Bible Ama An̄wam Enye Akan Idomo

Idomo ẹyọyọhọ ererimbot mfịn. Idịghe mmemmem n̄kpọ ndisọn̄ọ mmụm mme idaha Bible n̄kama. Ke uwụtn̄kpọ, ekeme ndidi ọkpọsọn̄ n̄kpọ ndinam item Bible emi: “Mbufo ẹfehe ẹbọhọ use.”—1 Corinth 6:18.

Kiet ke otu Mme Ntiense Jehovah emi nnyịn idikotde Sebastian, akanam utom ke itieutom Scandinavia kiet ke Poland. Enye ekenyene ndin̄wana ọkpọsọn̄ man omụm nsọn̄ọnda esie akama.

Ẹma ẹdiọn̄ọ Sebastian nte kiet ke otu Mme Ntiense Jehovah. Ke ẹkụtde nsịnifịk ye eti edu esie, mme eseutom ẹma ẹmenede enye ke itieutom. Nte ededi, emi ọkọwọrọ ke enye eyesidụk nsio nsio mbono mbon mbubehe ke itie oro ẹkesiwụtde oburobụt edinam unọ idem inemesịt.

Ikebịghike, ekikere Sebastian ama ọtọn̄ọ ndisiaha iba. “Eteutom mi ọfiọk ke ndi kiet ke otu Mme Ntiense Jehovah. Ntak edi oro enye enyenede mbuọtidem ke idem mi. Nyataba utom mi emi ọkọsọn̄de ndinyene edieke nsịnde ndibuana. Mmọn̄ọ, edieke n̄kade nte ndanse kpọt?”

Ekem, Sebastian ama edifiọk mme n̄kpọ efen efen oro ẹyomde imọ inam. Ẹyeyom imọ “ise iban̄a” mbon oro ẹtode isenidụt ke ndinọ mmọ iban akpara ke okoneyo. Nso ke enye akpanam?

Sebastian ama ebiere ke imọn̄ iti eteutom imọ ekikere imọ oro ọkọn̄ọde ke Bible kaban̄a oburobụt ido. Ikebịghike, ama ana in̄wan̄-in̄wan̄ nte ke utom oro ikọfọnke ye Sebastian ye nte ke ebebịghi m̀mê awawara enye ọyọkpọn̄ utom oro. Enye ama enyene utom efen oro okụkọfiọn̄ mîkawakke edi oro mîkakamake utọ idomo oro. Idahaemi, enye enyene eti ubieresịt.

Nso ke afo akpanam edieke ẹnyịkde fi nditiene nnam m̀mê ndinyịme oburobụt ido? Ndi akpama ndinam usọp usọp ukpụhọde? Nte ẹbụkde ke Genesis 39:7-12, oro edi se Joseph akanamde.