Ndidiana Kiet Mbọp Itie Utuakibuot Oro Otorode Abasi

MME owo ke kiet ke otu mme isuo Solomon Islands ẹkese obufa Ufọkmbono Obio Ubọn̄ Mme Ntiense Jehovah. Do n̄wan kiet ama ọdọhọ ete: “Nnyịn imesinam ediwak edinam ukọ okụk ke ufọkabasi nnyịn. Imesidọhọ mbon ufọkabasi nnyịn ẹtịp okụk, kpa ye oro nnyịn inyeneke okụk oro ekemde ndida mbọp obufa ufọkabasi. Mbufo Mme Ntiense ẹsinam didie ẹnyene okụk?” Ntiense oro enye okobụpde mbụme emi ama ọbọrọ ete: “Nnyịn idiana kiet nte ubon ituak ibuot inọ Jehovah ke ofụri ererimbot. Esop nnyịn ye nditọete nnyịn ke ofụri ererimbot ẹketịp se ẹdade ẹbọp obufa Ufọkmbono Obio Ubọn̄ emi. Jehovah ekpep nnyịn ndidiana kiet nnam kpukpru n̄kpọ.”

Afo oyokụt ke Mme Ntiense Jehovah ẹsidiana kiet ke kpukpru se mmọ ẹnamde, emi esịnede edibọp ata ediwak Ufọkmbono Obio Ubọn̄. Orụk edidiana kiet emi idịghe obufa n̄kpọ. Enen̄ede ebịghi ikọt Abasi ẹketọn̄ọ ndidiana kiet. Ntak idọhọde ntre?

Ndibọp Ataya ye Temple

Jehovah ekenyene idụt Israel ke ekikere ke ini enye ọkọdọhọde Moses ke se ikande isua 3,500 emi ẹkebede ete: “Yak mmọ ẹnam edisana ebiet ẹnọ mi.” (Exodus 25:8) Ke ini Jehovah eketịn̄de aban̄a nte ẹdibọpde ebiet emi, enye ama adian do ete: “Kpa nte emi ami n̄wụtde fi kpukpru n̄kpọ, kpa mbiet ebiet-idụn̄, ye mbiet kpukpru n̄kpọ utom esie, kpasụk ntre ke mbufo edinam enye.” (Exodus 25:9) Ekem Jehovah ama ọnọ ọyọhọ ntọt aban̄a nte edisana ebiet oro editiede, mme n̄kpọutom esie, ye se ẹdidade ẹbana enye. (Exodus 25:10–27:19) Edisana ebiet m̀mê ataya emi ekenyene ndidi akpan ebiet utuakibuot nnọ kpukpru nditọ Israel.

Nnyịn ifiọkke ibat owo oro ẹkenamde utom ke ataya oro, edi ẹma ẹdọhọ kpukpru nditọ Israel ẹtịp n̄kpọ man ẹda ẹbọp enye. Moses ọkọdọhọ mmọ ete: “Mbufo ẹda enọ mbufo ẹsọk Jehovah: yak kpukpru owo eke esịt mmọ ẹnyịmede, ẹda enye ẹdi nte enọ Jehovah.” (Exodus 35:4-9) Didie ke nditọ Israel ẹkenam n̄kpọ? Exodus 36:3 ọdọhọ ete: “Mmọ ẹbọ Moses kpukpru enọ emi nditọ Israel ẹkedade ẹsọk ke utom edisana efe, man ẹnam enye. Ndien mmọ ẹsụk ẹdada enọ ima ẹsọk enye kpukpru usenubọk.”

Ikebịghike ẹma ẹnọ ata ediwak n̄kpọ, ndien mme owo ke ẹkedada n̄kpọ ẹdi. Ke akpatre, mme anamutom usọ ẹma ẹdọhọ Moses ẹte: “Mbio emi ẹda n̄kpọ ẹbe adan̄a nte ekemde, ẹdinọ ke edinam utom, emi Jehovah okowụkde ete ẹnam enye.” Ntre Moses ama ọnọ uyo  ete ‘yak iren ye iban ẹtre ndida n̄kpọ ndi.’ Nso iketịbe? “Se mmọ [ẹkenọde] ekem ndinam kpukpru utom oro, onyụn̄ osụhọ.”—Exodus 36:4-7.

