Jehovah Esikop Eseme Nnyịn

“Enyịn Jehovah ese mbon eti ido, utọn̄ esie onyụn̄ ọbiọn̄ọ ọnọ eseme mmọ.”—PS. 34:15.

1, 2. (a) Etie ediwak owo didie ke idem mfịn? (b) Ntak emi mîkpaha nnyịn idem?

 NDI nnanenyịn esịm fi? Ke edide ntre, idịghe afo ikpọn̄ ke nnanenyịn esịm! Ata ediwak owo ke ẹn̄wana ndiyọ mfịghe eke usen ke usen ke idiọk editịm n̄kpọ emi. Etie nte esinen̄ede ọsọn̄ ndusụk owo ndiyọ mme mfịghe emi. Esinen̄ede etie mmọ ke idem nte eketiede David andiwet psalm emi ọkọdọhọde ete: “Mmofụm, mmonyụn̄ mbụn̄ọ eti-eti: mmeseme mban̄a mmụm esịt mi. Esịt mi ebre, odudu mi ọmọkpọn̄ mi; ama edi un̄wana enyịn mi, kpa mmọ idụhe ye ami.”—Ps. 38:8, 10.

² Sia idide mme Christian, ikpaha nnyịn idem ke uwem ọyọhọ ye mfụhọ. Nnyịn imọfiọk ke “ubiak uman” edi ubak idiọn̄ọ edidu Jesus. (Mark 13:8; Matt. 24:3) Ikọ Greek oro ẹkabarede “ubiak uman” ekeme ndiwọrọ ọkpọsọn̄ ubiak m̀mê nnanenyịn. Ikọ emi enen̄ede owụt ọkpọsọn̄ ubiak oro mme owo ẹkopde ke “ndiọkeyo” emi.—2 Tim. 3:1.

Nnanenyịn Nnyịn An̄wan̄a Jehovah

3. Nso ke ikọt Abasi ẹnen̄ede ẹfiọk?

³ Ikọt Jehovah ẹnen̄ede ẹfiọk ke nnanenyịn ekeme ndisịm mmimọ, ndien ke enen̄ede etie nte mme idiọk idaha oro ẹdude ke emi ẹdikam ẹtetịm ẹdiọk. Ke adianade ye se ubonowo ẹsobode, nnyịn emi idide ikọt Abasi imenyene ‘asua, kpa Devil,’ emi ebierede ndibiat mbuọtidem nnyịn. (1 Pet. 5:8) Isọn̄ke ndinyene ukem ekikere oro David ekenyenede, emi ọkọdọhọde ete: “Esuene omobụn̄ mi esịt; udọn̄ọ anam mi: mmonyụn̄ ntie mbet owo eke atuade mi mbọm, edi idụhe; nnyụn̄ mbet mme ọdọn̄ esịt, edi n̄kwe.”—Ps. 69:19, 20.

4. Nso isidọn̄ nnyịn esịt ke ini nnanenyịn?

⁴ Ndi David ọkọdọhọ ke idotenyịn imọ akpa mfụhọ? Baba-o. Kop mme n̄kpọ en̄wen oro enye eketịn̄de mi ke psalm oro: “Koro Jehovah okopde ọnọ mme ubuene, ndien isịnke mbon n̄kpọkọbi esie [m̀mê, ikọt esie oro ẹkọbide] ke ndek.” (Ps. 69:33) Ke nditịm ntịn̄, ndusụk ini, nnanenyịn oro isobode ekeme ndinam etie nnyịn ke idem nte n̄kpọ eke idide mbon n̄kpọkọbi. Ekeme nditie nte mbon en̄wen inen̄ekede ifiọk nte etiede nnyịn ke idem, onyụn̄ ekeme ndidi mmọ ifiọkke. Edi ukem nte David, ndifiọk ke nnanenyịn nnyịn enen̄ede an̄wan̄a Jehovah ekeme ndidọn̄ nnyịn esịt.—Ps. 34:15.

5. Nso ke Edidem Solomon ekenịm?

⁵ Solomon eyen David ama owụt emi ke ini ẹkeyakde temple Jerusalem ẹnọ. (Kot 2 Chronicles 6:29-31.) Enye ama ekpe Jehovah ubọk ete okop eseme ofụri esịt oro owo kiet kiet edisemede ọnọ Enye aban̄a ‘ufen ye ndutụhọ esie.’ Didie ke Abasi ese akam mbon oro ẹdude ke nnanenyịn? Solomon ama enịm ke Abasi oyokop akam mmọ onyụn̄ an̄wam mmọ. Ntak-a? Koro Enye enen̄ede ‘ọfiọk esịt nditọ Adam.’

