Mme Mbụme Ẹtode Mme Andikot

Nso ke esop ẹkpenam edieke Christian awatde ubomisọn̄ ekenyene mbabuat unọmọ ndien mme owo ẹkpan̄a?

Oyom esop ẹdụn̄ọde ẹfiọk m̀mê Christian enyene ubiomikpe iyịp mbak esop editiene abuana ke ubiomikpe iyịp. (Deuteronomy 21:1-9; 22:8) Awat-ubomisọn̄ emi edide ntak oro ubomisọn̄ owotde owo ekeme ndinyene ubiomikpe iyịp edieke enye mîketịn̄ke enyịn m̀mê okokoide-koi abiat kiet ke otu ibet uwat Caesar. (Mark 12:14) Edi odu mme n̄kpọ en̄wen oro oyomde ẹdụn̄ọde ẹfiọk.

Akana owotowo oro ekefehede aka kiet ke otu mme obio ubọhọ ke Israel ada ke ikpe. Edieke ẹkedide ẹdikụt ke enye ekededue owot owo, ẹma ẹyak enye aka iso odu ke obio oro, onyụn̄ ọbọhọ osio-usiene iyịp. (Numbers 35:6-25) Ntre edieke Christian edide ntak oro owo akpade ke mbabuat unọmọ ubomisọn̄, mbiowo ẹnyene ndidụn̄ọde nse m̀mê enye enyene ubiomikpe iyịp ekededi. Idịghe se ukara ẹdọhọde m̀mê se esopikpe ebierede edinen̄ede ebiere se esop Christian ẹdinamde.

Ke uwụtn̄kpọ, esopikpe ẹkeme ndibiere ke owo edue isop ke ndikabiat ibet uwat, edi mbiowo oro ẹdụn̄ọrede n̄kpọ emi ẹkeme ndikụt ke owo oro akawatde ubomisọn̄ oro inyeneke ubiomikpe iyịp koro idụhe se enye akpakanamde mbak mme owo ẹdikpan̄a. Kpa ye oro, idem ọkpọkọm esopikpe ẹdọhọ ke owo inyeneke ubiomikpe iyịp, mbiowo ẹkeme ndibiere ke enye enyene ubiomikpe iyịp ke akpanikọ.

Ubiere oro mbiowo emi ẹdụn̄ọrede n̄kpọntịbe oro ẹsịmde ekpenyene ndikọn̄ọ ke N̄wed Abasi ye in̄wan̄-in̄wan̄ uyarade oro ẹdude—utọ nte awat-ubomisọn̄ ndinyịme ke imedue ọkọrọ ye ikọ ntiense owo iba m̀mê ita oro ẹkemede ndiberi edem, emi ẹkekụtde ini mbabuat unọmọ oro etịbede. (Deuteronomy 17:6; Matthew 18:15, 16) Ẹkpenyene ndimek kọmiti ukpeikpe edieke ẹkụtde ke Christian oro enyene ubiomikpe iyịp ke akpanikọ. Edieke kọmiti ukpeikpe ẹbierede ke Christian oro akabade esịt, ẹyeda N̄wed Abasi ẹnọ enye nsuannọ oro odotde ẹnyụn̄ ẹbọ enye mme ifetutom oro enye akakamade ke esop. Enye ididịghe aba ebiowo m̀mê asan̄autom unamutom. Owo idiyakke enye anam mme n̄kpọ en̄wen n̄ko ke esop. Enye enyene nduduọhọ ke iso Abasi sia enye mîketịn̄ke enyịn ikpeme nte awatde uwat ndien ke ntak oro mbabuat unọmọ etịbe, mme owo ẹnyụn̄ ẹkpan̄a.—Galatia 6:5, 7.

Ke uwụtn̄kpọ: Edieke edide enyọn̄ ama ọdiọk, akpakana enye enen̄ede etịn̄ enyịn. Edieke edide idap ama anam enye, do akpakana enye etre uwat onyụn̄ ọduọk odudu tutu enyịn atara enye, mîdịghe akpakana enye ọdọhọ owo en̄wen awat.

Nso edieke enye akawatde ọsọp akan nte ibet etemede? Edieke Christian ekededi awatde ubomisọn̄ ọsọp akan nte ibet etemede, emi ọwọrọ ke enye inọhọ ‘Caesar mme n̄kpọ eke ẹnyenede Caesar.’ Emi owụt n̄ko ke enye idaha uwem ke edisana n̄kpọ, koro ubomisọn̄ oro ọsọpde akaha ekeme ndiwot owo. (Matthew 22:21) Ke afan̄ emi, yak ikere iban̄a n̄kpọ en̄wen. Nso orụk uwụtn̄kpọ ke ebiowo ekpenịm ọnọ otuerọn̄ edieke enye mîdọn̄ke enyịn ke mme ibet uwat oro Caesar enịmde m̀mê okoide-koi etre ndinịm mmọ?—1 Peter 5:3.

Mme Christian ikpọdọhọke ekemmọ mme Christian ẹdi ẹdisop idem ke akpan ebiet ke ini oro edinamde mmọ ẹwat uwat ọsọp akan nte ibet etemede man ẹkpesịm do ke ini. Nte ededi, ke ediwak idaha, esiyom ẹbabak ẹtọn̄ọ isan̄ m̀mê ẹkpụhọde ndutịm oro ẹkenamde man ẹnyene ini oro ekemde ẹda ẹka isan̄. Edieke ẹnamde oro, Christian idiwatke ubomisọn̄ ọsọp akan nte ibet etemede, edi eyekeme ndinịm ibet uwat oro “mme odudu eke ẹkponde ẹkan,” oro edi, mme ukara ẹnịmde. (Rome 13:1, 5) Emi ayan̄wam awat-ubomisọn̄ efep unọmọ oro ekemede ndiwot owo onyụn̄ efep ubiomikpe iyịp. Emi ayan̄wam enye enịm eti uwụtn̄kpọ onyụn̄ enyene eti ubieresịt.—1 Peter 3:16.