“Ọtọn̄ọde ke Emi, Mmenịm ke Abasi Do”

ALEXANDRA, n̄wan Ukraine kiet emi odụn̄de ke Prague ke Czech Republic, ọkọnyọn̄ utom usen kiet. Enye ama okụt ekpri efọk n̄kpọ kiet emi mme owo oro ẹkesan̄ade ẹbe ẹketịghade ke itiembehe tren. Idem ama akpa enye ndikụt se ikesịnede ke efọk n̄kpọ oro ke ini enye ekemende ese. Okụk mbon Czech ẹkotde koruna 5,000 ekesịne! Iketiehe nte ke owo baba kiet ke okoyom efọk n̄kpọ oro. N̄kpọ ama ọsọn̄ ye Alexandra etieti sia enye edide odudụn̄ ke Czech Republic. Nso ke enye akpanam?

Alexandra ama owụt Victoria eyen esie efọk n̄kpọ oro ke enye ama ekesịm ufọk. Mmọ ẹma ẹdụn̄ọde ẹyom m̀mê iyokụt enyịn̄ ye adres andinyene, edi ufọn ikodụhe. Nte ededi, ekpri babru emi ẹwetde mme nọmba ama esịne ke efọk oro. Ẹkewet nọmba n̄wedokụk ban̄k ke edem kiet, ẹnyụn̄ ẹwet ediwak nọmba efen ke edem eken. Efọk oro ama enyene n̄ko ndausụn̄ ndika ban̄k n̄kann̄kụk ye babru oro ẹkewetde “koruna 330,000.” Nnennen ibat okụk emi ekesịnede ke efọk oro ekedi oro.

Ofụri ukeme oro Alexandra ekesịnde ndida se iketiede nte nọmba urụk ukopikọ n̄kot ban̄k oro ọkọwọrọ ikpîkpu. Ntre, enye ama asan̄a ye eyen esie akasian ban̄k se iketịbede. Mmọ ẹma ẹbụp mbon ban̄k m̀mê anie ekenyene nọmba n̄wedokụk ban̄k oro mmọ ẹkekụtde ke efọk oro. Edi orụk nọmba oro ikodụhe ke ban̄k oro. Ke ndan̄nsiere, Alexandra ama ada nọmba efen oro okodude ke efọk oro afiak edi ban̄k. N̄wan kiet emi esisịnde okụk ke ban̄k oro ekenyene nọmba oro. Alexandra ye Victoria eyen esie ẹma ẹnyene nneme ye n̄wan oro ẹnyụn̄ ẹfiọk ke okụk esie okosop oro. Ke ini mmọ ẹkesobode ke akpatre, n̄wan oro ama enen̄ede ọkọm mmọ onyụn̄ obụp ete, “Ndikpe mbufo okụk ifan̄?”

Victoria ama ọbọrọ ete: “Udukpehe nnyịn baba n̄kpọ kiet. Edieke nnyịn ikpokoyomde okụk oro, nnyịn ikpadaha isọk fi.” Enye ama ada ekpri usem Czech oro enye ọfiọkde ọdọhọ ete: “Nnyịn ida okụk emi isọk fi koro nnyịn idide Mme Ntiense Jehovah. Ubieresịt nnyịn oro Bible ọnọde ukpep iyakke nnyịn ida n̄kpọ oro mîdịghe eke nnyịn.” (Mme Hebrew 13:18) N̄wan oro ama etịn̄ ye idatesịt ete, “Ọtọn̄ọde ke emi, mmenịm ke Abasi do.”