“Ikọ ke Ekem Ini Nsifọn Ntem?”

KE MBONO Mme Ntiense Jehovah oro ekedide ofụri usen kiet, Kim ama esịn ofụri ukeme ndikpan̄ utọn̄ nnyụn̄ n̄wet mme akpan n̄kpọ ke adan̄aemi okodomode ndinam ekpri eyenan̄wan esie emi edide isua iba ye ubak etie sụn̄-n̄. Ke mbono oro ama akasuana, eyenete an̄wan kiet emi eketiede ke udịm n̄kpọitie Kim ama enen̄ede otoro enye ke nte enye ye ebe esie ẹkesede ẹban̄a eyenan̄wan mmọ ke ini mbono oro. Itoro oro ama enen̄ede otụk Kim tutu idem idahaemi, ke ediwak isua ẹma ẹkebe, enye ọdọhọ ete: “Ini ekededi oro nnen̄erede n̄kpa mba ke mbono esop, mmesiti ikọ eyenete an̄wan oro. Ndinem ikọ esie ẹsụk ẹsesịn udọn̄ ẹnọ mi ndika iso nnọ eyenan̄wan nnyịn ukpep.” Ke akpanikọ, ikọ oro ẹtịn̄de ke ekemini ekeme ndinen̄ede nsịn udọn̄ nnọ owo. Bible ọdọhọ ete: “Ikọ ke ekem ini nsifọn ntem?”—Mme N̄ke 15:23.

Nte ededi, ekeme ndisọn̄ ndusụk nnyịn nditoro mbon en̄wen. Ndusụk ini, ndikere mban̄a mme mmeme nnyịn ekeme ndinam emi ọsọn̄ nnyịn ndinam. Eyenete kiet ọdọhọ ete: “Esitie mi nte nda ke okpụk. Adan̄a nte mmenerede mbon en̄wen, ntre ke ndọdiọn̄ nsụhọde ndụk okpụk.” Mme utọ n̄kpọ nte bụt, unana uko, m̀mê edikop ndịk ke ẹkeme ndida se itịn̄de ke usụn̄ en̄wen ekeme n̄ko ndinam ọsọn̄ nditoro owo. Ke adianade do, ekeme ndisọn̄ nnyịn nditoro owo edieke owo mîkesitoroke nnyịn ke ini ikedide uyen.

Nte ededi, ndifiọk ke itoro ekeme ndinam ufọn nnọ anditoro ye owo oro ẹtorode, ekeme ndinam nnyịn isịn ofụri ukeme nditoro owo ke ekemini. (Mme N̄ke 3:27) Ke ntem, nso idi nti utịp ẹtode editoro owo? Ẹyak ineme ndusụk ibio ibio.

Nti Utịp

Itoro oro odotde ekeme ndinam owo oro ẹtorode enyene uko. Christian kiet edide n̄wanndọ, emi ekerede Elaine, ọdọhọ ete: “Ke ini mme owo ẹtorode mi, esitie mi nte ke mmọ ẹnyene mbuọtidem ke idemmi, ke mmọ ẹnyụn̄ ẹda mi nte eti owo.” Ih, nditoro owo emi mînyeneke uko ekeme ndinam enye enyene uko ndiyọ mme n̄kpọ ubiọn̄ọ onyụn̄ anam enye okop idatesịt. Mme uyen akpan akpan ẹsibọ ufọn ke ini ẹtorode mmọ. Uyen kiet emi ọdọhọde ke idem ama emem imọ ke ntak etikwo etikwo ekikere oro imọ ikenyenede, ọdọhọ ete: “Mmesidomo ofụri ukeme mi ndinem Jehovah esịt, edi ndusụk ini esitie mi nte ke se ededi oro nnamde ikemke. Ke ini owo otorode mi, esinem mi ke idem etieti.” N̄ke a-Bible emi edi ata akpanikọ: “Ikọ eke ẹtịn̄de ke ekem ini, edi apple o-gold ke usan e-silver.”—Mme N̄ke 25:11.

