Nte Ererimbot Emi Edisịmde Utịt

“Mbufo idụhe ke ekịm, emi akpanamde usen oro abuat mbufo nte inọ.”​—1 THESS. 5:4.

NTE AFO EMEKEME NDINAM AN̄WAN̄A?

Mme n̄kpọ ewe oro owo mîkwe ke enyịn ke mme itie N̄wed Abasi oro ẹtienede mi ẹtịn̄ ẹban̄a?

1 Thessalonica 5:3

Ediyarade 17:16

Daniel 2:44

1. Nso idin̄wam nnyịn idu ke ukpeme inyụn̄ iyọ mme idomo?

 MME n̄kpọntịbe oro ẹdinyen̄ede isọn̄ ẹyesọp nditịbe. Nte mme ntịn̄nnịm ikọ Bible ẹsude owụt ke emi edi akpanikọ, ntre oyom nnyịn idu ke ukpeme. Nso idin̄wam nnyịn inam emi? Apostle Paul esịn udọn̄ ọnọ nnyịn ete “idọn̄ enyịn ke mme n̄kpọ oro owo mîkwe ke enyịn.” Ke akpanikọ, ana ikere iban̄a nsinsi uwem oro Abasi edinọde nnyịn, edide ke heaven m̀mê ke isọn̄. Nte ofụri se Paul ekenemede owụtde, enye ekewet ikọ emi ndida nsịn udọn̄ nnọ nditọete esie ẹwụk ekikere ke eti utịp oro mmọ ẹdibọde ke ndisọn̄ọ nda nnam akpanikọ. Ndinam ntre ayan̄wam mmọ ẹyọ mme idomo ye ukọbọ.—2 Cor. 4:8, 9, 16-18; 5:7.

2. (a) Nso ke ana inam edieke iyomde ndika iso nnyene idotenyịn? (b) Nso ke idineme ke ibuotikọ emi ye enye oro etienede?

² Item Paul emi esịne ata akpan edumbet, oro edi: Edieke iyomde ndika iso nnyene idotenyịn, inaha iwụk ntịn̄enyịn ke mme n̄kpọntịbe oro ikụtde idahaemi kpọt. Ana iwụk n̄ko ke mme akpan n̄kpọntịbe oro nnyịn mîkwe kan̄a. (Heb. 11:1; 12:1, 2) Ke ntre, ẹyak ineme n̄kpọntịbe duop emi ẹnyenede ebuana ye idotenyịn nsinsi uwem nnyịn. *

NSO IDITỊBE ESISỊT INI MBEMISO UTỊT EDIDE?

3. (a) Akpa Thessalonica 5:2, 3 ọdọhọ ke nso iditịbe ke ini iso? (b) Nso ke mme andikara ẹdinam, ndien mmanie ẹditiene mmọ inam?

³ Ke leta emi Paul ekewetde ọnọ mbon Thessalonica, enye ama etịn̄ kiet ke otu n̄kpọ emi ẹditịbede  ke ini iso. (Kot 1 Thessalonica 5:2, 3.) Enye eketịn̄ aban̄a “usen Jehovah.” “Usen Jehovah” emi ẹtịn̄de ẹban̄a ke itien̄wed emi editọn̄ọ ke ini ẹdisobode nsunsu ido ukpono onyụn̄ etre ke ini emi ẹdin̄wanade ekọn̄ Armageddon. Edi mbemiso usen Jehovah oro ọtọn̄ọde, mme andikara ererimbot ẹyetan̄a “Emem ye ifụre!” Mfiori emi ekeme ndidi n̄kpọntịbe ini kiet m̀mê ediwak n̄kpọntịbe. Mme idụt ẹkeme ndikere ke mmimọ imekpere ndikọk ikpọ mfịna mmimọ. Nso kaban̄a mme adaiso ido ukpono? Mmọ ẹdi ubak ererimbot, ke ntre, etie nte mmọ ẹyetiene mme andikara ererimbot ẹtan̄a etop emi. (Edi. 17:1, 2) Mme adaiso ido ukpono emi ẹdinam n̄kpọ nte mme nsunsu prọfet emi ẹkedude ke Judah eset. Jehovah ọkọdọhọ ke mmọ ẹdọhọ “ẹte, ‘Emem! Emem!’ ke ini emem mîdụhe.”—Jer. 6:14; 23:16, 17.

