Dori Enyịn ke Jehovah Nyụn̄ Nyene Uko
Dori Enyịn ke Jehovah Nyụn̄ Nyene Uko
“Dori enyịn ke Jehovah; nyene uko nyụn̄ sọn̄ esịt. Ih, dori enyịn ke Jehovah.”—PSALM 27:14, NW.
1. Idotenyịn edi akpan n̄kpọ adan̄a didie, ndien ẹtịn̄ ẹban̄a enye adan̄a didie ke N̄wed Abasi?
ATA idotenyịn ebiet nyayama un̄wana. Enye an̄wam nnyịn iyọ mme mfịna oro isobode idahaemi, inyụn̄ isak iso ise ini iso uko uko ye idatesịt. Jehovah kpọt ekeme ndinọ ata idotenyịn, ndien enye ada Ikọ esie eke odudu spirit anam oro. (2 Timothy 3:16) Ke nditịm ntịn̄, ikọ emi, “idotenyịn,” “dori enyịn,” ye “ndidori enyịn,” ẹdu ediwak itie ke Bible ẹnyụn̄ ẹwọrọ ndinen̄ede ntie mbet nnyụn̄ nnịm ke eti n̄kpọ ke edi onyụn̄ ọwọrọ n̄kpọ oro ẹtiede ẹbet do. * Utọ idotenyịn oro idịghe ikpîkpu ekikere oro mînyeneke nsọn̄ọ m̀mê n̄kpọ ndiwụt ke se ẹdoride enyịn ẹban̄a oyosu.
2. Didie ke idotenyịn akan̄wam Jesus?
2 Jesus ama odori enyịn ke Jehovah ke ini enye okosobode idomo ye nsọn̄ọn̄kpọ. Mme Hebrew 12:2 ọdọhọ ete: “Ke ntak idatesịt oro ẹkenịmde enye ke iso enye ama ọyọ ndutụhọ ke eto, ibatke esuene ke n̄kpọ, onyụn̄ osụhọde etetie ke ubọk nnasia ebekpo Abasi.” Sia Jesus ekenen̄erede owụk ntịn̄enyịn ke ndiwụt ke Jehovah enyene unen ndikara ekondo, nnyụn̄ nnam enyịn̄ Esie asana, enye ikedehedei itre ndikop uyo Abasi inamke n̄kpọ m̀mê nso iketịbe inọ enye.
3. Didie ke idotenyịn ekeme ndin̄wam mme asan̄autom Abasi?
3 Edidem David ama owụt ke idotenyịn ye uko ẹdi nditọeka ke ini enye ọkọdọhọde ete: “Dori enyịn ke Jehovah; nyene uko nyụn̄ sọn̄ esịt. Ih, dori enyịn ke Jehovah.” (Psalm 27:14, NW) Edieke iyomde ndikop nsọn̄idem, inaha iyak idotenyịn nnyịn ekịm, utu ke oro, ana ika iso inyene enye ke ekikere kpukpru ini. Ndinam ntre ayanam ikpebe Jesus ke ndinyene uko ye ifịk nte nnyịn inamde utom oro enye ọkọnọde mme mbet esie. (Matthew 24:14; 28:19, 20) Ke nditịm ntịn̄, ẹsiak idotenyịn, mbuọtidem ye ima nte mme akpan edu oro anade mme asan̄autom Abasi ẹnen̄ede ẹnyene.—1 Corinth 13:13.
Ndi ‘Ọmọyọhọ ye Idotenyịn’?
