Ndi Jehovah Ọfiọk Fi?
Ndi Jehovah Ọfiọk Fi?
“Jehovah ọmọfiọk mmọ eke ẹnyenede enye.”—2 TIM. 2:19.
1, 2. (a) Nso ikenen̄ede ibehe Jesus? (b) Mme mbụme ewe ke ikpekere iban̄a?
USEN kiet Pharisee kiet ama edi edibụp Jesus ete: “Ewe edi n̄kponn̄kan ewụhọ ke Ibet?” Jesus ama ọbọrọ ete: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.” (Matt. 22:35-37) Jesus ama enen̄ede ama Ete esie eke heaven, ndien enye ama odu uwem ekekem ye se enye eketịn̄de oro. Enye ndisọn̄ọ nda nnam akpanikọ owụt ke n̄kpọ en̄wen oro ekebehede Jesus ekedi nte Jehovah esede imọ. Ke ntre, esisịt ini mbemiso enye akakpade, enye ama ọdọhọ ke Abasi ama ọfiọk ke imọ imenịm mme ewụhọ esie. Emi ama anam Jesus aka iso odu ke ima Jehovah.—John 15:10.
2 Ediwak owo mfịn ẹdọhọ ke imama Abasi. Nnyịn inyụn̄ isịne do. Edi, mme akpan n̄kpọ oro anade ikere iban̄a ẹdi: Ndi Abasi ọfiọk mi? Jehovah ese mi didie? Ndi enye ọfiọk mi nte owo emi enyenede imọ? (2 Tim. 2:19) Nso ifet ke edi ntem ndifiọk ke imekeme ndinyene n̄kpet n̄kpet itie ebuana ye Andikara ekondo!
3. Ntak emi ndusụk owo mînịmke ke imekeme ndidi mmọ eke ẹnyenede Jehovah, ndien nso idinam ikpụhọ utọ ekikere oro?
3 Edi, ekeme ndisọn̄ ndusụk mbon oro ẹnen̄erede ẹma Jehovah ndinịm ke Abasi ekeme ndida mmimọ nte nti owo. Ndusụk mmọ ẹkere ke mmimọ iwọrọke n̄kpọ, ntre mmọ inịmke ke mmimọ imekeme ndinyene Jehovah. Edi esịt adat nnyịn didie ntem ndifiọk ke Abasi idaha nnyịn ntre! (1 Sam. 16:7) Apostle Paul ọkọdọhọ ekemmọ mme Christian ete: “Edieke owo ekededi amade Abasi, Abasi ọfiọk owo emi.” (1 Cor. 8:3) Ima emi amade Abasi edi akpan n̄kpọ emi edinamde enye ọfiọk fi. Kere ban̄a emi: Ntak emi afo okotde magazine emi? Nso inam fi odomo ndinam n̄kpọ Jehovah ke ofụri esịt, ukpọn̄, ekikere, ye ukeme fo? Edieke edide ama ayak idem ọnọ Abasi onyụn̄ ana baptism, nso ikanam fi anam oro? Bible ọdọhọ ke Jehovah, emi esisede esịt, esidụri ndiye owo ada. (Kot Haggai 2:7; John 6:44.) Ntem, emekeme ndidọhọ ke imọ inam n̄kpọ Jehovah sia enye okodụride imọ ada. Tutu amama Jehovah idikpọn̄ke mbon emi enye odụride ada, emi ẹkade iso ẹnam akpanikọ. Mmọ ẹnen̄ede ẹsọn̄ urua ke enyịn Abasi, ndien enye ama mmọ etieti.—Ps. 94:14.
4. Ntak emi akpanade ika iso ikere nte Abasi ndifiọk nnyịn ọsọn̄de urua?
4 Ke Jehovah ama okodụri nnyịn ada, se ikpenen̄erede ibehe nnyịn ekpedi ndika iso ndu ke ima esie. (Kot Jude 20, 21.) Ti ete ke Bible owụt ke owo ekeme ndifiọrọ n̄kpọn̄ m̀mê ndiwọn̄ọde n̄kpọn̄ Abasi. (Heb. 2:1; 3:12, 13) Ke uwụtn̄kpọ, apostle Paul ama asiak Hymenaeus ye Philetus mbemiso etịn̄de se idude ke 2 Timothy 2:19. Etie nte ama odu ini emi mmọ mbiba ẹkenyenede Jehovah, edi nte ini akakade mmọ ẹma ẹkpọn̄ akpanikọ. (2 Tim. 2:16-18) Ti n̄ko ke ndusụk mbon emi Abasi ọkọdiọn̄ọde ke mme esop ke Galatia ikakaha iso idu ke un̄wana eke spirit oro mmọ ẹkedude ini kiet ko. (Gal. 4:9) Ẹyak nnyịn ikûdedei ida idaha nnyịn ye Abasi inam mbubru.
