“Nnyịn Inyene Ndikop Uyo Abasi nte Andikara Utu ke Uyo Owo”

‘Abasi Nnyịn Emekeme Ndinyan̄a Nnyịn’

ẸKETỊM edinam emi man enyene uten̄e. Ẹma ẹwụk akamba mbiet owo o-gold ke unaisọn̄ Dura emi anade edi ekekpere obio Babylon. Ẹkenyene ndinam ata akpan usọrọ nda ntọn̄ọ ndituak ibuot nnọ mbiet emi, ndien akana ikpọ owo ukara ẹdụk usọrọ oro ẹnyụn̄ ẹnụhọ ẹnọ mbiet oro ke ini ẹdikopde uyo nsio nsio ndido ikwọ. Nebuchadnezzar Edidem Babylon ama ọnọ ewụhọ ete owo eke mîdituakke ibuot inọ mbiet emi ayakpa ke akwa ikan̄. Anie ekpededei etre ndinam ewụhọ emi?

Idem ama enen̄ede akpa mme owo ndikụt ke Shadrach, Meshach, ye Abednego emi ẹkebakde Jehovah ẹnyụn̄ ẹtuakde ibuot ẹnọ enye, iketieneke inụhọ inọ mbiet oro. Mmọ ẹma ẹfiọk ke ndinụhọ nnọ mbiet oro idiyakke mmimọ inọ Jehovah Abasi “san̄asan̄a utuakibuot,” (NW). (Deuteronomy 5:8-10) Ke ini ẹkedọhọde mmọ ẹtịn̄ ntak oro mmọ mîkonụhọke inọ mbiet oro, mmọ ẹma ẹdọhọ Nebuchadnezzar uko uko ẹte: “Sese, Abasi nnyịn emi nnyịn inamde n̄kpọ esie emekeme ndinyan̄a nnyịn nsio ke akwa ikan̄ emi asakde: ndien enye ayanyan̄a nnyịn osio fi ke ubọk, O edidem. Ndien mîdịghe ntre, fiọk, O edidem, ete ke nnyịn ikwe nte inamde n̄kpọ abasi fo, inyụn̄ ikwe nte ituakde ibuot inọ owo o-gold emi afo ekenịmde.”—Daniel 3:17, 18.

Ẹkenyan̄a nditọ Hebrew ita oro ẹketomode ẹdọn̄ ke akwa ikan̄, ke utịbe utịbe usụn̄. Abasi ama ọdọn̄ angel kiet edikpeme mme anam-akpanikọ asan̄autom Esie emi. Edi mmọ ẹma ẹmemek ndikpa utu ke ndisọn̄ ibuot ye Jehovah. * Ke isua ikie itiokiet ẹma ẹkebe, mme apostle Jesus Christ ẹma ẹnam ukem ubiere oro ke ini mmọ ẹkedade ke iso akwa esop mme Jew ẹtịn̄ ẹte: “Nnyịn inyene ndikop uyo Abasi nte andikara utu ke uyo owo.”—Utom 5:29.

Mme Akpan N̄kpọ Oro Ikpepde

Shadrach, Meshach, ye Abednego ẹnịm eti uwụtn̄kpọ mbuọtidem, n̄kopuyo, ye nsọn̄ọnda ẹnọ nnyịn. Nditọ Hebrew ita oro ẹma ẹbuọt idem ke Jehovah. Ubieresịt mmọ oro N̄wed Abasi ọkọnọde ukpep ikayakke mmọ ẹbuana ke edinam ekededi oro akabuanade nsunsu utuakibuot m̀mê ufreidụt. Mme Christian eyomfịn ẹnen̄ede ẹbuọt idem ke ata Abasi kpasụk ntre. Mmọ ẹyak ubieresịt mmọ oro Bible ọnọde ukpep ada mmọ usụn̄ ẹnyụn̄ ẹsịn nditiene mbuana ke mme edinam nsunsu utuakibuot m̀mê mme edinam oro ẹbiatde ibet ye mme edumbet Abasi.

Mme anam-akpanikọ nditọ Hebrew ita oro ẹma ẹbuọt idem ke Jehovah ẹnyụn̄ ẹmek ndikop uyo esie utu ke ndidi mme ọwọrọiso owo, ndinyene ikpọ itie, m̀mê ubọn̄ ke Obio Ukara Babylon. N̄kparawa oro ẹma ẹnyịme ndibọ ndutụhọ nnyụn̄ n̄kpa utu ke ndibiat itie ebuana mmọ ye Abasi. Mmọ ‘ẹma ẹka iso ẹsọn̄ọ ẹda nte n̄kpọ eke ẹkụtde Enye emi enyịn owo mîkwe’ ukem nte Moses oro okodude uwem mbemiso mmọ, akanamde. (Mme Hebrew 11:27) Mmọ mbita ẹma ẹbiere ndisọn̄ọ nda utu ke ndikan̄ mbuọtidem  man ẹdu uwem, edide Jehovah ama emek ndinyan̄a mmọ m̀mê ikemekke. Nte an̄wan̄ade, uwụtn̄kpọ mmọ ke apostle Paul eketịn̄ aban̄a ke ini enye akasiakde mme anam-akpanikọ oro ‘ẹkenịmede ide ikan̄.’ (Mme Hebrew 11:34) Mme asan̄autom Jehovah ke eyo nnyịn ẹbuọt idem ke Jehovah ẹnyụn̄ ẹkop uyo esie kpasụk ntre ke ini ẹdomode nsọn̄ọnda mmọ.

Se ikpepde n̄ko ito se iketịbede inọ Shadrach, Meshach, ye Abednego edi ke Abasi esinọ owo eke ọsọn̄ọde ada ye enye utịp. Andiwet psalm ọkọkwọ ete: “Jehovah . . . ikpọn̄ke mbon-ima esie,” m̀mê mbon oro ẹsọn̄ọde ẹda ye enye. (Psalm 37:28) Nnyịn ikpekereke ke Abasi ayanyan̄a nnyịn mfịn ke utịbe utịbe usụn̄ nte enye akanyan̄ade nditọ Hebrew ita oro. Kpa ye oro, nnyịn imenịm ke inamke n̄kpọ m̀mê nso utọ afanikọn̄ ke isobo, Ete nnyịn eke heaven ayan̄wam nnyịn. Abasi ekeme nditre afanikọn̄ oro, ọnọ nnyịn ukeme ndiyọ, m̀mê anam nnyịn iset ke n̄kpa edieke isọn̄ọde ida tutu esịm n̄kpa. (Psalm 37:10, 11, 29; John 5:28, 29) Mbuọtidem, n̄kopuyo, ye nsọn̄ọnda ẹyen̄wam nnyịn ikan kpukpru ini oro ẹdomode nsọn̄ọnda nnyịn ndien nnyịn imemek ndikop uyo Abasi utu ke uyo owo.

[Ikọ idakisọn̄]

[Ekebe/Ndise ke page 9]

NDI AMA ỌFIỌK KE?

• Nditọ Hebrew ita oro ikọyọhọke isua 30 ima ke ini ẹkedomode nsọn̄ọnda mmọ.

• Ẹma ẹnam akwa ikan̄ oro enen̄ede asak.—Daniel 3:19.