Ndinen owo Ẹyetoro Abasi ke Nsinsi

“Owo edinen ido eyedi se ẹditide . . . Edinen ido esie ebịghi ke nsinsi.”—PS. 112:6, 9.

1. (a) Nso inem inem ini iso ke Abasi enịm ọnọ mbon emi enye abatde nte ndinen owo? (b) Ewe mbụme edemerede?

NSO utịbe utịbe ini iso ke Abasi enịm ntem ọnọ mbon emi enye abatde nte ndinen owo! Eyenem mmọ ndikpep ekese mban̄a nti edu Jehovah ke nsinsi. Mmọ ẹyenen̄ede ẹtoro Abasi ke ini ẹdifiọkde ekese iban̄a mme edibotn̄kpọ Esie. Kiet ke otu mme akpan n̄kpọ oro anade owo enyene man enye etiene odu uwem ini emi edi “edinen ido,” emi ẹtịn̄de ẹfiak ẹtịn̄ ke Psalm 112. Edi nte Jehovah Abasi emi edide edisana onyụn̄ anamde se inende ekeme ndida mme anamidiọk nte ndinen owo? Ọkpọkọm nnyịn itịme didie ndinam nti n̄kpọ, nnyịn isitreke ndinam ndudue, imakam isinam ndiọi n̄kpọ ndusụk ini.—Rome 3:23; Jas. 3:2.

2. Ewe utịben̄kpọ iba ke Jehovah akanam ke ntak ima?

² Ima ama anam Jehovah anam ata eti ndutịm man ibọhọ kpukpru emi. Didie?  Akpa, enye ama osio uwem edima Eyen esie ke heaven ke utịbe utịbe usụn̄ edisịn ke idịbi eyenan̄wan emi mîkọfiọkke erenowo, man enye amana nte mfọnmma owo. (Luke 1:30-35) Ekem ke mme asua ẹma ẹkewot Jesus, Jehovah ama anam n̄wọrọnda utịben̄kpọ en̄wen. Abasi ama anam Jesus eset nte owo eke spirit emi ẹnọde ubọn̄.—1 Pet. 3:18.

3. Ntak emi Abasi okokopde inemesịt ndinam Eyen esie eset nte owo eke spirit?

³ Ke Jesus ama ekeset, Jehovah ama ọnọ enye uwem emi mîkemeke ndikpa—emi enye mîkenyeneke mbemiso edide isọn̄. (Heb. 7:15-17, 28) Jehovah ama enen̄ede okop inemesịt ndinam emi sia Jesus ama ọsọn̄ọ ada anam akpanikọ ọnọ Enye, idem ke ini enye okosobode n̄kpọsọn̄ idomo. Ke ntre, Jesus ama enen̄ede owụt ke Satan okososu ndidọhọ ke mme owo ẹkpono Abasi ke ntak ufọn idemmọ, idịghe ke ntak ima oro mmọ ẹmade Abasi.—N̄ke 27:11.

4. (a) Nso ke Jesus akanam ọnọ nnyịn ke ini enye akafiakde ọnyọn̄ heaven, ndien nso ke Jehovah akanam? (b) Esitie fi didie ke idem ke ini ekerede aban̄a se Jehovah ye Jesus ẹnamde ẹnọ fi?

⁴ Jesus ama akam anam se ikande oro ke heaven. Enye ama ada ekọmurua “iyịp esiemmọ” ‘akada ke iso Abasi ke ntak nnyịn.’ Ama enen̄ede enem edima Ete nnyịn eke heaven ndibọ ọsọn̄urua iyịp Jesus emi nte “uwa usio-isop mme idiọkn̄kpọ nnyịn.” Emi anam nnyịn ikeme ndinam “edisana utom [nnọ] odu-uwem Abasi” ye ‘edisana esịt.’ Ntak edi oro odotde inyịme ye ikọ emi ẹdade ẹtọn̄ọ Psalm 112, “Mbufo ẹtoro Jehovah.”—Heb. 9:12-14, 24; 1 John 2:2.

5. (a) Nso ke nnyịn ikpanam man Abasi aka iso ada nnyịn nte ndinen owo? (b) Ntak emi idọhọde ke Psalm 111 ye 112 ẹsan̄a kiet?

