David ọkọdọhọ ke ‘akanam imọ ikwe nte ẹkpọn̄de edinen owo ofụri ofụri, m̀mê nte nditọ esie ẹben̄ede udia.’ David eketịn̄ se enye ke idemesie okokụtde. Enye ama ọfiọk ke Abasi esise aban̄a mme asan̄autom esie kpukpru ini. (Ps. 37:25) Edi ikọ David iwọrọke ke akananam n̄kpọ inanake asan̄autom Abasi m̀mê ke n̄kpọ idinanake asan̄autom Abasi tutu amama.

Enyene mme ini emi n̄kpọ ọkọsọn̄de ye enye David ke idemesie, utọ nte ini emi Saul ekebịnede enye oyom ndiwot. Udia emi enye akakamade ama ekpere ndikụre, ntre enye ama ọdọhọ Ahimelech ọnọ imọ ye mbon emi ẹsan̄ade ye imọ uyo ita. (1 Sam. 21:1-6) Omokụt do ke kpa ye emi David eketịn̄de ikọ oro, ke enye ama ‘eben̄e udia’ ke ini n̄kpọ ọkọsọn̄de ye enye. Edi enye ama ọfiọk ke Jehovah idikpọn̄ke imọ kpa ye n̄kpọ ọdiọkde ntre. Se idude edi ke idụhe ebiet ndomokiet ke Bible emi ọdọhọde ke David ama asan̄a eben̄e mme owo n̄kpọ adia man odu uwem.

Jesus ama ọn̄wọn̄ọ ke Matthew 6:33 ke Abasi ọyọnọ mbon emi ẹnịmde n̄kpọ Obio Ubọn̄ akpa ke uwem se inanade mmọ. Enye ọkọdọhọ ete: “Ẹka iso, ndien, ndibem iso nyom obio ubọn̄ ye edinen ido esie, ndien ẹyedian kpukpru n̄kpọ emi [oro edi, se edidiade, se edin̄wọn̄de, ye se edisịnede] ẹnọ mbufo.” Edi enyene se Jesus eketịn̄de emi owụtde ke biọn̄ ekeme ndidọn̄ “nditọete” esie ke ntak emi ẹkọbọde mmọ. (Matt. 25:35, 37, 40) Se ikọwọrọde apostle Paul edi emi. Ndusụk ini, biọn̄ ama esidọn̄ enye, itọn̄ onyụn̄ asat enye.—2 Cor. 11:27.

Jehovah ama ọdọhọ ke ẹyekọbọ nnyịn ke nsio nsio usụn̄. Enye ekeme ndiyak nnyịn inana ndusụk n̄kpọ man owụt ke Devil edi osu nsu. (Job 2:3-5) Nditọete nnyịn ẹsibọ ufen etieti ke ini ukọbọ. Ke uwụtn̄kpọ, ẹma ẹdọn̄ ndusụk mmọ ke ufọk-n̄kpọkọbi mbon Nazi, ndien mbon Nazi ẹma ẹsinịm mmọ biọn̄ man ẹnam mmọ ẹdọhọ ke mmimọ idịghe Mme Ntiense aba. Edi Mme Ntiense emi ẹma ẹka iso ẹkop uyo Jehovah, Jehovah ikonyụn̄ ikpọn̄ke mmọ. Jehovah ama ayak utọ n̄kpọ emi ọwọrọ mmọ kpa nte enye esiyakde nsio nsio idomo eken ẹsịm kpukpru mme Christian. Kpa ye emi, imọfiọk ke enye esin̄wam mbon emi ẹbọde ufen ke ntak enyịn̄ esie. (1 Cor. 10:13) Inaha ifre se Bible etịn̄de ke Philippi 1:29 ete: “Koro ẹma ẹnọ mbufo akwa ifet ndibuọt idem ke Christ ndinyụn̄ n̄kụt ukụt ke ibuot esie.”

Jehovah ọn̄wọn̄ọ ke imọ idikpọn̄ke mme asan̄autom imọ. Ke uwụtn̄kpọ, Isaiah 54:17 ọdọhọ ntem: “N̄kpọekọn̄ ekededi eke ẹdibotde ẹban̄a fi idikwe unen.” Se ẹtịn̄de ke itien̄wed emi ye ke mme itien̄wed eken owụt ke Abasi idiyakke ẹsobo ikọt esie ẹfep, edi Christian kiet kiet ekeme ndisobo idomo, onyụn̄ ekeme ndikpa ke ntak idomo.