọ ndifre Jehovah. Utu ke ete ye eka mi ndinyịme mfiak ntọn̄ọ ndinam n̄kpọ  Jehovah, mmọ ẹma ẹsịn ofụri ukeme ndinam mi ntre ofụri ofụri.

Ke Ufọkmbono Obio Ubọn̄, mma nsobo ye ediwak nditọete oro mbonubon mmọ ẹkebiọn̄ọde mmọ. Mmọ ẹma ẹdọhọ mi ke Jehovah ayan̄wam mi nsọn̄ọ nda. (Matt. 10:34-37) Mmọ ẹma ẹdọhọ ke edieke nsọn̄ọde nda ye Jehovah, ke emi ekeme ndinam mbonubon mi ẹdifiọk Jehovah. Ntre mma mbọn̄ akam ke ofụri esịt n̄kpe Jehovah ubọk nte an̄wam mi mbuọt idem ye enye.

Ete ye eka mi ẹma ẹsibiọn̄ọ mi ke nsio nsio usụn̄. Eka mi ama esikpek mi onyụn̄ ekpe mi ubọk ete ntre ndinam n̄kpọ Jehovah. Ediwak ini, n̄kesisioroke uyo. Ini ekededi oro nsiorode uyo, ima isifan̄a mfan̄a inyụn̄ itọhọ, sia nnyịn mbiba ikada ke ido ukpono nnyịn enen. Idahaemi, mmedikụt ke ekpedi mma nsikpeme nte ntịn̄de ikọ ye eka mi ye nte mfan̄ade n̄kpọ ido ukpono ye enye, ke nnyịn ikpekesitọhọke kpukpru ini. Ete ye eka mi ẹma ẹsinọ mi ediwak utom nnam ke ufọk, mbak ndiwọrọ. Ndusụk ini, mmọ ẹma ẹsikọbi usụn̄ ẹbaha mi, inyụn̄ inọhọ mi udia.

Eka mi ama esikpe mbon en̄wen ubọk ete ẹtịn̄ ikọ ye ami man ntre ndinam n̄kpọ Jehovah. Enye ama ọdọhọ titia ufọkn̄wed nnyịn etịn̄ ikọ ye ami, edi ete mbon ikọbọrọke enye ikọ. Enye ama ada mi ebịne eteutom esie, onyụn̄ ọdọhọ enye anam mi n̄kụt ke idụhe ido ukpono oro ọfọnde. Ke ini ikodude ke ufọk, eka mi ama esikot iman nnyịn, onyụn̄ atua eyet ekpe mmọ ubọk ete ẹn̄wam imọ ẹnam mi n̄kpụhọde ekikere. N̄kpọ emi ama enen̄ede ayat mi esịt. Ke ini n̄kodụkde mbono esop, mma ntịn̄ n̄kpọ emi nnọ mbiowo, edi mmọ ẹma ẹdọhọ n̄kûyat esịt,  ke se eka mi anamde oro akam ananam mbon oro enye etịn̄de n̄kpọ emi ọnọ ẹdiọn̄ọ Jehovah.

Ete ye eka mi ẹma ẹyom n̄ka ufọkn̄wed ntaifiọk man nnyene eti utom nnam. Edi nnyịn ikekemeke nditie kiet nneme n̄kpọ emi emem emem, ke ntak iyatesịt. Ntre, mma n̄wet ediwak leta nnọ ete ye eka mi man nnam mmọ ẹdiọn̄ọ se mbierede ndinam. Ete mi ama enen̄ede ayat esịt, onyụn̄ ọdọhọ mi ete: “Edieke ekerede ke emem ntre ndikụt utom nnam, nnọ fi n̄kpọn̄ kpọt ada oyom utom; edieke mûkwe, wọrọ ke ufọk mi.” Mma mbọn̄ akam nnọ Jehovah mban̄a n̄kpọ emi. Ke eyo ama ekesiere, mma ndaha ukwọrọikọ. Nte n̄kosụk n̄kwọrọde ikọ, nditọete iban iba ẹma ẹdi ẹdidọhọ mi nsidikpep nditọ mmimọ n̄kpọ. N̄kpọ emi ikenemke ete mi esịt; ntre enye ama etre ndisitịn̄ ikọ ye ami, ikonyụn̄ inọhọ mi iso aba. Eka mi ama akam ọdọhọ ke ọkpọfọn imọ akan edieke n̄kpedide abiatibet, utu ke ndidi Ntiense Jehovah.

