Nen̄ede Tiene Nam Akwa Utom Idọk Eke Spirit

“Ẹnyene ekese ndinam ke utom Ọbọn̄.”—1 COR.15:58.

1. Jesus ọkọdọhọ mme mbet esie ẹnam nso?

JESUS ama ọduọk odudu ke obube mmọn̄ emi ekperede Sychar ke Samaria ke ini akakade isan̄ ke utịt utịt isua 30 E.N. Do ke enye ọkọdọhọ mme mbet esie “ẹmenede enyịn ẹse in̄wan̄, [ke] n̄kpọ ẹdat se ẹkpen̄ede.” (John 4:35) Jesus iketịn̄ke iban̄a ata ata ukpen̄e, edi eketịn̄ aban̄a ukpen̄e eke spirit, oro edi, ndika n̄koyom mbon emi ẹnyenede eti esịt, emi ẹditienede imọ. Emi owụt ke enye okoyom mme mbet esie ẹnam utom emi. Ekese ama odu ndinam, edi ini ikodụhe.

2, 3. (a) Nso iwụt ke ini idọk edi emi? (b) Nso ke idineme ke ibuotikọ emi?

² Se Jesus eketịn̄de aban̄a ukpen̄e m̀mê idọk enen̄ede ebehe nnyịn mfịn. Nnyịn idu ke ini emi ‘n̄kpọ ẹnen̄erede ẹdat edi se ẹkpen̄ede’ ke ererimbot emi. Ke ẹkot ediwak miliọn owo kpukpru isua ẹte ẹdikpep akpanikọ emi ọnọde owo uwem, ndien ediwak tọsịn mbufa mbet ẹsibụhọ ke mmọn̄. Enen̄ede edi akwa ukpono nditiene nnam akwa utom idọk emi Jehovah Abasi adade usụn̄ mi. Ndi ke etiene ‘anam ekese’ ke utom idọk emi?—1 Cor. 15:58.

³ Jesus ama ekpep mme mbet esie ndinam utom idọk emi ke ofụri isua ita ye ubak oro enye ọkọkwọrọde ikọ ke isọn̄ emi. Imọn̄ ineme ita ke otu akpan n̄kpọ oro Jesus ekekpepde mme mbet esie ke ibuotikọ emi. Mme n̄kpọ emi ẹyenam ifiọk edu oro ikpenyenede edieke iyomde ndikụt unen ke utom idọk eke spirit emi isịnde idem inam mi. Ẹyak itọn̄ọ ndineme mmọ kiet kiet.

Oyom Isụhọde Idem

4. Nso ke Jesus akanam man owụt ke ọfọn ẹsụhọde idem?

⁴ Kere emi ise: Idaha idahaoro ke mme mbet ẹfan̄a m̀mê anie okpon akan ke otu mmimọ. Enyene ndidi esịt ke osụk ayayat mmọ. Jesus okot ekpri eyenọwọn̄ enịm ke ufọt mmọ; owụk enyịn ese eyen oro, onyụn̄ ọdọhọ ete: “Owo ekededi eke edisụhọrede idem nte ekpri eyenọwọn̄ emi edi enye emi okponde akan ke obio ubọn̄ heaven.” (Kot Matthew 18:1-4.) Utu ke ndikere n̄kpọ nte mbon ererimbot emi ẹkerede ke uwọrọiso, inyene, ye se owo edide anam owo edi n̄kpọ, akana mmọ ẹfiọk ke edi nsụhọdeidem akam anam owo okpon. Ke Jehovah edidiọn̄ inyụn̄ ida mmimọ inam n̄kpọ edieke inen̄erede isụhọde idem.

5, 6. Ntak emi anade osụhọde idem man ekeme ndinen̄ede nsịn idem nnam utom idọk emi? Nọ uwụtn̄kpọ.