4. Nso ke nnyịn ifiọk emi mme owo ke ererimbot mîfiọkke?

⁴ Inamke n̄kpọ m̀mê mmanie ẹditiene ifiori “Emem ye ifụre!” emi, emi ediwụt ke usen Jehovah ọmọn̄ ọtọn̄ọ. Emi akanam Paul ọdọhọ ete: “Nditọete, mbufo idụhe ke ekịm, emi akpanamde usen oro abuat mbufo nte inọ, koro kpukpru mbufo ẹdi nditọ un̄wana.” (1 Thess. 5:4, 5) Nnyịn itiehe nte mme owo ke ererimbot, koro imọfiọk se N̄wed Abasi etịn̄de aban̄a mme n̄kpọ emi ẹtịbede ke ererimbot idahaemi. Didie ke ntịn̄nnịm ikọ emi aban̄ade edifiori “Emem ye ifụre!” edisu? Iyokụt ini ama ekem. Ke ntre, ẹyak ibiere ‘nditaba idap nnyụn̄ nnyene ikike.’—1 Thess. 5:6; Zeph. 3:8.

“ỌBỌN̄ AN̄WAN” EMI EKEREDE KE N̄KPỌ IKEMEKE NDINAM IMỌ

5. (a) Didie ke “akwa ukụt” editọn̄ọ? (b) Ewe “ọbọn̄ an̄wan” ekere ke n̄kpọ ikemeke ndinam imọ?

⁵ Nso iditịbe ke oro ebede? Paul ọkọdọhọ ete: “Ini ekededi emi mmọ ẹdọhọde: ‘Emem ye ifụre!’ adan̄aoro nsobo ayabuat mmọ.” Akpa ikpehe mbabuat nsobo emi editọn̄ọ ye nsobo “Akwa Babylon,” kpa ukara ererimbot eke nsunsu ido ukpono emi ẹkotde n̄ko “akpara.” (Edi. 17:5, 6, 15) Nsobo ofụri nsunsu ido ukpono, emi Christendom esịnede kpa do, edidi ntọn̄ọ “akwa ukụt.” (Matt. 24:21; 2 Thess. 2:8) N̄kpọ emi ayakpa ediwak owo idem. Ntak-a? Koro tutu esịm ini oro, akpara emi edida idemesie nte “ọbọn̄ an̄wan” emi “[mîdikopke] mfụhọ tutu amama.” Edi  enye eyedifiọk ke imọ ikanam ndudue ndikere ke n̄kpọ ikemeke ndinam imọ. Ẹyesobo enye ẹfep ata usọp usọp, nte n̄kpọ emi edide “ke usen kiet.”—Edi. 18:7, 8.

6. Mmanie ẹdisobo nsunsu ido ukpono?

⁶ Ikọ Abasi owụt ke “idiọk unam” emi enyenede “nnụk duop” edisobo akpara oro. Se ikpepde ke n̄wed Ediyarade owụt ke Edidiana Mme Idụt edi idiọk unam oro. “Nnụk duop” ẹda ẹban̄a kpukpru ukara owo emi ẹnọde “ididuot idiọk unam” emi ibetedem. * (Edi. 17:3, 5, 11, 12) Nsobo emi edidiọk adan̄a didie? Mme idụt emi ẹnamde Edidiana Mme Idụt ẹyebụme inyene akpara oro, ẹwụt idiọk esie, ẹta obụkidem esie, ẹnyụn̄ “ẹfọp enye ke ikan̄ ofụri ofụri.” Enye ididụhe aba ke nsinsi.—Kot Ediyarade 17:16.

