Bọ Spirit Abasi, Kûbọ Eke Ererimbot

“Nnyịn ikọbọhọ spirit ererimbot, edi ikọbọ spirit emi otode Abasi, man nnyịn ikpọfiọk mme n̄kpọ oro Abasi ọnọde nnyịn ke mfọnido.” —1 COR. 2:12.

1, 2. (a) Nso orụk ekọn̄ ke ata mme Christian ẹn̄wana? (b) Mme mbụme ewe ke idineme?

ATA mme Christian ke ẹn̄wana ekọn̄! Asua nnyịn okop odudu, akari n̄kari, onyụn̄ enen̄ede ọfiọk ndin̄wana ekọn̄. Enye enyene n̄kpọekọn̄ oro enen̄erede okop odudu tutu enye akan ata ediwak ke otu ubonowo. Edi ufọn idụhe nnyịn ndikere ke nnyịn inyeneke odudu m̀mê ke ẹyekan nnyịn. (Isa. 41:10) Nnyịn imenyene okopodudu n̄kpọ ukpeme oro ikemede ndida n̄kan en̄wan ekededi.

² Nnyịn in̄wanake ata ekọn̄, edi in̄wana ekọn̄ eke spirit. Asua nnyịn edi Satan kpa Devil, ndien akpan n̄kpọekọn̄ esie edi “spirit ererimbot.” (1 Cor. 2:12) Akpan n̄kpọ ukpeme emi nnyịn idade ikan en̄wan esie edi spirit Abasi. Man ikan ke ekọn̄ emi inyụn̄ ika iso isọn̄ idem ke n̄kan̄ eke spirit, ana iben̄e Abasi ọnọ nnyịn spirit esie ndien ekem iwụt mbun̄wụm spirit emi ke uwem nnyịn. (Gal. 5:22, 23) Edi nso idi spirit ererimbot, ndien enye asan̄a didie edinyene odudu ntre? Nnyịn ikeme ndisan̄a didie mfiọk m̀mê spirit ererimbot ke akara nnyịn? Ndien nso ke ikeme ndikpep nto Jesus mban̄a edibọ spirit Abasi nnyụn̄ mbiọn̄ọ spirit ererimbot?

Ntak Emi Spirit Ererimbot Odude ke Kpukpru Ebiet?

3. Nso idi spirit ererimbot?

³ Spirit ererimbot oto Satan, kpa “andikara ererimbot emi,” ndien enye ọbọbiọn̄ọ edisana spirit Abasi. (John 12:31; 14:30; 1 John 5:19) Enye edi akpan odudu ererimbot oro esinamde mme owo ẹnam n̄kpọ. Ọkpọsọn̄ odudu emi anam ubonowo ẹnam mme n̄kpọ oro ẹtuahade ye uduak Abasi.

4, 5. Spirit oro Satan esịnde udọn̄ ọnọ akasan̄a didie edidu ke kpukpru ebiet?

⁴ Odudu oro Satan esịnde udọn̄ ọnọ akasan̄a didie edidu ke kpukpru ebiet? Akpa, Satan ama abian̄a Eve ke In̄wan̄ Eden. Enye ama anam Eve enịm ke ndida ke idem n̄kpọn̄ Abasi oyofori uwem esie. (Gen. 3:13) Enye ekedi ata osu nsu! (John 8:44) Ekem, enye ama ada n̄wan anam Adam etre ndinam akpanikọ nnọ Jehovah. Ke ntak se Adam ekemekde, enye ama anyam ubonowo esịn ke idiọkn̄kpọ, ke ntem spirit nsọn̄ibuot Satan ama ọtọn̄ọ ndikara  mmọ toto ke emana.—Kot Ephesus 2:1-3.

⁵ Satan ama otụn n̄ko ediwak angel usụn̄, emi ẹkekabarede ẹdi mme demon. (Edi. 12:3, 4) Ẹkesọn̄ ibuot oro ye Abasi mbemiso Ukwọ eyo Noah. Mme angel oro ẹkenịm ke n̄kpọ eyetịm ọfọn ye mmimọ edieke ikpọn̄de itie mmimọ ke heaven inyụn̄ inana iso o-bụt idiyụhọ idiọk udọn̄ mi ke isọn̄. (Jude 6) Mme demon oro ẹkefiakde ẹnyọn̄ do, ke ẹn̄wam Satan “emi adade kpukpru mme andidụn̄ isọn̄ otụn usụn̄.” (Edi. 12:9) Ọdiọk tutu sia ata ediwak ke otu ubonowo mîfiọkke ke odudu mme demon do.—2 Cor. 4:4.