5. (a) Nso idi ndusụk edu emi Abasi amade? (b) Mme uwụtn̄kpọ ewe ke idineme iban̄a?
5 Odu ndusụk edu emi Jehovah enen̄erede ama. (Ps. 15:1-5; 1 Pet. 3:4) Mbuọtidem ye nsụhọdeidem ẹma ẹnam ndusụk mbon emi Abasi ọkọdiọn̄ọde ẹwọrọ ẹda san̄asan̄a. Ẹyak ineme iba ke otu mmọ man ikụt nte mme edu emi ẹkenamde Jehovah enen̄ede ama mmọ. Iyeneme n̄ko iban̄a owo emi ekekerede ke Abasi ọfiọk imọ, edi emi akatan̄de idem onyụn̄ edide edikụt ke Jehovah ama esịn imọ. Imekeme ndikpep ekese nti n̄kpọ nto mmọ.
Ete Mmọ Oro Ẹnyenede Mbuọtidem
6. (a) Didie ke Abraham okowụt ke imenyene mbuọtidem ke un̄wọn̄ọ Jehovah? (b) Jehovah ọkọdiọn̄ọ Abraham didie?
6 Abraham ama “ọbuọt idem ye Jehovah.” Ke nditịm ntịn̄, ẹkot enye “ete kpukpru mmọ oro ẹnyenede mbuọtidem.” (Gen. 15:6; Rome 4:11) Mbuọtidem akanam Abraham ọkpọn̄ ufọk, mme ufan, ye inyene esie aka ebiet emi oyomde usụn̄. (Gen. 12:1-4; Heb. 11:8-10) Mbuọtidem Abraham okosụk ọsọsọn̄ ke ediwak isua ẹma ẹkebe. Enye “[ndikekpere] ndiwa Isaac” eyen esie ke ndinam ewụhọ oro Jehovah ọkọnọde enye owụt emi. (Heb. 11:17-19) Abraham ama ọbuọt idem ke un̄wọn̄ọ Jehovah, ntre Abasi akada enye nte san̄asan̄a owo. Abasi ama enen̄ede ọfiọk Abraham. (Kot Genesis 18:19.) Emi ọwọrọ ke ikedịghe Jehovah ndidiọn̄ọ ke odu owo emi ekerede Abraham, edi ke enye ama ama onyụn̄ ada Abraham nte ufan.—Jas. 2:22, 23.
7. Nso ke ana ifiọk iban̄a mme un̄wọn̄ọ Jehovah ndisu, ndien didie ke oro okotụk Abraham?
7 Ọfọn ifiọk ke tutu Abraham akpa ke enye ikadaha isọn̄ oro ẹken̄wọn̄ọde ẹnọ enye inyene. Enye ikonyụn̄ ikwe nte mfri esie ẹwakde “nte ntan mbeninyan̄.” (Gen. 22:17, 18) Okposụkedi emi mme un̄wọn̄ọ oro mîkosụhu ke eyouwem Abraham, enye ama aka iso enyene ọkpọsọn̄ mbuọtidem ke Jehovah. Enye ama ọfiọk ke edieke Abasi ọn̄wọn̄ọde n̄kpọ, ke enye iditreke ndinam. Ke akpanikọ, Abraham ama odu uwem ekekem ye utọ mbuọtidem oro. (Kot Mme Hebrew 11:13.) Ndi Jehovah ọfiọk nnyịn nte mbon emi ẹnyenede orụk mbuọtidem Abraham?
Ndibet Jehovah Owụt ke Imenyene Mbuọtidem
8. Nso idi ndusụk n̄kpọ emi ẹnen̄erede ẹdọn̄ ndusụk owo?
8 Ekeme ndidi enyene mme n̄kpọ emi ẹnen̄erede ẹdọn̄ nnyịn ndikụt nte ẹsude. Ndọ, ndinyene nditọ, ye nsọn̄idem ẹdi ndammana n̄kpọ, emi mînyụn̄ idiọkke. Edi odu ediwak owo emi ẹsụk ẹbetde-bet ndusụk m̀mê kpukpru n̄kpọ emi. Edieke isịnede ke otu oro, nte inamde n̄kpọ ediwụt adan̄a nte inyenede mbuọtidem.