Itoro ekeme ndidemede owo ukpọn̄ onyụn̄ esịn udọn̄ ọnọ owo. Asan̄autom uyọhọ ini kiet ọdọhọ ete: “Itoro esisịn udọn̄ ọnọ mi nnam utom ọkpọsọn̄ nnyụn̄ mfori utom ukwọrọikọ mi.” N̄wan kiet emi enyenede nditọ iba ọdọhọ ke ini mbon en̄wen ke esop ẹtorode nditọ imọ ke ini mmọ ẹbọrọde mbụme ke mbono esop, ke esidọn̄ mmọ nditetịm mbọrọ mbụme. Ih, itoro ekeme ndinam mme uyen ẹnam n̄kọri nte mme Christian. Ke nditịm ntịn̄, kpukpru nnyịn  imesiyom ẹwụt ke ẹdara ẹnyụn̄ ẹma nnyịn. Ererimbot emi ọyọhọde ye mfịghe mi ekeme ndinam nnyịn ikpa mba inyụn̄ ikop mmemidem. Ebiowo kiet ọdọhọ ete, “Ke ini idem ememde mi ndusụk ini, itoro esitie nte ibọrọ akam mi.” Elaine ọdọhọ n̄ko ete, “Ndusụk ini, esitie mi nte Jehovah ada ikọ mbon en̄wen owụt ke imọ imama mi.”

Nditoro owo ekeme ndinam owo enịm ke ẹma imọ. Nditoro owo ke ofụri esịt owụt ke ẹkere ẹban̄a owo, onyụn̄ anam itie ufan, ifụre, ye ima ẹdu. Enye owụt ke nnyịn imenen̄ede ima ekemmọ mme Christian inyụn̄ idara mmọ. Josie, emi edide eka nditọ, ọdọhọ ete: “Ke ini edem, n̄kenyene ndisọn̄ọ nda nnọ akpanikọ ke ufọk oro ẹkekade nsio nsio ido ukpono. Nditọete oro ẹkọride ẹsịm ọyọhọ idaha ndikotoro mi ini oro ama an̄wam mi nsọn̄ọ nda.” Ke akpanikọ, “nnyịn idi ndido idem kiet eken.”—Ephesus 4:25.

Edieke imade nditoro owo, iyokụt eti ke idem mbon en̄wen. Nnyịn isise nti edu mbon en̄wen, idịghe mmeme mmọ. Ebiowo kiet ekerede David ọdọhọ ete, “Ndiwụt esịtekọm mban̄a se mbon en̄wen ẹnamde ayanam nnyịn isiwak nditoro mmọ.” Nditi nte Jehovah ye Eyen esie ẹwakde nditoro mme anana-mfọnmma owo ayanam nnyịn n̄ko iwak nditoro mme owo.—Matthew 25:21-23; 1 Corinth 4:5.

Mbon Oro Ẹdotde Ẹtoro

Sia Jehovah Abasi edide Andibot, enye odot akan ndibọ itoro. (Ediyarade 4:11) Okposụkedi mîyomke nnyịn itoro enye man enye enyene uko m̀mê enyene udọn̄  ndinam n̄kpọ, ke ini nnyịn itorode Jehovah ke ntak akwa ubom esie ye ima-mfọnido esie, enye esisan̄a ekpere nnyịn, nnyịn inyụn̄ inyene n̄kpet n̄kpet itie ebuana ye enye. Nditoro Abasi anam nnyịn inyene n̄ko ekikere oro adade ukem ukem iban̄a se nnyịn inamde onyụn̄ anam nnyịn itoro Jehovah ke se inamde. (Jeremiah 9:23, 24) Eti ntak efen emi anamde nnyịn itoro Jehovah edi ke enye ọnọ kpukpru owo oro ẹdotde idotenyịn nsinsi uwem. (Ediyarade 21:3, 4) Edidem David eset ama enyene ọkpọsọn̄ udọn̄ ‘nditoro enyịn̄ Abasi’ “nnyụn̄ n̄kpono enye ke ekọm.” (Psalm 69:30) Nnyịn ikpakam inyene ukem udọn̄ oro n̄ko!

