Ntak Emi Ekpesikade N̄kpọ ke Ini?

ISIMEMKE utom kpukpru ini ndika n̄kpọ ke ini. Ndusụk n̄kpọ oro ẹkemede ndinam owo aka n̄kpọ ke idiọk ini ẹdi anyan usụn̄ isan̄, idiọk usụn̄, m̀mê ndikpọn̄ ufọk ke idiọk ini. Kpa ye oro, ndika n̄kpọ ke ini edi akpan n̄kpọ. Ke uwụtn̄kpọ, ẹsida owo emi esibakde utom nte owo emi ẹkemede ndiberi edem, emi esịnde ifịk ke utom. Edi owo emi esikade utom ke idiọk ini ekeme ndibiat n̄kpọ nnọ mbon en̄wen inyụn̄ iyakke ẹnam utom nte ẹkpenamde. Ndisika n̄wed ke idiọk ini ekeme ndinam eyen ufọkn̄wed ataba ndusụk se ẹsikpepde inyụn̄ iyakke enye ebe n̄wed. Nditre ndikokụt abiausọbọ ke ini emi enye ekenịmde idiyakke enye enen̄ede ọnọ fi ntịn̄enyịn.

Edi ke ndusụk ebiet, mme owo idaha uka n̄kpọ ke ini ke akpan n̄kpọ. Ekeme ndisọp mmehe nnyịn ndisika n̄kpọ ke idiọk ini edieke idude do. Ke edide ntre, oyom inam edi edu nnyịn ndisika n̄kpọ ke ini. Ndidiọn̄ọ ufọn edibak n̄ka n̄kpọ ayanam inam emi. Ntak emi ikpesikade n̄kpọ ke ini? Nso ke ikpanam man isika n̄kpọ ke ini? Ndien nso ufọn ke ikeme ndibọ edieke ibakde ika n̄kpọ?

Jehovah—Abasi Emi Esinamde N̄kpọ ke Ini

Akpan ntak emi anamde isibak ika n̄kpọ edi sia iyom ndikpebe Abasi nnyịn. (Eph. 5:1) Jehovah enịm eti uwụtn̄kpọ  ke ndisinam n̄kpọ ke ini. Akananam enye inamke n̄kpọ ke idiọk ini. Enye esisu uduak esie ke ata nnennen ini oro enye ekenịmde. Ke uwụtn̄kpọ, ke ini enye okoyomde ndida Ukwọ nsobo idiọk ererimbot eyo Noah, enye ama ọdọhọ Noah ete: “Da eto gopher nam ubom nọ idem fo.” Nte usen nsobo oro ekekperede, Jehovah ama ọdọhọ Noah odụk ubom oro onyụn̄ ọdọhọ enye ete: “Osụk kan̄a usen itiaba ami nyanam edịm edep ke isọn̄ ke uwemeyo aba ye okoneyo aba; nyonyụn̄ nsọhi kpukpru se idude uwem emi n̄kanamde, ke iso isọn̄ mfep.” Ndien ke ata nnennen ini, ‘ke ọyọhọ usen itiaba, mmọn̄ ukwọ ama ọtọn̄ọ ndidu ke isọn̄.’ (Gen. 6:14; 7:4, 10) Kere se ikpeketịbede inọ Noah ye ubon esie edieke mmọ mîkpokodụkke ubom oro ke ini. Akana mmọ ẹnam n̄kpọ ke ini ukem nte Abasi mmọ esinamde.

Ke n̄kpọ nte isua 450 ẹma ẹkebe tọn̄ọ Ukwọ eketịbe, Jehovah ama ọdọhọ ete-ekpụk oro Abraham ke enye eyenyene  eyen emi Mfri oro ẹken̄wọn̄ọde editode ubon esie. (Gen. 17:15-17) Abasi ama asiak nnennen ini emi Isaac edimanade. Ndi oro ama etịbe? Bible ọdọhọ ete: “Sarah oyomo, onyụn̄ aman eyeneren ọnọ Abraham ke ini usọn̄ esie, ke ini oro Abasi [akasiakde] ọnọ enye.”—Gen. 17:21; 21:2.

Ediwak itie ke Bible ẹwụt nte Abasi esinamde n̄kpọ ke ini. (Jer. 25:11-13; Dan. 4:20-25; 9:25) Bible ọdọhọ isinyene usen ubiereikpe Jehovah ke ekikere. Kpa ye oro enye etiede mme owo ke enyịn nte “ebịghi,” se idiọn̄ọde edi ke enye ‘idibehe ini.’—Hab. 2:3.

Ọfọn Ẹsika N̄kpọ Abasi ke Ini

Akana kpukpru irenowo ke Israel ẹkesịm ebiet emi ẹdinịmde “edisana esop” Jehovah ke ini. (Lev. 23:2, 4) Abasi ama enịm n̄ko ini emi anade ẹnam ndusụk uwa. (Ex. 29:38, 39; Lev. 23:37, 38) Ndi oro iwụtke ke Abasi oyom mme asan̄autom esie ẹsika n̄kpọ imọ ke ini?

Ke ini apostle Paul ọkọnọde mbon Corinth eyo esie item aban̄a nte mme Christian ẹkpenịmde mbono esop, enye ama ọdọhọ mmọ “ẹyak kpukpru n̄kpọ ẹda itie ke ido nte eyede ye ke ndutịm.” (1 Cor. 14:40) Akana mme Christian ẹsitọn̄ọ edinam utuakibuot mmọ ke nnennen ini. Jehovah ikpụhọkede nte enye esede uka n̄kpọ ke ini. (Mal. 3:6) Ekere ke nso ke ikpanam man isika mboho Christian nnyịn ke ini?