⁵ Tutu mfịn, ediwak owo ẹsụk ẹsesịn ibuot ye itọn̄ ẹyom odudu, uwọrọiso, ye inyene. Emi iyakke mmọ ẹnyene ini ẹnam n̄kpọ Abasi. (Matt. 13:22) Edi ikọt Jehovah ẹma ‘ndisụhọde idem’ ke iso mbon en̄wen man Enyene-idọk emi ọdiọn̄ onyụn̄ ama mmọ.—Matt. 6:24; 2 Cor. 11:7; Phil. 3:8.

⁶ Da Francisco, ebiowo ke esop kiet ke Edem Usụk America ke uwụtn̄kpọ. Enye ama ọkpọn̄ ufọkn̄wed ntaifiọk ọtọn̄ọ utom usiakusụn̄ ke ini enye ekedide akparawa. Enye ọdọhọ ete: “Ke ini n̄koyomde ndidọ n̄wan, n̄kpokoyom utom oro akpakanamde  inen̄ede inyene okụk. Edi ima ibiere ndidu mmemmem uwem nnyụn̄ n̄ka iso ke utom uyọhọ ini. N̄kpọ ikememke ye nnyịn ke ima ikenyene nditọ. Kpa ye oro, Jehovah ama an̄wam nnyịn ika iso idu mmemmem uwem.” Francisco ekeberi ikọ esie ntem: “Mmedi ebiowo mbe isua 30 idahaemi, nnyụn̄ nnyene mme san̄asan̄a ifetutom eken. Edi akananam nnyịn ituaha n̄kpọfiọk ke ndikebiere ndidu mmemmem uwem.”

7. Didie ke esinam se ẹwetde ke Rome 12:16?

⁷ Edieke mûyomke “ikpọ n̄kpọ” ererimbot emi, edi oyụhọde ye “mme usụhọde n̄kpọ,” afo eyenyene ekese edidiọn̄ onyụn̄ anam ekese ke utom idọk emi.—Rome 12:16; Matt. 4:19, 20; Luke 18:28-30.

Ndisịn Ifịk Esinyene Ufọn

8, 9. (a) Tịn̄ uwụtn̄kpọ talent oro Jesus ọkọnọde. (b) Uwụtn̄kpọ emi ekeme ndinen̄ede n̄n̄wam anie?

⁸ N̄kpọ en̄wen oro utom idọk emi enen̄erede oyom edi nsịnifịk. Jesus ama anam emi an̄wan̄a ke uwụtn̄kpọ talent. * Uwụtn̄kpọ emi aban̄a ete kiet emi akayakde inyene esie ọnọ ifịn esie ita mbemiso adahade esenidụt. Ẹkenọ akpa ofụn talent ition, ẹnọ ọyọhọ iba talent iba, ẹnọ ọyọhọ ita talent kiet. Ke ete oro ama akadaha, akpa ye udiana ifịn ẹma ẹsịn ifịk ẹsọsọp ẹda talent mmọ ‘ẹnam mbubehe.’ Edi ọyọhọ ofụn ita ekedi ifu. Enye ama etịbi isọn̄ edịp talent esie. Ke ini ete oro ọkọnyọn̄de edi, enye ama anam akpa ifịn iba oro ẹse ẹban̄a “ediwak n̄kpọ.” Edi enye ama ọbọ ọyọhọ ofụn ita talent kiet oro, onyụn̄ ebịn enye osio ke ufọk.—Matt. 25:14-30.

⁹ Ndi ọdọn̄ fi ndikpebe nti ifịn oro nnyụn̄ nnen̄ede nsịn ifịk ke utom unam mbet emi? Edi nso ke akpanam edieke idaha fo mîyakke anam ntre idahaemi? Ekeme ndidi nsọn̄ọn̄kpọ anam anam utom ediwak hour man ekeme ndise mban̄a ubon. Mîdịghe, ke okpon owo, ndien udọn̄ọ iyakke ọbọ emem. Ke edide ntre, uwụtn̄kpọ emi esịne mme ikọ oro ẹdisịnde udọn̄ inọ fi.