4. Nso ke mme Christian oro ẹyetde aran ye “mme erọn̄ en̄wen” ẹtie ye ọkpọsọn̄ udọn̄ ẹbet?
4 Ikọt Abasi ẹnyene utịbe utịbe ini iso. Mme Christian oro ẹyetde aran ke ẹtie ye ọkpọsọn̄ udọn̄ ẹbet ndikara ye Christ ke heaven, ke adan̄aemi “mme erọn̄ en̄wen” ẹtiede ẹbet nte ẹdinamde mmọ ‘ẹbọhọ ufụn itie mbiara ẹnyụn̄ ẹnyene ubọn̄ ubọn̄ ifụre eke nditọ Abasi’ mi ke isọn̄. (John 10:16; Rome 8:19-21; Philippi 3:20) “Ubọn̄ ubọn̄ ifụre” oro esịne edinyan̄a owo nsio ke idiọkn̄kpọ ye enyene-ndịk utịp esie. Ke akpanikọ, Jehovah—Andinọ “kpukpru nti enọ ye kpukpru enọ eke ẹfọnde ẹma”—ọyọnọ mme anam-akpanikọ asan̄autom esie nti enọ ye kpukpru ẹnọ eke ẹfọnde ẹma.—James 1:17; Isaiah 25:8.
5. Nnyịn idisan̄a didie ‘iyọhọ ye idotenyịn’?
5 Adan̄a didie ke idotenyịn oro inyenede nte mme Christian okpotụk nnyịn? Rome 15:13 okot ete: “Abasi emi ọnọde emem akpakam anam mbufo ẹyọhọ ye idatesịt ye emem oto ke mbufo ndinịm ke akpanikọ, man mbufo ẹkpeyọhọ ye idotenyịn oto ke odudu edisana spirit.” Idotenyịn itiehe nte un̄wana tiande ke okoneyo; enye ebiet un̄wana utịn oro asiahade ke usenubọk, emi anamde owo enyene emem, inemesịt, uduak, ye uko. Ti ete ke ndinịm se Ikọ Abasi etịn̄de ke akpanikọ nnyụn̄ nnyene edisana spirit esie edinam nnyịn ‘iyọhọ ye idotenyịn.’ Rome 15:4 ọdọhọ ke “ẹkewet kpukpru n̄kpọ oro ẹkewetde ke ini edem ndida nnọ nnyịn item, man otode ke ime oro nnyịn inyenede ye ndọn̄esịt eke otode N̄wed Abasi nnyịn ikpenyene idotenyịn.” Mmọdo, bụp idemfo ete: ‘Ndi ke n̄ka iso nnyene nyayama idotenyịn emi ebe ke ndisịn idem n̄kpep Bible nnyụn̄ n̄kot enye kpukpru usen? Nte mmesibọn̄ akam mben̄e spirit Abasi?’—Luke 11:13.
6. Nso ke oyom ikpeme mbak idotenyịn nnyịn edikịm?
6 Jesus, kpa enye oro nnyịn ikpebede, akada Ikọ Abasi odu uwem. Nditịm n̄kere mban̄a se enye akanamde idiyakke idem emem nnyịn. (Mme Hebrew 12:3) Owụt ifiọk ndikere ke edieke iyakde idotenyịn oro Abasi ọnọde nnyịn ekịm, mîdịghe edieke iyakde n̄kpọ en̄wen—utọ nte mme n̄kpọ obụkidem m̀mê mme utịtmbuba ererimbot—ẹwọn̄ọrede ntịn̄enyịn nnyịn, nnyịn imekeme ndisọsọp n̄kop mmemidem ke n̄kan̄ eke spirit ndien nte ini akade, idikemeke aba ndidu uwem nte Abasi oyomde. Utọ idaha oro ekeme ndikam nnam ‘iwụre nte nsụn̄ikan̄ ke mbuọtidem nnyịn.’ (1 Timothy 1:19) Edi, ata idotenyịn ọyọsọn̄ọ mbuọtidem nnyịn.
