Mmọ Ẹbuana Eti Mbụk ye Mme Inan

“MMỌ ẹda n̄kpọ eke spirit ẹsọk mbufo!” Ntem ke andise mban̄a ufọk ukpeme mbonusọn̄ ke obio Navalcarnero ke Madrid ke Spain eketịn̄ ke ndondo emi aban̄a Mme Ntiense Jehovah oro ẹkedide ẹdise mbonusọn̄ oro enye esede aban̄a. Ntak emi enye eketịn̄de ikọ emi?

Ediwak mbonusọn̄ oro ẹdude ke ufọk mbonusọn̄ Rosas del Camino ẹdi mme inan. Nte ededi, ke ntak ukeme oro Mme Ntiense ẹsịnde ẹkpep Usem Idiọn̄ọ Mbon Spain, emi anam mmọ ẹkeme ndinyene nneme ye mme inan oro ẹdude do. Andise mban̄a ebiet oro otoro Mme Ntiense ke ndida ini mmọ nnọ mbon oro ẹyomde san̄asan̄a un̄wam mi ukpep eke spirit. Enye ama okụt eti utịp oro eti mbụk Obio Ubọn̄ enyenede ke idem mbonusọn̄ oro ẹdude do. Mbonusọn̄ emi ke idemmọ—akpan akpan mbon oro mîkemeke nditịn̄ ikọ m̀mê ndikụt n̄kpọ ọfọn—ẹsinen̄ede ẹma Mme Ntiense ndidi ndise mmimọ.

Eulogio, kiet ke otu mbonusọn̄ oro ẹdude do emi edide inan ke ekpep Bible idahaemi ye Mme Ntiense Jehovah. Usen kiet, ke ini ukpepn̄kpọ okosụk akade iso, akanieren kiet ama ayak uto oro mbonusọn̄ emi ẹkewetde ndida n̄wụt esịtekọm mmọ, ọnọ Ntiense oro ekekpepde mmọ n̄kpọ. Ibuotikọ uto oro ekedi “Ndidi Ntiense.” Uto oro okot ubak ubak ete: “Mmọ [Mme Ntiense Jehovah] ẹdu ata eti uwem, ndien Jehovah ọnọ mmọ ọniọn̄ oro ọnọde mmọ idatesịt. Mmọ ẹsika ufọk mme owo ndien ndien koro mmọ ẹbuọtde idem ke Jehovah.”

Mbuọtidem oro Mme Ntiense ke ofụri ererimbot ẹnyenede ke Jehovah enen̄ede anam ediwak mmọ ẹkpep usem idiọn̄ọ idụt mmọ. Emi anam mmọ ẹkeme ndibuana etop idotenyịn oro ẹkụtde ke Bible ye mme inan.