Nte Afo Emeti?

Nte afo ama ọbọ ufọn oto edikot mme nsiondi Enyọn̄-Ukpeme eke ndondo emi? Ọfọn, se m̀mê emekeme ndibọrọ mme mbụme oro ẹtienede mi:

• Ini ewe ke mme asiak ntantaọfiọn̄ ẹkeka ẹkese Jesus?

Bible kiet ọdọhọ ete: “Mme ekpemerọn̄ ẹkeka ẹkese Jesus ke usịnudia ufene ke okoneyo emi enye akamanade, idịghe mme ọfiọkn̄kpọ owo. Mme ọfiọkn̄kpọ owo ẹkedi ke ọfiọn̄ ifan̄ ẹma ẹkebe.” Ini oro, Jesus ekedi ‘ekpri eyen’ onyụn̄ odụn̄ ke ufọk. (Matt. 2:7-11) Ndi Mary ọkpọkọnọ inuen iba kpọt ke temple ke usen 40 ẹma ẹkebe edieke ẹkpekenọde Jesus gold ye mme ọsọn̄urua n̄kpọ ke okoneyo oro enye akamanade?—1/1, page 31.

• Nso ke ediwak owo ẹkeme ndinam man ẹfori uwem mmọ?

Owo ekeme ndibụp ete, ‘Nte mmekeme ndikpụhọde mme idaha mi nnyụn̄ ndu mmemmem uwem?’ Amy ama anam ntre. Enye ama enen̄ede enyene okụk onyụn̄ esika isan̄ etieti edi ikokopke inemesịt. Enye ama edikụt ke ndisịn idem mbịne ubọkọkọ ererimbot emi okpokotụn imọ usụn̄ ọkpọn̄ mbuọtidem. Ke ama ekenyene nneme ye mbiowo, enye ama ebiere ndinịm mme n̄kpọ Obio Ubọn̄ akpa onyụn̄ anam utom usiakusụn̄ ke isua ifan̄. Amy ọdọhọ ete, “Idahaemi mmokop uyụhọ oro akanam mmen̄kopke” ke ini oro n̄kanamde utom nnọ ererimbot.—1/15, page 19.

• Nso ikeme ndinam ndusụk eka ẹkop uyụhọ?

Ediwak mme eka ẹnam utom mbakara. Ndusụk ẹnam man ẹtiene ẹse ẹban̄a ubon, mbon eken ẹnyụn̄ ẹnam man ẹnyene okụk idemmọ mîdịghe man ẹkeme ndidep ikpọ n̄kpọ. Mbon eken ẹnam utom sia ẹmade utom oro. Mme eka emi ẹdide Christian ẹfiọk ke ẹnọ mmimọ akpan utom n̄ko—akpan akpan ke ini eyen edide nsek. Ndusụk ẹmek ndinam utom ke ibio ini m̀mê nditetre utom man ẹnen̄ede ẹse ẹban̄a ubon mmọ, ndien emi enen̄ede ọnọ uyụhọ.—2/1, page 28-31.

• Ewe “emana” ke Jesus eketịn̄ aban̄a ke Matthew 24:34?

Jesus ekesiwak nditịn̄ mban̄a “emana” ke idiọk usụn̄ ke ini enye etịn̄de ikọ ọnọ m̀mê aban̄a mme idiọkowo. Edi enye ikokotke mme mbet esie oro ẹkeyomde ndida edisana spirit nyet aran ke mîbịghike idiọk emana. Mmọ ẹdidot ndinen̄ede mfiọk se ẹtịn̄de ẹban̄a ke Matthew 24:32, 33. Ntre, etie nte Jesus eketịn̄ aban̄a mbet esie oro ẹyetde aran, emi ẹkedude ke akpa isua ikie ye mfịn.—2/15, page 23-24.

• Didie ke Ibet akakabade edi andikpeme nte ẹtịn̄de ke Galatia 3:24?

Andikpeme ke eset ekesiwak ndidi ofụn oro ẹkenen̄erede ẹberi edem, emi esisede eyenọwọn̄ enyịn onyụn̄ okụtde ete ke ẹnam se ete eyen oro oyomde ẹnam ẹnọ eyen imọ. Andikpeme emi ekenyene nditiene eyen oro n̄ka ọtọ nte enye akaka, ese aban̄a ubọ ukpep esie, ama onyụn̄ ekeme nditụnọ nnyụn̄ nsua nnọ enye. Kpasụk ntre, Ibet ama ekpeme mme Jew, iyakke mmọ ẹtiene ẹnam mbubiam ido, utọ nte ndidọ mme okpono ndem. Ukem nte andikpeme mîkesinamke utom esie ke nsinsi, Ibet ikodụhe ke nsinsi, enye okodu tutu Christ edi.—3/1, page 18-21.

• Nte ẹtịn̄de ke James 3:17, mme edu ewe ke ikpenyene?

Nte ndisana owo, nnyịn inyene ndisọsọp nsịn idiọkido. (Gen. 39:7-9) Oyom itie emem emem n̄ko, itre ndinam n̄kpọ ekọn̄ ekọn̄, m̀mê ndinam n̄kpọ oro ekemede ndibiat emem. Ntre, nnyịn owo kiet kiet imekeme ndibụp idem nnyịn ite: ‘Ndi ẹdiọn̄ọ mi nte anam-emem m̀mê nte owo utọk? Ndi mmesiwak nditọhọ ye mbon en̄wen? Ndi mmesisọp nyat esịt ye mbon en̄wen m̀mê nnam mbon en̄wen ẹyat esịt? Mîdịghe, ndi mmesima ndifen nnọ mbon en̄wen utu ke ndiyịre nte mbon en̄wen ẹda mi nte ntiede.’—3/15, page 24-25.

• Ntak emi Jesus akanamde nnan oro okụt usụn̄ sụn̄sụn̄? (Mark 8:22-26)

Bible inọhọ akpan ibọrọ ke mbụme emi. Edi, ekeme ndidi Jesus ndinam nnan emi okụt usụn̄ sụn̄sụn̄, ama anam owo oro ọtọn̄ọ ndikụt un̄wana utịn sụn̄sụn̄. Anaedi emi ekedi Jesus ndiwụt nnan oro ima ima edikere mban̄a.—4/1, page 30.