Idotenyịn Anam Ẹnyene Mbuọtidem
7. Didie ke idotenyịn anam ẹnyene mbuọtidem?
7 Bible ọdọhọ ke “mbuọtidem edi edisọn̄ọ mbet mme n̄kpọ oro ẹdoride enyịn ẹban̄a, uyarade oro owụtde ke ata idem n̄kpọ odu okposụkedi owo mîkwe.” (Mme Hebrew 11:1) Mmọdo, owo imenke-men idotenyịn idian ye mbuọtidem sia enye akam edi akpan ikpehe mbuọtidem. Da Abraham ke uwụtn̄kpọ. Owo ikpekekereke ke enye okpokobon eyen oto Sarah n̄wan esie, koro mmọ ẹma ẹnen̄ede ẹsọn̄ ke ini Abasi ọkọdọhọde ke iyọnọ mmọ adiakpa. (Genesis 17:15-17) Didie ke Abraham akanam n̄kpọ? Rome 4:18 ọdọhọ ete: “Okposụkedi ntak ndinyene idotenyịn mîkodụhe, edi ọkọn̄ọde ke idotenyịn enye ama enyene mbuọtidem, man enye akpakabade edi ete ọnọ ediwak idụt.” Ke akpanikọ, idotenyịn oro Abraham ekenyenede ke Abasi ama anam enye enen̄ede enịm ke iyenyene eyen. Ntem, mbuọtidem esie ama anam enye enen̄ede enyene idotenyịn. Kamse, Abraham ye Sarah ẹma ẹkam ẹnyene uko ndikpọn̄ ufọk ye iman mmọ n̄kodụn̄ ke tent ke esenidụt!
8. Didie ke ime ọsọn̄ọ idotenyịn?
8 Abraham ama enyene nyayama idotenyịn sia enye ama okop uyo Jehovah ke kpukpru n̄kpọ, idem ke ini ọkọsọn̄de ndinam ntre. (Genesis 22:2, 12) Ukem nte Abraham, nnyịn imekeme nditịm nnịm ke Jehovah ọyọnọ nnyịn utịp edieke ikopde uyo esie inyụn̄ ikade iso inam n̄kpọ esie. Paul ọkọdọhọ ke “ime anam ẹnyene eti idaha,” ndien “eti idaha onyụn̄ anam idotenyịn odu, ndien idotenyịn oro idaha isịm edikpu.” (Rome 5:4, 5) Ntak edi oro Paul ọkọdọhọde n̄ko ete: “Nnyịn iyom owo mbufo kiet kiet owụt utọ ifịk oro man ekpenyene ọyọhọ nsọn̄ọ aban̄a idotenyịn tutu esịm utịt.” (Mme Hebrew 6:11) Idotenyịn oro ọkọn̄ọde ke edinyene n̄kpet n̄kpet itie ebuana ye Jehovah ekeme ndin̄wam nnyịn iyọ nsọn̄ọn̄kpọ ekededi uko uko ye idatesịt.
“Ẹdat Esịt ke Idotenyịn”
9. Nso ke ikeme ndinam kpukpru ini man ‘idat esịt ke idotenyịn’ oro inyenede?
9 Idotenyịn oro Abasi ọnọde nnyịn ọsọn̄ urua akan n̄kpọ ekededi oro odude ke ererimbot emi. Psalm 37:34 ọdọhọ ete: “Bet [m̀mê dori enyịn ke] Jehovah, nyụn̄ nịm ido esie, ndien enye eyemenede fi enịm ke enyọn̄, man ada isọn̄ enyene.” Ke akpanikọ, enen̄ede odot ‘idat esịt ke idotenyịn’ emi. (Rome 12:12) Nte ededi, oyom ika iso ikere iban̄a idotenyịn nnyịn man ikeme ndinam oro. Ndi emesikere kpukpru ini aban̄a idotenyịn oro Abasi ọnọde fi? Nte emekeme ndikụt idemfo ke Paradise, enyenede nsọn̄idem ye unana editịmede esịt, okụt nte mbonima fo ẹkande fi ẹkụk, onyụn̄ okụt nte etienede anam utom oro enyenede uduak. Ndi emesitie ekere aban̄a mme ndise Paradise oro ẹdude ke mme n̄wed nnyịn. Ẹkeme ndimen utọ editie n̄kere oro ndomo ye edikwọhọde ukụtiso kpukpru ini man ẹkeme ndinen̄ede n̄kụt iso fo. Edieke owo mîkwọhọkede ukụtiso, ntọn̄ ye mbio idiyakke nnyịn inen̄ede ikụt iso nnyịn. Ndien mme n̄kpọ en̄wen ẹkeme ndiwọn̄ọde ntịn̄enyịn nnyịn. Akpakam nnyịn idehedei iyak oro etịbe!
