Nịm Mme Utịtmbuba Oro Ekemede Ndisịm, Nyụn̄ Kop Idatesịt

“MMAFIAK n̄n̄wana n̄kak!” Anaedi emesitịn̄ n̄kpọ ntem ediwak ini ke ntak emi mûkekemeke ndinam se akaduakde. Ekpri eka ekeme nditịn̄ utọ n̄kpọ emi ke ntak emi enye akpade mba aban̄a ekikak ntịn̄enyịn emi obufa nsekeyen esie oyomde tutu enye ikemeke ndinen̄ede nnọ ntịn̄enyịn ke mme n̄kpọ eke spirit. Nte ẹkebọkde Christian en̄wen ekeme ndinam enye ekere ke se imọ inamde ikemke, onyụn̄ ekere ke akananam imọ inamke n̄kpọ nte ekemde ke esop. Ntiense emi ọsọn̄de ekeme ndikere ke imọ iwọrọke n̄kpọ ke ntak emi enye mîkemeke aba ndibuana ọyọhọ ọyọhọ ke mme edinam Christian emi enye ekesinamde ke ini ekedide n̄kaiferi. Christiane emi mbiomo ubon mîyakke enye anam ekese ke utom Jehovah nte enye akpamade ndinam, ọdọhọ ete: “Utịn̄ikọ oro ẹnọde man ẹsịn udọn̄ ẹnọ nditọete ẹdụk utom usiakusụn̄ esinam mi ntua eyet.”

Ikpanam n̄kpọ didie iban̄a mme utọ n̄kpọ emi? Didie ke ndusụk Christian ẹkeme ndise idaha mmọ ke nnennen usụn̄? Nso idi mme ufọn edinịm mme utịtmbuba oro ikemede ndisịm?

Nyene Eti Ibuot

Apostle Paul ama etịn̄ ọnọ nnyịn nte ikpasan̄ade ikop idatesịt ke ini enye ọkọdọhọde ete: “Ẹdat esịt ke Ọbọn̄ kpukpru ini. Nyọtọn̄ọ ntak ndọhọ, Ẹdat esịt! Ẹyak kpukpru owo ẹdiọn̄ọ ẹban̄a eti ibuot mbufo.” (Phil. 4:4, 5) Man ikop idatesịt ye uyụhọ ke utom oro inamde inọ Abasi, ana inịm mme utịtmbuba oro ẹwụtde eti ibuot, emi ẹkemde ye ukeme ye idaha nnyịn. Edieke idomode ndisịm mme utịtmbuba oro mîwụtke eti ibuot kpa ye se iditakde, nnyịn inọ idem nnyịn editịmede esịt nte mîdotke. Edi nnyịn ikponyụn̄ inịmke utịtmbuba oro ekpride akaha inọ idem nnyịn, ida mmeme oro ikerede nte inyenede nte isọn̄ nditehede ube nte mîdotke ke utom ukwọrọikọ.

Se ededi emi idaha nnyịn edide, Jehovah oyom inọ imọ se ifọnde ikan—oro edi, utom ofụri ukpọn̄ ye eke ofụri esịt. (Col. 3:23, 24) Edieke nnyịn mînọhọ Jehovah se ifọnde ikan, ọkpọwọrọ ke nnyịn idụhe uwem ikekem ye uyakidem nnyịn nnọ enye. (Rome 12:1) Ke adianade do, nnyịn idinen̄ekede ikop akwa uyụhọ ye ata idatesịt, ikponyụn̄ ibọhọ mme edidiọn̄ eken oro ẹtode utom ofụri ukpọn̄.—N̄ke 10:22.