⁵ Ana ika iso inyene mbuọtidem ke iyịp uwa ufak Jesus man Abasi aka iso abat nnyịn nte ndinen owo. Nnyịn ikpenyene ndikọm Jehovah kpukpru usen ke utọ akwa ima emi enye amade nnyịn mi. (John 3:16) Nnyịn n̄ko ikpenyene ndika iso n̄kpep Ikọ Abasi nnyụn̄ ndomo ukeme ndidu uwem nte Abasi oyomde. Psalm 112 ọdọn̄ọ nti item ition ọnọ kpukpru mbon oro ẹyomde ndika iso nnyene edisana esịt ke iso Abasi. Psalm 112 asan̄a kiet ye Psalm 111. Psalm mbiba emi ẹtọn̄ọ ye ikọ emi: “Mbufo ẹtoro Jehovah!” *

Se Inọde Owo Inemesịt

6. Didie ke ẹdiọn̄ “owo” Abasi oro ẹtịn̄de ẹban̄a ke Psalm 112?

⁶ “Ọfọfọn ọnọ owo eke abakde Jehovah, adara mbet esie eti-eti. Ubon esie [“ẹyewak etieti,” “NW”] ke ererimbot: ọfọfọn ọnọ emana mbon eti ido.” (Ps. 112:1, 2) Omokụt ke andiwet psalm emi ekebem iso asiak “owo” kiet, ekem ke utịt utịt ufan̄ikọ iba, enye ete “mbon eti ido.” Emi ọwọrọ ke se idude ke Psalm 112 ekeme ndiban̄a ediwak owo. Apostle Paul ama ọsọn̄ọ emi ke ini spirit Abasi akanamde enye ada Psalm 112:9 etịn̄ aban̄a mme Christian  akpa isua ikie. (Kot 2 Corinth 9:8, 9.) Psalm emi enen̄ede owụt se ikemede ndinọ mme anditiene Christ emi ẹdude ke isọn̄ mfịn inemesịt.

7. Ntak emi mme asan̄autom Abasi ẹkpebakde enye, ndien didie ke afo ekpese mbet Abasi?

⁷ Psalm 112:1 owụt ke ata mme Christian ẹnen̄ede ẹkop inemesịt sia mmọ ‘ẹbakde Jehovah.’ Mbak Abasi iyakke mmọ ẹdu uwem nte ererimbot Satan. Mmọ ẹsinen̄ede ẹkop inem ndikpep Ikọ Abasi nnyụn̄ nnịm mbet esie. Emi esịne ndikwọrọ eti mbụk Obio Ubọn̄ ke ofụri isọn̄. Mmọ ẹdomo ukeme ndinam mme owo ke kpukpru idụt ẹdi mbet nnyụn̄ nnọ mme idiọkowo ntọt mban̄a usen ubiereikpe Abasi oro edide.—Ezek. 3:17, 18; Matt. 28:19, 20.

8. (a) Didie ke ẹdiọn̄ ikọt Abasi emi ẹsịnde ifịk ẹnam utom Abasi? (b) Mme edidiọn̄ ewe ke ẹnịm ẹnọ mbon oro ẹdidụn̄ọde ke isọn̄?

⁸ Mme asan̄autom Abasi ke ẹkwọrọ eti mbụk nte Jesus eketemede, ndien emi anam mmọ ẹwak ẹbe miliọn itiaba idahaemi. Anie mîkwe ke ikọt Abasi ‘ẹwak etieti ke ererimbot’ mfịn? (John 10:16; Edi. 7:9, 14) Abasi oyonyụn̄ enen̄ede ‘ọdiọn̄’ mmọ ke ini enye edinamde uduak esie. Abasi eyekpeme mbon oro ẹnyenede idotenyịn edidu ke isọn̄ tutu “akwa ukụt” ebe man ada mmọ ọtọn̄ọ “obufa isọn̄” emi ‘edinen ido edidụn̄de.’ Mbon oro ẹdibọhọde Armageddon ẹyenyene mme edidiọn̄ efen. Mmọ ẹyetiene ẹdara ediwak miliọn mbon oro ẹdisetde ẹdi. Nso inem inem ini ke emi edidi ntem! Ke akpatre, mbon oro ‘ẹmade mbet Abasi eti-eti’ ẹyekabade ẹdi mfọnmma ẹnyụn̄ ẹnyene “ubọn̄ ubọn̄ ifụre eke nditọ Abasi.”—2 Pet. 3:13; Rome 8:21.