10. Ntak emi editie ye ọkpọsọn̄ udọn̄ mbet utịp nnyịn owụtde ke imenyene eti itie ebuana ye Jehovah?
10 Nte ededi, ima oro imade Jehovah enen̄ede edi ntak oro inamde n̄kpọ esie. (Mark 12:30) Edi nnyịn ikpenyene nditie ye ọkpọsọn̄ udọn̄ mbet utịp oro enye edinọde nnyịn. Ke akpanikọ, Jehovah oyom nnyịn inam oro! Mme Hebrew 11:6 ọdọhọ “ke mbuọtidem mîdụhe owo ikemeke nditịm nnem enye esịt, koro ana owo eke asan̄ade ekpere Abasi enịm ke akpanikọ ete enye odu ye nte ke enye edi andinọ mmọ eke ẹsịnde ifịk ẹyom enye utịp.” Ntak emi Jehovah oyomde nnyịn ida imọ nte Andinọ utịp? Edieke idade enye nte Andinọ utịp, oro oyowụt ke imenen̄ede idiọn̄ọ Ete nnyịn eke heaven. Enye edi Ete oro atatde ubọk onyụn̄ amade nditọ esie. Kam kere nte uwem ọkpọsọn̄de ye nte idem ekpesisọpde emem nnyịn edieke nnyịn mîkpenyeneke ini iso ye idotenyịn.—Jeremiah 29:11.
11. Didie ke idotenyịn akan̄wam Moses anam eti ubiere?
11 Moses ama enịm n̄wọrọnda uwụtn̄kpọ nte owo oro akakade iso ekere aban̄a idotenyịn oro Abasi ọkọnọde enye. Moses ama enyene odudu, ọwọrọ etop, n̄ko inyene Egypt okonyụn̄ esịne enye ke ubọk sia enye ekedide “eyen adiaha Pharaoh.” Ewe ke enye ekemek: inyene emi m̀mê ndinam n̄kpọ Jehovah? Moses ama enyene uko ndimek ndinam n̄kpọ Jehovah. Ntak-a? Mme Hebrew 11:24-26 ọbọrọ ete: “Sia enye okowụkde enyịn ese utịp eke ẹdinọde.” Ih, idotenyịn oro Moses ekenyenede ama anam enye enen̄erede owụk enyịn ese utịp oro Jehovah ekenịmde enye ke iso.
12. Didie ke idotenyịn Christian ebiet ndụn m̀mê itam?
12 Apostle Paul ekemen idotenyịn odomo ye ndụn m̀mê itam. Ndamban̄a ndụn emi esikpeme ukeme ukeren̄kpọ nnyịn man ikeme ndinam nti ubiere, imek mme ebeiso n̄kpọ, inyụn̄ isọn̄ọ ida. (1 Thessalonica 5:8) Nte emesiyara ndamban̄a ndụn emi kpukpru ini? Ke edide ntre, ukem nte Moses ye Paul, idotenyịn fo ikọn̄ọke ke ‘mme inyene oro mînyeneke iwụk, edi ọkọn̄ọ ke Abasi, emi ọnọde nnyịn kpukpru n̄kpọ uwak uwak man ida ikop inemesịt.’ Ke akpanikọ, oyom inen̄ede inyene uko man itre ndinam se mme owo ẹmade ndinam mfịn inyụn̄ isịn ibụk ibụk udọn̄ idemowo, edi ukeme oro isịnde idiwọrọke ikpîkpu! Idem n̄kpọ, ntak ikpoyomde n̄kpọ ekededi oro mîdịghe “ata uwem,” emi anade ebet mbon oro ẹdoride enyịn ẹnyụn̄ ẹmade Jehovah?—1 Timothy 6:17, 19.