Ndi Spirit Ererimbot ke Akara Fi?

6. Nso idi n̄kukụre n̄kpọ oro ekemede ndinam spirit ererimbot akara nnyịn?

⁶ Ediwak owo ifiọkke nte odudu Satan akarade mme owo, edi ata mme Christian ẹfiọk mme n̄kukan esie. (2 Cor. 2:11) Ke nditịm ntịn̄, spirit ererimbot ikemeke ndikara nnyịn ibọhọke nnyịn iyak enye akara. Ẹyak ineme mbụme inan̄ oro ẹdin̄wamde nnyịn ikụt m̀mê edi spirit Abasi m̀mê eke ererimbot akara nnyịn.

7. Nso idi usụn̄ kiet emi Satan adade odomo ndidian̄ade nnyịn n̄kpọn̄ Jehovah?

⁷ Nso ke unọ idem inemesịt oro mmekde etịn̄ aban̄a mi? (Kot James 3:14-18.) Satan odomo ndidian̄ade nnyịn n̄kpọn̄ Abasi ke ndinam nnyịn ima afai. Devil ọfiọk ke Jehovah asasua owo ekededi eke amade afai. (Ps. 11:5) Ke ntre, Satan odomo ndida mme n̄wed, fim, ye mme mbre vidio—emi ndusụk ẹsịnde udọn̄ ẹnọ mme andibre ndinam oburobụt ido ye ibak ke mbre—ndemede udọn̄ obụkidem nnyịn. Ibeheke Satan m̀mê ubak esịt nnyịn ke ama se inende ama akam edi ubak esịt nnyịn ke ama se idiọkde m̀mê se enye esịnde udọn̄ ọnọ.—Ps. 97:10.

8, 9. Nso mbụme oro ẹban̄ade unọ idem inemesịt ke ikpobụp idem nnyịn?

⁸ Ke n̄kan̄ eken, spirit Abasi esinam mbon oro ẹbọde enye ẹnyene edisana ido, ẹtie emem emem, ẹnyụn̄ ẹyọhọ ye mbọm. Ọkpọfọn ibụp idem nnyịn ite, ‘Ndi unọ idem inemesịt oro mmekde anam mi nnyene nti edu?’ Eti ibuot emi otode enyọn̄ “isan̄ake ye mbubịk.” Mbon oro spirit Abasi akarade ikwọrọke edisana ido ye emem inọ mme mbọhọidụn̄ mmọ ke adan̄aemi mmọ ẹmade ndise ibak ibak afai ye oburobụt ido ke ufọk mmọ.

⁹ Jehovah oyom san̄asan̄a utuakibuot. Edi Satan akam oyom ẹtuak ibuot ẹnọ imọ ini kiet kpọt, nte enye okoyomde Jesus atuak ọnọ imọ. (Luke 4:7, 8, ik. id.) Nnyịn imekeme ndibụp idem nnyịn ite: ‘Ndi unọ idem inemesịt oro mmekde anam mi n̄keme ndinọ Abasi san̄asan̄a utuakibuot? Ndi se mmekde anam ọsọn̄ m̀mê emem mi utom ndibiọn̄ọ spirit ererimbot? Ndi n̄kpenyene ndinam ukpụhọde ke se ndimekde ke ini iso?’

10, 11. (a) Nso edu ke spirit ererimbot esịn udọn̄ ọnọ kaban̄a inyene obụkidem? (b) Ikọ oro ẹdade odudu spirit Abasi ẹwet esịn udọn̄ ọnọ nso orụk edu?

¹⁰ Ami nda didie inyene obụkidem? (Kot Luke 18:24-30.) Spirit ererimbot anam mme owo ẹma “se idọn̄de enyịn” ke ndinam mmọ ẹdiọk itọn̄ ẹnyụn̄ ẹma inyene. (1 John 2:16) Enye anam ediwak owo ẹbiere ndinyene inyene. (1 Tim. 6:9, 10) Spirit oro ayanam nnyịn inịm ke edieke ikọde ekese n̄kpọ obụkidem ibon, ke emi ayanam nnyịn inyene n̄kpọ ke ini iso. (N̄ke 18:11) Edi edieke imade okụk ikan Abasi, emi ọkpọwọrọ ke Satan akan nnyịn. Nnyịn ikpenyene ndibụp idem nnyịn ite, ‘Ndi uwem mi owụhọ ke ndiyom inyene obụkidem ye inemesịt?’