7. Didie ke “idiọk unam” editọn̄ọ ndisobo nsunsu ido ukpono?

⁷ Ntịn̄nnịm ikọ Bible owụt nte nsobo emi editọn̄ọde. Enyene nte Jehovah edisịnde ke esịt mme andikara ererimbot emi “ete ẹnam ekikere imọ,” oro edi, ẹsobo akpara oro. (Edi. 17:17) Ido ukpono ẹsịn nsọk ẹnọ ekọn̄ ẹnyụn̄ ẹka iso ndisịn mfịna etieti ke ererimbot; ke ntre, ukara ẹdikere ke ndisobo akpara emi edidi ke ufọn idụt mmimọ. Ke nditịm ntịn̄, ke ini ukara ẹdinamde n̄kpọ emi, mmọ ẹdikere ke mmimọ inam “ekikere [mmimọ] kiet.” Edi Abasi edida mmọ isobo kpukpru nsunsu ido ukpono. Ntem n̄kpọ ọyọwọn̄ọde obono; ikpehe editịm n̄kpọ Satan kiet ayadaha an̄wana ye ikpehe editịm n̄kpọ esie en̄wen, ndien enye idikemeke nditre n̄kpọ emi.—Matt. 12:25, 26.

ẸN̄WANA YE IKỌT ABASI

8. Nso idi en̄wan “Gog isọn̄ Magog”?

⁸ Ke ẹma ẹkesobo nsunsu ido ukpono, ẹyekụt nte ikọt Abasi “ẹdụn̄de ke ifụre” mînyụn̄ “inyeneke ibibene.” (Ezek. 38:11, 14) Nso iditịbe inọ mbon emi ẹtiede nte ikemeke ndinyan̄a idem mi, emi ẹkade iso ẹtuak ibuot ẹnọ Jehovah? Etie nte “ediwak owo” ẹyen̄wana ye mmọ. Ikọ Abasi ọdọhọ ke oro edi en̄wan “Gog isọn̄ Magog.” (Kot Ezekiel 38:2, 15, 16.) Didie ke nnyịn ikpada en̄wan emi?

9. (a) Nso inen̄ede ibehe mme Christian? (b) Nso ye nso ke ikpanam idahaemi man isọn̄ọ mbuọtidem nnyịn?

⁹ Idem inyekke nnyịn ikaha ndifiọk ke ẹyen̄wana utọ en̄wan emi ye ikọt  Abasi. Idịghe edinyan̄a nnyịn enen̄ede ebehe nnyịn, se ikam inen̄erede ibehe nnyịn edi nte ẹdinamde enyịn̄ Jehovah asana ẹnyụn̄ ẹwụt ke enye enyene unen ndikara. Ke nditịm ntịn̄, Jehovah etịn̄ ebe utịm ike 60 ete: “Mbufo ẹyefiọk ẹte ke ami ndi Jehovah.” (Ezek. 6:7) Ke ntre, nnyịn itie ye ọkpọsọn̄ udọn̄ ibet ini emi n̄wọrọnda ikpehe ntịn̄nnịm ikọ Ezekiel emi edisude, koro imenịm ke “Jehovah ọfiọk nte anyan̄ade mbon oro ẹten̄ede Enye osio ke idomo.” (2 Pet. 2:9) Edi kan̄a ke emi, iyom ndida kpukpru ifet oro inyenede nsọn̄ọ mbuọtidem nnyịn man ikpekeme ndisọn̄ọ nda ye Jehovah ke ini idomo ekededi. Nso ke ikpanam? Ikpenyene ndibọn̄ akam, n̄kpep Ikọ Abasi, ntie n̄kere se ikpepde, nnyụn̄ n̄kwọrọ etop Obio Ubọn̄ nnọ mme owo. Ndinam ntem ayanam idotenyịn nsinsi uwem nnyịn ọsọn̄ọ ada nte “ukwak ubom.”—Heb. 6:19; Ps. 25:21.

MME IDỤT ẸNYENE NDIFIỌK JEHOVAH

10, 11. Didie ke Armageddon editọn̄ọ, ndien nso iditịbe ini oro?

¹⁰ Nso n̄kpọntịbe oro ẹdinyen̄ede isọn̄ ke Satan ndin̄wana ye mme asan̄autom Jehovah edida idi? Jehovah ayada Jesus ye mme udịmekọn̄ oro ẹdude ke heaven anyan̄a ikọt Esie. (Edi. 19:11-16) Oro edidi “ekọn̄ akwa usen Abasi Ata Ọkpọsọn̄”—oro edi, Armageddon.—Edi. 16:14, 16.