“Ndikpọn̄ke Fi”
13. Nso ke Jehovah ọn̄wọn̄ọ ọnọ mme anam-akpanikọ asan̄autom esie?
13 Mbon oro ẹkọn̄de idotenyịn mmọ ke editịm n̄kpọ emi ẹnyene ndinen̄ede n̄kere mban̄a enyene-ndịk n̄kpọ oro editịbede ọnọ mmọ ke ini iso koro “uman” enen̄ede abiak ererimbot emi. (Matthew 24:8) Edi inaha mbon oro ẹdoride enyịn ke Jehovah ẹkop ndịk. Mmọ ẹyeka iso ‘ẹdụn̄ ke ifụre, ẹyenyụn̄ ẹtie sụn̄ ẹnana ndịk idiọk n̄kpọ.’ (Mme N̄ke 1:33) Sia idotenyịn mmọ mîkọn̄ọke ke editịm n̄kpọ emi, mmọ ẹdat esịt ndinam item Paul emi: “Ẹkûyak uwem mbufo asan̄a ye ima okụk, ke adan̄aemi mbufo ẹyụhọde ye mme n̄kpọ eke ẹdude ke emi. Koro enye ọdọhọde ete: ‘Ndikpọn̄ke fi, ndinyụn̄ nsịnke fi.’”—Mme Hebrew 13:5.
14. Ntak oro mme Christian mîkpetịmekede esịt nte mîdotke iban̄a mme n̄kpọ obụkidem oro ẹnanade mmọ?
14 “Ndikpọn̄ke fi, ndinyụn̄ nsịnke fi”—ọkpọikọ iba emi ẹwụt ke Abasi enen̄ede ekere aban̄a nnyịn. Jesus ama ọsọn̄ọ etịn̄ ọnọ nnyịn ete ke Abasi ama onyụn̄ ekere aban̄a nnyịn, ke ini enye ọkọdọhọde ete: “Ẹka iso, ndien, ndibem iso nyom obio ubọn̄ ye edinen ido esie, ndien ẹyedian kpukpru n̄kpọ eken [mme n̄kpọ udu-uwem] ẹnọ mbufo. Mmọdo, ẹkûtịmede esịt ẹban̄a n̄kpọn̄, koro n̄kpọn̄ eyenyene editịmede esịt esie.” (Matthew 6:33, 34) Jehovah ọdiọn̄ọ ke imemke utom inọ nnyịn ndisịn ifịk nyom Obio Ubọn̄ esie nnyụn̄ nyom se ididiade. Mmọdo, ẹyak inyene ọyọhọ mbuọtidem ke Abasi ekeme onyụn̄ eben̄e idem ndinọ nnyịn mme n̄kpọ oro ẹnanade nnyịn.—Matthew 6:25-32; 11:28-30.
15. Didie ke mme Christian ẹnam enyịn mmọ ‘ẹnen̄ede ẹse’?
15 Ndinam enyịn nnyịn ‘ẹnen̄erede ẹse’ oyowụt ke imọbuọt idem ye Jehovah. (Matthew 6:22, 23) Owo oro enyịn esie ẹnen̄erede ẹse edi owo akpanikọ, enyene eti esịt, idiọkke itọn̄ inyụn̄ iyomke ikpọ n̄kpọ. Ndinam enyịn nnyịn ẹnen̄erede ẹse iwọrọke ndidi ọkpọkpọi ubuene m̀mê nditre ndibiom mbiomo nnyịn nte mme Christian. Utu ke oro, enye ọwọrọ ‘ndida eti ibuot’ mbiere ndinam utom Jehovah edi akpa n̄kpọ ke uwem nnyịn.—2 Timothy 1:7.