Ndida Inyene Nnam N̄kpọ ke Eti Usụn̄

9, 10. Nso ke ata mme Christian ẹda inyene eke spirit mmọ ẹnam, ndien didie ke edinen ido mmọ edibịghi ke nsinsi?

⁹ “Ubọn̄ ye inyene ẹdu enye ke ufọk: edinen  ido esie onyụn̄ ebịghi ke nsinsi. Un̄wana asiaha ke ekịm ọnọ nti owo: enye ọfọn ido, onyụn̄ enyene esịt mbọm, onyụn̄ enen.” (Ps. 112:3, 4) Ndusụk ikọt Abasi ẹma ẹnyene inyene ke eyo Bible. Ke nditịn̄ ke usụn̄ efen, mbon oro Abasi akamade ẹma ẹnyene ata inyene, okposụkedi emi mîkedịghe inyene obụkidem. Imọfiọk ke ediwak mbon oro ẹsụhọrede idem ke iso Abasi ẹkeme ndibuene, mme owo ẹsinyụn̄ ẹse mmọ ke usụhọde nte ẹkesinamde ke eyo Jesus. (Luke 4:18; 7:22; John 7:49) Edi ọkpọkọm owo edi imọ m̀mê ubuene, enye ekeme ndinyene inyene ke n̄kan̄ eke spirit.—Matt. 6:20; 1 Tim. 6:18, 19; kot James 2:5.

¹⁰ Mme Christian oro ẹyetde aran ye nsan̄a mmọ ẹsinọ mme owo inyene eke spirit mmọ. Mmọ ẹyama nte ‘un̄wana ẹnọ nti owo’ ke n̄kịmn̄kịm ererimbot Satan emi. Mmọ ẹnam emi ke ndikpep mme owo ọsọn̄urua ọniọn̄ ye ifiọk Abasi. Mme andibiọn̄ọ ẹdomo nditre utom ukwọrọikọ Obio Ubọn̄, edi mmọ ikemeke. Utu ke oro, utịp eti utom emi ‘eyebịghi ke nsinsi.’ Edieke ikọt Abasi ẹsọn̄ọde ẹda ẹnam akpanikọ ke ini ẹsobode idomo, mmọ ẹkeme ndidori enyịn̄ ndidu uwem ‘mbịghi ke nsinsi.’

11, 12. Nso idi ndusụk n̄kpọ emi ikọt Abasi ẹdade inyene mmọ ẹnam?

¹¹ Mme Christian oro ẹyetde aran ye “akwa otuowo” ẹsinọ mme owo n̄kpọ. Psalm 112:9 ọdọhọ ete: “Enye amatat ubọk, ọnọ mme ubuene n̄kpọ.” Ata mme Christian ẹsinọ nditọete mmọ ye mbọhọidụn̄ mmọ emi ẹdude ke unana n̄kpọ. Mmọ ẹsinyụn̄ ẹtiene ẹtịp n̄kpọ man ẹda ẹn̄wam mme owo ke ini afanikọn̄ etịbede. Emi esinọ mmọ inemesịt nte Jesus ọkọdọhọde.—Kot Utom 20:35; 2 Corinth 9:7.

¹² Ke adianade do, kere ban̄a ibat okụk oro ẹsibiatde ẹmịn̄ mme magazine emi ke usem 172, ndien mbon oro ẹsisemde ediwak ke otu usem emi inyeneke ubọk. Ti n̄ko ete ke ẹmịn̄ n̄wed emi ke mme usem idiọn̄ọ oro ẹsidade ẹnyene nneme ye mme inan ye nnan.