Ikọ oro ẹkabarede “eti ibuot” ke Bible ọnọ ekikere edikere mban̄a owo. Enye ke ata ata usụn̄ ọwọrọ “ndiyịme nnọ.” (Jas. 3:17) Ikọ emi ọnọ n̄ko ekikere aban̄a owo nditre ndiyom unen n̄kaha. Do, edieke inyenede eti ibuot, nnyịn iyekeme ndise idaha nnyịn nte odotde. Ndi oro ọsọn̄ akaha ndinam? Ọsọn̄ ndusụk owo ndinam oro, idem okposụkedi emi mmọ ẹkemede ndikere mban̄a mbon en̄wen. Ke uwụtn̄kpọ, edieke etiede nte n̄kpet n̄kpet ufan nnyịn akpa mba ke ntak emi enye anamde utom akaha, ndi nnyịn ikpodomoke  ndinam enye okụt ntak emi ọfọnde ndinam ukpụhọde? Kpasụk ntre, oyom nnyịn ikpep ndifiọk mme n̄kpọ emi ẹkemede ndiwụt ke imanam n̄kpọ ibe ukeme nnyịn.—N̄ke 11:17.

Ekeme ndisọn̄ ndida eti ibuot mfiọk ukeme nnyịn edieke ete ye eka nnyịn ẹketiede uyịre uyịre. Ke ini uyen, ndusụk owo ẹkekere ke ana inam n̄kpọ efen efen m̀mê inam ọfọn akan se inamde man ete ye eka mmimọ ẹma mmimọ. Edieke ini uyen nnyịn eketiede ntre, nnyịn imekeme ndinyene ukwan̄ ekikere mban̄a nte Jehovah esede nnyịn. Jehovah ama nnyịn ke utom ofụri esịt oro inamde inọ enye. Ikọ Abasi ọn̄wọn̄ọ ọnọ nnyịn ete ke Jehovah “[ọfiọk] nte iborode; emeti ete ke nnyịn idi ntan.” (Ps. 103:14) Enye ọfiọk mme mmeme nnyịn onyụn̄ ama nnyịn ke ini inamde n̄kpọ esie ifịk ifịk kpa ye mme mmeme oro. Nditi ke Abasi nnyịn idịghe uyịre uyịre eteutom ayan̄wam nnyịn inyene eti ibuot, m̀mê isụhọde idem, ke utịtmbuba oro inịmde, inyụn̄ ifiọk mme mmeme nnyịn.—Mic. 6:8.

Kpa ye oro, osụk ọsọsọn̄ ndusụk owo ndinyene orụk eti ibuot oro. Edieke etiede fi ntre, dọhọ eyenete emi enyenede mbufiọk oro ọfiọkde fi an̄wam fi. (N̄ke 27:9) Ke uwụtn̄kpọ, ndi ọdọn̄ fi ndinam utom nte asiakusụn̄ ofụri ini? Ata eti utịtmbuba edi oro! Ndi ọsọn̄ fi ndisịm utịtmbuba oro? Ekeme ndidi omoyom ẹn̄wam fi man odu mmemmem uwem. Mîdịghe, eyenete emi afo ọbuọtde idem ekeme ndineme ye afo m̀mê ekese mbiomo ubon ẹyeyak m̀mê idiyakke fi esịm utịtmbuba oro idahaemi. Enye ekeme ndin̄wam fi okụt m̀mê afo emekeme ndinam utom en̄wen emi afo oyomde ndinam mi mîdịghe, an̄wam fi okụt mme ukpụhọde oro oyomde fi anam man ekeme ndinam utom emi. Ebe n̄ko ekeme ndinen̄ede n̄n̄wam n̄wan esie ọfiọk se ukeme esie ekemede ndimen. Ke uwụtn̄kpọ, enye ekeme ndidọhọ n̄wan ọduọk kan̄a odudu mbemiso ọfiọn̄ oro enye editọn̄ọde obufa ifetutom. Emi ekeme ndinam enye enyene odudu onyụn̄ an̄wam enye aka iso okop idatesịt ke utom ukwọrọikọ.

Yom Mme N̄kpọ Oro Afo Ekemede Ndinam

Ndidụk idem akwa owo m̀mê unana nsọn̄idem ekeme ndibiọn̄ọ nnyịn ndinam ekese ke utom Jehovah. Edieke afo edide ete m̀mê eka, afo emekeme ndikere ke imọ isinen̄ekede inyene ifet ikpep n̄kpọ m̀mê ibọ ufọn ito mme mbono esop ke ntak emi n̄kpri nditọ ẹsidade ini imọ mîsinyụn̄ iyakke imọ inam se ikpanamde. Edi, ndusụk ini, okûdi ndiwụk ntịn̄enyịn n̄kaha ke mme mmeme fo ẹkeme ndikpan fi ndikụt se ekemede ndinam?