¹¹ Jehovah ama ada Ezekiel etịn̄ aban̄a ekọn̄ oro ete: “‘Ami nyokot akan̄kan̄ ke ofụri ikpehe mi oro ẹtiede obot obot nte edin̄wana ye [Gog],’ uyo Jehovah Akakan Ọbọn̄ Andikara edi emi. ‘Akan̄kan̄ owo kiet kiet ayan̄wana ye eyenete esie.’” Ke ntak nnyekidem, mbon emi ẹdade ye Satan ẹdidu ke ndutịme ẹnyụn̄ ẹn̄wana ye kiet eken. Edi ẹyesobo Satan n̄ko. Jehovah ọdọhọ ete: “Nyanam . . . ikan̄ ye sulphur ẹdep [Gog] ke idem ye ke idem udịmekọn̄ esie ye ke idem ediwak owo oro ẹdidude ye enye.” (Ezek. 38:21, 22) Nso iditịbe ke ini Abasi anamde emi?

12. Nso ke mme idụt ẹnyene ndinam?

¹² Mme idụt ẹyefiọk ke Jehovah ọdọhọ ẹsobo mmimọ. Ekem, kpa nte ekedide ye mbon Egypt eset oro ẹkebịnede nditọ Israel ke Ididuot Inyan̄, udịmekọn̄ Satan ẹkeme ndifiori ke mbrenyịn ẹte: ‘Jehovah an̄wana ọnọ mmọ’! (Ex. 14:25) Ih, mme idụt ẹnyene ndifiọk Jehovah. (Kot Ezekiel 38:23.) Ndi imenen̄ede ikpere ini emi mme n̄kpọ emi ẹditọn̄ọde nditịbe?

UKARA ERERIMBOT EN̄WEN IDIDAHAKE IDA

13. Nso ke nnyịn ifiọk iban̄a ọyọhọ ikpehe ition ke mbiet oro Daniel etịn̄de aban̄a?

¹³ Ntịn̄nnịm ikọ kiet ke n̄wed Daniel anam ifiọk nte akwa ukụt ekperede. Daniel ama etịn̄ aban̄a mbiet emi etiede nte owo, emi ndido esie ẹdide nsio nsio n̄kpọ. (Dan. 2:28, 31-33) Enye ada aban̄a mme ukara ererimbot emi ẹdude ke adiana ke adiana, emi ẹnen̄erede ẹnyene n̄kpọ ndinam ye ikọt Abasi ke eset ye ke eyomfịn. Mmọ ẹdi Babylon, Media ye Persia, Greece, Rome—ye akpatre ukara ererimbot, emi odude ke eyo nnyịn. Se nnyịn ikpepde ke ntịn̄nnịm ikọ Daniel owụt ke akpatre ukara ererimbot emi edi ikpat ye nnuenukot mbiet oro. Britain ye United States ẹma ẹdụk san̄asan̄a ediomi ke ini akpa ekọn̄ ererimbot. Ntem, ọyọhọ ikpehe ition ke mbiet oro Daniel okokụtde edi Ukara Ererimbot Eke Britain ye America. Ikpat edi akpatre n̄kpọ ke mbiet oro, ndien emi owụt ke ukara ererimbot  en̄wen ididahake ida. Ikpat ye nnuenukot mbiet oro ẹdi ukwak ye mbateso ndien emi owụt nte Ukara Ererimbot Eke Britain ye America mînen̄ekede ikop odudu.

14. Ukara ererimbot ewe edidi akpan ukara ke ini Armageddon edin̄wanade?

¹⁴ Ntịn̄nnịm ikọ oro owụt n̄ko ke ẹma ẹsiak akamba itiat emi adade aban̄a Obio Ubọn̄ Abasi ẹsio ke obot ke 1914. Obot emi ada aban̄a itie edikara Jehovah. Itiat oro ke asan̄a ebịne se enye oyomde nditọ—ikpat mbiet oro. Ẹyenuak ikpat ye mme ndido eken ke mbiet oro ke Armageddon. (Kot Daniel 2:44, 45.) Ntem, Ukara Ererimbot Eke Britain ye America edisụk idi akpan ukara ererimbot ke ini Armageddon edin̄wanade. Edidi n̄kpọ idatesịt didie ntem ndikụt nte ntịn̄nnịm ikọ emi osude! * Edi nso ke Jehovah edinam Satan?