6. Didie ke ikpọyọ editịmede esịt, ndien ntak-a?

⁶ Nnyịn n̄ko imekeme ndibọn̄ akam nnọ Jehovah mban̄a ‘ufen ye ndutụhọ nnyịn,’ kpa nnanenyịn oro nnyịn owo kiet kiet isobode. Ndifiọk ke nnanenyịn nnyịn an̄wan̄a Jehovah, n̄ko ke enye ekere aban̄a nnyịn,  ẹkpenyene ndidọn̄ nnyịn esịt. Apostle Peter ama ọsọn̄ọ emi ke ini enye ọkọdọhọde ete: “[Ẹtop] kpukpru editịmede esịt mbufo ẹdori enye ke idem, koro enye ekerede aban̄a mbufo.” (1 Pet. 5:7) Se itịbede inọ nnyịn ebehe Jehovah. Jesus ama ọsọn̄ọ etịn̄ ke Jehovah enen̄ede ekere aban̄a nnyịn ete: “Nte owo inyamke akadan̄abasi iba ke ekpri okudọk? Edi baba kiet ke otu mmọ iduọhọ ke isọn̄ ke Ete mbufo mîfiọkke. Edi ẹbat kpa kpukpru idet ibuot mbufo. Ke ntre ẹkûfehe ndịk: Mbufo ẹmesọn̄ urua ẹkan ediwak akadan̄abasi.”—Matt. 10:29-31.

Beri Edem ke Un̄wam Jehovah

7. Nso un̄wam ke ikeme ndidori enyịn ndibọ?

⁷ Nnyịn imekeme nditịm nnịm ke Jehovah enyịme onyụn̄ ekeme ndin̄wam nnyịn ke ini nnanenyịn. “Abasi edi ebiet-ubọhọ nnyịn ye odudu nnyịn, Enye edi andinyan̄a eke ekperede nnyịn eti-eti ke nnanenyịn.” (Ps. 34:15-18; 46:1) Didie ke Abasi esin̄wam nnyịn? Kere ban̄a se 1 Corinth 10:13 etịn̄de ete: “Abasi edi akpanikọ, idinyụn̄ iyakke ẹdomo mbufo ẹbe se mbufo ẹkemede ndiyọ, edi enye oyosio usụn̄ ubọhọ ke ufọt idomo man mbufo ẹkeme ndiyọ enye.” Jehovah ekeme ndinam afanikọn̄ nnyịn ebe efep, mîdịghe enye ekeme ndinọ nnyịn odudu man ikpọyọ enye. Jehovah ayada ekededi ke otu usụn̄ mbiba emi an̄wam nnyịn.

8. Didie ke ikeme ndibọ ufọn nto un̄wam Abasi?

⁸ Didie ke ikeme ndibọ utọ un̄wam oro? Kop se ẹdọhọde nnyịn inam mi: ‘Ẹtop kpukpru editịmede esịt mbufo ẹdori enye ke idem.’ Emi ọwọrọ yak nnyịn ke ndamban̄a usụn̄ iyak kpukpru mfịna nnyịn inọ Jehovah. Nnyịn iyodomo nditre nditịmede esịt inyụn̄ inyene ime inịm ke enye eyese aban̄a se inanade nnyịn. (Matt. 6:25-32) Oyom isụhọde idem man inyene orụk mbuọtidem oro, ikûnyụn̄ iberi edem ke ukeme m̀mê ifiọk nnyịn. Edieke isụhọrede idem ke “idak ọkpọsọn̄ ubọk Abasi,” emi oyowụt ke imọfiọk unana ukeme nnyịn. (Kot 1 Peter 5:6.) Ndien emi ayanam iyọ se ededi oro Abasi ayakde etịbe. Nnyịn imekeme ndiyom usọp usọp un̄wam, edi imenịm ke Jehovah ọfiọk ata nnennen ini ye nte enye edinamde n̄kpọ ke ibuot nnyịn.—Ps. 54:7; Isa. 41:10.

