Ndinọ Ikọ Ntiense ke An̄waurua

APOSTLE PAUL ama esika an̄waurua kpukpru usen ọkọkwọrọ eti mbụk oro aban̄ade Jesus ke ini enye okodude ke Athens. (Utom 17:17) Paul ekemek an̄waurua koro ediwak owo ke Athens ẹkesiwak ndidu do.

Ke se ikperede ndisịm isua 2,000 tọn̄ọ ke ini oro, ikọt Jehovah ẹsụk ẹtatan̄a etop Obio Ubọn̄ Abasi ke an̄waurua. Ntak-a? Koro ẹkeme ndikụt ediwak owo do. Mfịn, an̄waurua ekeme ndidi ikpọ ufọkurua m̀mê okụre emi ẹbọpde ikpọ ufọkurua. Ndusụk Ntiense ẹsibọ etubom utom m̀mê andinyene ufọkurua unyịme ẹnyụn̄ ẹbon mme n̄wed un̄wam ukpep Bible ke okpokoro m̀mê ke ekpri efe.

Ke uwụtn̄kpọ, ke okụre ikpọ ufọkurua ke New Jersey, U.S.A., ẹma ẹnam ndutịm man ẹbon n̄wed ke ibuotikọ emi aban̄ade nte ẹkemede ndika iso nnyene nti ido uwem ke ubon. Nso ikedi utịp? Ẹma ẹnịm n̄wed 153 ke usem itiokiet ke usen kiet.

N̄wan kiet emi akakade efe oro ama enen̄ede akpan̄ utọn̄ okop se kiet ke otu Mme Ntiense oro eketịn̄de. N̄wan oro ama enyịme ke enen̄ede oyom nnyịn ibuan Abasi ke uwem nnyịn ye ke ubon nnyịn. Enye ama ọbọ mme n̄wed emi: Kpep N̄kpọ to Akwa Andikpep, Ukpọhọde Inemesịt Ubon, ye Mme Mbụme N̄kparawa Owo Ẹbụpde—Mme Ibọrọ Ẹnyenede Ufọn.

Ke uwemeyo, eren kiet ama okụt mme n̄wed oro ẹkebonde ke ini akasan̄ade ebe aka ndidụk ufọkurua oro ekperede efe n̄wed oro. Enye ama owụk enyịn ese n̄wed N̄kparawa Owo Ẹbụp. Eyenete an̄wan oro akadade ekpere ama okụt ke eren oro ama n̄wed oro. Enye ama obụp eren oro ete, “Ndi odu n̄wed emi afo amade?” Enye ama otop ibuot onyụn̄ anyan ubọk ke n̄wed  N̄kparawa Owo Ẹbụp. Enye ama ọnọ ọbọn̄ oro n̄wed oro, emi ọbọn̄ mbon ama akanyanyanade aka ndimen. Enye ama ọdọhọ ke imọ inyene nditọ ita. Nte nneme akakade iso, enye ama ọdọhọ ke imọ imesinyene nneme ye mmọ kpukpru urua. Akpan ye udọ esie ẹdu ke ufọt isua 13 esịm 19. Nte enye okosụk esede n̄wed emi, enye ama ọdọhọ ke n̄wed oro ayan̄wam imọ ineme ndusụk n̄kpọ oro isinemede ye ubon imọ. Asuanetop oro ama owụt enye n̄ko n̄wed oro Ukpọhọde Inemesịt Ubon, onyụn̄ enen̄ede anam enye ọfiọk ke enye ye n̄wan esie ẹyekụt ata nti item do emi ẹdin̄wamde mmọ ẹnam mme ubiere ke ubon. Esịt ama enem ete oro aban̄a n̄kpọ emi, etịp okụk esịn, onyụn̄ enyịme asuanetop esidi edise mmimọ.

Mme Ntiense emi ẹkese didie edinọ ikọ ntiense ke okụre ikpọ ufọkurua emi? Eyenete an̄wan kiet ọdọhọ ete: “Orụk ukwọrọikọ enye emi ama enem mi ọsọn̄! Ekedi ata eti ifiọkutom.” Eyenete an̄wan en̄wen ọkọdọhọ ete: “Jehovah ọdọhọ ẹkwọrọ eti mbụk tutu esịm ke ata utịt ikpehe isọn̄. Mfịn, mi ke Paramus ke New Jersey, eti mbụk emi esịm mbon oro ẹsemde nsio nsio usem. Ama enem etieti nditiene mbuana ke utom emi. Kpukpru owo oro ẹkebuanade ke utom emi ẹma ẹkop inemesịt. Idụhe owo oro okoyomde unyọn̄.”

Nte afo emekeme nditat mme usụn̄ oro adade ọkwọrọ eti mbụk? Akpan usụn̄ ukwọrọikọ nnyịn edi ndisan̄a ke ufọk ke ufọk. (Utom 20:20) Edi nte akpama ndikere mban̄a edinọ ikọ ntiense ke an̄waurua m̀mê ke okụre oro ẹbọpde ikpọ ufọkurua?