Odot itoro ekemmọ mme andituak ibuot nte odotde. Edieke nnyịn itorode mmọ, nnyịn inam ewụhọ Abasi emi ọdọhọde “ikere nte ikpedemerede kiet eken inọ ima ye nti utom.” (Mme Hebrew 10:24) Apostle Paul ama enịm eti uwụtn̄kpọ ke afan̄ emi. Enye ekewet esop oro okodude ke Rome ete: “Ke akpa itie, mmọnọ Abasi mi ekọm ebe ke Jesus Christ mban̄a kpukpru mbufo, koro ẹtịn̄ ẹban̄a mbuọtidem mbufo ke ofụri ererimbot.” (Rome 1:8) Kpasụk ntre, apostle John ama otoro Gaius, ekemmọ Christian, ke ntak ata eti uwụtn̄kpọ emi enye ekenịmde ke “ndisan̄a ke akpanikọ.”—3 John 1-4.

Mfịn, ke ini ekemmọ Christian owụtde edu Christ ke usụn̄ oro odotde ẹkpebe, ọnọde ata inem inem utịn̄ikọ, m̀mê ọbọrọde mbụme ke ofụri esịt ke mbono esop, oro edi ata eti ifet nditoro eyenete oro. Mîdịghe edieke eyenọwọn̄ enen̄erede esịn ukeme ndikụbọde itie N̄wed Abasi ke mbono esop, nnyịn imekeme nditoro enye. Elaine oro ikasiakde ke ntọn̄ọ ntọn̄ọ ọdọhọ ete: “Nnyịn inyene nsio nsio enọ. Ke ini itorode owo en̄wen ke se enye anamde, nnyịn iwụt esịtekọm iban̄a nsio nsio enọ oro ikọt Abasi ẹnyenede.”

 Nditoro Owo ke Ubon

Nso kaban̄a nditoro mbonubon nnyịn? Oyom ekese ini, ukeme, ye ima ima ntịn̄enyịn man ebe ye n̄wan ẹkeme ndinọ ubon n̄kpọ eke spirit ye eke obụk nnyụn̄ mma ubon. Ke akpanikọ, odot ebe ye n̄wan ẹtoro kiet eken, nditọ ẹnyụn̄ ẹtoro mmọ. (Ephesus 5:33) Ke uwụtn̄kpọ, Ikọ Abasi etịn̄ ntem aban̄a enyene-ido an̄wan: “Nditọ esie ẹdaha ke enyọn̄ ẹkọm enye. Ebe esie n̄ko onyụn̄ otoro enye.”—Mme N̄ke 31:10, 28.

Odot ẹtoro nditọ n̄ko. Ke mfụhọ, ndusụk ete ye eka ẹsisọp ndisian nditọ mmọ se mmọ ẹyomde ẹnam, edi mmọ isisọpke nditoro mmọ ke ukeme oro mmọ ẹsịnde ndikpono nnyụn̄ n̄kop uyo nnọ ete ye eka mmọ. (Luke 3:22) Edieke ẹbakde ẹtọn̄ọ nditoro eyenọwọn̄, emi esiwak ndinam enye ọfiọk ke ẹma imọ onyụn̄ ọnọ enye ifụre.

Edi akpanikọ, oyom ukeme man itoro mbon en̄wen, edi imesibọ ekese ufọn ito nditoro mme owo. Ke nditịm ntịn̄, adan̄a nte nnyịn isịnde ifịk itoro mbon oro ẹdotde ẹtoro, ntre ke nnyịn iditetịm ikop inemesịt.—Utom 20:35.