10. Nso iwụt ke ete enyene talent oro ama enyene eti ibuot, ndien ntak oro ọsọn̄ọde fi idem?

¹⁰ Ti ke ete oro ama ọfiọk ke ifịn imọ idịghe ukem. Enye ama owụt emi ke ndinọ “owo kiet kiet nte ekemde ye ukeme esiemmọ.” (Matt. 25:15) Akpa ofụn ama enyene udori akan ọyọhọ ofụn iba sia edide okụk esie akawak akan. Edi eteufọk mmọ okotoro mmọ mbiba, okot mmọ ‘nti ifịn emi  ẹnamde akpanikọ,’ onyụn̄ ọnọ mmọ mbiba ukem utịp. (Matt. 25:21, 23) Mfịn n̄ko, Jehovah Abasi, Enyene-idọk emi, ọfiọk ke idaha fo iyakke anam n̄kpọ esie nte akpamade ndinam. Enye okụt ofụri se anamde ke utom Esie, idinyụn̄ itreke ndinọ fi utịp.—Mark 14:3-9; kot Luke 21:1-4.

11. Tịn̄ nte ndisịn ifịk ke ini afanikọn̄ ekemede ndinyene ufọn.

¹¹ Se Selmira eyenete nnyịn an̄wan ke Brazil anamde owụt ke idịghe tutu n̄kpọ ọfọfọn owo mbemiso enye ekeme ndisịn ifịk nnam n̄kpọ Abasi. Isua edịp ko, inọ ẹma ẹtop ebe esie ẹwot ẹkpọn̄ enye ye nditọ ita. Utom unam ufọk asana emi enye anamde esinen̄ede ada enye ini, enye esinyụn̄ odụk ubomisọn̄ emi mme owo ẹfahade-faha. Edi kpa ye kpukpru ukụt emi, enye anam ndutịm man ekeme ndisiak usụn̄. Ndien nte ini akakade, nditọ esie iba ẹma ẹtiene ẹdụk utom usiakusụn̄. Enye ọdọhọ ete: “Mbon oro ikpepde Bible ẹbe 20, ndien mmọ ẹditie nte mbonubon nnyịn. Tutu mfịn emi, isụk idi ufan; mmọ ẹma mi, ami nnyụn̄ mma mmọ. Owo ikemeke ndidep utọ ufan emi.” Omokụt do nte Enyene-idọk emi ọdiọn̄de Selmira!

12. Nso ke ikpanam man isịn ifịk ikwọrọ ikọ?

¹² Edieke idaha fo mîyakke enen̄ede enyene ini anam utom idọk emi, emekeme ndisụk nnam ekese ke ndinen̄ede nsịn ifịk nnam se ekemede. Ama etịn̄ enyịn anam nti ekikere oro ẹsinọde kpukpru urua ke Esoputom, ukwọrọikọ fo eyenen̄ede esịne ifiọk; oyonyụn̄ enyene mbufa usụn̄ oro adade ọkwọrọ ikọ. (2 Tim. 2:15) Edieke ekemede, emekeme ndikpụhọde ndutịm fo mîdịghe etre ndinam mme n̄kpọ oro mînen̄ekede inyene ufọn, man ekeme ndisan̄a ye esop mbufo kpukpru ini n̄ka ukwọrọikọ.—Col. 4:5.

13. Siak akpan n̄kpọ oro edinamde itọn̄ọ inyụn̄ ika iso isịn ifịk inam n̄kpọ.

¹³ Ti ke ima ye esịtekọm ẹsinam owo esịn ifịk anam n̄kpọ. (Ps. 40:8) Ọyọhọ ofụn ita oro Jesus akasiakde ke uwụtn̄kpọ talent oro akada eteufọk esie nte ata idiọk owo emi ọsọn̄de ido onyụn̄ oyomde owo anam se mîkemeke. Ntak edi oro enye eketịbide isọn̄ esịn talent esie, utu ke ndida nnam mbubehe nnọ eteufọk esie. Man ikûbiet idiọk ofụn oro, oyom itọn̄ọ inyụn̄ ika iso isan̄a ikpere Jehovah emi edide Enyene-idọk emi. Sio ini nịm kpep n̄kpọ nyụn̄ tie kere nti edu esie—nte ima, ime, ye mbọm. Emi ayanam enen̄ede esịn ifịk anam n̄kpọ esie ke ofụri esịt.—Luke 6:45; Phil. 1:9-11.

