Adat Esịt ‘Nditiene Eyenerọn̄ N̄kan’

KE LETA oro Carey W. Barber ekewetde ke 1971, enye ama etịn̄ aban̄a isua 50 oro enye akanamde n̄kpọ ata Abasi ete: “Mme isua oro nnamde n̄kpọ nnọ Jehovah ẹfọn ẹnana mbiet. Edibuana ye ikọt esie; Abasi ndikpeme mi nsio ke ubọk mme anamidiọk ke ererimbot Satan; idotenyịn editiene Eyenerọn̄, kpa Jesus Christ, n̄kan; ye mme n̄kpọ oro ẹwụtde ke Jehovah ama mi ẹnam nnen̄ede nnyene emem ye ata uyụhọ oro ẹkpemede esịt owo ẹnyụn̄ ẹnam nnen̄ede nnyene idotenyịn ke nyakan ke akpatre.”

Ke 1977, ẹma ẹmek Brọda Barber, kpa Christian emi ẹyetde aran, nte owo Otu Ukara Mme Ntiense Jehovah. Ke isua 30 oro enye ekedide owo Otu Ukara, enye ama aka iso ebet ini oro enye ‘editienede Eyenerọn̄ ikan.’ Enye ama anam oro ke ndikọsọn̄ọ nda tutu esịm usen n̄kpa esie ke Sunday, April 8, 2007, ke ama ekesịm isua 101.—1 Corinth 15:57.

Carey Barber akamana ke England ke 1905, onyụn̄ ana baptism ke Winnipeg ke Canada ke 1921. Ke isua iba ẹma ẹkebe, enye ye Norman amanamba eyeneka esie eren, ẹma ẹka Brooklyn ke New York man ẹken̄wam ke obufa utom oro ẹketọn̄ọde. Ini oro ke ikọt Jehovah ẹkeyom nditọn̄ọ nsion̄o mme n̄wed mmọ man ẹkpeda ẹsuan eti mbụk Obio Ubọn̄ “ke ofụri isọn̄.” (Matthew 24:14) Kiet ke otu akpa utom oro ẹkenọde Brọda Barber ekedi ndinam utom ke ukwak umịn̄n̄wed. Ibio ibio n̄kpọ oro ẹkewetde ẹban̄a ikpe oro ẹkedade ẹka Esop Anana Ntọn̄ United States ekesịne ke otu n̄kpọ oro ẹkemịn̄de. Nte ini akakade, Brọda Barber ama anam utom ke Itieutom Utịmutom, ese aban̄a mme n̄kpọ oro ẹban̄ade esop ye utom ukwọrọikọ ke idụt oro.

Ifiọk oro enye ekenyenede ke ndinam utom ke nsio nsio itie emi ama anam enye enen̄ede odot ke ini ẹkenọde enye akanam utom oro ẹsan̄ade-san̄a ke 1948, ndien enye ama asan̄a ese mme esop onyụn̄ enịm mme mbono ke ofụri edem usoputịn United States. Enye ọkọdọhọ ke se ikenemde imọ ikan ekedi ndisisan̄a ke an̄wa n̄kwọrọ ikọ. Utom emi ama anam ediwak nditọete iren ye iban ẹdiọn̄ọ Brọda Barber. Ifiọk ye ifịk esie ke utom ukwọrọikọ ama enen̄ede an̄wam enye ke ini ẹkekotde enye edidụk ọyọhọ otu 26 ke Ufọkn̄wed Enyọn̄-Ukpeme Ukpep Bible eke Gilead. Ke ufọkn̄wed oro ke enye ekedidiọn̄ọ Sydney Lee Brewer, emi ekedide ekemmọ eyen ufọkn̄wed emi otode Canada. Ke ẹma ẹkekụre ufọkn̄wed, mmọ ẹma ẹdọ ndọ ẹnyụn̄ ẹdara obufa ndọ mmọ ke usụn̄ edika n̄kese mme esop ke obio Chicago ke Illinois. Sista Barber ekedi ata eti nsan̄a onyụn̄ enen̄ede ọnọ ebe esie ibetedem ke ofụri isua 20 oro mmọ ẹkenamde utom oro ẹsan̄ade-san̄a ọtọkiet.

Mbon oro ẹkesobode ẹnyụn̄ ẹdiọn̄ọde Brọda Barber ke mme isua oro enye akanamde utom nte esenyịn district m̀mê circuit m̀mê ke isua 30 oro enye akanamde utom nte owo Otu Ukara esinyụn̄ akade nsio nsio ebiet, idifreke mme utịn̄ikọ esie ye mme inem inem ikọ esie. Enen̄ede odot nnyịn idara nte enye ‘etienede Eyenerọn̄ akan.’