Christmas Etie Didie Mfịn?

KE UKEM ọfiọn̄ emi ke isua duop emi ẹkebede, magazine U.S.News & World Report ama enyene ibuotikọ ikpaedem oro ọkọdọhọde: “Ndiyom Christmas.” Ibuotikọ oro akaban̄a m̀mê Christmas ke “akabarede edi eti edinam, onyụn̄ etre ndidi n̄kpọ mbubịne.” Ndi Christmas ke akabarede edi eti edinam onyụn̄ etre ndidi n̄kpọ mbubịne?

Ibuotikọ oro ama ọnọ mme ntak oro nnyịn mîkpekereke ke oro eyetịbe. Enye ọkọdọhọ ete: “N̄wetnnịm n̄kpọ ndomokiet idụhe ndiwụt ke ẹma ẹsinịm usọrọ usen emana Christ ibọhọke ke ọyọhọ isua ikie inan̄ emi Constantine . . . ekedide andikara Rome.” Oro owụt “ke nsụhọde n̄kaha ke owo ndomokiet ifiọkke ini oro Jesus akamanade.” Ibuotikọ oro ọdọhọ ke “mme gospel ikam isiakke ukpọk isua oro Jesus akamanade, n̄wan̄wadise ndien ndisiak nnennen ọfiọn̄ m̀mê usen.” Ewetmbụk kiet ke University of Texas ọdọhọ ke “akpa mme Christian ikakam ikereke-kere ndinịm usọrọ emana Jesus.”

Ke ekpri ibuotikọ oro, “Ubiere Oro Owo Mîmụmke Ibuot,” magazine oro etịn̄ “nte ufọkabasi akasan̄ade enyene December 25.” Enye ọdọhọ ete: “Ata ediwak owo ẹdọhọ ke ẹkefọfiọk ẹnam usọrọ Saturnalia ye mme usọrọ ukpono ndem eken ẹkabade ẹdi usọrọ mme ‘Christian.’” “Mme adaiso ido ukpono ẹkenịm usọrọ Christmas ke utịt utịt December, kpa ini oro ediwak owo ẹkemehede ye usọrọ, man ata ediwak owo ẹkpedia usọrọ emana Andinyan̄a.” Ke ufọt ufọt ọyọhọ iduọk isua ikie 19, enye akakabade edi edinam edidep nnyụn̄ nnọ mme owo enọ. “Obufa ido unọ enọ Christmas ama anam mme anyam n̄ken̄e n̄kpọurua ẹsọsọp ẹforo, ndien ikebịghike mme anyam ikpọ ubọkurua ye mme asuanetop n̄kpọurua ẹma ẹnen̄ede ẹsuan etop ẹban̄a ini emi.”

Ntre, ntak ndomokiet idụhe ndikere ke Christmas ekeme ndibiet n̄kpọ en̄wen n̄kan edinam oro mîdịghe eke ata mme Christian. Okposụkedi Christmas edide “uwouwo usọrọ oro ẹdade ẹnam mbubịne” mfịn, akananam ata mme Christian ikereke-kere ndinịm usọrọ usen emana Jesus. Utu ke nditịn̄ mban̄a usọrọ emana Christ, Bible akam enen̄ede etịn̄ aban̄a ufak oro enye ọkọnọde ke ndikpa nnyụn̄ nset n̄ka heaven. (Matthew 20:28) Oro ayaka iso edi akpan n̄kpọ ke nsinsi nsinsi.