Nsịnudọn̄ Emi ‘Otode Inua Nditọwọn̄’

Ke December 2009, Esop Anana Ntọn̄ ke Russia ama ọnọ ubiereikpe emi akanamde ẹsuan esop ido ukpono Mme Ntiense Jehovah ke Taganrog ke Russia, ẹbọ Ufọkmbono Obio Ubọn̄ mmọ, ẹnyụn̄ ẹdọhọ ke n̄wed 34 ke otu n̄wed mmọ ẹdi ata akpatre ndiọi n̄wed. Ẹma ẹsịn n̄kpọ emi akpade owo idem mi ye ndise Mme Ntiense emi ẹkebierede ikpe emi ẹnọ, esịnede n̄kpri nditọwọn̄, ke ikpehe Intanet Mme Ntiense Jehovah.

Ke ọfiọn̄ ifan̄ ẹma ẹkebe, ubon kiet emi ẹdide Mme Ntiense Jehovah ke Queensland ke Australia, emi ẹkekotde mbụk ubiereikpe emi, ẹma ẹnọ ekebe ye leta ẹsọk n̄kọk itieutom Mme Ntiense Jehovah ke Russia. Leta mmọ ọkọdọhọ ete: “Ndima Nditọete, Mbuọtidem ye idomo nditọete nnyịn ke Russia ẹnen̄ede ẹtụk Cody ye Larissa nditọ nnyịn. Mmọ ẹmewet mme kad ye mme leta, ndien nnyịn imanam ekpri ekebe enọ oro inọde ẹsọk nditọwọn̄ ke Taganrog, man inam mmọ ẹfiọk ke ata anyan usụn̄ ko, ke odu nditọwọn̄ en̄wen emi ẹsọn̄ọde ẹda n̄ko ẹnam n̄kpọ Jehovah ẹnyụn̄ ẹkerede ẹban̄a mmọ. Mmọ ẹnọ ufiop ufiop ima ye ekọm ẹsọk mmọ.”

Ke ini nditọwọn̄ ke Taganrog ẹma ẹkebọ ẹnọ oro, mmọ ẹma ẹwet ndiye leta ẹnọ ẹsọk ubon oro ke Australia. Ikọ nsịnudọn̄ emi ‘otode inua nditọwọn̄’ mi ama otụk Ntiense kiet emi anamde utom ke n̄kọk itieutom Russia tutu enye ewet leta ọnọ ẹsọk Cody ye Larissa ete: “Mmọdiọn̄ọ ke ẹmefiọk nte esibiakde owo ke ini ẹnọde n̄kpri ye ikpọ owo ufen ke n̄kpọ emi mmọ mîduehe. Nditọete nnyịn ke Taganrog iduehe n̄kpọ baba kiet, edi ẹma ẹbọ mmọ Ufọkmbono Obio Ubọn̄ mmọ. N̄kpọ emi anam mmọ ẹnen̄ede ẹfụhọ. Mmọ ndifiọk ke mme owo ke n̄kan̄ eken ke ererimbot ẹkere ẹban̄a mmimọ eyesịn udọn̄ ọnọ mmọ. Ẹmenam etieti ndiwụt ima ye ntatubọk!”—Ps. 8:2.

Ke akpanikọ, nnyịn idi nditọete ofụri ererimbot, ndien ima oro imade kiet eken an̄wam kpukpru nnyịn iyọ mme idomo ye mfịna oro isobode. Ke adan̄aemi ẹtiede ke esopikpe ẹfan̄a m̀mê n̄wed Mme Ntiense Jehovah ẹnam mme owo ẹsua kiet eken, nditọ nnyịn ke ẹwụt ke mmimọ imekere iban̄a kiet eken, ikereke iban̄a idụt m̀mê ido obio owo, ẹnyụn̄ ẹwụt nte ikọ Jesus emi edide akpanikọ: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.”—John 13:35.

[Mme ndise ke page 32]

Nditọwọn̄ emi ẹtode Russia (ufien) emi nditọwọn̄ emi ẹtode Australia (nnasia) ẹkenọde ẹnọ ẹsọk