Mbufa Mbon Otu Ukara

KE USENUBỌK Wednesday August 24, 2005, mbonubon Bethel ke United States ye ke Canada oro ẹkekụtde se ikade iso ke Brooklyn ke ekebe ndise, ẹma ẹkop aduai-owo-idem ntọt. Ẹkedọhọ ke ọtọn̄ọde ke September 1, 2005, owo iba emi, Geoffrey W. Jackson ye Anthony Morris III, ẹditiene ẹdi mbon Otu Ukara Mme Ntiense Jehovah.

Brọda Jackson ọkọtọn̄ọ utom usiakusụn̄ ke February 1971 ke Tasmania, emi edide isuo Australia. Enye ama ọdọ Jeanette (Jenny) ke June 1974. Esisịt ini ke oro ebede, ẹma ẹmek mmọ akpan asiakusụn̄. Ọtọn̄ọde ke 1979 esịm 2003, mmọ ẹkenam utom isụn̄utom ke Tuvalu, Samoa, ye Fiji—mme isuo Edem Usụk Pacific. Brọda Jackson ye Jenny n̄wan esie ẹma ẹnen̄ede ẹn̄wam ke ndikabade mme n̄wed Bible ke ini mmọ ẹkenamde utom ke mme isuo emi. Ọtọn̄ọde ke 1992, Brọda Jackson ekedi owo Kọmiti N̄kọk Itieutom Samoa, ndien ọtọn̄ọde ke 1996, enye ekedi owo Kọmiti N̄kọk Itieutom Fiji. Ke April 2003, ẹma ẹkot enye ye Jenny n̄wan esie ẹdinam utom ke Bethel United States ke Itieutom Esede Aban̄a Ukabade N̄wed. Esisịt ini ke oro ebede, ẹma ẹmek Brọda Jackson nte andin̄wam Kọmiti Unọ Ukpep Otu Ukara.

Brọda Morris ọkọtọn̄ọ usiakusụn̄ ke 1971 ke United States. Enye ama ọdọ Susan ke December isua oro, onyụn̄ aka iso ke utom usiakusụn̄ ke n̄kpọ nte isua inan̄ tutu Jesse akpan mmọ amana. Nte ini akakade, Paul udọ mmọ ama amana. Brọda Morris ama afiak odụk utom usiakusụn̄ ofụri ini ke 1979. N̄wan esie ama etiene odụk utom usiakusụn̄ ofụri ini ke akpan ye udọ mmọ ẹma ẹketọn̄ọ n̄wed. Ubon emi ẹkenam utom ke ebiet oro udọn̄ okokponde ke Isuo Rhode ye ke North Carolina ke United States. Brọda Morris akanam utom ke North Carolina nte andida itie esenyịn circuit, ke ini akpan ye udọ mmọ ẹkedụkde utom usiakusụn̄ ofụri ini. Ẹma ẹkot Jesse ye Paul ẹdinam utom ke n̄kọk itieutom United States ke ini owo mmọ kiet kiet ekesịmde isua 19, ke adan̄aemi Morris ete mmọ ọkọtọn̄ọde utom circuit. Ekem ke August 1, 2002, ẹma ẹkot Morris ye Susan ẹte ẹtiene ẹdinam utom ke Bethel. Brọda Morris akanam utom ke Itieutom Utịmutom ke Patterson, mbemiso ẹkemekde enye nte andin̄wam Kọmiti Utom Otu Ukara.

Ke adianade ye G. W. Jackson ye A. Morris III oro ẹsụk ẹmekde mbufa mi, mbon Otu Ukara eken ẹdi C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; ye D. Sydlik. Kpukpru mbon Otu Ukara ẹdi mme Christian oro ẹyetde aran.