Oto Itieutom Ubon N̄kani N̄kpọ Nnyịn

Ndisan̄a ye Mme Akaisan̄ Ido Ukpono

“N̄KEMEKE ndisan̄a ke enyịnusụn̄ ke enyịnusụn̄!” Ediwak mbufa nditọ ukpepn̄kpọ Bible ẹsikere ntem ẹban̄a edikwọrọ ikọ nnọ mme owo emi mmọ mîfiọkke. Edi ọnọ utịn̄ikọ an̄wa ye andikpep Bible emi enyenede mbufiọk, emi ẹkesikotde akaisan̄ ido ukpono, eketịn̄ ikọ emi.

Ama esidọn̄ ediwak mme andikot Zion’s Watch Tower emi ẹkekpọn̄de ufọkabasi mmọ ndisop idem ye mbon oro ẹkenyenede udọn̄ nte mmọ ndifiọk akpanikọ Bible. Magazine oro ama esịn udọn̄ ọnọ mme andikot ete ẹyom mbon oro ẹnyenede ukem ọsọn̄urua mbuọtidem oro, ẹsinyụn̄ ẹsop idem kpukpru ini ẹkpep Bible. Ọtọn̄ọde ke n̄kpọ nte 1894, Watch Tower Society ẹma ẹsinọ mme andida ke ibuot mmọ ẹsan̄a ẹse mme otu oro ẹdọhọde ẹdise mmimọ. Nte ini akakade, ẹkekot mmọ mme akaisan̄ ido ukpono, ndien ẹkesimek mme owo emi ẹkenyenede mbufiọk ẹnyụn̄ ẹnamde utom ọkpọsọn̄ mi ke ntak nsụhọdeidem, ifiọk Bible, eti ukeme unọ utịn̄ikọ ye edikpep owo n̄kpọ, ye edisọn̄ọ nda nnọ ufak. Mmọ ẹkesidu usen kiet m̀mê iba ye mme otu emi. Akpa ini emi ediwak Nditọ Ukpepn̄kpọ Bible ẹkesiwọrọde an̄wautom ekedi ini emi mmọ ẹsuande n̄wedikot ndida ntọt utịn̄ikọ an̄wa akaisan̄ ido ukpono. Ke Hugo Riemer, emi akakabarede edi owo Otu Ukara nte ini akakade, ama ọkọnọ utịn̄ikọ mbubreyo ke ufọkn̄wed kiet, enye ama ọbọrọ mme mbụme Bible tutu ebe ufọt okoneyo. Okposụkedi emi enye akakpade mba, esịt ama enem enye, enye onyụn̄ ọdọhọ ke mbono esop oro ama enem tutu.

Enyọn̄-Ukpeme (Ikọmbakara) ọkọdọhọ ke “akpan ufọn” mme akaisan̄ ido ukpono ekedi ndida mme mbono esop oro ẹkesinịmde ke ufọk nditọete nsọn̄ọ “ikọt Abasi” idem. Nditọ Ukpepn̄kpọ Bible ẹma ẹsito mme obio n̄kann̄kụk oro ẹdi ẹdidụk mme utịn̄ikọ oro ye mme ikpehe mbụme ye ibọrọ. Ekem ẹma ẹsikama mmọ esen nte ido mme Christian edide. Ke ini Maude Abbott ekedide ekpri eyenan̄wan, enye ama odụk utịn̄ikọ usenubọk, ndien ke oro ebede kpukpru owo ẹma ẹtie ẹkanade anyan okpokoro ke okụre oro. Enye ọdọhọ ete: “Akpakịp ndinem udia ẹma ẹdu—unam edi, ufafran̄ unen, bred ke utọ ke utọ, ye inịn̄e inịn̄e uyo! Kpukpru owo ẹma ẹdia ofụri se mmọ ẹkekemede ndidia, ndien ke n̄kpọ nte n̄kanika iba uwemeyo nnyịn ima ifiak isop idem ndikop utịn̄ikọ en̄wen.” Edi enye adian do ete, “Etisịm ini oro idap ama enen̄ede anam kpukpru owo.” Benjamin Barton emi akanamde utom ukaisan̄ ido ukpono ebịghi ọkọdọhọ ete, ‘Edieke n̄kpakadiade kpukpru ndinem udia oro ẹkenọde mi, n̄kpeketre utom ukaisan̄ ido ukpono anyan ini ko, sia n̄kpekebe mfep.’ Ke akpatre, leta emi ẹkewetde ke ibuot itieutom ke Brooklyn ama eteme nditọete iban emi ẹkenyenede eti esịt ete ke ọkpọfọn kpukpru owo ẹsinọ akaisan̄ ido ukpono “ata udia emi ẹsidiade kpukpru usen,” ẹnyụn̄ “ẹyak enye ede idap ọfọn.”

Mme akaisan̄ ido ukpono ẹma ẹnen̄ede ẹfiọk ndikpep owo n̄kpọ ye ndida mme chart, uwụtn̄kpọ, m̀mê n̄kpọ en̄wen ekededi oro mmọ ẹnyenede nnam se mmọ ẹkpepde an̄wan̄a. Utịn̄ikọ R. H. Barber “ama esinem etieti.” W. J. Thorn, emi ekesinamde n̄kpọ nte ete, ekesitịn̄ ikọ “nte mme ete-ekpụk eset.” Usen kiet ke ini ẹkesụk ẹwatde Shield Toutjian ke ubomisọn̄ emi ẹkotde Model A Ford, enye ama ofiori inikiet inikiet ete, “Tuak da!” Enye ama ọfrọ osụhọde ke ubomisọn̄ oro, esịbe flawa ke ikọt, onyụn̄ ọnọ mme nsan̄a esie ukpep oro enye mîkeben̄eke idem aban̄a edibotn̄kpọ Jehovah.