Ke ntak ntatubọk nditọ Israel, ẹma ẹbọp ataya ẹkụre ke ufan̄ isua kiet. (Exodus 19:1; 40:1, 2) Ikọt Abasi ẹma ẹkpono Jehovah ke nditịp n̄kpọ nda n̄n̄wam utuakibuot akpanikọ. (Mme N̄ke 3:9) Nte ini akakade, mmọ ẹma ẹnyene ata akamba n̄kpọ ndibọp. Ndien emi ama afiak ọnọ mbon oro ẹmade ifet ndin̄wam ke utom, edide mmọ ẹma ẹnyene usọ ubọpn̄kpọ m̀mê ikenyeneke.

Ke ekperede ndisịm isua ikie ition ke nditọ Israel ẹma ẹkebọp ataya, mmọ ẹma ẹtọn̄ọ ndibọp temple ke Jerusalem. (1 Ndidem 6:1) Temple emi ekenyene ndidi ata akamba ufọk oro ẹsịnde itiat idakisọn̄, ẹnyụn̄ ẹdade itiat ye eto ẹbọp. (1 Ndidem 5:17, 18) Jehovah akada ‘spirit esie eteme’ David nte ẹdibọpde temple. (1 Chronicles 28:11-19) Edi Solomon eyen David ke Jehovah ekemek ndibọp temple imọ. (1 Chronicles 22:6-10) David ama ada ofụri esịt esie an̄wam ke utom oro. Enye ama edep itiat, ukwak, ye mme n̄kpọ eken onyụn̄ ọnọ ata ediwak gold ye silver. Enye ama esịn udọn̄ n̄ko ọnọ ekemmọ nditọ Israel nditat ubọk, onyụn̄ obụp mmọ ete: “Anie ndien emenyịme ndiyọhọ ubọk esie mfịn emi nnọ Jehovah?” Nso ke mmọ ẹkenam?—1 Chronicles 29:1-5.

Solomon ama enyene ata ediwak gold ye silver ke ini enye ọkọtọn̄ọde ndibọp temple. Okpoho ye ukwak ẹma ẹwak ẹbe se ẹkemede ndidomo. (1 Chronicles 22:14-16) Jehovah ama ọnọ kpukpru nditọ Israel ibetedem, anamde mmọ ẹkụre utom oro ke isua itiaba ye ubak kpọt.—1 Ndidem 6:1, 37, 38.

“Ufọk Abasi”

Ẹkekot ataya ye temple “ufọk Abasi.” (Judges 18:31; 2 Chronicles 24:7) Akananam Jehovah iyomke ufọkidụn̄. (Isaiah 66:1) Enye ọkọdọhọ ẹbọp mme itie oro ke ufọn mme owo. Ke akpanikọ, ke edinam uyak temple nnọ, Solomon ama obụp ete: “Nte Abasi oyodụn̄ ke isọn̄ ndien ke akpanikọ? Sese, enyọn̄ ye ata enyọn̄ ikemke fi, kpan̄ ọfiọk ufọk emi n̄kọbọpde.”—1 Ndidem 8:27.

Jehovah ama ada Isaiah prọfet esie etịn̄ ete:  “Ufọk mi eyekere, ete, Ufọk akam kpukpru mme idụt.” (Isaiah 56:7) Uwa oro ẹkewade ye akam oro ẹkebọn̄de ke temple, ọkọrọ ye mme usọrọ oro ẹkenamde do, ẹma ẹn̄wam mme abak-Abasi—oro edi mme Jew ye mbon oro mîdịghe mme Jew—ẹsan̄a ẹkpere ata Abasi. Mmọ ẹma ẹkeme ndidi ufan Jehovah nnyụn̄ nnyene ukpeme esie ke ndituak ibuot nnọ enye ke ufọk esie. Akam oro Solomon ọkọbọn̄de ke edinam ediyak temple nnọ enen̄ede owụt ke emi edi akpanikọ. Afo emekeme ndikot ikọ esie emi otụkde owo mi, ke 1 Ndidem 8:22-53 ye 2 Chronicles 6:12-42.

Ẹma ẹsobo ufọk ata Abasi oro anyan ini ko, edi Ikọ Abasi ama ebebem iso etịn̄ aban̄a ini emi ẹditan̄de kpukpru owo ke ofụri idụt ẹbok man ẹtuak ibuot ẹnọ Jehovah ke temple esie eke spirit. (Isaiah 2:2) Mfọnmma uwa ikpọn̄-ikpọn̄ Eyen Abasi, emi mme uwa unam ke temple ẹkedade ẹban̄a, edidi usụn̄ ndisan̄a n̄kpere Jehovah. (John 14:6; Mme Hebrew 7:27; 9:12) Mfọnn̄kan usụn̄ emi ke Mme Ntiense Jehovah ẹda ẹtuak ibuot ẹnọ Abasi, ndien mmọ ke ẹn̄wam ediwak owo ndinam ntre n̄ko.