9, 10. (a) Nso ke ndusụk owo ẹnam man ẹnyene se mmọ ẹyomde? (b) Nso ke afo ekere aban̄a mme un̄wọn̄ọ Abasi ndisu?
9 Ikpowụtke eti ibuot edieke owo okpodomode ndinyene mme n̄kpọ oro ke idiọk usụn̄. Oro akpabiat itie ufan owo ye Abasi. Ke uwụtn̄kpọ, ndusụk owo ẹmebọ usọbọ emi atuahade ye item Jehovah. Ndusụk ẹnam utom emi mîsiyakke mmọ ẹdu ye ubon mmọ m̀mê ẹdụk mme mbono esop. Ke adianade do, nso ke ikpetịn̄ iban̄a edidụk ediomi ndọ ye owo emi mînịmke ke akpanikọ? Edieke Christian akpanamde orụk n̄kpọ oro, ndi enye enen̄ede oyom Jehovah ọfiọk imọ? Ekpeketie Jehovah didie edieke Abraham mîkpekenyeneke ime itie ibet se Abasi ọkọn̄wọn̄ọde ọnọ enye osu? Nso ikpeketịbe edieke Abraham ekpekemekde ebiet kiet ọnọ idemesie onyụn̄ anam enyịn̄ ọnọ idemesie utu ke nditie mbet Jehovah? (Men Genesis 11:4 domo.) Ndi Jehovah akpaka iso ọfiọk enye nte eti owo?
10 Mme n̄kpọ ewe ke afo oyom? Ndi mbuọtidem fo ọsọn̄ ekem ndinam fi etie ebet Jehovah, emi ọn̄wọn̄ọde ndinọ fi nti n̄kpọ oro oyomde? (Ps. 145:16) Nte ekedide ye Abraham, ekeme ndidi ndusụk n̄kpọ emi Abasi ọn̄wọn̄ọde idisọpke isu nte nnyịn ikpamade ẹsu. Edi Jehovah ama nnyịn inyene utọ mbuọtidem Abraham inyụn̄ inam n̄kpọ iwụt mbuọtidem oro. Ndinam ntre eyenen̄ede ọfọn ye nnyịn.—Heb. 11:6.
Ukpụhọde ke Ufọt Nsụhọdeidem ye Ntan̄idem
11. Anaedi nso ifet ke Korah ekenyene, emi owụt ke enye akanam n̄kpọ Abasi didie?
11 Ke ini ẹtịn̄de ẹban̄a edikpono ndutịm ye mme ndausụn̄ Jehovah, se ẹditịn̄de iban̄a Moses edidi ata isio ye se ẹditịn̄de iban̄a Korah. Nte mmọ ẹkenamde n̄kpọ ekebiere nte Jehovah esede mmọ. Korah ekedi eyen Levi emi otode ubon Kohath, ndien enye ama enyene ediwak ifet. Etie nte oro ama esịne ndikụt nte ẹnyan̄ade nditọ Israel ke Ididuot Inyan̄, nditiene nnam se Jehovah ekebierede ọnọ nditọ Israel emi ẹkesọn̄de ibuot ke Obot Sinai, ye nditiene nse mban̄a edimen Ekebe Ediomi. (Ex. 32:26-29; Num. 3:30, 31) Ekeme ndidi enye ama ọsọn̄ọ ada ye Jehovah ke ediwak isua, ndien nte ini akakade ediwak owo ke itienna nditọ Israel ẹkeda enye nte eti uwụtn̄kpọ.
12. Nte ẹwụtde ke page 28, didie ke ntan̄idem okotụk itie ufan Korah ye Abasi?
12 Edi, nte idụt Israel ẹkesụk ẹsan̄ade ke usụn̄ uka Isọn̄ Un̄wọn̄ọ, Korah ama ekere ke enyene se mîsan̄ake ọfọn ke ndutịm Abasi. Ndien iren 250 emi ẹkedide mme ọwọrọiso owo ke Israel ẹma ẹtiene Korah ẹdomo ndinam mme ukpụhọde. Anaedi Korah ye mbon oro ẹkedade ye enye ẹma ẹnen̄ede ẹnịm ke mmimọ imenyene eti itie ebuana ye Jehovah. Mmọ ẹma ẹdọhọ Moses ẹte: “Ekem mbufo adan̄aoro, koro ofụri esop emi ẹdi edisana, Jehovah onyụn̄ odu ke otu mmọ.” (Num. 16:1-3) Mmọ ẹma ẹbuọt idem ẹkaha ke idemmọ ẹnyụn̄ ẹtan̄ idem. Moses ama ọdọhọ mmọ ete: “Jehovah ayanam ẹfiọk m̀mê anie edi owo esie.” (Kot Numbers 16:5.) Eyo ndan̄nsiere etikụt, Korah ye kpukpru mbon emi ẹkedade ye enye ẹma ẹkpan̄a.—Num. 16:31-35.