9. Nso mbiomo ke David ekenyene nditop nnọ Jehovah?

⁹ Ti mme ikọ David emi ẹwetde ke Psalm 55:22 ẹte: “Top mbiomo fo nọ Jehovah, ndien enye ayakama fi: enye idiyakke edinen owo esehede ke nsinsi.” David okodu ke ata nnanenyịn ke ini enye ekewetde ikọ emi. (Ps. 55:4) Nnyịn imọfiọk ke enye ekewet psalm emi ke ini emi Absalom eyen esie okoyomde ndibọ enye itie ubọn̄. Ahitophel, emi akakam edide akpan ọnọ-item edidem ama etiene odụk odu emi. David ekenyene ndifehe n̄kpọn̄ Jerusalem mbak ẹdiwot enye. (2 Sam. 15:12-14) Idem ke mme ini nnanenyịn emi, David ama aka iso ọbuọt idem ye Abasi, ndien mbuọtidem esie ikọwọrọke ikpîkpu.

10. Nso ke nnyịn inyene ndinam ke ini nnanenyịn?

¹⁰ Ukem nte David, oyom nnyịn isibọn̄ akam inọ Jehovah, inyụn̄ isian enye nnanenyịn ekededi oro isobode. Ẹyak ikere iban̄a se apostle Paul ekesịnde udọn̄ ọnọ nnyịn ete inam ke afan̄ emi. (Kot Philippi 4:6, 7.) Nso  ididi utịp edieke ibọn̄de akam ke ofụri esịt? “Emem Abasi emi akande kpukpru ekikere eyekpeme esịt [nnyịn] ye ukeme ukeren̄kpọ [nnyịn] ke Christ Jesus.”

11. Didie ke “emem Abasi” esikpeme esịt ye ukeme ukere n̄kpọ nnyịn?

¹¹ Ndi akam oyokpụhọde mfịna fo? Ih, ekeme ndikpụhọde. Nte ededi, oyom nnyịn iti ke Jehovah isiyereke akam nnyịn kpukpru ini ke usụn̄ oro nnyịn ikpoyomde. Edi, akam esinam nnyịn inyene nnennen idaha ekikere, mbak mme mfịna nnyịn ẹdikan nnyịn ubọk. “Emem Abasi” ekeme ndinam nnyịn imụm idem ikama ke ini esịt etịmerede nnyịn. “Emem Abasi” eyekpeme esịt ye ukeme ukeren̄kpọ nnyịn kpa nte emi otu mbonekọn̄ ẹsikpemede obio mbak afai afai mbon ntịme. Enye n̄ko ayan̄wam nnyịn ikan mme eyịghe, ndịk, ye ndiọi ekikere onyụn̄ ekpeme nnyịn mbak idinam n̄kpọ ke ibụmede ye unana ibuot.—Ps. 145:18.

12. Nọ uwụtn̄kpọ oro aban̄ade nte owo ekemede ndinyene ifụre.

¹² Didie ke ikeme ndinyene ifụre ke ini nnanenyịn? Kam kere ban̄a uwụtn̄kpọ oro ekemede ndidi ukem ye idaha nnyịn. Eteutom owo ekeme ndidi owo nsọn̄ido. Edi eyenutom oro ekeme nditịn̄ nte etiede enye ke idem nnọ andinyene itieutom, emi esifọnde ido onyụn̄ amade ndikọk ibuot ye mme owo. Andinyene itieutom anam eyenutom emi ọdiọn̄ọ ke imọ imọfiọk nte etiede enye ke idem, ndien ke iyọsọp ndisio owo oro ọsọn̄de ido mfep ke itie esie. Editie eyenutom oro didie ke idem? Ndinịm emi ke akpanikọ nnyụn̄ mfiọk se iyomde ndida itie ọyọsọn̄ọ enye idem onyụn̄ anam enye ebiere ndika iso nnam utom, idem okposụkedi emi enye ediyọde mme idomo mbemiso ini oro. Kpasụk ntre, nnyịn imọfiọk ke Jehovah ọfiọk se iwọrọde nnyịn, onyụn̄ asian nnyịn ete ke ibịghike “ẹmọn̄ ẹsio andikara ererimbot emi ẹduọk.” (John 12:31) Nso ndọn̄esịt ke emi edi ntem!