16. Ntak oyomde inyene mbuọtidem ye uko man ikeme ndinam enyịn nnyịn ẹnen̄erede ẹse?
16 Oyom inyene mbuọtidem ye uko man inam enyịn nnyịn ẹnen̄ede ẹse. Ke uwụtn̄kpọ, edieke eteutom fo esisụk ọdọhọde anam utom ke ini mbono esop, ndi eyenyene uko ndika iso nnịm mme n̄kpọ eke spirit ke akpa itie? Edieke owo ekerede ke Jehovah idinamke se enye ọkọdọhọde ke iyaka iso ise iban̄a mme asan̄autom imọ, do Satan ekeme ndinam n̄kpọ ọdọdiọn̄ ọsọn̄ ye owo oro, ndien enye ekeme nditre ndidụk mme mbono esop ofụri ofụri. Ke akpanikọ, Satan ekeme ndinyene se adade omụm nnyịn edieke nnyịn mînyeneke mbuọtidem ke Jehovah, ndien utu ke Jehovah ndimek se idide ebeiso n̄kpọ nnọ nnyịn, Satan edikabade anam oro. Nso n̄kpọ mmọneyet ke oro ekpedi ntem!—2 Corinth 13:5.
‘Dori Enyịn ke Jehovah’
17. Didie ke ẹdiọn̄ mbon oro ẹbuọtde idem ke Jehovah idahaemi?
17 N̄wed Abasi esiwụt ke mbon oro ẹdoride enyịn ẹnyụn̄ ẹbuọtde idem ye Jehovah isituaha n̄kpọfiọk. (Mme N̄ke 3:5, 6; Jeremiah 17:7) Ndusụk ini, mmọ isinyeneke ediwak n̄kpọ obụkidem edi mmọ ẹfiọk ke inyene obụkidem ifetke-fet nditie nte mme edidiọn̄ oro ẹnade ẹbet mmimọ. Ntem ke mmọ ẹwụt ke ‘imebet Jehovah’ inyụn̄ itịm inịm ke enye ọyọnọ kpukpru mme anam-akpanikọ ikọt esiemmọ se mmọ ẹyomde. (Psalm 37:4, 34) Emi anam mmọ ẹnen̄ede ẹkop inemesịt idem idahaemi. Mme N̄ke 10:28 ọdọhọ ke “idori-enyịn mbon eti ido edi idatesịt: edi se mme idiọk owo ẹbetde ayatak.”
18, 19. (a) Nso inem inem ikọ ndọn̄esịt ke Jehovah etịn̄ ọnọ nnyịn? (b) Didie ke ikeme ndinịm Jehovah ke “ubọk nnasia” nnyịn?
18 Ke ini ete omụmde eyen esie ubọk asan̄a, eyen oro idikopke ndịk. Ntre n̄ko ke edi ye nnyịn nte isan̄ade ye Ete nnyịn eke heaven. Jehovah ọkọdọhọ nditọ Israel ete: “Kûdịghe, koro ami ndude ye afo. . . . Nditreke ndinyan̄a fi; . . . Koro ami Jehovah Abasi fo mmụmde fi ubọk nnasia, emi ndọhọde fi, nte, Kûfehe; ami n̄n̄wam fi.”—Isaiah 41:10, 13.