Ndusụk ini, mma nsikere m̀mê Jehovah akam enem esịt nte nsọn̄de ibuot ye ete ye eka mi ntem. Edi mma nsibọn̄ akam nnyụn̄ ntie n̄kere se n̄kotde ke Bible mban̄a nte Jehovah amade nnyịn. Emi ama an̄wam mi n̄keme ndiyọ ubiọn̄ọ emi, nnyụn̄ mfiọk ke ete ye eka mi ẹnam kpukpru emi ke ntak emi mmọ ẹmade mi. Jehovah ama an̄wam mi mfiọk ke ọfọn ndikop uyo imọ n̄kan uyo ete ye eka mi. Nte n̄kesịnde idem n̄kwọrọ ikọ, ntre ke ukwọrọikọ ekenen̄ede enem mi. Ntre mma mbiere ndisiak usụn̄.

Ndusụk nditọete iban oro ẹkediọn̄ọde ke mmoyom ndinam utom usiakusụn̄, ẹma ẹdọhọ mbet kan̄a tutu esịt osụhọde ete ye eka mi. Mma mbọn̄ akam mben̄e Jehovah ọniọn̄, nnam ndụn̄ọde, ntie n̄kere ntak emi nyomde ndisiak usụn̄, nnyụn̄ nnyene nneme ye nditọete oro ẹma ẹkenam n̄kpọ Jehovah ẹbịghi. Mma mbiere ke nyom ndinem Jehovah esịt. Mma ndiọn̄ọ ke ọkpọkọm mbebet ndusụk ini ẹbe mbemiso ntọn̄ọde utom usiakusụn̄, oro idinamke ete ye eka mi ẹkpụhọde ekikere.

N̄kọtọn̄ọ utom usiakusụn̄ isua oro n̄koyomde ndikụre ufọkn̄wed sekọndri. Ke mma n̄kasiak usụn̄ ke ndusụk ini, mma mbiere ndikọkwọrọ ikọ ke ebiet emi ẹnen̄erede ẹyom mme ọkwọrọikọ. Edi ete ye eka mi ikoyomke n̄kpọn̄ ufọk. Ntre mma mbet tutu nsịm isua 20. Mbak eka mi edinen̄ede etịmede esịt, mma ndọhọ n̄kọk itieutom Japan ẹnọ mi n̄kọkwọrọ ikọ ke edem usụk Japan emi iman nnyịn ẹdụn̄de.

Esịt ama enem mi ndikụt ediwak mbon oro n̄kekpepde n̄kpọ do, ẹnade baptism. Mma n̄kpep nditịn̄ Ikọmbakara man n̄keme ndikwọrọ ikọ nnọ ediwak owo. N̄kodu esop kiet ye nditọete iren iba emi ẹkedide mme akpan asiakusụn̄. Nte mmọ ẹkesisịnde idem ẹkwọrọ ikọ ẹnyụn̄ ẹn̄wamde mme owo, ama anam mbiere ndidi akpan asiakusụn̄. Ke ini n̄kodude do n̄kwọrọ ikọ, eka mi ama ọdọn̄ọ idiọk idiọk utịm ikaba. Mma nnyụn̄ n̄ka ufọk utịm ikaba n̄kese mban̄a enye. Se n̄kanamde emi ama akpa enye idem, enye ama onyụn̄ ọtọn̄ọ ndifọn ido ye ami.