Mme Itie Utuakibuot Oro Ẹbọpde ke Eyomfịn

Mme Ntiense Jehovah ẹnam n̄kpọ ẹnọ ata Abasi ke ofụri ererimbot. Mmọ ẹdi “ọkpọsọn̄ idụt” emi ibat mmọ akade-ka iso ndikọri. (Isaiah 60:22) Ata akpan itie emi Mme Ntiense Jehovah ẹsisopde idem edi Ufọkmbono Obio Ubọn̄. * Ẹbọbọp ata ediwak Ufọkmbono Obio Ubọn̄, ndien ke ẹyoyom ata ediwak en̄wen.

Mme Ntiense Jehovah ‘ẹnọ idem mmọ unyịme unyịme’ ndibọp mme Ufọkmbono Obio Ubọn̄. (Psalm 110:3, NW) Nte ededi, ediwak ini Mme Ntiense emi ẹdude ke n̄kann̄kụk isinyeneke usọ ubọpn̄kpọ, ndien ndusụk ebiet emi ẹnen̄erede ẹnam n̄kọri eke spirit ẹnen̄ede ẹbuene. Ke 1999, Otu Ukara Mme Ntiense Jehovah ama ọtọn̄ọ ndutịm ubọp Ufọkmbono Obio Ubọn̄ man ẹkan mme mfịna emi. Ndutịm emi anam Mme Ntiense oro ẹnyenede usọ ubọpn̄kpọ ẹka ata anyan ebiet ẹkekpep nditọete mmọ ndibọp mme Ufọkmbono Obio Ubọn̄. Mbon oro mmọ ẹnọde ukpep emi ẹka iso ndibọp n̄kpọ ke obio mmọ. Nso idi utịp nsịnifịk emi?

Ọtọn̄ọde ke ini ẹketọn̄ọde ndutịm emi esịm February 2006, Mme Ntiense Jehovah ẹmebọp mbufa Ufọkmbono Obio Ubọn̄ 13,000 ke mme obio oro ẹbuenede. Kot se ndusụk owo oro ẹsidụkde mbono esop ke mbufa Ufọkmbono Obio Ubọn̄ emi ẹtịn̄de.

“N̄kpọ nte owo 160 ẹkesidụk mbono esop ke esop kiet. Ke ẹma ẹkebọp obufa Ufọkmbono Obio Ubọn̄, owo 200 ẹkedụk akpa mbono esop oro ẹkenịmde do. Idahaemi, ke ọfiọn̄ itiokiet ẹma ẹkebe, owo 230 ẹsidụk mbono esop do. Nnyịn imokụt ke Jehovah ọdiọn̄ utom ubọp ukeuke ufọkmbono emi ẹdade ẹtuak ibuot ẹnọ enye mi.”—Esenyịn oro asan̄ade-san̄a ke Ecuador.

“Ke ediwak isua, mme owo ẹma ẹsibụp nnyịn ẹte: ‘Ini ewe ke mbufo ẹdinyene Ufọkmbono Obio Ubọn̄ nte enye emi isikụtde ke n̄wed mbufo?’ Nnyịn imọkọm Jehovah ke emi inyenede itie utuakibuot oro eyede mi ndien. Nnyịn ikedi n̄kpọ nte owo 30 emi ikesidụkde mbono esop ke ufọkurua eyenete kiet. Edi owo 110 ẹkedụk akpa mbono esop oro ikenịmde ke obufa Ufọkmbono Obio Ubọn̄.”—Esop kiet ke Uganda.

 “Nditọete iban iba emi ẹdide mme asiakusụn̄ ofụri ini ẹdọhọ ke imenen̄ede ikop inem ndinam utom ke efakutom mmimọ tọn̄ọ ẹkebọp obufa Ufọkmbono Obio Ubọn̄. Mmọ ẹdọhọ ke mme owo ẹnen̄ede ẹnyịme ndikpan̄ utọn̄ nnọ mmimọ ke ini ikwọrọde ikọ ke ufọk ke ufọk ye ke ido nneme. Nditọete emi ẹnịm ukpepn̄kpọ Bible 17 idahaemi, ndien ediwak owo ke otu oro ẹsidụk mme mbono esop.”—N̄kọk itieutom Solomon Islands.