13. Ke adianade ye edibọn̄ akam, nso en̄wen ke oyom nnyịn inam?

¹³ Ntre, nte n̄kukụre se inyenede ndinam edi nditop mbiomo nnyịn nnọ Jehovah ke akam? Baba-o. Oyom inam mme n̄kpọ en̄wen. Oyom inam n̄kpọ ke n̄kemuyo ye akam nnyịn. Ke ini Edidem Saul ọkọdọn̄de mme owo ete ẹkewot David ke ufọk esie, David ama ọbọn̄ akam ete: “Sio mi mme asua mi ke ubọk, O Abasi mi: menede mi nịm ke enyọn̄ kan mmọ eke ẹnamde ikọ ye ami. Sio mi mme anam-idiọk ke ubọk, nyụn̄ nyan̄a mi sio ke ubọk mbon afai.” (Ps. 59:1, 2) Ke adianade ye akam, David ama akpan̄ utọn̄ ọnọ n̄wan esie onyụn̄ efehe ọnyọn̄. (1 Sam. 19:11, 12) Ke ukem usụn̄ oro, nnyịn imekeme ndibọn̄ akam nyom ọniọn̄ man ikeme ndiyọ, ndien iso-ọfọn, mfịna nnyịn ekeme nditehede ube.—Jas. 1:5.

Nte Ikemede Ndinyene Ukeme Ndiyọ

14. Nso ikeme ndinam nnyịn iyọ ke ini isobode mfịna?

¹⁴ Ekeme ndidi mfịna nnyịn idisọpke ikụre. Mmọ ẹkeme ndika iso ke ndusụk ini. Ke edide ntre, nso idin̄wam nnyịn iyọ? Akpa, ti ete ke edieke nnyịn ikade iso inam n̄kpọ Jehovah kpa ye oro isobode nsọn̄ọ n̄kpọ, emi owụt adan̄a nte imade enye. (Utom 14:22) Ti ikọ oro Satan okodoride Job ete: “Nte Job abak Abasi ke ikpîkpu? Nte afo usịnke ọkọ ukan enye, ye ufọk esie, ye kpukpru se enye enyenede, ukụk? Afo ọmọdiọn̄ se ubọk esie anamde, inyene esie omonyụn̄ ọtọt ke  isọn̄? Edi kam nyan ubọk fo, tụk kpukpru se enye enyenede; enye iditreke ndikpọn̄ fi an̄wa-an̄wa.” (Job 1:9-11) Job ndikọsọn̄ọ nda ama owụt ke edori ikọ oro ekedi ata nsu. Nnyịn n̄ko ndiyọ n̄kpọsọn̄ idaha owụt ke Satan edi osu nsu. Ndien nnyịn ndiyọ ọsọn̄ọ idotenyịn ye mbuọtidem nnyịn.—Jas. 1:4.

15. Mme uwụtn̄kpọ ewe ẹkeme ndisọn̄ọ nnyịn idem?

¹⁵ Ọyọhọ iba, ti ete ke “kpa ukem ndutụhọ emi ke ọyọyọhọ ke ofụri otu nditọete mbufo ke ererimbot.” (1 Pet. 5:9) Ih, “idomo ikesịmke mbufo ibọhọke se isiwakde nditịbe nnọ owo.” (1 Cor. 10:13) Ntre, ndikere mban̄a uwụtn̄kpọ mbon en̄wen utu ke ndiwụk ntịn̄enyịn ke mme mfịna fo, ekeme ndinam enyene odudu ye uko. (1 Thess. 1:5-7; Heb. 12:1) Da ini kere ban̄a uwụtn̄kpọ mbon oro afo ọfiọkde oro ẹsọn̄ọde ẹda ẹyọ kpa ye oro ẹsobode ubiak ubiak afanikọn̄. Ndi amanam ndụn̄ọde oyom mme ifiọkutom oro ẹwetde ẹban̄a mbon oro ẹsobode ukem mfịna oro afo osobode? Mme utọ ifiọkutom emi ẹkeme ndinen̄ede nsọn̄ọ fi idem.

16. Didie ke Abasi esisọn̄ọ nnyịn idem ke ini isobode nsio nsio idomo?

¹⁶ Ọyọhọ ita, ti ete ke Jehovah edi “Ete mbọm ye Abasi kpukpru ndọn̄esịt, emi ọdọn̄de nnyịn esịt ke kpukpru ukụt nnyịn, man nnyịn ikpekeme ndidọn̄ mbon oro ẹdude ke ukụt ekededi esịt ebe ke ndọn̄esịt oro Abasi ọnọde nnyịn.” (2 Cor. 1:3, 4) Etie nte n̄kpọ eke Abasi adade nnyịn ke n̄kan̄ esịn udọn̄ ọnọ onyụn̄ ọsọn̄ọ nnyịn idem, idịghe ke ukụt oro isobode idahaemi kpọt edi ke “kpukpru ukụt nnyịn.” Emi ekeme ndinam nnyịn idọn̄ mbon en̄wen esịt “ke ukụt ekededi.” Paul ke idemesie ama okụt ke se itien̄wed emi etịn̄de edi akpanikọ.—2 Cor. 4:8, 9; 11:23-27.