Se Akpanamde man Esika N̄kpọ ke Ini

Ndusụk owo ẹkụt ke ndibak ntịm idem esinen̄ede an̄wam. (N̄ke 21:5) Yak idọhọ ke edida nnyịn minit 30 ndikesịm ebiet emi iyomde ndika, ndi okpowụt ifiọk ndinyụn̄ n̄kpọn̄ ufọk ke ayakde minit 30 edinam oro nditọn̄ọ? Ndi ikpakam ifọnke ibak ikan oro, mbak edieke “unọmọ etịbede” ke usụn̄, ikposụk ikesịm ke eti ini? (Eccl. 9:11) José emi edide akparawa emi esikade n̄kpọ ke ini ọdọhọ ete: “Se idin̄wamde owo esika n̄kpọ ke ini edi ndidiọn̄ọ m̀mê edida imọ minit ifan̄ ndikesịm ebiet emi ikade.” *

Esiyom ndusụk owo ẹnam ndutịm ẹbabak ẹdaha ke itieutom man ẹkpekesịm mbono esop ke ini. Se Ntiense kiet ke Ethiopia akanamde edi oro ke ini enye ọkọfiọkde ke owo emi edisidide idibọ imọ utom ke usen mbono esop mmimọ ayanam isika mbono esop ke ata idiọk ini. Enye ama anam ndutịm man owo en̄wen esibabak edibọ imọ utom ke usen mbono esop mmimọ. Ndien enye ama enyịme ndisinam utom hour itiaba nnọ owo oro.

Esinen̄ede ọsọn̄ ndika mbono esop ke ini edieke inyenede n̄kpri nditọ. Ẹsima ndiyak mbiomo editịm nditọ idem nnọ eka ikpọn̄, edi mbon eken ke ubon ẹkeme n̄ko ndin̄wam ndien akpana mmọ ẹnam ntre. Eyenete an̄wan kiet ke Mexico emi ekerede Esperanza ọbọk nditọ itiaita ikpọn̄. Akpa eyen esie edi isua 23, ke ini ekperedem edide isua 5. Enye ama etịn̄ se mmimọ isinamde man ikesịm mbono esop ke ini, ete: “Nditọ mi iban oro ẹkponide ẹsitịm n̄kpri eken idem. Emi esinam n̄keme ndikụre se nnyenede ndinam ke ufọk nnyụn̄ ntịm idem man idaha mbono esop ke ini emi ikenịmde.” Mmọ ẹnyene ini emi mmọ ẹkenịmde ndisidaha mbono esop, ndien kpukpru owo ẹsisọp ẹnam n̄kpọ man ẹkeme ndidaha ke ini oro.

Ufọn Edika Mbono Esop ke Ini

Ndikere ufọn oro ibọde ke ndisika mbono esop ke ini eyesịn udọn̄ ọnọ nnyịn onyụn̄ anam ibiere ndinam se ededi oro ikemede man isika mbono esop ke ini. N̄kaiferi kiet emi ekerede Sandra, emi esikade mbono esop ke eti ini ọdọhọ ete: “Se isinamde mma ndibak n̄ka mbono esop edi ke emi esinọ mi ifet ndikọm nditọete, nnyene nneme ye  mmọ, nnyụn̄ nnen̄ede mmehe ye mmọ.” Ke ini ibakde ika mbono esop, iyenyene ifet ndikop ifiọkutom nditọete nnyịn oro ẹsọn̄ọde ẹda ẹnam n̄kpọ Abasi ẹbịghi. Imekeme ndisịn udọn̄ nnọ nditọete nnyịn iren ye iban, ‘idemede mmọ inọ ima ye nti utom’ edieke ibakde ika inyụn̄ inemede nti nneme ye mmọ.—Heb. 10:24, 25.

Ikwọ ye akam oro isidade itọn̄ọ mme mbono esop nnyịn ẹnen̄ede ẹdi akpan n̄kpọ ke utuakibuot nnyịn. (Ps. 149:1) Ikwọ nnyịn esitoro Jehovah, anam iti mme edu oro ikpenyenede, onyụn̄ esịn udọn̄ ọnọ nnyịn ndikwọrọ ikọ ye idatesịt. Nso kaban̄a akam ediberede? Ke eset, Jehovah okokot temple “ufọk akam mi.” (Isa. 56:7) Mfịn, imesibọn̄ akam inọ Abasi ke ini idụkde mbono esop. Isida akam ediberede iben̄e ndausụn̄ ye edisana spirit Jehovah; emi esinyụn̄ etịm esịt ye ekikere man ikeme ndimụm se ẹdikpepde. Oyom ibiere ndisibak n̄ka mbono esop man idu ke ini ẹkwọde akpa ikwọ ẹnyụn̄ ẹbọn̄de akam.

Helen emi edide isua 23 ama etịn̄ ntak emi enye esibakde aka mbono esop, ete: “Sia edide Jehovah enyene kpukpru se isikpepde do, emi esịnede ikwọ oro isikwọde itọn̄ọ ye akam, n̄kere ke ndibabak n̄ka mbono esop edi ndiwụt Jehovah ke mmama enye.” Ndi idịghe nte ikponyụn̄ idade mbono esop nnyịn edi oro? Ntre ke edi. Mmọdo, ẹyak inam se ededi oro ikemede man emehe nnyịn ndisika kpukpru n̄kpọ ke ini, akpan akpan n̄kpọ Abasi nnyịn.

[Ikọ Idakisọn̄]

[Ndise ke page 26]

Babak tịm idem

[Ndise ke page 26]

Babak nam n̄kpọ mbak edieke “unọmọ etịbede”

[Mme ndise ke page 26]

Tiene bọ ufọn edisibak n̄ka mbono esop