Ke ediwak tọsịn isua emi ẹkebede, Levi kiet ama enyene udọn̄ ndinam n̄kpọ emi enye mîkemeke ndinam. Enye ama enyene akwa ifet ndisinam utom urua iba kpukpru isua ke temple. Edi, enye ama enyene ata eti udọn̄ ndidụn̄ n̄kpere itieuwa ke nsinsi. (Ps. 84:1-3) Nso ikan̄wam anam-akpanikọ eren emi okop uyụhọ?  Enye ama edifiọk ke ndidu ọkpọkọm usen kiet kpọt ke okụre temple ekedi ata akwa ifet. (Ps. 84:4, 5, 10) Kpasụk ntre, utu ke ndiwụk ntịn̄enyịn ke se nnyịn mîkemeke ndinam, nnyịn ikpenyene ndifiọk nnyụn̄ n̄wụt esịtekọm mban̄a se idaha nnyịn ẹkemede ndiyak nnyịn inam.

Da Nerlande, eyenete an̄wan emi odude ke Canada, ke uwụtn̄kpọ. Enye esisan̄a ke n̄kpọitie mbon n̄kpọnnam onyụn̄ ekere ke imọ ikemeke ndinam ekese ke utom ukwọrọikọ. Nte ededi, enye ama okpụhọde ekikere esie onyụn̄ ada okụre ufọkurua mbọhọ esie nte ọkpọkpọ efakutom esie. Enye ọdọhọ ete: “Nsitie ke n̄kpọitie mbon n̄kpọnnam n̄kpere anyan n̄kpọitie ke okụre ufọkurua oro. Esinem mi ndikwọrọ ikọ nnọ mme owo oro ẹsidide ẹditie do ẹduọk odudu esisịt.” Ndibuana ke akpan orụk utom ukwọrọikọ enye emi anam Nerlande enen̄ede okop inemesịt.

Nam Ukpụhọde Edieke Oyomde Anam

Ubom ekeme ndinen̄ede nsọp ke ini ofụm emende afara esie. Edi etie etakubom enyene ndifịt afara ke ini enye osobode oyobio. Enye ikemeke ndikara oyobio, edi edieke enye efịtde afara enye ekeme ndika iso n̄kara ubom esie. Kpasụk ntre, nnyịn isikemeke ndikara mme afanikọn̄ oro ẹbietde oyobio, emi nnyịn isisobode. Edi imekeme ndikara uwem nnyịn ebe ke ndikpụhọde nte idade odudu, ekikere, ye ntụk nnyịn inam n̄kpọ. Ke ini ikerede iban̄a mbufa idaha nnyịn, emi ayanam ika iso ikop uyụhọ ye idatesịt ke utom Abasi.—N̄ke 11:2.

Kere ban̄a mme uwụtn̄kpọ emi. Edieke nnyịn mînen̄ekede inyene odudu, ọkpọfọn itre ndinam mme n̄kpọ oro ẹkemede ndinam ikpa mba ke usen man ikpekeme ndinyene odudu ndidụk mbono esop ke mbubịteyo usen oro. Emi ayanam inen̄ede ibọ ọyọhọ ufọn ito edisop idem ye nditọete nnyịn. Mîdịghe, ekeme ndidi eka eyen ikemeke ndibuana ke utom ukwọrọikọ eke ufọk ke ufọk ke ntak emi idem eyen esie mîsọn̄ke, enye ekeme ndidọhọ eyenete an̄wan ada eyen ukpepn̄kpọ esie edi ufọk imọ man itiene ibuana ke ukpepn̄kpọ oro ke adan̄aemi eyen imọ edede.

Nso ke akpanam edieke idaha fo mîsiyakke ekpep kpukpru n̄kpọ oro ẹdinemede ke mbono esop? Afo emekeme ndise adan̄a n̄kpọ oro ekemede ndikpep onyụn̄ ekpep oro ọfọn adan̄a nte ekekeme. Edieke ikpụhọrede n̄kpri utịtmbuba nnyịn, nnyịn imekeme ndika iso nnam utom inyụn̄ ikop inemesịt.