13, 14. Ke mme usụn̄ ewe ke Moses okowụt ke imọ imosụhọde idem?
13 Edi Moses ekedi “ata sụn̄sụn̄ owo akan kpukpru owo oro ẹkedude ke iso isọn̄.” (Num. 12:3) Enye ama owụt sụn̄sụn̄ ido ye nsụhọdeidem esie ke ndibiere nditiene ndausụn̄ Jehovah. (Ex. 7:6; 40:16) Idụhe se iwụtde ke Moses ama esifan̄a nte Jehovah akanamde n̄kpọ m̀mê ke ama esiyat esịt aban̄a nditiene ndausụn̄ Jehovah. Ke uwụtn̄kpọ, Jehovah ama etịn̄ kpukpru n̄kpọ aban̄a nte ẹkpebọpde tent utuakibuot, utọ nte uduot ndidi emi ẹdidade ẹnam ọfọn̄ tent oro, ye ibat ekọp emi ẹdidude ke mmọ. (Ex. 26:1-6) Edieke esenyịn ke esop Abasi ọnọde fi item emi etiede nte enye eteteme fi kpukpru n̄kpọ, ekeme ndidi esịt idinemke fi ndusụk ini. Edi Jehovah edi mfọnmma esenyịn, emi esiyakde utom ọnọ owo ifụre ifụre onyụn̄ enyenede mbuọtidem ke mme asan̄autom esie. Edieke enye etịn̄de ediwak n̄kpọ aban̄a se enye ọnọde ẹnam, enyene eti ntak emi anamde enye anam ntre. Ti ete ke Moses ikayatke esịt ye Jehovah ke ntak emi eketịn̄de ekese n̄kpọ aban̄a se anade ẹnam, nte n̄kpọ eke Jehovah okosụhọrede enye itie m̀mê mîyakke enye anam se ọdiọn̄ọde m̀mê enyene ifụre. Utu ke oro, Moses ama okụt ete ke mbonutom ẹma “ẹnam kpa ntre” ke nditiene ndausụn̄ Abasi. (Ex. 39:32) Enye ama enen̄ede osụhọde idem. Moses ama ọfiọk ke utom Jehovah ke edi ye nte ke imọ ikedi eyenutom.
14 Ẹma ẹkụt n̄ko ke Moses osụhọde idem, idem ke ini enye okokụtde edikpu. Isan̄ kiet Moses ama ayat esịt etre ndinọ Abasi ukpono ke ini akanamde n̄kpọ ye mbon nsụkuyo. Emi ama anam Jehovah ọdọhọ Moses ke enye ididaha nditọ Israel idụk Isọn̄ Un̄wọn̄ọ. (Num. 20:2-12) Enye ye Aaron eyeneka esie ẹma ẹyọ nsụkuyo nditọ Israel ke ediwak isua. Edi ke ntak ndudue oro, Moses ikenyeneke ndikụt se enye okodoride enyịn aban̄a ke ediwak isua! Moses akanam n̄kpọ didie? Edi akpanikọ ke Moses ama okụt edikpu, edi enye ama osụhọde idem enyịme se Jehovah ekebierede. Enye ama ọfiọk ke Jehovah edi edinen Abasi, emi mîsikpehe ukwan̄ikpe. (Deut. 3:25-27; 32:4) Ke ini ekerede aban̄a Moses, ndi usudaha enye nte owo emi Jehovah ọfiọkde?—Kot Exodus 33:12, 13.
