Nte Afo Emeti?

Nte afo ama ọbọ ufọn oto edikot mme nsiondi Enyọn̄-Ukpeme eke ndondo emi? Se m̀mê emekeme ndibọrọ mme mbụme oro ẹtienede mi:

• Didie ke ikeme ndisem “edisana usem,” kpa akpanikọ oro aban̄ade Abasi ye uduak esie, udọn udọn? (Zeph. 3:9, NW)

Nte edide ye usem ekededi, man isem “edisana usem” udọn udọn, oyom inen̄ede ikpan̄ utọn̄, ikpebe mbon oro ẹsemde udọn udọn, imụm mme n̄wed Bible ye ndusụk ufan̄ikọ Bible idọn̄ ke ibuot, inyụn̄ ifiak itịn̄ se ikpepde, ikot uyo ọwọrọ, idụn̄ọde nte ẹbonde ikọ ke usem m̀mê nte ikọ akpanikọ etiede, ika iso inam n̄kọri, inịm mme akpan ini ukpepn̄kpọ, inyụn̄ ikpep “ndisem” edisana usem emi kpukpru ini.—8/15, page 21-25.

• Nso idi ndusụk n̄kpọ oro ẹwụtde ke imọfiọk Abasi?

“Jehovah edi enyịn̄ esie,” ndien enye oyom nnyịn ifiọk ke imọ ikere Jehovah. (Ex. 15:3) Enye edi “Abasi ima ye emem.” (2 Cor. 13:11) Enye edi “Abasi ifiọk” ye “Abasi edinyan̄a.” (1 Sam. 2:3; Ps. 25:5) Abasi edisan̄a ikpere mbon oro ẹfiọkde enye.—9/1, page 4-7.

• Nso ke “urụk eke ẹfiakde ita-ita” ọwọrọ ke ini enye aban̄ade ndọ?

“Urụk eke ẹfiakde ita-ita” edi ebetọ ikọ. (Eccl. 4:12) Ke ini ebetọ ikọ emi aban̄ade ndọ, enye esịne urụk iba emi edide ebe ye n̄wan, emi ẹfiakde ẹdian ke esịne-ufọt urụk emi edide Abasi. Ndiyak Abasi odu ke ndọ ọnọ ebe ye n̄wan ukeme ndiyọ mme mfịna, nnyụn̄ n̄kop inemesịt.—9/15, page 16.

• Nso ke “edidori owo ubọk” oro ẹtịn̄de ẹban̄a ke Hebrew 6:2 ọwọrọ?

Utu ke nditịn̄ mban̄a edimek mbiowo, etie nte aban̄a edidori mme owo ubọk man ẹnọ mmọ utịbe utịbe enọ edisana spirit. (Utom 8:14-17; 19:6)—9/15, page 32.

• Eti ete ọfiọk ke nditọ imọ ẹyom nso?

Ndusụk n̄kpọ oro mmọ ẹyomde ẹdi (1) ima ete, (2) eti uwụtn̄kpọ, (3) inemesịt ke ufọk, (4) edikpep mmọ mme n̄kpọ eke spirit, (5) editụnọ mmọ, (6) edikpeme mmọ.—10/1, page 18-21.

• Didie ke mbon oro ẹdade usụn̄ ẹkpekpono mbon en̄wen?

Usụn̄ kiet oro ebiowo ekemede ndikpono mbon emi enye adade usụn̄ edi nditre ndidọhọ mmọ ẹnam n̄kpọ oro enye ke idem esiemmọ mîkpamaha ndinam. Enye owụt ukpono n̄ko ke ndinọ ntak oro enye ọdọhọde ẹnam n̄kpọ m̀mê ntak ndausụn̄ oro enye ọnọde.—10/15, page 22.

• Nso idi ndusụk n̄kpọ oro ẹdinamde ẹka iso ẹyak esịt ẹsịn ke ndọ?

N̄kpọ iba ẹdi: (1) Da ndọ fo nte akpan n̄kpọ. (2) Fep kpukpru orụk unana edinam akpanikọ. Edide mbufo ẹmenyene mfịna ke ndọ mbufo m̀mê inyeneke, oyom anam n̄kpọ man nsan̄a fo ọfiọk ke esịt fo enen̄ede esịne ke ndọ mbufo; n̄kpọ iba oro ẹyen̄wam.—11/1, page 18-21.

• Nso ke ebiowo ekeme ndikpep nto nte ekpemerọn̄ Israel ekesikamade nnụk nnụk esan̄?

Ekpemerọn̄ ekesikama nnụk nnụk esan̄ ekpeme otuerọn̄ esie. Nte mme erọn̄ ẹkesidụkde m̀mê ẹwọrọde ke ufọk ufene, mmọ ‘ẹkesisan̄a ke idak esan̄ ẹbe’ ndien ke ntem ekpemerọn̄ ama ekeme ndibat mmọ. (Lev. 27:32) Oyom ekpemerọn̄ Christian ọfiọk otuerọn̄ Abasi emi enye esede enyịn kpasụk ntre n̄ko.—11/15, page 9.

• Didie ke eka ekeme ndiwụt ke imọ ida usanaidem nte akpan n̄kpọ?

Enye enyene ndiyet ubọk mbemiso otụkde udia, onyụn̄ enyene ndikịbi udia koro ediwak n̄kpọ ẹkeme ndibiat udia. Enye anam ufọk asana mbak eku, usịne, ye n̄kpri unam. N̄kpọ en̄wen ẹsịne edisiyet ọfọn̄ nnyụn̄ nyere mmọn̄ kpukpru ini. Mme n̄kpọ emi ẹdu ke n̄kemuyo ye Bible.—12/1, page 9-11.