“Ana Mbufo Ẹdi Edisana”

14. Nso ke Abasi enen̄ede oyom oto mbon oro ẹyomde ndinam utom idọk?

¹⁴ Apostle Peter ama okot N̄wed Abasi Usem Hebrew ndiwụt se Abasi oyomde oto mme asan̄autom esie ke isọn̄ ete: “Nte ekemde ye Enye emi edide Edisana emi okokotde mbufo, mbufo n̄ko ke idem mbufo ẹkabade ẹsana ke ofụri edu uwem mbufo, koro ẹwet ẹte: ‘Ana mbufo ẹdi edisana koro ami ndide edisana.’” (1 Pet. 1:15, 16; Lev. 19:2; Deut. 18:13) Ikọ emi owụt ke Abasi oyom mme anamutom idọk ẹsana ke ido uwem ye ke n̄kan̄ eke spirit. Se Abasi enen̄erede oyom oto nnyịn edi oro, ndien man isana ntem, oyom inam n̄kpọ emi edinamde nnyịn isana. Didie ke ikeme ndinam emi? Akpanikọ Bible ayan̄wam nnyịn.

15. Nso ke akpanikọ Bible ekeme ndinam ke idem nnyịn?

¹⁵ Akpanikọ Bible etie nte mmọn̄ oro eyetde owo asana. Ke uwụtn̄kpọ, apostle Paul ekewet ete ke esop Christian oro ẹyetde aran asana ke enyịn Abasi, nte edisana an̄wanndọ Christ, emi Christ “eyetde enye ke mmọn̄ anam asana oto ke ikọ [Abasi] . . . man enye ekpedi edisana onyụn̄ anana ndo.” (Eph. 5:25-27) Jesus n̄ko ama etetịn̄  aban̄a odudu oro Ikọ Abasi emi enye ọkọkwọrọde, enyenede ndinam owo asana. Jesus ọkọdọhọ mbet esie ete: “Mbufo ẹmesasana oto ke ikọ oro n̄ketịn̄de nnọ mbufo.” (John 15:3) Ntre, akpanikọ Bible enyene odudu ndinam owo asana ke ido uwem ye ke n̄kan̄ eke spirit. Abasi edinyịme ituak ibuot inọ imọ edieke iyakde akpanikọ Bible eyet nnyịn isana ntem.

16. Nso ke ikpanam man isana ke enyịn Abasi ye ke enyịn owo?

¹⁶ Ima itre kpukpru edu oro Abasi asuade mbemiso enye akayakde itiene inam utom idọk emi. Edi edieke iyomde ndika iso ndot ndinam utom emi, ana inịm eti uwụtn̄kpọ ke ndidu uwem nte Jehovah oyomde. (Kot 1 Peter 1:14-16.) Kpa nte isinịmde idem asana kpukpru ini, akpana iyak akpanikọ Bible anam nnyịn isana kpukpru ini. Emi esịne ndisikot Bible, ndụk mme mbono esop, nnyụn̄ nnen̄ede nsịn ifịk nnam se Abasi ọdọhọde. Ima inam emi, iyekeme ndikan idiọk udọn̄ emi ikadade imana, inyụn̄ iyakke ererimbot emi abiat nnyịn. (Ps. 119:9; Jas. 1:21-25) Ih, nso n̄kpọ ndọn̄esịt ke edi ntem ndifiọk ke akpanikọ Bible ekeme ndiyet nnyịn isana, idem ekpededi ikanam akwa idiọkn̄kpọ!—1 Cor. 6:9-11.

17. Siak item Bible oro anade inam man isana.

¹⁷ Ndi amama ukpụhọde oro akpanikọ Bible anamde fi anam? Ke uwụtn̄kpọ, esinam n̄kpọ didie ke ini ẹnọde fi item ẹban̄a nte unọ idem inemesịt ererimbot emi ọdiọkde? (Ps. 101:3) Ndi emetre ọkpọsọn̄ ndụk ye mbon itieutom m̀mê ye nditọ ufọkn̄wed mbufo emi mînamke n̄kpọ Jehovah? (1 Cor. 15:33) Ndi ke esịn ofụri ukeme nditre n̄kpọ ekededi emi ekemede ndinam edehe ke enyịn Jehovah? (Col. 3:5) Ndi amada san̄asan̄a ọkpọn̄ mbre ukara ererimbot emi ye edu ufreidụt oro ẹsikụtde ke ediwak mbre mbuba?—Jas. 4:4.