Oyom Isụhọde Idem man Isụk Ibuot Inọ Jehovah
15. Nso ke ntan̄idem Korah ekeme ndikpep nnyịn?
15 Nte nnyịn inamde n̄kpọ iban̄a mme ukpụhọde oro ẹnamde ke esop Christian ofụri ererimbot ye nte inamde iban̄a ubiere mbon emi ẹdade usụn̄ ekeme ndinam Jehovah ọfiọk m̀mê etre ndifiọk nnyịn. Korah ye mbon oro ẹkedade ye enye ẹma ẹdian̄ade ẹkpọn̄ Abasi ke ntak emi ẹkebuọtde idem ẹkaha ke idemmọ, ẹtan̄ idem, ẹnyụn̄ ẹnana mbuọtidem. Kpa ye oro Korah ekesikụtde nte Moses emi ama ọkọsọn̄ ọnọde ndausụn̄ ke usen ke usen, Jehovah ekenen̄ede ada idụt oro usụn̄. Korah ama efre oro ndien ke ntem ikọsọn̄ọke ida ye mbon emi Abasi akadade ọnọ ndausụn̄. Ekpekenen̄ede ọfọn edieke Korah ekpekebetde Jehovah anam n̄kpọ oro an̄wan̄a enye m̀mê ebet ẹnam ukpụhọde edieke okpokoyomde ẹnam ntre. Ke akpatre, ntan̄idem ama anam Korah abiat ediwak isua oro enye ọkọsọn̄ọde ada anam akpanikọ!
16. Didie ke ndikpebe nsụhọdeidem Moses ekeme ndinam Jehovah ọfiọk m̀mê etre ndifiọk nnyịn?
16 Mbụk oro enen̄ede odụri mbiowo ye kpukpru owo mfịn ke esop utọn̄. Oyom isụhọde idem man ikeme ndibet Jehovah nnyụn̄ ntiene ndausụn̄ mbon oro ẹmekde ẹte ẹda usụn̄. Ndi nnyịn imesiwụt ke imosụhọde idem inyụn̄ inyene ifụre ifụri ido nte Moses? Ndi nnyịn imọfiọk inyụn̄ inyịme ke Jehovah ada mbon oro ẹdade usụn̄ ke esop anam n̄kpọ inyụn̄ itiene ndausụn̄ oro mmọ ẹnọde? Ndi imekeme ndimụm idem n̄kama ke ini ẹkpude nnyịn? Edieke inamde mme n̄kpọ emi, Jehovah ọyọfiọk nnyịn. Edieke isụhọrede idem inyụn̄ ikopde uyo, nnyịn iyọsọn̄ urua ke enyịn esie.
Jehovah Ọmọfiọk Mmọ Eke Ẹnyenede Enye
17, 18. Nso ikeme ndin̄wam nnyịn ika iso idi mmọ eke ẹnyenede Jehovah?
17 Ọfọn ndikere mban̄a mbon oro Jehovah okodụride ada onyụn̄ ọfiọkde. Abraham ye Moses ẹkedi mme anana mfọnmma ẹsinyụn̄ ẹnam ndudue nte nnyịn. Kpa ye oro, Jehovah ama ọfiọk mmọ nte mmọ eke ẹnyenede enye. Edi se iketịbede inọ Korah owụt ke nnyịn imekeme ndiwọn̄ọde n̄kpọn̄ Jehovah, ndien ke ntem enye ifiọkke nnyịn aba. Ọfọn owo nnyịn kiet kiet obụp ete: ‘Jehovah ada mi didie? Nso ke mme uwụtn̄kpọ Bible emi ẹkpep mi?’
18 Afo emekeme ndinen̄ede n̄kop ndọn̄esịt ndifiọk ke Jehovah ada mme anam-akpanikọ owo emi enye odụride ada nte mmọ eke ẹnyenede enye. Ka iso nyene mbuọtidem, nsụhọdeidem, ye mme edu eken oro ẹdinamde fi etetịm ọsọn̄ urua ke enyịn Abasi. Jehovah ndifiọk owo edi akwa ukpono emi ọnọde owo inemesịt idahaemi, emi edinyụn̄ anamde owo enyene mme utịbe utịbe edidiọn̄ ke ini iso.—Ps. 37:18.
Nte Afo Emeti?
• Nso ọsọn̄urua ifet ke afo ekeme ndinyene ye Jehovah?
• Didie ke afo ekeme ndikpebe mbuọtidem Abraham?
• Nso ke Moses ye Korah ẹkeme ndikpep nnyịn?
[Mme Mbụme Ukpepn̄kpọ]
[Ndise ke page 26]
Ndi imenyene mbuọtidem nte Abraham ke Jehovah oyosu kpukpru un̄wọn̄ọ esie?
[Ndise ke page 28]
Korah ikenyịmeke ndisụhọde idem ntiene ndausụn̄
[Ndise ke page 29]
Ndi Jehovah ọfiọk fi nte owo emi osụhọrede idem etiene ndausụn̄?