Da Eti Edu Bọ Nyụn̄ Nọ Itoro

Nte ededi, ndibọ itoro ekeme ndidi n̄kpọ idomo nnọ ndusụk owo. (Mme N̄ke 27:21) Ke uwụtn̄kpọ, emi ekeme ndinam mme owo oro ẹnyenede edu ntan̄idem ẹseri iseri. (Mme N̄ke 16:18) Mmọdo, oyom ikpeme idem. Apostle Paul ama ọnọ ata eti item emi: “Ntịn̄ nnọ kpukpru owo do ke otu mbufo nte owo okûkere aban̄a idemesie akan nte enye ekpekerede; edi yak ekere nte enyene-ibuot owo ekpekerede, nte ekemde ye udomo mbuọtidem oro Abasi ọnọde owo kiet kiet.” (Rome 12:3) Man in̄wam mbon en̄wen ẹfep afia edikere mban̄a idemmọ n̄kan nte ẹkpekerede, ọkpọfọn nnyịn ifep ndiwụk ntịn̄enyịn ke nte mmọ ẹfiọkde n̄kpọ m̀mê ẹyede uyai. Utu ke oro, nnyịn ikpotoro mmọ ke ntak nti n̄kpọ oro mmọ ẹnamde.

Edieke idade eti edu inọ inyụn̄ ibọ itoro, emi ekeme ndinen̄ede nnọ nnyịn ufọn. Enye ekeme ndinam nnyịn itoro Jehovah kaban̄a kpukpru nti n̄kpọ oro inamde. Itoro ekeme n̄ko ndisịn udọn̄ nnọ nnyịn ika iso idu eti uwem.

Itoro ofụri esịt oro owo enen̄erede odot edi enọ emi kpukpru nnyịn ikemede ndinọ. Edieke nnyịn inen̄erede itoro owo, oro ekeme ndinen̄ede nnam ufọn nnọ owo oro akan nte nnyịn ikekerede.

[Ekebe/Ndise ke page 18]

Leta Oro Ekenen̄erede Otụk Enye Esịt

Esenyịn kiet oro asan̄ade-san̄a enen̄ede eti isan̄ kiet emi enye ye n̄wan esie ẹkenyọn̄de ẹka ebietidụn̄ mmọ ke ẹma ẹkekụre utom ukwọrọikọ ke usen ọkpọsọn̄ etuep. Enye ọdọhọ ete: “Tuep ama anam n̄wan mi tutu utom oro ẹsan̄ade-san̄a odorode enye, enye onyụn̄ ọdọhọ mi ke etie nte imọ idikemeke aba ndika iso ke utom oro ẹsan̄ade-san̄a. Enye ama ọdọhọ ete, ‘Ekpetịm ọfọn inam utom uyọhọ ini ke esop kiet, idụn̄ ke ebiet kiet, inyụn̄ isinịm mme ukpepn̄kpọ Bible nnyịn.’ N̄kanamke ubiere ekededi, edi n̄kọdọhọ yak ika iso inam utom tutu urua oro okụre inyụn̄ ise nte editiede enye ke idem ke utịt urua oro. Edieke enye edisụk enen̄erede oyom nnyịn itre utom oro ẹsan̄ade-san̄a, do nyekere mban̄a ekikere esie. Kpasụk usen oro, nnyịn ima ika itie unọ leta inyụn̄ ikụt ọkpọkpọ leta emi n̄kọk itieutom ekewetde ọnọ ẹsọk enye. Leta oro ama esịne itoro ofụri esịt emi ẹketorode enye ẹban̄a ukeme oro enye esịnde ke utom an̄wautom ye ime esie, onyụn̄ owụt ke imemke utom ndisina ke nsio nsio bed kpukpru urua. Itoro oro ama enen̄ede otụk enye esịt tutu enye idehede itịn̄ aba iban̄a ndikpọn̄ utom oro ẹsan̄ade-san̄a. Ke nditịm ntịn̄, enye ama esịn udọn̄ ọnọ mi ediwak ini ke ini n̄kekerede ndikpọn̄ utom emi.” Ebe ye n̄wan emi ẹma ẹnam utom emi ẹsan̄ade-san̄a ke isua 40.

[Ndise ke page 17]

Anie odot ẹtoro ke esop mbufo?

[Ndise ke page 19]

Nditọwọn̄ ẹsinam n̄kọri ke ini ẹmade ẹnyụn̄ ẹtorode mmọ