17. Didie ke Bible ekeme ndin̄wam nnyịn iyọ nnanenyịn?

¹⁷ Ọyọhọ inan̄, nnyịn imenyene Ikọ Abasi, kpa Bible, oro “[ọfọnde] ndida nnọ ukpep, nsua nnọ owo, nnen̄ede mme n̄kpọ, nnọ ntụnọ ke edinen ido, man owo Abasi etịm odot, eben̄e idem ọyọhọ ọyọhọ ndinam eti utom ekededi.” (2 Tim. 3:16, 17) Ikọ Abasi esinam ‘idot’ inyụn̄ ‘iben̄e idem ndinam eti utom ekededi.’ Enye n̄ko esinam nnyịn iyọ mme mfịna. Enye anam nnyịn ‘itịm idot’ inyụn̄ ‘iben̄e idem ọyọhọ ọyọhọ.’ Akpasarade ikọ oro ẹkabarede “eben̄e idem ọyọhọ ọyọhọ” enen̄ede ọwọrọ “ndidọn̄ n̄kpọutom nyọhọ.” Ekeme ndidi ikọ emi akaban̄a ubom oro ẹkedọn̄de kpukpru n̄kpọ oro ẹdiyomde ke isan̄ mmọn̄, m̀mê aban̄a masịn oro ekemede ndinam n̄kpọ ekededi oro ẹyomde enye anam. Kpasụk ntre, Jehovah ada Ikọ  esie ọnọ nnyịn kpukpru se iyomde man ikeme ndise mban̄a se ededi oro isobode. Ntem, nnyịn n̄ko imekeme ndidọhọ ite, “Edieke Abasi enyịmede, enye ọyọnọ mi ukeme man nyọ.”

Edinyan̄a Nsio ke Kpukpru Nnanenyịn

18. Ndiwụk ntịn̄enyịn ke nso edin̄wam nnyịn ika iso iyọ?

¹⁸ Ọyọhọ ition, ti kpukpru ini ete ke Jehovah ọn̄wọn̄ọ nditre kpukpru nnanenyịn oro ubonowo ẹsobode ke mîbịghike. (Ps. 34:19; 37:9-11; 2 Pet. 2:9) Ke akpatre, Abasi ayanyan̄a nnyịn osio ke nnanenyịn oro isobode idahaemi, onyụn̄ ọnọ nnyịn ifet ndinyene uwem nsinsi edide ke heaven ye Jesus m̀mê ke paradise isọn̄.

19. Didie ke ekeme ndika iso nsọn̄ọ nda?

¹⁹ Tutu ini oro, nnyịn iyaka iso iyọ nnanenyịn oro isobode ke idiọk ererimbot emi. Nnyịn itetie ibet ini emi nnanenyịn mîdidụhe aba! (Ps. 55:6-8) Ẹyak nnyịn iti ke nsọn̄ọnda nnyịn owụt ke Devil edi osu nsu. Nnyịn ikpakam ida akam ye otu nditọete Christian nnyịn isọn̄ọ idem, inyụn̄ iti ke nditọete ke ẹsobo ukem idomo oro nnyịn isobode. Ka iso nditịm ndot nnyụn̄ mben̄e idem ọyọhọ ọyọhọ ebe ke ndida Ikọ Abasi nnam n̄kpọ edifọn edifọn. Kûdedei uyak mbuọtidem oro enyenede ke ima ima edikere mban̄a emi otode “Abasi kpukpru ndọn̄esịt” emem. Ti ete ke “enyịn Jehovah ese mbon eti ido, utọn̄ esie onyụn̄ ọbiọn̄ọ ọnọ eseme mmọ.”—Ps. 34:15.

Nte Afo Emekeme Ndibọrọ?

• Eketie David didie ke idem ke ini enye okodude ke nnanenyịn?

• Nso ke Edidem Solomon ekenịm?

• Nso ikeme ndin̄wam nnyịn iyọ se Jehovah ayakde etịbe?

[Mme Mbụme Ukpepn̄kpọ]

[Ndise ke page 13]

Solomon ama enịm ke Jehovah eyetre nnanenyịn ikọt Esie

[Ndise ke page 15]

David ama otop mbiomo esie ọnọ Jehovah ke akam onyụn̄ anam n̄kpọ aban̄a se enye ekeben̄ede