19 Enem didie ntem ndifiọk ke Jehovah omomụm nnyịn ubọk asan̄a! David ekewet ete: “Mmenịm Jehovah ke iso mi kpukpru ini: koro enye odude mi ke ubọk nnasia, ndisehekede.” (Psalm 16:8) Didie ke ikeme ndinịm Jehovah ke “ubọk nnasia” nnyịn? Ke nsụhọde n̄kaha, imekeme ndinam oro ke usụn̄ iba. Akpa usụn̄ edi ndiyak Ikọ esie ada nnyịn usụn̄ ke kpukpru se inamde, ọyọhọ usụn̄ iba edi ndikere mban̄a utịbe utịbe utịp oro Jehovah enịmde ọnọ nnyịn. Asaph emi eketienede ewet psalm ọkọkwọ ete: “Edi ami nsụk ndodu ye afo kpukpru ini: afo omụm mi ubọk nnasia. Afo ayada mi usụn̄ ke item fo, ndien ama ekem, ayada mi edisịm ke ubọn̄.” (Psalm 73:23, 24) Utọ ikọ ndọn̄esịt emi ekeme ndinam nnyịn isak iso ise ini iso ye uko.
“Edinyan̄a Mbufo ke Asan̄a Ekpere”
20, 21. Nso ina ibet mbon oro ẹdoride enyịn ke Jehovah?
20 Oyom inen̄ede inịm Jehovah ke ubọk nnasia nnyịn kpukpru usen. Ke mîbịghike, ererimbot Satan emi ọmọn̄ okụt orụk akwa ukụt eke akanam mîdụhe toto ke editọn̄ọ ererimbot tutu esịm emi, ndien akwa ukụt emi editọn̄ọ ye nsobo nsunsu ido ukpono. (Matthew 24:21) Ndịk eyenen̄ede anam mbon oro mînyeneke mbuọtidem. Edi idem ke ntịme ntịme ini oro, mme asan̄autom Jehovah emi ẹnyenede uko ẹyedat esịt ke idotenyịn oro mmọ ẹnyenede! Jesus ọkọdọhọ ete: “Nte mme n̄kpọ emi ẹtọn̄ọde nditịbe, ẹnen̄ede ẹda ẹnyụn̄ ẹmenede ibuot mbufo ke enyọn̄, koro edinyan̄a mbufo ke asan̄a ekpere.”—Luke 21:28.
21 Mmọdo, ẹyak idat esịt ke idotenyịn oro Abasi ọnọde nnyịn ikûnyụn̄ iyak Satan ada mme n̄kari esie abian̄a m̀mê atap nnyịn. Ẹyak inyụn̄ inen̄ede isịn ifịk inyene mbuọtidem, ima, ye mbak Abasi. Edieke inamde oro, nnyịn iyenyene uko ndikop uyo Jehovah ke idaha ekededi, inyụn̄ ibiọn̄ọ Devil. (James 4:7, 8) Ih, ‘mbufo ẹkop uko, ndien enye ọyọsọn̄ọ mbufo esịt, kpukpru mbufo emi ẹdoride enyịn ke Jehovah.’—Psalm 31:24.
[Ikọ idakisọn̄]
^ ikp. 1 Ke N̄wed Abasi Christian Usem Greek, okposụkedi ẹdade ikọ oro “idotenyịn” ẹtịn̄ ẹban̄a utịp eke heaven oro mme Christian oro ẹyetde aran ẹnyenede, nnyịn idineme enye oro kpukpru owo ẹfiọkde ke ibuotikọ emi.
Nte Afo Emekeme Ndibọrọ?
• Didie ke idotenyịn akanam Jesus enyene uko?
• Nso ebuana ke mbuọtidem ye idotenyịn ẹnyene?
• Didie ke idotenyịn ye mbuọtidem ẹkeme ndinọ Christian uko ndimek mme ebeiso n̄kpọ oro ẹwụtde eti ibuot?
• Ntak emi mbon oro ẹdoride enyịn ke Jehovah ẹkpesakde iso ẹse ini iso ye uko?
[Mme Mbụme Ukpepn̄kpọ]
[Ndise ke page 28]
N̄kpri m̀mê ikpọ, ndi ẹmekeme ndikụt idem mbufo ke Paradise?