Utom ukaisan̄ ido ukpono ama esisọn̄ onyụn̄ akama ediwak n̄kpọ-ata ọnọ nditọete emi, akpan akpan mbon emi ẹkedide n̄kpọ nte isua 45 m̀mê akande oro. Edi se ikọsọn̄de ndusụk mmọ ikan akakam edi ukpụhọde oro  ẹkenamde ẹban̄a se idide akpan utom mmọ. Idahaemi mmọ ẹkenyene ndida iso ke ndikwọrọ ikọ ke ufọk ke ufọk. Enyọn̄-Ukpeme (Ikọmbakara) eke March 15, 1924, ọkọdọhọ ke “kiet ke otu akakan utom” ata mme Christian “edi ndinọ ikọ ntiense mban̄a obio ubọn̄. Se ẹdọn̄de mme akaisan̄ ido ukpono ẹkenam edi emi.”

Ndusụk mme akaisan̄ ido ukpono ikamaha ukpụhọde emi, sia mmọ ẹma ẹkpọn̄ utom emi, ndusụk mbon oro ẹkekopde idiọkesịt ẹma ẹkam ẹtọn̄ọ ido ukpono mmọ. Robie D. Adkins ama etịn̄ nte akaisan̄ ido ukpono kiet emi ekedide ata ọnọ utịn̄ikọ ekesemede idiọk idiọk ete: “N̄kukụre se mfiọkde edi ndikwọrọ ikọ ke mbot utịn̄ikọ. N̄kemeke ndisan̄a ke enyịnusụn̄ ke enyịnusụn̄!” Brọda Adkins ọkọdọhọ ete: “Ini oro n̄kafiakde n̄kụt enye ekedi ke 1924 ke akamba mbono ke Columbus ke Ohio. Enye ekedi owo emi ekenyenede mbọm akan do, ada ikpọn̄ ke mfụt ekpri eto kiet, ofụhọ ke otu ediwak tọsịn nditọete oro ẹkopde idatesịt. Akpatre ini emi n̄kokụtde enye ekedi oro. Enye ama ọkpọn̄ esop esisịt ini ke oro ebede.” Edi “ediwak nditọete emi ẹkopde inemesịt ke ẹkekama n̄wed ẹsan̄a ẹbe ẹka ubomisọn̄ mmọ,” emi owụtde ke mmọ ẹma ẹnen̄ede ẹnyene udọn̄ ndinọ ikọ ntiense ke ufọk ke ufọk.—Utom 20:20, 21.

Okposụkedi emi idem ekenyekde ndusụk mme akaisan̄ ido ukpono oro ẹkenọde ẹka ẹkenọ mme owo ukpep ukem nte ekenyekde mbon oro mmọ ẹkekade ndinọ ukpep, mmọ ẹma ẹnen̄ede ẹnam utom emi. Maxwell G. Friend (Freschel), akaisan̄ ido ukpono emi ekesisemde usem German, ekewet ntem aban̄a unọ ikọ ntiense eke ufọk ke ufọk, “Ikpehe utom ukaisan̄ enye emi ama anam utom ukaisan̄ ọdọdiọn̄ enyene uforo.” John A. Bohnet, emi ekedide akaisan̄ ido ukpono, ama ọtọt ete ke ata ediwak nditọete ẹma ẹsio ofụri esịt ẹma nsọn̄uyo oro ẹkedoride ke utom edikwọrọ Obio Ubọn̄. Enye ọdọhọ ke ata ediwak nditọete ẹma “ẹnyene ọkpọsọn̄ udọn̄ ndida iso ke utom ukwọrọikọ.”

Ke ediwak isua emi ẹbede, mme anam-akpanikọ nditọete oro ẹsan̄ade-san̄a ẹmen̄wam ediwak nditọete. Norman Larson, emi ama ekedi Ntiense ke ediwak isua ọkọdọhọ ete, “Utom mme akaisan̄ ido ukpono ama enen̄ede enyene ufọn, idem nte ami n̄kokụtde ke ini n̄kedide eyenọwọn̄. Mmọ ẹma ẹnam ekese ndikpep mi nnennen usụn̄.” Tutu esịm mfịn emi, utọ mme esenyịn oro ẹsan̄ade-san̄a do, emi ẹsiyakde n̄kpọ atak mmọ ẹnyụn̄ ẹsọn̄ọde ẹda, ke ẹn̄wan̄wam nditọete mmọ ẹdọhọ ẹte, “Nnyịn imekeme ndisan̄a ke enyịnusụn̄ ke enyịnusụn̄!”

[Se ẹwetde ke ikpọ abisi ke page 32]

Usen emi akaisan̄ ido ukpono ekedide ekesidi usen inemesịt!

[Ndise ke page 31]

Benjamin Barton ama awaha n̄kpọ nte ebiet 170 ke isan̄ oro enye akakade ke 1905

[Ndise ke page 32]

Walter J. Thorn ekedi akaisan̄ ido ukpono, ndien ẹkesikot enye Papa ke ntak emi enye ekesinamde n̄kpọ nte ete onyụn̄ enyenede edu Christ

[Ndise ke page 32]

Ẹkenọ J. A. Browne aka Jamaica nte akaisan̄ ido ukpono ke n̄kpọ nte 1902 man ekesịn udọn̄ ọnọ n̄kpri otu 14

[Ndise ke page 32]

Utom ukaisan̄ ido ukpono ama esinam mbuọtidem mme Christian etetịm ọsọn̄, anam mmọ ẹnen̄ede ẹdiana kiet, onyụn̄ anam mmọ ẹnen̄ede ẹkpere esop Abasi