Nte Afo Emeti?

Nte afo ama ọbọ ufọn oto edikot mme nsiondi Enyọn̄-Ukpeme eke ndondo emi? Ọfọn, se m̀mê emekeme ndibọrọ mme mbụme oro ẹtienede mi:

• Nso idi akpan n̄kpọ ita emi ẹkemede ndin̄wam nnyịn ikan udọn̄ editre ndinam akpanikọ?

Ẹdi: (1) Edinyene ata mbak Abasi. (1 Pet. 3:12) (2) Edinyene ubieresịt oro Bible ọnọde ukpep. (3) Edinen̄ede nsịn ukeme man iyụhọ ye se inyenede.—4/15, page 6-7.

• Nnyịn isan̄a didie ifiọk ke ndida edinam n̄kpọ Abasi nte akpan n̄kpọ iwọrọke ke ana isọn̄ iso kpukpru ini m̀mê itre ndinọ idem nduọkodudu?

Imekeme ndikere mban̄a uwụtn̄kpọ Jesus. Enye ama esidia udia ke eti idaha ye mme owo. Nnyịn imọfiọk ke enye ikadaha kpukpru n̄kpọ ke akpan n̄kpọ kpukpru ini inyụn̄ isọn̄ iso. Mme owo, idem nditọwọn̄, ẹma ẹnyene ifụre ndisan̄a n̄kpere enye.—4/15, page 10.

• Nso ke ebe ye n̄wan ẹkeme ndinam edieke etiede nte mmọ inen̄ekede idiana aba ke mmọ ẹma ẹkenyene nditọ?

Ana mmọ ẹnam kiet eken ọfiọk ke isụk imama enye. Ebe ekeme ndinam n̄kpọ man etre n̄wan esie ndidedei n̄kere ke enye imaha imọ aba. Ndien ana mmọ ẹsitie ẹneme se mmọ ẹyomde.—5/1, page 12-13.

• Nso ke ẹkeda eto olive oro ke Rome ibuot 11 ẹwụt?

Eto olive oro aban̄a udiana mfri Abraham, kpa Israel eke spirit. Jehovah etie nte orụn̄ ndien Jesus etie nte ekpat ndamban̄a eto olive emi. Ke ini ata ediwak ata mme Jew ẹkesịnde Jesus, ẹma ẹsịbe mme Gentile emi ẹkenịmde ke akpanikọ ẹdidian, man ẹnyene ọyọhọ ibat udiana ikpehe mfri Abraham.—5/15, page 22-25.

• Nso idi akpan eti mbụk emi ikemede ndinọ mme ubuene?

Eti mbụk oro edi: Abasi ememek Jesus nte Edidem. Enye edi nnennen Andikara emi editrede ubuene. Ntak-a? Koro enye edikara ofụri ubonowo ndien enye enyene odudu ndinam n̄kpọ; enye esitua mme ubuene mbọm; onyụn̄ ekeme nditre ata akpan n̄kpọ emi adade ubuene edi, kpa ibụk emi ikadade-da imana.—6/1, page 7.

• Nso ke ikọ Jesus ọkọwọrọ ke ini enye ọkọdọhọde Caiaphas ete: “Afo ke idemfo ọdọhọ”?—Matt. 26:63, 64.

Etie nte ikọ oro ẹkabarede “afo ke idemfo ọdọhọ” ekedi ebetọ ikọ emi mme Jew ẹkesiwakde nditịn̄ nsọn̄ọ nte ke se owo etịn̄de edi akpanikọ. Caiaphas oro ekedide akwa oku ama obobụp m̀mê Jesus ekedi Christ, Eyen Abasi. Jesus ndikọdọhọ, “afo ke idemfo ọdọhọ” okowụt ke imenyịme ke imọ idi Christ.—6/1, page 18.

• Ndi nditọ oro Jesus okpokobonde ẹkpeketiene ẹkpe ufak?

Baba. Kpa ye oro Jesus okpokobonde ediwak biliọn mfọnmma nditọ, eyen ndomokiet oro Jesus okpokobonde iketieneke ikpe ufak oro. Mfọnmma uwem Jesus kpọt ekedi n̄kemn̄kem ye eke Adam. (1 Tim. 2:6)—6/15, page 13.

• Didie ke mme Christian ẹkeme ndiwụt ke imanam item oro ẹnọde ẹban̄a nsunsu mme andikpep ke Utom 20:29, 30?

Mmọ isidaha nsunsu mme andikpep idụk ufọk mmọ m̀mê ndikọm mmọ. (Rome 16:17; 2 John 9-11) Mme Christian isikotke n̄ko mme n̄wed mbon mfiakedem, isehe mme edinam TV oro ẹsịnede mmọ, inyụn̄ idụn̄ọkede ikpehe Intanet oro esịnede mme ukpepn̄kpọ mmọ.—7/15, page 15-16.

• Anie ekpekpep nditọ n̄kpọ aban̄a Abasi?

Ete ye eka ẹkpenyene ndinam oro, nte Bible etemede. (N̄ke 1:8; Eph. 6:4) Ndụn̄ọde oro ẹnamde owụt ke edieke edide ete ye eka ẹkpep nditọ mmọ n̄kpọ, ke oro esifọn.—8/1, page 6-7.