¹¹ Edi Ikọ emi ẹkedade odudu spirit Abasi ẹwet esịn udọn̄ ọnọ nnyịn ete ida eti ibuot ise okụk inyụn̄ isịn ifịk inam utom man inyene se idade ibọk idem nnyịn ye ubon nnyịn. (1 Tim. 5:8) Spirit Abasi an̄wam mbon oro ẹbọde enye man ẹkpebe edu ntatubọk  Jehovah. Ẹdiọn̄ọ utọ mbon oro nte mme andinọnọ, idịghe mme andibọbọ. Mmọ ẹnen̄ede ẹma mme owo ẹkan inyene ẹnyụn̄ ẹdat esịt ndibuana se mmọ ẹnyenede ye mbon en̄wen ke ini ẹkemede ndinam ntre. (N̄ke 3:27, 28) Mmọ inyụn̄ idehedei iyak un̄wana okụk edi ebeiso n̄kpọ ọnọ edinam n̄kpọ Abasi.

12, 13. Didie ke spirit Abasi, emi okpụhọrede ye spirit ererimbot, ekeme ndinam ufọn nnọ nnyịn?

¹² Edu mi ebiet ewe spirit? (Kot Colossae 3:8-10, 13.) Spirit ererimbot esịn udọn̄ ọnọ mme utom obụkidem. (Gal. 5:19-21) N̄kpọ emi esinen̄erede owụt m̀mê spirit ewe akara nnyịn isidịghe ke ini n̄kpọ ọfọnde, edi esidi ke ini mfịna odude, utọ nte ke ini eyenete ofụmide, eduede, m̀mê akam anamde idiọk adian nnyịn. Ke adianade do, ekeme ndina in̄wan̄-in̄wan̄ ke esịtufọk nnyịn m̀mê ewe spirit akara nnyịn. Ekeme ndiyom idụn̄ọde idem nnyịn. Bụp idemfo ete, ‘Ke ufan̄ ọfiọn̄ itiokiet emi ẹbede, ndi edu mi enen̄ede ebiet eke Christ mîdịghe ndi mmafiak ntọn̄ọ idiọk inua ikọ ye idiọk edu uwem?’

¹³ Spirit Abasi ekeme ndin̄wam nnyịn ‘isio akani owo ye mme edinam esie iduọk,’ inyụn̄ imen “obufa owo” isịne. Oro ayanam nnyịn idọdiọn̄ inyene ima inyụn̄ ifọn ido. Ayanam nnyịn ifen inọ kiet eken ke ofụri esịt, idem edieke etiede nte imenyene eti ntak nditọhọ. Ke ini ikerede ke ẹnam n̄kpọ ye nnyịn ke ufịk, nnyịn idinamke aba n̄kpọ ke “udu ye iyatesịt ye ifụtesịt ye mfiori ye ikọ isụn̄i.” Utu ke oro, iyenen̄ede isịn ukeme man ‘itua owo mbọm.’—Eph. 4:31, 32.

14. Ediwak owo ke ererimbot ẹse didie Ikọ Abasi?

¹⁴ Ndi mmokpono nnyụn̄ mma edumbet Bible kaban̄a ido uwem? (Kot Mme N̄ke 3:5, 6.) Spirit ererimbot esinam mme owo ẹtre ndinam se Ikọ Abasi ọdọhọde. Mbon oro spirit emi akarade ẹsịn mme ikpehe Bible oro mmọ ẹdade nte se mîmemke utom ndinam, ẹkabade ẹma mme ukpepn̄kpọ ye ikpọ ifiọk owo. (2 Tim. 4:3, 4) Ndusụk owo ẹsesịn Ikọ Abasi ofụri ofụri. Utọ mme owo oro ẹdọhọ ke Bible inyeneke ufọn inyụn̄ idịghe akpanikọ, ẹnyụn̄ ẹkabade ẹse idemmọ ke mbon ọniọn̄. Mmọ idaha nti edumbet esie emi ẹban̄ade efịbe, idan̄ ukemuduot, ye udian̄ade ndọ ke n̄kpọ. Mmọ ẹkpep ke “eti edi idiọk, idiọk onyụn̄ edi eti.” (Isa. 5:20) Ndi spirit emi ebe fi? Ndi nnyịn isiberi edem ke ọniọn̄ owo, emi esịnede ekikere idem nnyịn, ke ini inyenede mfịna? Mîdịghe ndi imesidomo ndinam item Bible?