18. Didie ke ndisana ke enyịn Abasi ye ke enyịn owo edinam in̄wụm ekese mfri ke utom idọk emi?

¹⁸ Edieke anamde akpanikọ ke mme n̄kpọ emi, eyenen̄ede ọfọn ye afo. Jesus ama ada mme mbet esie oro ẹyetde aran odomo ye n̄kọk vine onyụn̄ ọdọhọ ete: “Kpukpru n̄kọk eke mîn̄wụmke mfri ke idem mi [Ete mi eyesịbe] efep, onyụn̄ ọdiọn̄ kpukpru n̄kọk oro on̄wụmde mfri, man enye okpon̄wụm ediwak mfri.” (John 15:2) Afo oyon̄wụm ekese mfri edieke ayakde akpanikọ Bible emi etiede nte mmọn̄ eyet fi asana.

Mme Edidiọn̄ Idahaemi ye Eke Ini Iso

19. Didie ke ẹkediọn̄ mme mbet ke ifịk oro mmọ ẹkesịnde ẹnam utom idọk?

¹⁹ Ke Pentecost eke isua 33 E.N., ẹma ẹnọ mme anam-akpanikọ mbet oro ẹkenamde se Jesus eketemede edisana spirit man mmọ ẹdi ntiense esie “tutu ẹsịm ke ata utịt ikpehe isọn̄.” (Utom 1:8) Mmọ ẹma ẹnam utom otu ukara, ẹnam utom isụn̄utom, ẹdi mme esenyịn oro ẹsan̄ade-san̄a, ẹnyụn̄ ẹda usụn̄ ke utom edikwọrọ eti mbụk “[nnọ] kpukpru edibotn̄kpọ ke idak ikpaenyọn̄.” (Col. 1:23) Nso edidiọn̄ ke mmọ ẹkenyene ntem, ndien emi ama anam mme owo ẹkop idatesịt!

20. (a) Nso edidiọn̄ ke ọbọ ke ndinen̄ede nsịn idem ke utom idọk emi? (b) Nso ke ebiere ndinam?

²⁰ Ndinen̄ede nsụhọde idem, nsịn ifịk,  nnyụn̄ ndu ata eti uwem nte Bible etemede, ayanam ika iso inam ekese ke akwa utom idọk eke spirit emi osụk akade iso idahaemi. Ke ini udia uwem ye uma-inyene ererimbot emi ọnọde ediwak owo editịmede esịt ye ufen, nnyịn imokop inemesịt ndiyụhọ ye se inyenede. (Ps. 126:6) Se ikam ikande oro edi nte ke ‘utom nnyịn idịghe ikpîkpu ke Ọbọn̄.’ (1 Cor. 15:58) Jehovah Abasi, Enyene-idọk emi, ọyọnọ nnyịn nsinsi uwem ke ‘utom ye ima eke iwụtde iban̄a enyịn̄ esie.’—Heb. 6:10-12.

[Ikọ Idakisọn̄]

Nte Afo Emeti?

Nte osụk odomode ndisịn idem nnen̄ede nnam utom idọk emi . . .

• ntak emi ọfọnde osụhọde idem-e?

• nso ke akpanam man ọtọn̄ọ ndisịn ifịk nnyụn̄ n̄kama ke ubọk oro?

• ntak emi ọfọnde asana ke enyịn Abasi ye ke enyịn owo?

[Mme Mbụme Ukpepn̄kpọ]

[Ndise ke page 17]

Nsụhọdeidem ekeme ndinam idu mmemmem uwem inyụn̄ inen̄ede isịn idem inam n̄kpọ Obio Ubọn̄