Ọfọn Onyụn̄ Enen

13. Mmanie ẹfọn ido ẹnyụn̄ ẹnọ owo n̄kpọ ẹkan, ndien didie ke nnyịn ikeme ndikpebe mmọ?

¹³ “Ọfọfọn ye owo eke ọfọnde ido, onyụn̄ ọnọde ebuọt.” (Ps. 112:5) Ekeme ndidi ọmọfiọk ke idịghe kpukpru mbon oro ẹsinọde owo n̄kpọ ẹsifọn ido. Ndusụk owo ẹsinọ owo n̄kpọ man ẹwụt ke mmimọ imenyene n̄kpọ ikan mbon en̄wen, ndusụk ẹfọn mfọn ndịbe ntua. Mme owo isikopke inemesịt edieke owo emi ọnọde mmọ n̄kpọ anamde etie nte ke mmọ ẹdi mme usụhọde owo m̀mê ke mmọ ẹdi mbiomo. Edi esinen̄ede enem ke ini ata owo mfọnido ọnọde owo un̄wam. Jehovah ọfọn ido onyụn̄ ọnọ owo n̄kpọ ke inemesịt akan. (1 Tim. 1:11; Jas. 1:5, 17) Jesus Christ okonyụn̄ ọfọn ido nte Ete esie. (Mark 1:40-42) Ke ntre, man Abasi ada nnyịn nte ndinen owo, ana isinọ mme owo n̄kpọ ke idatesịt inyụn̄ ifọn ido ye mme owo, akpan akpan ke ini ikpepde mmọ n̄kpọ iban̄a Jehovah ke an̄wautom.

14. Didie ke ‘ikpakama n̄kpọ nnyịn nte enende’?

¹⁴ “Enye ayakama n̄kpọ esie nte enende.” (Ps. 112:5) Ntịn̄nnịm ikọ Bible owụt ke akama ukpọhọde emi anamde akpanikọ ese aban̄a inyene Eteufọk esie nte enende ke enyịn Jehovah. (Kot Luke 12:42-44.) Imokụt emi ke ndausụn̄ N̄wed Abasi emi ẹnọde mbiowo emi ẹsikpede ikpe ẹnọ owo emi anamde akwa idiọkn̄kpọ ke esop. Ndausụn̄ N̄wed Abasi emi ofụn emi anamde akpanikọ ọnọde kpukpru esop, mme isụn̄utom, ye ubon Bethel, ẹwụt ke nte mmọ ẹnamde n̄kpọ enen. Idịghe mbiowo kpọt ke ẹyom ẹnam se inende, ana kpukpru mme Christian ẹnam se inende ye kpukpru owo, edide ye nditọete, onyụn̄ edide mmọ oro mînịmke ke akpanikọ, ye ke ini mmọ ẹnamde mbubehe.—Kot Micah 6:8, 11.

 Edidiọn̄ Emi Enyenede Ndinen Owo

15, 16. (a) Didie ke ndiọi mbụk ererimbot emi otụk ndinen owo? (b) Nso ke ikọt Abasi ẹbiere ndika iso nnam?

¹⁵ “Koro enye mîdisehekede ke nsinsi: owo edinen ido eyedi se editide ke nsinsi. Idiọk etop idinamke enye ndịk: esịt esie omowụhọ, ọbuọt idem ye Jehovah. Esịt esie ọmọsọn̄ ada, ndịk idinamke enye, tutu enye okụt mme asua esie.” (Ps. 112:6-8) Idụhe ini ekededi oro akanam ikopde ndiọi mbụk ntem, utọ nte etop ekọn̄, edinam oyomonsia, mbufa udọn̄ọ ye n̄kani udọn̄ọ oro ẹfiakde ẹdi, ubiatibet, unana, ye nte ẹsabarede mmọn̄ ye ofụm. Mme n̄kpọ emi ẹsitiene ẹfịna mbon oro Abasi adade nte ndinen owo, edi emi isinamke idem enyek mmọ. Utu ke oro, mmọ ‘ẹsisọn̄ọ ẹda’ ẹnyụn̄ ẹdori enyịn ke obufa ererimbot Abasi ekpere. Ke ini afanikọn̄ etịbede, mmọ isinen̄ekede itịmede esịt sia mmọ ẹfiọk ke Jehovah ayan̄wam mmimọ. Akanam enye iyakke ndinen owo ‘ẹsehede’—edi esin̄wam mmọ onyụn̄ ọnọ mmọ ukeme ndiyọ.—Phil. 4:13.