“Pastọ kiet emi odụn̄de ke mbọhọ oro ẹbọpde obufa Ufọkmbono Obio Ubọn̄ ọdọhọ ke emi anam n̄kann̄kụk oro enyene uku ndien ke mme owo do ẹda oro ẹtan̄ ase. Ediwak owo oro ẹsisan̄ade ẹbe ẹsitịn̄ nte ufọkmbono oro eyede. Nditọete ẹsida emi ẹnọ ikọ ntiense. Ata ediwak owo ẹyom ndifiọk mban̄a nditọete nnyịn eke ofụri ererimbot. Emi anam ediwak owo oro ẹketrede ndidụk mbono esop ke ediwak isua ẹfiak ẹtọn̄ọ ndidụk.”—N̄kọk itieutom Myanmar.

“Eyenete an̄wan kiet ama okot eren kiet emi ekenyenede udọn̄ ete edi itie emi ẹkebọpde Ufọkmbono Obio Ubọn̄ ke n̄kann̄kụk mmọ. Ekem eren oro ama ọdọhọ ete: ‘N̄kekere ke owo idiyakke mi ndụk. Ama akpa mi idem nte Mme Ntiense ẹkekọmde mi ufan ufan. Iren ye iban ẹma ẹsịn ifịk ẹnam utom, inyụn̄ ibiatke ini. Mmọ ẹma ẹdiana kiet ẹnam utom ẹnyụn̄ ẹkop inemesịt.’ Eren oro ama enyịme ẹkpep imọ Bible onyụn̄ ọtọn̄ọ ndisidụk mme mbono esop. Ekem enye ama ọdọhọ ete: ‘Ekikere mi okpụhọde. Ndikpọn̄ke Abasi ke emi mma n̄kọfiọk enye mi.’”—N̄kọk itieutom Colombia.

 Ẹnen̄ede Ẹyom In̄wam

Ndibọp Ufọkmbono Obio Ubọn̄ esịne ke otu ndisana utom oro inamde. Enen̄ede odot ẹtoro Mme Ntiense Jehovah ke nte mmọ ẹn̄wamde ke utom emi—ke nditịp okụk ye ke ndin̄wam ke mme usụn̄ en̄wen. Nte ededi, oyom iti ke ndisana utom nnyịn eken ẹdi akpan n̄kpọ n̄ko. Ke ini ke ini, mme oto-obot afanikọn̄ ẹsinọmọ nditọete nnyịn, onyụn̄ oyom nnyịn in̄wam mmọ. Edimịn̄ mme n̄wed Bible enen̄ede edi akpan n̄kpọ ke edisana utom nnyịn. Ediwak nnyịn imokụt nte magazine m̀mê n̄wed oro ẹkọn̄ọde ke Bible ẹnyenede odudu ke idem owo oro enyenede eti esịt ke ini enye ọbọde okot. Ke adianade do, enen̄ede edi akpan n̄kpọ ndin̄wam mme isụn̄utom ye mbon eken emi ẹnamde san̄asan̄a utom uyọhọ ini. Mme utọ Christian oro ẹwade idem mi ẹnen̄ede ẹn̄wam nditat utom ukwọrọikọ ke mme akpatre usen emi.

Mbon oro ẹketịpde n̄kpọ ẹda ẹbọp temple ẹma ẹnen̄ede ẹkop inemesịt. (1 Chronicles 29:9) Nditịp n̄kpọ nda n̄n̄wam ke utuakibuot akpanikọ mfịn esinam ikop inemesịt n̄ko. (Utom 20:35) Nnyịn isikop inemesịt emi ke ini itịpde okụk kaban̄a edida Ufọkmbono Obio Ubọn̄ nnam n̄kpọ ye kaban̄a utom ofụri ererimbot, ndien ke ntre in̄wam ẹnam mme utom eken oro ẹnyenede ebuana ye edikwọrọ eti mbụk Obio Ubọn̄. Mme Ntiense Jehovah mfịn ẹnen̄ede ẹdiana kiet ke utuakibuot akpanikọ ke utịbe utịbe usụn̄. Kpukpru nnyịn ikpakam ikop inemesịt oro otode editịp n̄kpọ nda n̄n̄wam utuakibuot akpanikọ!