Ke isua itiaba ẹma ẹkebe, Atsushi, kiet ke otu akpan asiakusụn̄ iba oro ikodude esop kiet, ama ewet leta obụp m̀mê ami n̄kpama ndidọ imọ. Akanam n̄kereke-kere ndidọ Atsushi, n̄konyụn̄ n̄kereke-kere m̀mê enye akpama ndidọ mi. Ke ọfiọn̄ kiet ama ekebe, mma n̄wet ndọhọ enye ke n̄kpama nnyịn itịm idiọn̄ọ kiet eken. Ima idikụt ke nnyịn mbiba imama utom ofụri ini, imonyụn̄ inyịme ndinam se ededi oro ẹdọn̄de nnyịn. Nte ini akakade, nnyịn ima idọ ndọ. Esịt ama enem mi ndikụt ete ye eka mi, ye ediwak mbonubon nnyịn ẹdụkde ndọ nnyịn.

Ke adan̄aemi ikosụk inamde utom usiakusụn̄ ofụri ini, ẹma ẹdọhọ ebe mi esisan̄a ese mme  esop ke ini esenyịn circuit mîdụhe. Ikebịghike, ima ibọ mme edidiọn̄ en̄wen. Ẹma ẹmek nnyịn mme akpan asiakusụn̄, ndien ekem ẹmek ebe mi esenyịn circuit. Isan̄ kiet, ke ima ikokụre ndikese kpukpru esop ke circuit nnyịn, n̄kọk itieutom ẹma ẹkot nnyịn ke fon, ẹnyụn̄ ẹbụp m̀mê ikpama ndikanam utom circuit ke idụt Nepal.

Mma n̄kere m̀mê ete ye eka mi ẹyenyịme n̄ka idụt emi oyomde usụn̄ ntre. Mma n̄kot mmọ ke fon, ndien ete mi ama ọdọhọ mi ete: “Idụt oro mbufo ẹyomde ndika do eye etieti.” Mbemiso n̄kokotde enye, enye ama akam ekere ndika n̄kese Nepal, koro ufan esie kiet ama ọnọ enye n̄wed oro etịn̄de n̄kpọ aban̄a idụt oro.

Ima ifiak ibọ edidiọn̄ nte ikosụk inamde utom circuit ke idụt Nepal, emi mme owo ẹtiede ufan ufan. Ẹma ẹdọhọ nnyịn inam utom circuit isịm idụt Bangladesh. Kpa ye oro Bangladesh ekperede Nepal, ido mbon Bangladesh ama enen̄ede okpụhọde. Nnyịn ikesikwọrọ ikọ ke nsio nsio usụn̄. Ke isua ition ẹma ẹkebe, ẹma ẹdọhọ nnyịn ifiak inyọn̄ Japan; mi ke nnyịn inam utom circuit idahaemi.

Ndinam utom circuit ke Japan, Nepal, ye Bangladesh ekpep mi ediwak n̄kpọ aban̄a Jehovah. Mme idụt emi kiet kiet ẹkpụhọde ye kiet eken, mbon emi ẹnyụn̄ ẹtode idụt kiet ẹkpụhọde ye kiet eken. Mmokụt nte Jehovah esede aban̄a mme owo, odụri mmọ adian idem, an̄wam, onyụn̄ ọdiọn̄ mmọ.

Mmọkọm Jehovah ke kpukpru se enye anamde ọnọ mi. Enye an̄wam mi ndiọn̄ọ imọ, ayak mi nnam utom esie, onyụn̄ ọnọ mi eti ebe. Enye an̄wam mi nnam nti ubiere, ndien oro anam nnen̄ede n̄kpere enye ye ubon mi idahaemi. Mmọkọm Jehovah nte enye anamde mi ye eka mi ifiak idi nti ufan. Esịt enen̄ede enem mi ndidu ke emem ye Abasi ye eka mi.