15. Utu ke ndiberi edem ke asian nnyịn, nso ke ikpanam?

¹⁵ Spirit Abasi anam nnyịn ikpono Bible. Ukem nte andiwet psalm, nnyịn ida ikọ Abasi nte utuenikan̄ ukot nnyịn ye un̄wana usụn̄ nnyịn. (Ps. 119:105) Utu ke ndiberi edem ke asian nnyịn, nnyịn inen̄ede  ibuọt idem ke Ikọ Abasi oro ẹwetde-wet man an̄wam nnyịn ifiọk eti ye idiọk. Nnyịn imekpep ndikpono Bible ye ndima ibet Abasi.—Ps. 119:97.

Kpep N̄kpọ to Uwụtn̄kpọ Jesus

16. Nso ibuana ke ndinyene “ekikere Christ”?

¹⁶ Man ibọ spirit Abasi, ana ikpep ndinyene “ekikere Christ.” (1 Cor. 2:16) Man inyene “ukem edu ukere n̄kpọ Christ Jesus,” oyom ifiọk nte enye ekesikerede onyụn̄ anamde n̄kpọ ndien ekem ikpebe enye. (Rome 15:5; 1 Pet. 2:21) Kere ban̄a ndusụk usụn̄ emi ikemede ndinam oro.

17, 18. (a) Nso ke ikpep ito Jesus iban̄a akam? (b) Ntak emi ‘ikpakade iso iben̄e’?

¹⁷ Bọn̄ akam ben̄e spirit Abasi. Mbemiso Jesus okosobode idomo, enye ama ọbọn̄ akam ete spirit Abasi an̄wam imọ. (Luke 22:40, 41) Oyom nnyịn n̄ko iben̄e Abasi ọnọ nnyịn edisana spirit esie. Jehovah esitat ubọk ọnọ mbon oro ẹben̄ede enye ke mbuọtidem. (Luke 11:13) Jesus ọkọdọhọ ete: “Ẹka iso ẹben̄e, ndien ẹyenọ mbufo; ẹka iso ẹyom, ndien mbufo ẹyekụt; ẹka iso ẹkọn̄, ndien ẹyeberede ẹnọ mbufo. Koro kpukpru owo eke ẹben̄ede ẹbọde, kpukpru owo eke ẹnyụn̄ ẹyomde ẹkụtde, ẹdinyụn̄ ẹbererede ẹnọ kpukpru owo eke ẹkọn̄de.”—Matt. 7:7, 8.

¹⁸ Ke ini oyomde spirit ye un̄wam Jehovah, kûsọsọp utre ndiben̄e. Ekeme ndiyom ibọn̄ akam ndien ndien inyụn̄ ibọn̄ ebịghi. Ndusụk ini, Jehovah esiyak mbon oro ẹben̄ede enye n̄kpọ ẹwụt adan̄a nte n̄kpọ emi ebehede mmọ ye adan̄a nte mmọ ẹnen̄erede ẹnyene mbuọtidem. *

19. Nso ke Jesus ekesinam kpukpru ini, ndien ntak emi nnyịn ikpekpebede enye?

¹⁹ Kop uyo Jehovah ke kpukpru n̄kpọ. Jesus ekesinam n̄kpọ oro enemde Ete esịt kpukpru ini. Ini kiet ke nsụhọde n̄kaha, Jesus ama enyene ekikere oro ekedide isio ye eke Ete esie ke nte ẹkpenamde n̄kpọ. Edi enye ama ọdọhọ Ete esie uko uko ete: “Yak okûdi uduak mi, edi yak edi uduak fo ada itie.” (Luke 22:42) Bụp idemfo ete, ‘Ndi mmesikop uyo Abasi idem ke ini mîmemke ndinam oro?’ Oyom ikop uyo Abasi man idu uwem. Ana ikop uyo inọ enye ke kpukpru n̄kpọ sia enye edide Andibot nnyịn, kpa Andinọ ye Andinịm nnyịn uwem. (Ps. 95:6, 7) Idụhe n̄kpọ en̄wen oro ekemede ndida itie n̄kopuyo. Nnyịn ikemeke ndinyene mfọn Abasi edieke mîkopke uyo esie.