¹⁶ Kpa ye oro ẹsuade ndinen ikọt Abasi, ẹsinyụn̄ ẹsude nsu ẹdori mmọ, emi isinamke mmọ ẹtre ndikwọrọ ikọ. Mmọ ẹsika iso ẹnam utom emi Jehovah ọdọn̄de mmọ—oro edi, ndikwọrọ eti mbụk Obio Ubọn̄ nnyụn̄ n̄n̄wam mbon oro ẹkpan̄de utọn̄, ẹkabade ẹdi mme mbet. Eyịghe idụhe nte ke ẹyeka iso ẹkọbọ ndinen owo nte utịt ererimbot emi enen̄erede ekpere. Ukọbọ emi eyenen̄ede ọsọn̄ ubọk ke ini Satan kpa Devil, emi edide Gog eke Magog edin̄wanade ye ikọt Abasi ke ofụri ererimbot. Ini oro ndien ke idikụt nte ẹdikande ‘mme asua’ nnyịn ofụri ofụri. Edinem didie ntem ndikụt ẹnen̄erede ẹnam enyịn̄ Abasi asana!—Ezek. 38:18, 22, 23.

“Ẹmenede Nnụk Esie ke Enyọn̄”

17. Didie ke ‘ẹdimenerede nnụk ndinen owo ke enyọn̄’?

¹⁷ Eyenen̄ede enem nnyịn nditoro Jehovah ọtọkiet ke ini emi Devil ye ererimbot esie mîdidụhe aba ibiọn̄ọ nnyịn. Mbon oro ẹkade iso ẹnyene eti enyịn̄ ke iso Abasi ẹdinyene utọ ifet emi. Mme asua idikanke mmọ koro Jehovah ọn̄wọn̄ọ ke ‘ẹyemenede nnụk ikọt imọ ke enyọn̄.’ (Ps. 112:9) Ikọt Jehovah ẹyenen̄ede ẹdat esịt ke ini mmọ ẹdikụtde nte ẹkande kpukpru mbon oro mîsụkke ibuot inọ ukara Abasi.

18. Didie ke mme akpatre ikọ emi ẹdude ke Psalm 112 ẹdisu?

¹⁸ “Idiọk owo oyokụt, onyụn̄ ayat esịt; ayata edet esie, onyụn̄ atara: udọn̄ idiọk owo ayatak. (Ps. 112:10) Ibịghike, ẹmọn̄ ẹsobo kpukpru mbon oro ẹkade iso ẹbiọn̄ọ ikọt Abasi. Mmọ iyomke ndikụt nnyịn ikwọrọde ikọ; kpukpru oro ye mmọ ke idemmọ ẹyebe ẹfep ke “akwa ukụt.”—Matt. 24:21.

19. Nso ke nnyịn ikpodori enyịn iban̄a?

¹⁹ Ndi afo eyetiene odu ke otu mbon oro ẹdibọhọde? Mîdịghe edieke udọn̄ọ m̀mê usọn̄ adade fi ibuot mbemiso ererimbot Satan emi esịmde utịt, ndi afo oyodu ke otu “ndinen owo” emi ẹdisetde? (Utom 24:15) Afo emekeme ndibọrọ “ih” edieke akade iso ọbuọt idem ke uwa ufak Jesus onyụn̄ ekpebede Jehovah, nte ndinen “owo” emi ẹtịn̄de ẹban̄a ke Psalm 112 ẹkenamde. (Kot Ephesus 5:1, 2.) Jehovah oyokụt ete ke owo ifreke mme utọ owo emi ye nti utom mmọ ke nsinsi. Enye ke idemesie ayaka iso eti onyụn̄ ama mmọ ke nsinsi nsinsi.—Ps. 112:3, 6, 9.

[Ikọ Idakisọn̄]

Mme Mbụme Nditie N̄kere

• Ntak emi nnyịn ikpotorode Jehovah?

• Nso inọ ata mme Christian inemesịt mfịn?

• Nso utọ enọ esinem Jehovah esịt?

[Mme Mbụme Ukpepn̄kpọ]

[Ndise ke page 25]

Ana ibuọt idem ke iyịp Jesus man Abasi aka iso ada nnyịn nte ndinen owo

[Mme ndise ke page 26]

Ẹsida mme etịbe imaesịt ẹn̄wam ke ini afanikọn̄ etịbede, ẹnyụn̄ ẹda ẹmịn̄ mme n̄wed Bible