Armageddon​—Ndi Enye Oyosobo Ererimbot Fapfap?

ARMAGEDDON! Ndi ikọ emi etie fi nte enyene-ndịk nsobo m̀mê ekondo oro atade ikan̄? Ke ediwak ebiet ke ererimbot, iwakke ikọ Bible oro mme owo ẹwakde nditịn̄ nte “Armageddon.” Ẹsiwak ndida enye ntịn̄ mban̄a nte nsobo ubonowo edidiọkde eketre. Mme edinam ekebe ndise, mme vidio, ye mme ndise senima ẹsiwụt mme owo mme enyene-ndịk ndise ẹban̄ade nte “Armageddon” editiede. Ediwak owo ẹnyene ukwan̄ ekikere ẹban̄a se Armageddon edide, ke ini mbon eken mîfiọkke-fiọk se enye edide. Okposụkedi mme owo ẹnọde nsio nsio ekikere ẹban̄a se Armageddon edide, ata ediwak ekikere emi ikemke ye se Bible—kpa n̄wed oro ikọ emi otode—ekpepde aban̄a enye.

Sia Bible abuande Armageddon ye “utịt ererimbot,” ndi afo ukereke ke akpana itịm ifiọk se ikọ emi enen̄erede ọwọrọ? (Matthew 24:3, King James Version) Ndi ikpowụtke ifiọk ndidụn̄ọde ata n̄wed akpanikọ, kpa Ikọ Abasi, man ifiọk se Armageddon enen̄erede edi ye se enye ediwọrọde ọnọ fi ye ubon fo?

Utọ ndụn̄ọde oro ayanam fi ọfiọk ke utu ke Armageddon ndisobo ererimbot emi fapfap, ke enye edikam edi ata eti ntọn̄ọ ọnọ mbon oro ẹyomde ndidu nnyụn̄ ntọt nyọhọ edinen obufa ererimbot. Afo eyenen̄ede ọfiọk akpan etop N̄wed Abasi emi nte okotde se Armageddon enen̄erede edi ke ibuotikọ oro etienede.

[Ekebe/Ndise ke page 3]

AFO EKERE KE ARMAGEDDON EDI NSO?

• Edida n̄kpọekọn̄ nuclear nsobo isọn̄

• Edibiat isọn̄

• Utịn, mme ntantaọfiọn̄, ye mme ekondo eken ndiduọ mfụk isọn̄

• Abasi ndisobo ndiọi owo