20. Ofụri uwem Jesus ekenyene n̄kpọ ndinam ye nso, ndien didie ke nnyịn ikeme ndikpebe enye?

²⁰ Nen̄ede fiọk Bible. Ke ini Jesus ọkọbiọn̄ọde en̄wan oro Satan akan̄wanade ye mbuọtidem esie, enye okokot oto N̄wed Abasi. (Luke 4:1-13) Ke ini Jesus okosobode ye mme andibiọn̄ọ enye, enye akada Ikọ Abasi nte odudu esie. (Matt. 15:3-6) Ofụri uwem Jesus ekenyene n̄kpọ ndinam ye edifiọk ye edinam ibet Abasi osu. (Matt. 5:17) Nnyịn n̄ko iyom ndika iso nda Ikọ Abasi oro ọsọn̄ọde mbuọtidem owo mbọk esịt nnyịn. (Phil. 4:8, 9) Ekeme ndinen̄ede nsọn̄ ndusụk nnyịn ndiyom ini nda nnịm ukpepn̄kpọ idemowo ye eke ubon. Edi utu ke ndiyoyom ini, ekeme ndiyom nnyịn idedep ifet.—Eph. 5:15-17.

21. Nso ifet ke ikeme ndida nnam n̄kpọ man an̄wam nnyịn inen̄ede ifiọk inyụn̄ ida Ikọ Abasi isịn ke edinam?

²¹ “Ofụn emi anamde akpanikọ onyụn̄  enyenede ọniọn̄” aman̄wam nnyịn inyene ini ndida nnịm ukpepn̄kpọ idemowo ye eke ubon ebe ke ndidiomi mbubreyo Utuakibuot Ubon kpukpru urua. (Matt. 24:45) Ndi afo ke ada ini emi anam n̄kpọ nte ọfọnde? Man enyene ekikere Christ, ndi emekeme ndisida mme ibuotikọ oro afo amade nneme mme n̄kpọ oro Jesus ekekpepde? Emekeme ndida Watch Tower Publications Index nyom mme ibuotikọ oro afo amade ndikpep n̄kpọ mban̄a. Ke uwụtn̄kpọ, ọtọn̄ọde ke 2008 tutu esịm 2010, nsiondi ofụri owo eke magazine emi ama enyene ibuotikọ 12 emi enyịn̄ ekedide “Se Ikpepde Ito Jesus.” Enye n̄ko enyene mme ibuotikọ emi, “Eke N̄kparawa Owo” ye “Kpep Nditọ Fo.” Mme mbụme emi ẹdude do ẹyen̄wam fi enen̄ede ọfiọk Ikọ Abasi. Ntak emi mûsịnke mme ibuotikọ emi ke ini ke ini ke ndutịm Utuakibuot Ubon mbufo?

Nnyịn Imekeme Ndikan Ererimbot

22, 23. Nso ke ana inam man ikan ererimbot?

²² Ana ibiọn̄ọ spirit ererimbot man spirit Abasi ada nnyịn usụn̄. Utọ ubiọn̄ọ oro isimemke. Ekeme ndidi en̄wan, ata ọkpọsọn̄ en̄wan. (Jude 3) Edi imekeme ndikan! Jesus ọkọdọhọ mme mbet esie ete: “Mbufo ẹyekụt ukụt ke ererimbot, edi ẹnyene uko! Ami mmakan ererimbot.”—John 16:33.

²³ Nnyịn imekeme ndikan ererimbot edieke ibiọn̄ọde spirit esie inyụn̄ inamde ofụri se ikemede man ibọ spirit Abasi. Ke nditịm ntịn̄, “edieke Abasi adade ye nnyịn, anie edibiọn̄ọ nnyịn?” (Rome 8:31) Edieke ibọde spirit Abasi inyụn̄ itienede ndausụn̄ esie oro ẹdude ke Bible, nnyịn iyokop uyụhọ ye inemesịt inyụn̄ inyene emem ye idotenyịn nsinsi uwem ke obufa ererimbot oro enen̄erede ekpere.

[Ikọ Idakisọn̄]

Nte Afo Emeti?

• Ntak emi spirit ererimbot odude ke kpukpru ebiet?

• Ewe mbụme inan̄ ke ikpobụp idem nnyịn?

• Nso idi n̄kpọ ita emi ikpepde ito Jesus iban̄a edibọ spirit Abasi?

[Mme Mbụme Ukpepn̄kpọ]

[Ndise ke page 8]

Ndusụk angel ẹkesan̄a didie ẹkabade mme demon?

[Ndise ke page 10]

Satan ada spirit ererimbot akara mme owo, edi nnyịn imekeme ndibọhọ odudu esie