SE ẸDINAMDE AKAKAN ASUA ABASI

15. Ke Armageddon ama ekebe, nso iditịbe inọ Satan ye mme demon esie?

¹⁵ Akpa, Satan ayada enyịn esie okụt nte ẹsobode ofụri esop esie ke isọn̄. Ekem, ẹyenam enye ke idemesie n̄kpọ. Apostle John etịn̄ se ẹdinamde enye. (Kot Ediyarade 20:1-3.) Jesus Christ, kpa “angel” emi akamade “ukpọhọde editụn̄ọ ukpe,” oyomụm Satan ye mme demon esie otomo ọdọn̄ ke editụn̄ọ ukpe, onyụn̄ ọkọbi mmọ do ke tọsịn isua kiet. (Luke 8:30, 31; 1 John 3:8) Se ẹdinamde emi edi ntọn̄ọ edinuak urụkikọt ibuot. *—Gen. 3:15.

16. Nso ke ndisịn Satan ke “editụn̄ọ ukpe” ọwọrọ?

¹⁶ Nso idi “editụn̄ọ ukpe” emi ẹditomode Satan ye mme demon idọn̄? Ikọ Greek oro ẹkabarede “editụn̄ọ ukpe” edi aʹbys·sos, ndien enye ọwọrọ “ata editụn̄ọ obube.” Ẹkabarede enye n̄ko nte “obube emi mînyeneke utịt.” Ntem, enye edi ebiet emi baba owo kiet mîkemeke ndisịm ke mîbọhọke Jehovah ye angel emi enye emekde, oro akamade “ukpọhọde editụn̄ọ ukpe.” Satan edisịne do nte akpakpa, ikemeke ndinam n̄kpọ ndomokiet, man “enye okûtụn mme idụt usụn̄ aba.” Ke akpanikọ, ẹyekụbi “ekpe eke okụnide” do inua!—1 Pet. 5:8.

MME N̄KPỌNTỊBE ORO ẸDADE ẸSỊM INI EMEM

17, 18. (a) Nso idi mme n̄kpọntịbe oro owo mîkwe kan̄a oro nnyịn inemede? (b) Nso iditọn̄ọ ke mme n̄kpọntịbe emi ẹma ẹkebe?

¹⁷ Mme akpan n̄kpọntịbe ye mme n̄kpọntịbe oro ẹdinyen̄ede isọn̄ ẹyesọp nditịbe. Nnyịn itetie ibet ndikụt nte mfiori “Emem ye ifụre!” editiede. Ini oro ndien ke idikụt nte ẹsobode Akwa Babylon, en̄wan Gog eke Magog, ekọn̄ Armageddon, ye edidọn̄ Satan ye mme demon esie ke editụn̄ọ ukpe. Ke mme n̄kpọ emi ẹma ẹkebe, ke ini ofụri idiọkido ẹma ẹkebe ẹfep, n̄kpọ ẹyekpụhọde ofụri ofụri ke Tọsịn Isua Ukara Christ, emi “ediwak emem” edidatde nnyịn esịt.—Ps. 37:10, 11.

¹⁸ Ke adianade ye n̄kpọntịbe ition oro inemede ke ibuotikọ emi, odu “mme n̄kpọ [en̄wen] oro owo mîkwe ke enyịn” emi nnyịn iyomde ‘ndidọn̄ enyịn.’ Iyeneme mme n̄kpọntịbe emi ke ibuotikọ oro etienede.

[Mme Ikọ Idakisọn̄]

[Mme Mbụme Ukpepn̄kpọ]

[Ekebe/​Mme ndise ke page 4, 5]

N̄KPỌ ITION ORO ẸDITỊBEDE:

1 Edifiori “Emem ye ifụre!”

2 Mme idụt ndin̄wana ye “Akwa Babylon” nnyụn̄ nsobo enye

3 Edin̄wana ye ikọt Jehovah

4 Ekọn̄ Armageddon

5 Edidọn̄ Satan ye mme demon esie ke editụn̄ọ ukpe