[Ikọ idakisọn̄]

[Ekebe/Ndise ke page 20, 21]

MME USỤN̄ EMI NDUSỤK OWO ẸMEKDE NDINỌ ENỌ

MME ETỊBE KABAN̄A UTOM OFỤRI ERERIMBOT

Ediwak owo ẹsinịm, mîdịghe ẹnam ndutịm ẹban̄a okụk oro mmọ ẹdisịnde ke mme ekebe etịbe oro ẹdiande idiọn̄ọ emi: “Contributions for the Worldwide Work—Matthew 24:14.”

Ke ọfiọn̄ kiet kiet, mme esop ẹsinọ okụk emi aka n̄kọk itieutom Mme Ntiense Jehovah emi esede aban̄a idụt mmọ. Emekeme ndinọ okụk imaesịt nnennen ẹsọk n̄kọk itieutom Mme Ntiense Jehovah oro esede aban̄a idụt mbufo. Ẹkpenyene ndiwet “Watch Tower” ke babru okụk ban̄k oro ẹnọde. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken. Mme utọ etịbe oro ẹkpenyene ndisan̄a ye ibio ibio leta oro owụtde in̄wan̄-in̄wan̄ nte ke emi edi enọ.

ENỌ EMI ẸDIOMIDE-DIOMI

Ke adianade ye edinọ okụk nte enọ, mme usụn̄ enọ efen ẹdu oro ẹkemede ndinyene ufọn nnọ utom Obio Ubọn̄ ofụri ererimbot. Mmọ emi ẹsịne:

Insurance: Ẹkeme ndiwet enyịn̄ Watch Tower nte andibọ ufọn insurance m̀mê okụk ukpọn̄ utom.

Okụk Oro Ẹsịnde ke Itie Unịm Okụk: Ẹkeme ndinam okụk oro ẹsịnde ke itie unịm okụk, n̄wed oro ẹwetde okụk oro ẹsịnde ke itie unịm okụk ẹyom udori, m̀mê okụk ukpọn̄ utom owo odu ke enyịn̄ Watch Tower, mîdịghe ẹnam ẹkpe enye ẹnọ Watch Tower ke ini andinyene akpade, nte ekemde ye ndutịm itie unịm okụk n̄kann̄kụk.

Inyene ye Mbubehe: Ẹkeme ndinọ Watch Tower inyene ye mbubehe nte ata enọ.

Isọn̄ ye Ufọk: Ẹkeme ndinọ isọn̄ ye ufọk oro ẹkemede ndinyam, edide nte ata enọ m̀mê, edieke edide ufọk emi owo odụn̄de, man ẹmụm isọn̄ ye ufọk oro ẹkama ẹnọ andinọ, emi ekemede ndisụk n̄ka iso ndụn̄ do ke eyouwem esie. Tọt n̄kọk itieutom idụt mbufo mbemiso ayakde isọn̄ m̀mê ufọk ekededi ọnọ Watch Tower.

Unen N̄kpọ-Akpa ye Mme Ebuọt: Ẹkeme ndiyak inyene m̀mê okụk nnọ Watch Tower ke ndinọ enye unen oro ekemde ye ibet ndidia n̄kpọ-akpa, mîdịghe ẹkeme ndiwet enyịn̄ Watch Tower nte adia-ufọn ke n̄wed ebuọt.

Nte ikọ oro “enọ emi ẹdiomide-diomi” owụtde, oyom andinọ utọ enọ emi anam ndutịm.

Kaban̄a ntọt efen efen, afo emekeme ndinyene nneme ye N̄kọk Itieutom Mme Ntiense Jehovah ke Nigeria, edide ke ndiwewet m̀mê ke ndikot ke urụk ukopikọ, ke adres emi ẹwetde ke idak emi mîdịghe emekeme ndinyene nneme ye n̄kọk itieutom Mme Ntiense Jehovah emi esede aban̄a idụt mbufo.

Jehovah’s Witnesses

P.M.B. 1090,

Benin City 300001,

Edo State, Nigeria.

Telephone: (052) 202020

[Ndise ke page 18]

Ukeme oro kpukpru nnyịn isịnde anam ẹbọp ndiye Ufọkmbono Obio Ubọn̄ ke ofụri ererimbot

[Ndise ke page 18]

Obufa Ufọkmbono Obio Ubọn̄ ke Ghana