FRANÇOIS, ebiowo ke idụt oro ọtọn̄ọde-tọn̄ọ uforo ọdọhọ ete: “En̄wan ama asiaha ke ẹma ẹkekụre umekowo sia owo emi ẹkekande mîkenyịmeke, ndien emi ama anam ata ediwak Mme Ntiense Jehovah ẹfen̄e ẹkpọn̄ ufọk. Udia ye ibọk ẹma ẹnen̄ede ẹnana, ndien ekpri emi okodude ama ọsọn̄ urua etieti. Ẹma ẹberi ban̄k, okụk ama okụre ke mme masịn usio okụk, mîdịghe edi ke ikọfọnke.”

Nditọete ke n̄kọk itieutom ẹma ẹsọsọp ẹda okụk ye mme n̄kpọ eken ẹsọk nditọete emi ẹkedude ke mme Ufọkmbono Obio Ubọn̄ ke idụt oro. Mme n̄ka emi ẹken̄wanade ye kiet eken ikesiyakke mme owo ẹbe, edi mmọ ẹma ẹsiyak ubomisọn̄ n̄kọk itieutom ẹbe sia mmọ ẹfiọk ke Mme Ntiense isisịnke idem ke mme n̄kpọ ntem.

François ọdọhọ ete: “Edi ke ini ikakade Ufọkmbono Obio Ubọn̄ kiet, mme owo ẹma ẹdọn̄ọ ke ikọt ẹtop ubomisọn̄ nnyịn, edi itiat ikan̄ mmọ ẹkebe ke ufọt nnyịn. Ke ini owoekọn̄ ekefehede ebịne nnyịn ye ikan̄ ke ubọk, ima isọsọp iwat ubomisọn̄ ifiak edem edem, iwọn̄ọde iso, inyụn̄ iwat usọp usọp inyọn̄ n̄kọk itieutom. Ima ikọm Jehovah etieti ke ndikanyan̄a nnyịn. Ke ndan̄nsiere, nditọete 130 emi ẹkedude ke Ufọkmbono Obio Ubọn̄ oro ẹma ẹkeme ndika n̄kesịm ebiet emi mfịna mîdụhe. Ndusụk owo ẹkedi n̄kọk itieutom, nnyịn inyụn̄ ise iban̄a mmọ ke kpukpru usụn̄ tutu en̄wan oro okụre.”

François afiak ọdọhọ ete: “Nditọete ẹma ẹwet ediwak leta ẹnọ ẹsọk n̄kọk itieutom ẹnen̄ede ẹkọm mmọ ẹban̄a se mmọ ẹkenamde. Nditọete ndito ebiet en̄wen ndi ndin̄wam mmọ ama anam mmọ ẹtetịm ẹnyene mbuọtidem ke Jehovah.”

Ke ini oto-obot afanikọn̄ m̀mê enye emi mme owo ẹsịnde esịmde nditọete nnyịn, nnyịn isidọhọke mmọ ite, “akpakam afo enyene edisịnen̄kpọ ye udia usen.” (Jas. 2:15, 16) Imesidomo ndinọ mmọ se inanade mmọ. Ntre n̄ko ke ekedi ke ini ẹketọtde ke akwa akan̄ ọmọn̄ odu ke eyo mme apostle, “mme mbet [ẹma] ẹbiere, owo mmọ kiet kiet nte ekemde ye se owo enyenede, ndinọ n̄kpọ un̄wam ẹsọk nditọete emi ẹdụn̄de ke Judea.”—Utom 11:28-30.

Sia nnyịn idide mme asan̄autom Jehovah, imesima ndinọ mme owo se inanade mmọ. Edi oyom ẹnọ mme owo se inanade mmọ n̄ko ke n̄kan̄ eke spirit. (Matt. 5:3) Jesus ama ọdọhọ mme anditiene enye ete ẹnam mme mbet man ẹn̄wam mme owo ẹfiọk ke mmimọ imanana n̄kpọ ke n̄kan̄ eke spirit ẹnyụn̄ ẹyom se inanade mmọ oro. (Matt. 28:19, 20) Nnyịn owo kiet kiet imesida ekese ini, odudu, ye inyene nnyịn inam utom oro. Edi esop Abasi esida ndusụk okụk oro ẹtịpde an̄wam mme owo, edi akpan n̄kpọ oro ẹsidade etịbe ẹnam edi n̄kpọ Obio Ubọn̄ ye editan̄a eti mbụk. Ntem ke isiwụt ke imama Abasi ye mbọhọidụn̄ nnyịn.—Matt. 22:37-39.

Mbon oro ẹsitienede ẹtịp n̄kpọ ẹda ẹnam utom oro Mme Ntiense Jehovah ẹnamde ke ofụri ererimbot ẹkeme nditịm nnịm ke ẹsida etịbe mmimọ ẹnam n̄kpọ nte odotde. Ndi emekeme ndin̄wam nditọete fo oro ẹyomde un̄wam? Ndi ọdọn̄ fi nditịp n̄kpọ ẹda ẹnam utom edinam mbet? Edieke edide ntre, “kûtre ndinam eti n̄kpọ nnọ mbon oro ẹyomde un̄wam, ke ini ubọk fo ekemede ndinam.”—N̄ke 3:27.