 Ekeme ndiyom inyene iwụk inyụn̄ isịn ukeme man ikeme ndikpụhọde mme utịtmbuba nnyịn. Serge ye Agnès, emi ẹdide ebe ye n̄wan ke France, ẹkenyene ndinam akamba ukpụhọde ke ndutịm mmọ. Serge ọdọhọ ete: “Ke ini ikọfiọkde ke Agnès oyomo, idotenyịn nnyịn ndidi isụn̄utom ama akpa mfụhọ.” Serge emi idahaemi edide ete nditọiban iba emi ẹtiede uwem uwem, etịn̄ nte mmọ ẹkenịmde mbufa utịtmbuba. Enye ọdọhọ ete: “Sia nnyịn mîkekemeke ndika n̄kanam utom ke esenidụt, ima ibiere ndinam utom nte n̄kpọ eke idide isụn̄utom ke idụt emana nnyịn. Ikabuana ye otu oro ẹsemde usem esenidụt.” Ndi mmọ ẹma ẹbọ ufọn edinịm obufa utịtmbuba emi? Serge ọdọhọ ete: “Nnyịn imenen̄ede ikop inemesịt ke ẹda nnyịn ẹnam utom ke esop.”

Odile, eyenete an̄wan ke France, emi odude ke iduọk isua 70 enyene ewan̄kọ ọkpọ ke edọn̄, ndien ikemeke ndidada mbịghi. Enye ama okop mmemidem ke ntak emi udọn̄ọ emi mîkayakke enye abuana ke utom ukwọrọikọ eke ufọk ke ufọk. Edi enye ikọkpọtke. Enye ama okpụhọ utom ukwọrọikọ esie ebe ke ndinọ ikọ ntiense urụk ukopikọ. Enye ọdọhọ ete: “Emem utom onyụn̄ enem akan nte n̄kekerede!” Orụk utom ukwọrọikọ emi enye anamde mi anam enye afiak enyene ifịk ke utom ukwọrọikọ.

Mme Utịtmbuba Oro Ẹwụtde Eti Ibuot Ẹda Edidiọn̄ Ẹdi

Ndida eti ibuot nse se nnyịn ikemede ndinam ekeme ndinam nnyịn itre ekese editịmede esịt. Imekeme ndikop uyụhọ ke imenyene se inamde edieke inịmde mme utịtmbuba oro ẹwụtde eti ibuot. Ke ntem, nnyịn imekeme ndikop idatesịt ke se ikemede ndinam, idem edieke edide esisịt.—Gal. 6:4.

Nte nnyịn iwụtde eti ibuot ke se ikerede ke akpana inam, nnyịn iyenen̄ede ikere iban̄a nditọete nnyịn. Nnyịn iyowụt esịtekọm kpukpru ini iban̄a se mmọ ẹnamde ẹnọ nnyịn sia ifiọkde mme mmeme mmọ. Iyanam edu edidianakiet ye esịtmbọm ọkọri edieke iwụtde esịtekọm iban̄a un̄wam oro ẹnọde nnyịn. (1 Pet. 3:8) Ti ete sia Jehovah edide edima Ete, enye oyom inam n̄kukụre se ikemede ndinam. Ndien ke ini ikerede se ikemede ndinam nte owụtde eti ibuot inyụn̄ inịmde mme utịtmbuba oro ikemede ndisịm, iyenen̄ede ikop uyụhọ ye idatesịt ke utom oro inamde inọ Abasi.

[Se Ẹwetde ka Ikpọ Abisi ke page 29]

Man ikop idatesịt ye uyụhọ ke utom oro inamde inọ Abasi, ana inịm mme utịtmbuba oro ẹwụtde eti ibuot, emi ẹkemde ye ukeme ye idaha nnyịn

[Ndise ke page 30]

Nerlande okop idatesịt ke ndinam se enye ekemede ndinam ke utom ukwọrọikọ

[Ndise ke page 31]

Kpep “ndifịt afara”

[Ebiet Ẹdade N̄kpọ Ẹto]

© Wave Royalty Free/age fotostock

[Ndise ke page 32]

Serge ye Agnès ẹma ẹbọ ufọn ke ndinịm mbufa utịtmbuba